Pólland og áhrif ESB-aðildar

Stjórnmálafræðingurinn Gunnar Hólmsteinn Ársælsson, skrifar grein í Fréttablaðið í dag um áhrif ESB-aðildar á landið, en Pólverjar gengu í ESB árið 2004. Gunnar skrifar m.a.:

"Hagvöxtur (vöxtur þjóðarframleiðslu frá ári til árs), jókst verulega í Póllandi eftir aðild, sökum aukinnar eftirspurnar og fjárfestinga. Árið 2007 var 6,6% hagvöxtur í Póllandi, en að meðaltali var rúmlega fimm prósenta hagvöxtur á árunum 2003-2008. Á sama tímabili jókst framleiðni einnig umtalsvert, eða um 10% á sérstökum kvarða sem mælir slíkt.

Framlög ESB úr ýmsum sjóðum sambandsins eru mikilvægur þáttur í þróun efnahagsmála í Póllandi og á tímabilinu 2004-2008 fengu Pólverjar 14 milljarða evra frá ýmsum sjóðum/áætlunum ESB, umfram það sem þeir greiddu til sambandsins. Á tímabilinu 2007-2013 munu Pólverjar fá um 70 milljarða evra, sem m.a. á að nota til uppbyggingar á sviði samgöngu og umhverfismála, sem og almennrar atvinnuuppbyggingar.

Erlendar fjárfestingar hafa aukist verulega eftir aðild. Árið 2007 námu þær tæpum 17 milljörðum evra. Verslun og viðskipti hafa einnig aukist, eða um tæp 20% að magni til á ári frá aðild.

Pólland er mikil landbúnaðarþjóð, en mikil andstaða kom frá bændum gegn aðild, rétt eins og hér á landi. Pólskir bændur voru meðal tekjulægstu stétta í öllum fyrrverandi kommúnistaríkjum Evrópu fyrir aðild.

Frá aðild hefur hins vegar mikið breyst, til hins betra. Framleiðni í pólskum landbúnaði var árið 2007 um 47% hærri en árið 2000 og útflutningur á pólskum landbúnaðarvörum jókst um 250% á árunum 2003-2007. Innflutningur jókst á sama tímabili um 125%. Í frétt frá Warzaw Business Journal frá 10. maí s.l. kemur fram að tekjur pólskra bænda hafi frá árinu 2000 aukist um 107%!"

Öll greinin

 

Athugasemdir

[Sleggjan og Hvellurinn, 3.6.2010 kl. 19:12]

Mjög athyglisvert. Sérstaklega þetta með bændurnar.

Bændasamtökin á Íslandi ættu að lesa þessa grein. Það væri holl lesning. 

[Benedikta E, 8.6.2010 kl. 12:00]

Hvernig stendur á því að fjölmennasti innflytjendahópur á Íslandi eru Pólverjar.

Hvernig má það vera að þeir flýi sitt heimaland Pólland - frá "allri ESB velsældinni í Póllandi"

Má það vera að áróðurs maskína ESB líti framhjá staðreyndum - og noti í þess stað lygina sem áróðurs tálbeitu.

Pólverjarnir sem hingað leita eru í atvinnuleit og leit að betri lífskjörum en þeirri örbyrgð sem þeir hafa lifað við í Póllandi.

Pólverjar gengu í ESB 2004 svo reynsla Pólverjanna er komin á ESB aðild í Póllandi  - Fátækt og atvinnuleysi.

[Benedikta E, 8.6.2010 kl. 12:03]

Það er ljótt að skrökva.