Ný samtök: Sjálfstæðir Evrópusinnar

Heyrst hefur að á næstunni verði stofnuð samtök Evrópusinnaðra sjálfstæðismanna. Ganga þau undir vinnuheitinu Sjálfstæðir Evrópumenn. Heyrst hefur að einn frumkvöðla sé Benedikt Jóhannesson, ritstjóri og sjálfstæðismaður.

Hann var kosinn Evrópumaður ársins árið 2009 af Evrópusamtökunum. Af öðrum sem nefndir eru í þessu sambandi, eru Jónas Haralz, hagfræðingur, Þorsteinn Pálsson, fyrrum formaður Sjálfstæðisflokksins og ráðherra og Ragnheiður Ríkharðsdóttir, alþingismaður.

Hin opinbera stefna Sjálfstæðisflokksins að loknum landsfundi síðastliðið vor varð sú að það væri betra fyrir Ísland að standa utan ESB. Þessu eru margir sjálfstæðismenn ósammála og er vitað að þessi hópur er þó nokkuð stór. M.a. hefur varaformaður flokksins, Þorgerður Katrín Gunnarsdóttir talað með jákvæðum hætti gagnvart ESB og aðildarviðræðum.

Evrópumál eru þver-pólitísk í eðli sínu og Evrópusinna er að finna í öllum flokkum. Jákvæðar skoðanir á þeim málaflokki er ekki eitthvað sem menn eiga að þurfa að pukrast með, eða skammast sín fyrir!

Verður spennandi að fylgjast með þróun þessara mála og fagna Evrópusamtökin framtakinu!

Athugasemdir

[Kama Sutra, 9.2.2010 kl. 06:23]

Gott mál.

Því fleiri sem bætast í hópinn, því betra.  Jafnvel þótt þeir séu Sjálfstæðismenn!

[Ragnar Gunnlaugsson, 9.2.2010 kl. 10:34]

Lítið hrifinn af þessu liði.

[Hjörtur J. Guðmundsson, 9.2.2010 kl. 15:55]

Mér lízt betur á að vera sjálfstæður Íslendingur ;)