Milljónir í sparnað - með Evru-vöxtum: Reiknaðu dæmið!

Stöð tvö birti einkar áhugaverða frétt þann 21.5, sem byrjar svona:"Íslendingur sem tók húsnæðislán árið 2005 - væri fimmtán milljónum ríkari í dag ef honum hefðu boðist meðalvextir á slíkum lánum í Evruríkjunum. Þetta sýnir ný reiknivél Evrópusinna á www.jaisland.is. Ekki eru þó allir á einu máli um hvort reiknivélin gefur rétta mynd.

Evrópusinnar hafa haldið því fram að umtalsvert hagstæðara yrði fyrir Íslendinga að taka húsnæðislán ef þjóðin gengur í Evrópusambandið og tekur upp evru. Þeir halda því fram að þegar Íslendingur kaupir hús, borgi hann í raun til baka 2,5 hús. Sá sem búi í evruríki greiði hins vegar 1,5 hús til baka. Þá muni verðtryggingin gufa upp - enda hafi fáir í Evrópusambandinu heyrt um það fyrirbæri. Andstæðingar inngöngu telja málið ekki svo einfalt.

Regnhlífasamtökin sem halda úti heimasíðunni www.jaisland.is hafa sett í loftið reiknivél þar sem fólk getur slegið inn sitt eigið íslenska krónulán og fengið uppgefið hver staðan á því væri hefði viðkomandi tekið lánið á meðalvöxtum í evruríkjum.

Fréttastofa skoðaði 20,5 milljóna króna lán sem tekið var í mars 2005 á 4,15% vöxtum. Samkvæmt reiknivélinni voru meðalvextir í evruríkjunum þá 3,81%.

Munurinn er sláandi ef marka má þær forsendur sem samtökin gefa sér í reiknivélinni. Af íslenska láninu er búið að greiða um 10 milljónir króna - en í dag stendur skuldin í 31 milljón. Hefði lánið verið með meðal evruvöxtum, væri búið að greiða heldur minna í afborganir, eða 8,9 milljónir - og skuldin hefði lækkað niður í 16,8 milljónir.

Samanlagður munur á afborgunum og eftirstöðvum er því hvorki meira né minna en 15,3 milljónir króna. Miðað við þessar forsendur hefði því verið helmingi hagstæðara fyrir Íslendinginn að fá lán í evruríki."

Reikningana er hægt að framkvæma hér lan.jaisland.is

 

Athugasemdir

[Sigurgeir Jónsson, 21.5.2012 kl. 20:24]

ESB notar fréttastofur Stöðvar 2 og RÚV óspart í áróðri sínum við að koma Íslandi inn í ESB.ESB þarf að skýra hvernig stendur á því að Danmörk, Svíþjóð og til að mynd Bretland eru ekki með evru, fyrst evran er svona góður gjaldmiðill, sá besti að dómi ESB, þótt öll heimsbyggðin sé nú á nálum að hún hrynji.Og gat ekki ESB fréttastofan allt eins notað dollar í útreikningum sínum.Nei við ESB og áróðri þess.

[Ragna Birgisdóttir, 21.5.2012 kl. 20:37]

Það má nú ekki minnast á ESB í sjónvarpinu án þess að þið nei-sinnar missið í brók.Við hvað eruð þið svona hræddir?