Nýtt MA- og diplómanám í Evrópufræðum

Nýtt MA- og diplómanám í Evrópufræðum við stjórnmálafræðideild Háskóla Íslands

Í haust hefst við stjórnmálafræðideild Háskóla Íslands nýtt MA- og diplómanám í Evrópufræðum, sem kynnt verður á Námskynningu í HÍ næsta fimmtudag, 25. mars  á Háskólatorgi frá kl. 16:00-18:00. Viljum við bjóða þig hjartanlega velkominn að hitta okkur þar.

Forkröfur fyrir námið eru BA-próf í einhverri grein (1. einkunn á BA prófi í MA- námið, en einungis BA-próf í diplóma námið). Kennarar koma úr röðum okkar fremstu sérfræðinga, en auk þeirra hefur verið ráðinn til deildarinnar dr. Maximilan Conrad (mynd), ungur og upprennandi  fræðimaður sem hefur sérhæft sig í stofnunum Evrópusambandsins.  

Ekki þarf að fjölyrða um mikilvægi þekkingar á sviði Evrópufræða, hvort sem Ísland kýs að gerast aðili að Evrópusambandinu eða ekki, enda er landið aðili að Evrópska efnahagssvæðinu og innleiðir þegar umtalsverðan hluta regluverks Evrópusambandsins. Þá er Evrópa stærsta markaðssvæði Íslands. Skilningur á öllu regluverki Evrópusambandsins og umgjörð þess er því brýnt hagsmunamál fyrir Ísland.  

Meistaranám í Evrópufræðum býr nemendur undir hvers kyns störf sem krefjast fræðilegrar jafnt sem hagnýtrar þekkingar á Evrópusamrunanum, stofnunum Evrópusambandsins og ákvarðanatöku innan þess, alþjóðasamskiptum almennt og stöðu Íslands bæði almennt í alþjóðasamfélaginu og í Evrópu.  Hér getur verið um að ræða störf í ráðuneytum, stofnunum, sveitarfélögum, fyrirtækjum eða hagsmunasamtökum sem eru í samskiptum eða samstarfi við Evrópusambandið og falið í sér sérfræðiráðgjöf, rannsóknir eða þjónustu.  

Kennarar koma úr röðum færustu innlendra fag- og fræðimanna á þessu sviði, en erlendir kennarar eru kallaðir til þegar sérþekking er ekki til staðar hér á landi. Þeir eru sérfræðingar í innviðum, regluverki og ákvarðanatöku Evrópusambandsins, öryggismálum Evrópu og stöðu Íslands í þessu samhengi.  

Meistaranám í Evrópufræðum er 120 eininga hagnýtt og fræðilegt tveggja ára nám fyrir alla sem hafa lokið BA- eða BS-námi, með fyrstu einkunn, í einhverri grein.  Diplómanám í Evrópufræðum er hagnýt og fræðileg 30 eininga námsleið á fyrir þá sem lokið hafa BA- eða BS-námi í einhverri grein.  

Umsóknarfrestur í MA-nám í Evrópufræðum til að hefja nám að hausti 2010 er til 15. apríl. Umsóknarfrestur í diplómanámið er til 5. júní.

Kynningarbæklingur á  www.stjornmal.hi.is  Evrópufræði bls. 11-14.    

Nánari upplýsingar fást í síma 525-4573/525-5445  

Athugasemdir

[Gunnlaugur I., 25.3.2010 kl. 11:44]

Ja mikil er upphafning ykkar yfir "fræðunum" og mikilleika þeirra.

Minnir mann á hér áður fyrr voru í nafni vísinda og fræða bæði háskólar og allskyns fræðasetur andsetinn við að uppfræða og mennta fólk í Marxisma og öðrum kommúnistafræðum.

Allt í nafni vísinda og til að útskrifa áróðursmeistara til að útbreiða fagnaðarerindi hinns "fullkomna" kerfis.

Þessar "menntastofnanir" allar nutu yfirleitt fyrirgreiðslu og fjármuna frá Sovétríkjunum sálugu.

Svipað er hér uppá teningnum reynt er að upphefja ESB og þeirra líkan sem einhver háheilög vísindi og fræði. Auk þess sem ESB eys fjármunum í þá háskóla og fræðasetur sem eru tilbúinn að taka þátt í að úúnga svona "Evrópusérfræðingum"

[Sleggjan og Hvellurinn, 25.3.2010 kl. 14:05]

Ég hvet Gunnlaug til þess að halda áfram að kommenta. Það gerir okkur ESB sinna miklu auðveldari fyrir. Það þarf ekki nema að taka saman kommentinn frá honum og pósta þær rétt fyrir þjóðaratkvæðisgreiðslunna þá er sigurinn vís.

[Gunnlaugur I., 25.3.2010 kl. 15:29]

Ég þakka commentið frá "Sleggjunni og Þrumuni"

Jú mér þykir mjög gaman að hafa aðgang að því að fá að commenta á vefsíðu Evrópusamtakana og hef áður hælt þeim fyrir að leyfa öllum að hafa beinan aðgang að commenta kerfinu.

Það er meira en hægt er að segja um mín samtök Heimssýn. En ég ætla að vona að þeir opni á commenta kerfið sem fyrst, vegna þess að í rökræðum þurfum við ekkert að óttast ESB innlimunarsinna nema síður sé.

Það hefur greinilega sýnt sig, enda hefur hin mikla og fjöruga umræða um ESB skilað sér í því að nú vilja 70% þjóðarinnar ekkert með ESB aðild hafa að gera.  Andstaðan við ESB hefur aldrei verið einarðari og sterkari og ég tel mig leggja mín lóð á þær vogarskálar að afhjúpa "dýrðarljómann" og þennan klæðalausa risa á brauðfótunum sínum sem svo sannarlega ESB apparatið er.

Sjálfur sé ég þetta frá svolítið öðruvísi sjónarhorni en margur landi minn því sjálfur bý ég í ESB og hef gert undanfarin 4 ár.

Fyrst bjó ég í ESB landinu Bretlandi og nú bý ég í ESB landinu Spáni.

Og það verð ég að segja eftir að ég sé þetta og skoða þetta system betur svona innan frá, því vænna þykir mér um landið mitt Ísland með öllum sínum kostum og göllum og óska þess að það gangi aldrei undir þessa ólýðræðislegu kæfandi spilltu krumlu sem ESB apparatið er !

Ég er mjög bjartsýnn á að ykkar Evrópusamtök geti orðið 60 ára eins og þau Norsku gerðu nýlega og að þá verði Ísland eins og Noregur enn utan ESB.

Reyndar spái ég því að ESB verði löngu liðið undir lok fyrir þann tíma, svona miðstýrð Stórríki og ríkjasambönd standast aldrei tímans tönn það hefur sagan kennt okkur.

[Sleggjan og Hvellurinn, 25.3.2010 kl. 21:20]

Er samt ekki tími til kominn að hætta líkja ESB við Soviet ríkin?

ESB gengur út á frelsi og frjáls viðskipti. Það getur ekki verið meira anstæða en Soviet

Erum við ekki löngu búin að slá þessa líkingu útaf borðinu?

[Hjörtur J. Guðmundsson, 25.3.2010 kl. 22:01]

Frelsi og frjáls viðskipti? Einmitt, einmitt. Ef þetta væri nú satt, hvers vegna eru ríki Evrópusambandsins þá t.d. svipt frelsi sínu til þess að gera sjálfstæða viðskiptasamninga við ríki utan sambandsins við inngöngu í það?

[Evrópusamtökin, www.evropa.is, 26.3.2010 kl. 08:04]

Hjörtur: Þið nei-sinnar hamrið á þessu í sífellu, en talið aldrei um það við HVERJA þið viljið gera viðskiptasamning!

Hvernig væri nú að þið mynduð segja frá því á opinberum vettvangi og því hvernig ,,viðskiptastefna" ykkar er, ykkar hugmyndir um framtíðina.

Með aðild að ESB, fengi Ísland fullan aðgang að öflugustu ,,viðskiptamaskínu" heims, þar sem gríðarleg þekking er á viðskiptum og samningum um slíkt.

Og mynduð þið s.s. vilja breyta því að um 70% af okkar útflutningi fer til Evrópu?

Það skortir ALGERLEGA alla útfærslu á þessu hjá ykkur!