Enn eitt fórnarlamb gleymskunnar! Nú Ásmundur Einar!

Um daginn gleymdi Vigdís Hauksdóttir því að ákveðinn tími, þrír mánuðir, verða að líða fram að þjóðaratkvæðagreiðslu. Vigdís (og fleiri) ætlaði nefnilega snarlega að stoppa umsókn Íslands að ESB og vildi greiða atkvæði um málið samhliða stjórnlagaþingskosningunni. 

Þótti þetta ekki rós í hnappagat Vigdísar eða þeirra sem fluttu þessa tillögu. Einn þeirra er foringi Nei-sinna, Ásmundur Einar Daðason.

Hann virðist vera í bullandi bissness með netverslunina www.isbu.is. Fyrirtækið flytur inn allskyns landbúnaðarvörur, en Ásmundur er jú bóndi.

Og þegar maður er líka alþingismaður á maður að gera grein fyrir öllum svona "aukabúgreinum" ef svo mætti kalla.

En því GLEYMDI Ásmundur Einar!Hann  er því líkt og Vigdís, fórnarlamb gleymskunnar!

Stöð tvö greindi frá þessu í kvöld í sambandi við "hjásetumálið" sem hrjáir nú VG.

Hér á vef alþingis má sjá að ekkert er skráð á Ásmund Einar, sem hefur nú þegar sent Alþingi tölvupóst um málið.  

Á vef Ísbú.is segir: "Vöruúrvalið er alltaf að aukast en markmiðið er að geta boðið breytt úrval af búrekstrarvörum á sambærilegum eða betri verðum heldur en gengur og gerist hér á landi. Við erum ávallt að prófa nýjar vörur og sumar af þessum vörum fara í almenna sölu. Til að geta boðið hagstæð verð leggjum við ríka áherslu á að komast í samband beint við verksmiðjur erlendis og leitum leiða til að forðast óþarfa milliliði. Í dag bjóðum við vörur frá framleiðendum í Ástralíu, Bandaríkjunum, Bretlandi, Pakistan, Kína, Bandaríkjunum, Belgíu, Frakklandi og Nýja Sjálandi."

Þetta virðist því vera svona "beint-úr-verksmiðju-beint-í-bú" fyrirtæki og hefur mjög alþjóðlegt yfirbragð. Þrjú þeirra landa sem flutt er inn frá eru í ESB. 

Nýlega byrjaði fyrirtækið að selja höggvarða Samsung-farsíma. 

Athugasemdir

[Gunnlaugur I., 23.12.2010 kl. 08:58]

Þessi frétt ESB/ Baugsmiðilsins Stöð 2, lyktar öll af hefnigirni og pólitískum árásum á unga þingmanninn og bóndann Ásmund Einar Daðason. 

Það sama á við um þá þremenninga alla sem sátu hjá við fjárlögin, nú leggjast spunameistarar ESB og Samfylkingarinnar í lúsarleit til þess að koma einhverjum höggum á þá í ófrægingarherferð sinni.

Þó svo það séu óttaleg vindhögg eins og þetta, þá eru þau samt látinn vaða.

Það sama á við um þessa háðulegu grein ykkar hér, hún er merkt sömu illkvitnislegu hvötunum.

Tilgangurinn helgar meðalið.

Ásmundur rekur með myndarskap eitt öflugasta fjárbú landsins í Dölunum og það hefur ekki verið neitt leyndarmál að með þeim búskap hefur hann stundað sem hliðargrein, viðskipti með vélar og tæki fyrir landbúnað.

Hluti sem hann einmitt hefur þekkingu og reynslu af í gegnum starf sitt. 

Mér finnst þetta nú bara bera þess glögg merki að Ásmundur er dugnaðarforkur og útsjónarsamur í öllu sem hann tekur sér fyrir hendur. 

Ég tel mig nú hafa vitneskju fyrir því að þetta hafi verið ákaflega smátt í sniðum til að byrja með, en nú í kreppunni þurfa bændur auðvitað að gæta að sér og fjárfesta í vélum og tækjum á sem allra hagkvæmastan hátt og því hafi þessi hliðarbúgrein hans á tiltölulega stuttum tíma nú vaxið hröðum skrefum, vegna þess að hann er að bjóða mjög góðar og ódýrar vörur til annarra bænda.  

Þetta hefur ekki verið neitt leyndarmál, síður en svo og þessarar hliðarbúgreinar hans hefur oft verið getið í kynningu og viðtölum við manninn.

Auk þess sem öllum hefur verið aðgengileg heimasíðan isbu.is þar sem starfssemin er kynnt og vörurnar sem þeir bjóða.

Að gera veður útaf þessu sem einhverju stór tortryggilegu máli er því ekkert annað en atvinnurógur og nornaveiðar.

[Benedikta E, 23.12.2010 kl. 10:34]

Æ - Æ - Aumur áróður gegn Ásmundi Einari Daðasyni - hjá ykkur Evrópusinnum - Það er nokkuð síðan - ekki löngu eftir að Ásmundur Einar byrjaði´sem þingmaður að ég sá eða heyrði viðtal við hann þar sem hann nefndi þetta net-fyrirtæki sem hann ræki - sem þið hjá Evrópusinnum eruð nú að reyna að gera hann tortryggilegan fyrir.Aumkunarverð tilraun hjá ykkur - Evrópu-sinnar.

[Jón Frímann Jónsson, 23.12.2010 kl. 16:40]

Þetta er ágætur sími sem þarna er til sölu (Ég er þó aðdáandi Nokia persónulega). Mér þykir hann þó dýr hjá þeim miðað við verðið á þessum síma í Evrópu. Tæknilegar upplýsingar um þennan farsíma er að finna hérna.

Mér þykir þessi sími dýr hjá þeim. Vegna þess að á Amazon DE þá kostar hann eingöngu 116,80€, sem eru rúmlega 18,000 kr. Þannig að kominn hingað til lands með tolli og vaski þá væri þetta rúmlega 23.000 kr mundi ég halda (ef það er ekki hrikalegur tollur á farsímum sem eru seldir til Íslands). Hérna er síminn á Amazon DE.

Hvað afsökun Ásmundar Einars varðar. Þá trúi ég honum einfaldlega ekki.

[Evrópusamtökin, www.evropa.is, 23.12.2010 kl. 22:52]

Til G og B : Staðreyndir eru staðreyndir. Ásmundur Einar átti að sjálfsögðu að upplýsa um þetta þegar hann gerðist þingmaður. Hér er ekki verið að gera neitt tortryggilegt, slakiði á í "nojunni"!

En aðalstarf Ásmundar Einars á að sjálfsögðu að vera það að setja landsmönnum lög, með því að vera þingmaður á fullum launum.

Eða á þetta að vera eins og Karl Marx taldi æskilegt ; gera A í dag, B á morgun og C hinn, bara svona af því bara?