Litlar breytingar í ESB-málinu

Eyjan skrifar: "Fjórðungur kjósenda er hlynntur inngöngu Íslands í Evrópusambandið, samkvæmt nýrri könnun MMR. Stuðningur við aðild minnkar lítillega frá fyrri könnun. Nærri tveir af hverjum þremur eru andvígir ESB-aðild.

Könnun MMR var gerð dagana 31. janúar til 6. febrúar, eða skömmu eftir að dómur féll í Icesave málinu. Svo virðist sem niðurstaðan hafi breytt litlu um afstöðu kjósenda því litlar breytingar eru sjáanlegar á milli kannanna. 874 einstaklingar á aldrinum 18 til 67 ára tóku þátt í könnuninni."

ASÍ ber saman lífskjör á Norðurlöndum

ASÍ hefur gefið út ítarlega skýrslu, þar sem lífskjör á Norðurlöndum eru borin saman. Hér eru helstu niðurstöður í samantekt:

"Samantekt:
· Ísland hefur heltst úr lestinni á mörgum sviðum frá 2006 þegar efnahagsleg lífskjör eru borin saman við Danmörku, Noreg og Svíþjóð.
· Íslendingar vinna að jafnaði lengri vinnuviku til að halda uppi lífskjörum sambærilegum við það sem gerist annars staðar á Norðurlöndum og munurinn því meiri ef tekið er tillit til vinnutíma.
· Verulegur samdráttur fjárfestingar er áhyggjuefni en fjárfesting hefur ekki náð sér á strik eftir hrun og er enn langt undir sögulegu meðaltali.
· Mikil skuldsetning hins opinbera er ein stærsta ógnin við lífskjör Íslendinga en mikill samdráttur samneyslunnar hefur komið hart niður á heilbrigðis- og menntakerfinu.
· Skuldsetningu hefur verið mætt með niðurskurði og skattahækkunum en það haft að markmiði að hlífa þeim tekjulægstu.
· Íslensk heimili mættu kaupmáttarrýrnun og skattahækkunum með aðlögun neyslunnar. Til að halda uppi neyslu á nauðsynjum hafa þau dregið úr munaði og frestað endurnýjun á varanlegum neysluvörum.
· Af Norðurlöndunum er skattbyrði lágtekna lægst á Íslandi, á meðan skattbyrði meðaltekna er sambærileg við það sem þekkist Noregi en hærri en í Svíþjóð. Skattbyrði hátekna er hins vegar lægri hér á landi en annars staðar á Norðurlöndunum.
· Af Norðurlöndunum er Ísland eina landið þar sem launamenn hækka um skattþrep undir meðaltekjum. Það í bland við tekjutengingar tilfærslna hins opinberra dregur úr hvata til aukins vinnuframlags hjá hinum tekjulægri.
· Þrátt fyrir breytingar á skattkerfinu, bera launþegar í flestum tilfellum lægri skattbyrði á Íslandi en fyrir laun í sömu störfum í nágrannalöndunum.
· Tekjur eftir skatt eru í öllum tilfellum lægri á Íslandi eftir að tekið hefur verið tillit til verðlags þrátt fyrir lægri skattbyrði. Munurinn stafar að mörgu leyti af þeirri raunaðlögun launa sem hefur átt sér stað eftir hrunið, með falli í kaupmætti launa.
· Breytingar á skattkerfinu og auknar tilfærslur hafa orðið til þess að hlífa þeim tekjulægstu. Tekist hefur með tilfærslum að bæta stöðu ákveðinna hópa sbr. einstæðra foreldra í flestum tekjuhópum í samanburði við hin Norðurlöndin. Aftur á móti hefur staða hjóna og sambýlisfólks með börn versnað miðað við samanburðarlöndin frá 2006."

Nýtt fiskveiðikerfi ESB smellpassar Íslendingum

Í Speglinum þann 12.2 var rætt við Daða Má Kristófersson um nýja sjávarúvtvegsstefnu ESB, sem hann segir taka mjög mikið mið af stefnu Íslands og Noregs og passi Íslendingum mjög vel.

Í viðtalinu segir að tekið verði upp kvótakerfi í hinu nýja kerfi, að brottkast verði bannað og að valdið yfir þessum málum verði flutt frá Brussel til aðildarþjóðanna. Viðtalið við Daða byrja á 20 mínútum.

Viðskiptablaðið: Bara hægt að afnema höft með hjálp

Viskiptablaðið skrifar: "Mikilvægt er að afnema gjaldeyrishöftin sem allra fyrst. En það verður mjög erfitt eða útilokað án aðkomu annarra, s.s. í gegnum aðild að Evrópusambandinu og með hjálp Alþjóðagjaldeyrissjóðsins. Án þeirra er verkið mjög erfitt, tæki langan tíma eða útilokað. Þetta segir Þórður Magnússon, stjórnarformaður Eyris Invest og margra nýsköpunarfyrirtækja."

Síðan segir í fréttinni:"„Það liggur fyrir að við verðum að losna við gjaldeyrishöftin og það sem allra fyrst. Ég hef sagt það bæði opinberlega og annars staðar að eina raunhæfa leiðin til að afnema höftin sé að við gerumst aðilar að Evrópusambandinu og tökum upp evru. Þá er það sameiginlegt viðfangsefni okkar, Evrópusambandsins og Alþjóðagjaldeyrissjóðsins að afnema þau. Ein og án aðkomu annarra er það mjög erfitt eða útilokað og tekur mjög langan tíma. Varðandi hugmyndir um einhliða upptöku annars gjaldmiðils, þá er niðurstaðan alls staðar sú sama, að sú leið sé einfaldlega óframkvæmanleg,“ segir Þórður Magnússon aðspurður um hvort hann sjái fyrir sér losun hafta á næstu misserum."

Þráinn Bertelsson: Rammfalskur einleikur á krónuna

Þráinn Bertelsson er vanur að segja það sem honum liggur á hjarta og í viðtali við Morgunblaðið ræðir hann ástandið í stjórnmálunum og kemur þar að sjálfsögðu að ESB-málinu og krónunni:

"Mér finnst það líka heldur skítt og í raun óþolandi að þessi flokkur sem ég gekk til liðs við þegar Borgarahreyfingin var að liðast sundur, VG, skuli hafa, þvert ofan í þann stjórnarsáttmála sem ég hélt að þessi flokkur væri bundinn af, tekið það upp hjá sér að frysta viðræðurnar við Evrópusambandið. Ég hélt að það væru alveg hreinar línur með það að það stæði til að klára þennan samning og leggja hann fyrir þjóðina svo þjóðin þurfi ekki að rífast um það næstu áratugi hvaða samningur hefði getað náðst ef við hefðum ekki gefist upp á lokasprettinum,“ segir Þráinn og víkur að gjaldmiðlinum.

Íslenskt launafólk tekur skellinn

„Með þessum rammfalska einleik á krónuna hefur gengi krónunnar fallið svo að að laun hér á landi hafa lækkað um meira en 50%. Þannig er íslenskt launafólk vitanlega að taka á sig að borga það sem borgað verður af því stórkostlega efnahagsráni sem hér var framið, þann hluta þess sem við höfum ekki af fullkomnu samviskuleysi látið útlendinga súpa seyðið af. Ég er ekkert sérstaklega glaður með gang mála."

Feitletrun: ES-bloggið

Verðtrygging-Verðtrygging-Verðtrygging!

Hvað sem verður í lokahnykk kosningabaráttunnar í vor, er verðtryggingin mál málanna þessa dagana. Kannski ekki nema vona, því svo virðist vera sem landsmenn séu búnir að fá nóg af þessu fyrirbæri, sem í raun var hugsað sem skammtímafyrirbæri, en hefur viðgengist í yfir 30 ár.

Hagfræðingurinn Jón Steinsson skrifar grein um þetta á Eyjunni og segir þar meðal annars:

"Framsóknarmenn vilja afnema verðtryggingu neytendalána. En á sama tíma vilja þeir halda í krónuna. Þeir vilja leiðrétta stökkbreytt lán. En á sama tíma vilja þeir lækka skuldir ríkisins.

Það sem kemur mér helst á óvart er að þeir hafi ekki hreinlega ályktað að þeir vilji eiga kökuna og borða hana líka.

Í Argentínu lofaði Cristina Fernandez, forseti og frambjóðandi Peronista, kjósendum að allir fengju flatskjá ef hún næði kjöri. Það virtist ganga vel í kjósendur þar. Kannski er það næsti leikur hjá framsóknarmönnum.

Það er orðinn fastur liður fyrir Alþingiskosningar að Framsóknarflokkurinn tefli fram kosningaloforðum sem eru „too good to be true.“ Þ.e., hljóma of vel til þess að þau séu í raun skynsamleg þegar allar afleiðingar þeirra eru teknar með í reikninginn.

Í kosningunum árið 2003 bjargaði Framsóknarflokkurinn sér fyrir horn með því að lofa 90% húsnæðislánum og hækkun hámarkslána hjá Íbúðalánasjóði. Þetta gerði hann þrátt fyrir að húsnæðisverð væri þá hærra en það hafði verið árum saman. Hann stóð síðan við þetta kosningaloforð þegar húsnæðisverð var orðið ískyggilega hátt í sögulegu samhengi."

Ólafur Margeirsson, doktorsnemi í hagfræði, skrifar einnig grein um verðtryggingu á Pressunni og segir þar meðal annars: "Nú þegar líður að kosningum er ekki úr vegi að íhuga hvernig eigi að uppfylla eitt af þeim fjölmörgu kosningaloforðum sem á þjóðinni munu dynja næstu mánuði: hvernig á að afnema verðtryggingu á lánum til einstaklinga?

Ég ætla að biðja lesendur um að lesa eftirfarandi með þá staðreynd í huga að ég er ekki lögfróður maður. Sá texti sem ég hér rita verður því að taka með „klípu af salti“ eins og sagt er á engilsaxneskri tungu þegar ég íhuga lögfræðilega möguleika.

Einnig: ég þekki vel rökin um að verðtryggt lán sé einfaldlega frjáls samningur milli tveggja frjálsra aðila – lántaka og lánveitanda – og það sé síst af hinu besta að beinlínis banna slíka samninga. Ég ætla samt að leyfa mér að gera ráð fyrir því hér að slíkir samningar séu bannaðir enda er ég satt best að segja þeirrar skoðunar að það sé þjóðhagslega hagkvæmast að banna verðtryggingu, eins og hún er framkvæmd í dag, í lánum til einstaklinga. Þar að auki er hægt að finna mýmörg dæmi þess að frjálsir samningar milli frjálsra aðila eru bannaðir. Af hverju mega lyfjafyrirtæki til dæmis ekki framleiða og selja hvað sem þau vilja? Ein ástæðan er sú að framleiðendunum er skylt að upplýsa neytandann um hvað hann mun láta ofan í sig og hvaða áhrif það mun hafa (íhugið í framhaldi af þessu stöðuna sem lánveitandi og lántaki verðtryggðs láns eru í)."

Hér er einnig umfjöllun Spegilsins á RÚV um verðtryggingu

Þórður Snær Júlíusson um loforð úr lofti

Bendum fólki á að lesa mjög áhugaverðan leiðara FRBL þann 12.2 eftir Þórð Snæ Júlíusson. Verðtryggingin og loforð flokkanna vegna hennar er umfjöllunarefnið. Leiðarinn hefst svona:

"Framsóknarflokkurinn hélt flokksþing sitt um helgina. Ein þeirra ályktana sem þar voru samþykktar snýst um afnám verðtryggingar. Útfærsla á að vera tilbúin fyrir árslok 2013. Sjálfstæðisflokkurinn, Vinstri hreyfingin – grænt framboð, Björt framtíð, Hægri grænir og Dögun hafa allir sambærilega stefnu, þó að blæbrigðamunur sé á. Enginn þeirra hefur hins vegar sett fram leið til að framkvæma þetta án þess að setja annað hvort ríkissjóð eða lífeyrissjóðakerfið á höfuðið."

Síðan lýkur Þórður umfjöllun sinni með þessum orðum: "Verðtryggð neytendalán eru galin. Ekkert annað land í heiminum byggir útlánakerfi sitt á slíkum. En þau eru til vegna gjaldmiðilsins. Það er ekki hægt að afnema verðtryggingu nema að skipta út krónunni. Það er ekki ein leiðanna. Það er eina leiðin. Annað er innihaldslaust loft. Vonandi mun komandi ríkisstjórn, sama hvaða flokkar það verða sem í henni sitja, bera gæfu til að sjá þetta."

Árni Finnsson ræðir umhverfismálin á súpufundi

Á vef Já-Ísland segir: "Þriðjudaginn 12. febrúar 2013 stendur Já Ísland fyrir opnum súpufundi með Árna Finnssyni, formanni Náttúruverndarsamtaka Íslands og Evrópumanni ársins 2012.

Á fundinum, sem ber yfirskriftina "Umhverfismálin í Brussel og á Íslandi: Náttúruvernd og fiskveiðar" ætlar Árni að fjalla um það hvernig umhverfisverndarsamtök geta nýtt krafta sína til þess að hafa áhrif á ákvörðunartöku í Brussel. Á vettvangi Evrópusambandsins fer fram lagasetning og ákvarðanataka í öllum helstu málaflokkum er varða umhverfismál.

Fundurinn hefst klukkan 12.00 og er haldinn í nýjum húsakynnum Já Ísland, í Síðumúla 8, 108 Reykjavík.

Boðið verður upp á súpu og eru allir velkomnir."

Nýr forseti Evru-hópsins og ESM-sjóðsins

Hollendingurinn Jeroen Dijsselbloem, hefur tekið við formennsku í þeim hópi ríkja sem eru með Evruna sem gjaldmiðil (Eurozone-group) og nú í febrúar tók hann einnig við forsæti yfir Stöðugleikasjóði ESB, ESM (European Stabilty Mechanism). Frá þessu er sagt á EuObsever.

Jeroen er landbúnaðarhagfræðingur, en sneri sér síðan að rannsóknum í hagfræði og lauk mastersprófi á Írlandi. Hann tekur við af ekki minni manni en Jean Claude Juncker, forsætisráðherra Luxemborgar, sem sinnti þessu starfi frá upphafi þess árið 2005.

Holland er eitt af smáríkjum ESB og því tekur eitt smáríkið hér við af öðru!

Samkomulag um fjárlög ESB

MBL.is sagði frá niðurstöðunni varðandi fjárlög ESB næstu sjö árin, en í fyrsta sinn er um að ræða niðurskurð á þeim:

"Leiðtogar Evrópusambandsins náðu í dag samkomulagi um ramma fyrir fjárlög sambandsins á árunum 2014-2020. BBC segir að samkomulagið feli í sér að útgjöld ESB lækki og verði um 908 milljarðar evra eða um 1% af heildarframleiðslu ESB-ríkjanna.

Samkomulagið náðist eftir maraþonfund í Brussel. Herman van Rompuy, forseti leiðtogaráðs Evrópusambandsins, sagði í dag að það hefði verið þessi virði að bíða eftir þessari niðurstöðu.

Stjórnvöld í Bretlandi og Hollandi hafa þrýst fast á um að útgjöld ESB yrðu lækkuð og hafa í því sambandi bent á að þess sé krafist að ESB-ríkin skeri niður útgjöld heima fyrir.

David Cameron, forsætisráðherra Bretlands, sagði að þessi niðurstaða væri „góð fyrir Bretland.“ Hann sagði að í fyrsta skipti hefðu leiðtogar ESB náð samkomulagi um að lækka útgjöld sambandsins, en útgjöldin hefðu frá upphafi sambandsins alltaf hækkað milli ára.

Lönd í sunnanverðri álfunni, m.a. Frakkland og Ítalía, eru andvíg því að skorið verði mikið niður í útgjöldum ESB, en vilja að fjárlögunum verði breytt þannig að meira fé verði notað í fjárfestingar sem taldar eru líklegar til að skapa störf og draga úr atvinnuleysi.

Reynt var að ná samkomulagi um fjárlögin á leiðtogafundi ESB í nóvember en það tókst ekki. Framkvæmdastjórn Evrópusambandsins vildi fyrst að framlög aðildarríkjanna yrðu hækkuð um 5%, eða í 1,04 billjónir evra, en Herman Van Rompuy, forseti leiðtogaráðs Evrópusambandsins, lagði til á fundinum í nóvember að framlögin yrðu alls 973 milljarðar evra. Niðurstaðan virðist hafa orðið sú að útgjöldin yrðu nær 900 milljörðum evra, eða um 1% af heildarframleiðslu ESB-ríkjanna."

Samkvæmt þessu eru þjóðarframleiðsla ESB-ríkjanna um 90.000 milljarðar Evra. Til samanburðar er sama tala hér á landi um 10 milljarðar Evra.

http://www.mbl.is/frettir/erlent/2013/02/08/utgjold_esb_laekka_milli_ara_2/

Þegar aðalatriðin gleymast!

Ritari fylgdist með þjóðmálaumræðunni um helgina og var þar af nógu að taka. Menn voru að ræða vexti, verðbólgu, verðtryggingu, vaxtastig, velferð, launamál og fleira. Það sem hinsvegar er merkilegt við þá umræðu (sem aðallega Sjálfstæðismenna og Framsóknarmenn tóku þátt í) er að menn ræddu þetta fram og til baka án þess að minnast einu orði á hlut gjaldmiðilsins og gjaldeyrishaftanna í þessu.

Í drögum að ályktunum Framsóknarflokksins sem samþykkt voru á flokksþinginu segir t.d. að íslenska krónan eigi að vera framtíðargjaldmiðill þjóðarinnar (í nálægri framtíð....smá glufa á aðra gjaldmiðla hér) og því sé brýnt að efla umgjörð hennar?

Í drögunum segir: "Hagstjórn þarf að vera ábyrg og ríkisfjármál öguð. Skoða þarf sérstaklega hvernig fjármálakerfið getur unnið með í stað þess að margfalda peningamagn sem leiðir til þenslu. Í því samhengi verði skoðað að fela Seðlabankanum það vald að stýra peningamyndun til þess að tryggja stöðugleika."

Peningamagn og peningamyndun? Er það allt og sumt? Reddast þetta, ef þessu tvennu verður kippt í liðinn? Vert er að minna á að íslenska krónan er gjaldmiðill sem hefur tapa 99,5% af upphaflegu virði sínu!

Hér þarf gjaldmiðil sem réttir við kaupmátt fólks og ekki er hægt að fara með eins og einhverja tusku!

Umræða á villigötum...bulla bulla bulla - ekki bolla, bolla,bolla!

Um daginn var það rætt í fjölmiðlum að umræða um Evrópumál væri á villigötum. Kannski ekki nema von þegar fólk á borð við Vigdísi Hauksdóttur er að "ræða" þennan málaflokk.

Í viðtali við DV fyrir flokksþing Framsóknarflokksins sagði hún þetta: "Af hverju þurfti að
einkavæða bankana? Vegna þess að það var krafa um það vegna EES."

Okkur hér á ES-blogginu er hinsvegar ekki kunnugt um að einkavæðing íslenska bankakerfisins hafi verið krafa vegna EES. Og því á þessi fullyrðing Vigdísar sér enga stoð í veruleikanum!

Vigdís veit greinilega meira en margur annar um EES-samningin og ýmsar hliðar hans og hér er komin alveg splunkuný söguskýring á einkavæðingu bankanna.

Einkavæðing bankanna var hinsvegar ákveðin af stjórn Sjálfstæðisflokks og Framsóknarflokki, stjórn Davíðs Oddssonar og Halldórs Ásgrímssonar.

Það er mikil ábyrgð fréttamanna að láta fólk komast upp með það gagnrýnislaust að bulla bara um hlutina. Og er þetta reyndar ekki í fyrsta sinn sem þingkonan fer með fleipur í Evrópumálum.

EES-samnigurinn inniheldur hið svokallaða "fjórfrelsi" og eitt af þeim er frjálst flæði fjármagns á milli landa. Það hefur hinsvegar ekkert með einkavæðingu íslensku bankanna að gera, sem Vigdís getur lesið um á krækjunni!

Nei Evrópa!

Framsóknarmenn héldu flokksþing helgina 8-10 febrúar og samkvæmt Morgunblaðinu var "mikil eining" á þinginu.

Allskyns ályktanir voru samþykktar, t.d. að Íslandi væri best borgið utan ESB og að hætta bæri aðildarviðræðum og ekki hefja þær nema að undangenginni þjóðaratkvæðagreiðslu.

Er ekki næsta skref fyrir flokkinn að samþykkja að Ísland segi sigu úr EES og landið verði flutt eins langt frá Evrópu og hægt er?

Kannski ekki nema von að Framsókn sé orðinn þessi harði þjóðernisflokkur, sem virðist alfarið hafna alþjóðahyggju, því þar innanborðs eru núverandi og fyrrverandi formenn Nei-samtaka Íslands, sem og Vigdís Hauksdóttir.

Á þinginu var kosið í æðstu embætti flokksins og þar var meðaltalið um 95% í hvert embætti. Sennilega voru engir auðir eða ógildir seðlar, nema hjá Guðna Ágústssyni, sem reyndi að kjósa sjálfan sig formann!

Þetta minnir á það þegar kosið var í Sovétríkjunum sálugu. Þar var þátttaka yfirleitt ekki minni en 95-100% og stundum fór þátttakan reyndar yfir 100%. Það gerist kannski á næsta flokksþingi Framsóknar!

Pawel Bartoszek um næsta fjármálaráðherra í FRBL

Pawel Bartoszek er skemmtilegur penni og í Fréttablaðinu þann 8.2 skrifar hann grein sem ber heitið Næsti fjármálaráðherra. Pawel segir í byrjun:

"Ekkert annað embætti í ríkisstjórninni þarf að vera jafnvel mannað á næsta kjörtímabili. Það þarf að vinna að því að á Íslandi verði aftur frjálst og opið hagkerfi, það þarf að hjálpa hluta landsmanna út úr skuldafangelsi og um leið að verjast ýmsum vondum hugmyndum um stórfelldar eignatilfærslur í því skyni. Staðan verður erfið. Góður fjármálaráðherra mun skipta meira máli en góður forsætisráðherra.

Forsætisráðherrann þarf einna helst að sjá til þess að sá sem heldur á tékkheftinu hafi sæmilegan vinnufrið.

„Nú er komið að mér"

Hinn mikla uppgang Póllands eftir 1989 má meðal annars þakka því að jafnvel mestu klikkhausarnir settu konu með viti í fjármálaráðuneytið.

Á Íslandi hefur ekki alltaf tekist jafnvel til."

Í lok greinar sinnar fjallar Pawel um höftin: "Það ríkja gjaldeyrishöft á Íslandi. Genginu er handstýrt til að vernda þá starfsemi sem fyrir er á kostnað þess sem hugsanlega gæti orðið.

Það er ömurlegt viðskiptaumhverfi og fólk mun ekki vilja búa við slíkt. Planið núna virðist vera það að markaðurinn öðlist trú á krónunni, gengi hennar styrkist og þá sé hægt að afnema höftin. Auðvitað er þetta plan ekki að ganga. Gengið er áfram lágt þrátt fyrir að sífellt sé verið sé að herða höftin. En segjum jafnvel að planið gengi allt eftir. Þá býr þetta auðvitað ekki til neina varanlega lausn.

Örgjaldmiðlar eins og íslenska krónan munu aldrei geta varist áföllum öðruvísi en með gjaldeyrishöftum eða hótunum um þau.

Að undanförnu hefur eftirfarandi lína heyrst: „Við sitjum uppi með krónuna, hvort sem okkur líkar það betur eða verr." Að heyra þetta úr munni stjórnmálamanna er rugl. Auðvitað breytist ekkert ef fólk sem getur breytt hlutum nennir því ekki. En ég vil einmitt að næsti fjármálaráðherra verði manneskja sem getur myndað sér eigin skoðun á því hvað sé best fyrir Ísland, óháð hvers kyns kreddum og vangaveltum um hvað öðrum kunni að þykja líklegt til vinsælda.

Næsti fjármálaráðherra þarf að vera þungavigtarmanneskja þegar kemur að fjármálum. Ef Sjálfstæðisflokkurinn telur sig hafa slíka manneskju innan raða frambjóðenda sinna þá á hann að tefla henni fram í kosningabaráttunni. Ef hann telur svo ekki vera þá ætti hann að leita út fyrir raðir væntanlegra þingmanna flokksins."

Bendum einnig á góðan leiðara FRBL Gervilausnir í gerviveröld, sem fjallar um höftin.

ESB: Breytingar á fiskveiðistefnu samþykktar

Á RÚV segir: "Evrópuþingið í Strassborg samþykkti í dag tillögur um breytingar á fiskveiðistjórnunarstefnu ESB. Meginmarkmið þeirra er að koma í veg fyrir ofveiði og brottkast afla. Vonast er til að breytingarnar verði að lögum á næsta ári að loknum frekari viðræðum við aðildarríki.

Um 75 prósent af fiskistofnun Evrópusambandsins eru ofveiddir enda hafa verndunarsjónarmið sjaldnast ráðið för þegar ráðherraráðið ákveður kvótana. Stofnar þorsks og kola hafa minnkað um 32 prósent frá 1993. Afli í Norðursjónum hefur minnkað frá því að vera 3,5 milljónir tonna árið 1995 í 1,5 milljónir tonna árið 2007. Með samþykkt Evrópuþingsins í dag kann að vera að stórt skref hafi verið tekið til að snúa þessari öfugþróun við."

http://www.ruv.is/frett/breytingartillogur-samthykktar