Bolli Héðinsson og leið David Cameron

Bolli Héðinsson, hagfræðingur, skrifaði grein í FRBL þann 20.2 um Evrópumálin. Í henni segir Bolli meðal annars:

"David Cameron, forsætisráðherra Breta, hyggst nú fara sömu leið og Íslendingar og óska eftir samningaviðræðum við Evrópusambandið. Að samningaviðræðunum loknum hyggst hann síðan bera samninginn undir þjóðaratkvæði. Þetta hlýtur að teljast hin rökrétta leið, þ.e. að vita fyrst hverju hægt er að ná fram í samningaviðræðunum áður en atkvæðin eru greidd.

Ólíkt því sem haldið er fram á Íslandi þá telur Cameron að heilmikið sé hægt að semja um við ESB. Þetta er leið sem Bretar hafa farið áður. Þeir sömdu á níunda áratugnum um hinn svokallaða „breska afslátt" af framlögum sínum til ESB. Þess afsláttar njóta þeir enn þar sem þeir náðu fram varanlegri undanþágu frá framlögum sínum til ESB. Þegar ákvarðanir um nýjustu fjárhagsáætlun ESB var tekin nú á dögunum náðu Danir einnig að semja um verulegan afslátt frá fyrri framlögum sínum til ESB.

Semja fyrst við ESB

Aðeins hér á landi heyrast raddir um að greiða eigi þjóðaratkvæði um eitthvað sem enginn veit hvað er. Hér á landi dettur mönnum í hug að betra sé að greiða atkvæði áður en samningur liggur fyrir, áður en vitað er hvað hægt sé að greiða atkvæði um. Aðeins á Íslandi er haldið í þá umræðuhefð að deila um það sem hægt er að staðreyna. Af árangursleysi þeirrar aðferðar ætti þjóðin hins vegar að hafa nægjanlega átakanlega og bitra reynslu. Að hætta aðildarviðræðum í miðjum klíðum er aðeins fallið til að halda lífi í deilum um það sem við fáum ekki botn í nema ljúka aðildarviðræðunum. Það er ekki síður hagsmunamál þeirra sem andsnúnir eru ESB en þeirra sem því eru hlynntir."

Athugasemdir

[Sigurgeir Jónsson, 20.2.2013 kl. 21:48]

Hvar er" samningurinn" sem átti að semja um fyrir fjórum árum og átti að vera á borðinu eftir eitt til-eitt og hálft ár.Af hverju er hann ekki kominn og hvenær á hann að koma svo hægt sé að kjósa um hann.ESB og Evrópusamtökin verða að fara að svara því.Og hvað ef ekki tekst að "semja".Ætlar Bolli Héðinsson samt að halda því fram að samningur sé á leiðinni..Geta ekki allir sæst á að ef enginn "samningur"verður á borðinu eftir 6-12 mánuði þá verði kosið um hvort halda skuli áfram, þar sem "samningar" hafi ekki tekist.Afhverju eru Evrópusamtökin á móti lýðræðislegum kosningum.Nei við ESB.

[Eggert Sigurbergsson, 21.2.2013 kl. 03:20]

Ef eitthvað væri að semja um í sjávarútvegsmálum þá væri fyrir lifandis löngu búið að semja um þann kafla. Eina sem hefur gerst er að menn hafa verið að dunda sér við að opna og loka köflum í fjögur ár, kafla sem eru þegar hluti af EES.

Að sjálfsögðu er komin tími til að greiða atkvæði um hvort við ætlum að halda áfram þessu rugli, það yrði kannski til þess að fá staðreyndir upp á borðið um að ekkert sé um að semja.

[Pétur Harðarson, 21.2.2013 kl. 15:44]

Nú er búið að loka 11 köflum af 33. Hvar er hægt að sjá hverju var náð fram í samningalotum fyrir þessa 11 kafla? Þurfti lagabreytingar til að loka einhverjum af þessum köflum? Hvað spá menn að það taki langan tíma að semja um sjávarútveg, landbúnað, skattamál, stjórnun fjármála, upptöku evru og hina 18 kaflana? Hvernig fer það saman að við erum of lítil of máttlaus til að vera með eigin gjaldmiðil á meðan við erum nógu stór og öflug til að fara fram á einhverja sérstaka skilmála í viðræðum við ESB eða hafa nægilega sterka rödd á Evrópuþingi til að hafa áhrif á lagasetningar þar?

[Pétur Harðarson, 21.2.2013 kl. 16:38]

...og í sambandi við David Cameron þá er flokkur hans í vandræðum. Skoðanakannanir sýna að meirihluti Breta er óánægður með ESB aðildina og því stingur hann upp á að fara í viðræður og leyfa svo þjóðinni að kjósa... eftir 5 ár. Það þýðir að fyrst verður flokkurinn að ná endurkjöri. Mig grunar að Cameron sé að stóla á að margt breytist á þessum fimm árum.