Verða Íslendingar fyllibyttur í boði ESB?

Ögmundur Jónasson, þingmaður(!) fer mikinn í Morgunblaðinu í dag, í grein sem næstum vekur upp gæsahúð, þannig er andinn í henni. Segja má að hún falli í flokk þeirra greina sem styðja við hina svokölluðu "Hrægammakenningu" þ.e. að ESB vilji sölsa undir sig allt verðmætt hér við land.

Ögmundur skrifar m.a.: "Ef Ísland sameinast Evrópusambandinu fjölgar íbúum um 0,07 prósent. Yfirráðasvæði sambandsins stækkar um tæp 10 prósent og áhrifasvæði (eftirlits- og björgunarsvæði) um 20 prósent. Það er ekki að undra að herskáir Evrópusinnar líti hýru auga til Festung Island, Virkisins í norðri. Áhrifasvæðið færi úr ca 10 milljónum ferkílómetra í 12 milljónir ferkílómeta. Koma aðrir jafn færandi hendi? Halda menn að þessum 0,07 prósentum muni verða treyst fyrir stjórn og eftirliti á 20% Evrópu? Að sjálfsögðu ekki. En ekki mun standa á styrkveitingum – svona rétt á meðan verið er að tala okkur til. Hið sama gæti hent okkur og indíána Norður-Ameríku. Þeir töpuðu landinu en sátu uppi með glerperlur og eldvatn." (Leturbreyting, ES-blogg)

 Hann notar s.s. sér til stuðnings eitt ógeðfelldasta dæmið úr amerískri sögu, þ.e.a.s. meðferð hvíta mannsins á indíánum.

Og gefur þar með í skyn að meðferð ESB á Íslendingum verði svipuð. Og ekki nóg með það, heldur er ESB líka ein allsherjar peningadæla, sem notar fé sitt til að "kaupa" lönd inn í sambandið!

Þetta er makalaus málflutningur og í raun eitt það versta sem sett hefur verið á pappír í ESB-umræðunni lengi.

Ögmundur virðist hafa orðið öfgunum að bráð, talar um "stórríki", "innlimun", "við gegn þeim" og segir að ESB sé að tala niður til okkar, svo eitthvað sé nefnt.

Ögmundur ætti að vita betur; ESB rænir t.d. ekki auðlindum af aðildarþjóðum, hefur ekki innlimað eitt einasta landa og ekki borgað með búsi!

Það mun verða íslenska þjóðin sem greiðir atkvæði um það á endanum, hvort við göngum í ESB eða ekki! Þegar aðildarsamningur liggur fyrir!

Stundum verður maður kjaftstopp, grein Ögmundar er í þeim flokknum!

Vonandi er botninum náð hjá Ögmundi með þessari ótrúlegu grein! 

Okkur hjá Evrópusamtökunum er spurn eftir lesturinn á greininni:

Verða Íslendingar fyllibyttur í boði ESB? 

 

Athugasemdir

[Ómar Bjarki Kristjánsson, 6.8.2010 kl. 15:00]

Já já, kallinn fór alveg með það þarna.  Stimplaði sig út með stæl kallgreyið.

[Sigurgeir Jónsson, 6.8.2010 kl. 15:11]

Ekki er annað sjáanlegt en að ESB sé þegar búið að kaupa einhverja íslendinga, allavega þá sem eru á launum hjá bandalaginu.Og þær greiðslur sem ESB segist vera tibúið að koma með vegna þess"aðlögunarferlis"sem ESB telur nauðsynlegt að íslendingar gangi í gegnum, þær greiðslur ESB eru í raun ekkert annað en mútur og það verður þeim til ævarandi skammar sem taka við þeim .Ögmundur hefur rétt fyrir sér.

[Ómar Bjarki Kristjánsson, 6.8.2010 kl. 15:51]

Kallinn hlýtur að verða að segja af sér þingmennsku vegna þessarar þvaðursgreinar.  Ekki við hæfi að svona maður gegni störfum fyrir hönd þjóðar í vestrænu lýðræðisríki.  Er bara þannig.

[Jón Frímann Jónsson, 6.8.2010 kl. 16:15]

Sigurgreir, Þetta svar þitt er bæði rökleysa og rökleysi. Síðan er það hin tilbúna fullyrðing andstæðinga ESB á Íslandi um að fólk sé á launum hjá ESB við að skrifa um kosti ESB aðildar. Þetta er auðvitað ekkert nema tilbúningur, og fellur undir ekkert annað en lygi.

[Sleggjan og Hvellurinn, 6.8.2010 kl. 21:16]

Þetta er það heimskulegasta sem hefur komið í ESB umræðuna síðan Ungir bændur auglýstu ESB-herinn í Fréttablaðinu.

[Þorsteinn Briem, 6.8.2010 kl. 21:26]

Ögmundur Jónasson þegar Alþingi samþykkti 16. júlí í fyrra þingsályktun um aðildarumsókn að Evrópusambandinu:

"Í dag var samþykkt á Alþingi að Ísland gengi til aðildarviðræðna við Evrópusambandið. Vinstrihreyfingin grænt framboð á þingi klofnaði í málinu.

Nokkrir þingmenn studdu tillögu um tvöfalda atkvæðagreiðslu, það er að fyrst yrði þjóðin spurð hvort hún vildi sækja um aðild og síðan yrði kosið um niðurstöðuna.

Lengi vel var ég á þessu máli, enda hef ég alltaf talið að í grundvallaratriðum lægi ljóst fyrir hvað í boði væri fyrir Ísland og þyrfti engar könnunarviðræður til að leiða það í ljós.

En þótt ég hafi verið þessarar skoðunar hafa aðrir haft allt aðra sýn og viljað láta reyna á hvað við fengjum við viðræðuborð. En þótt ég sé á þessu máli eru margir annarrar skoðunar og vilja láta reyna á í viðræðum hvað við fengjum. Gott og vel, þá gerum við það.

Þannig hef ég hugsað síðustu misserin. Þess vegna var ég reiðubúinn að fylgja þeirri tillögu að ná í samningsdrög til að kjósa um.

Í ræðu minni á Alþingi í gær gerði ég grein fyrir þessari afstöðu minni. Jafnframt því  hve arfavitlaust ég teldi það vera að ganga inn í ESB.

Er einhver mótsögn í þessu? Nei, ekki nokkur.

Er ég að ganga á bak orða minna gagnvart kjósendum? Nei, þetta hef ég sagt frá því á síðasta ári og í aðdraganda kosninganna."

ESB reynir á Vinstri græna

[Þorsteinn Briem, 6.8.2010 kl. 21:34]

Halla Gunnarsdóttir, sem var aðstoðarmaður Ögmundar Jónassonar, þáverandi heilbrigðisráðherra, þegar Alþingi samþykkti 16. júlí í fyrra þingsályktun um aðildarumsókn að Evrópusambandinu:

"Í Morgunblaðinu í dag kemur fram að mörgum framsóknarmönnum sé heitt í hamsi vegna afstöðu Guðmundar Steingrímssonar í Evrópusambandsmálinu en hann hyggst greiða atkvæði með tillögu ríkisstjórnarinnar um að gengið verði til aðildarviðræðna við bandalagið.

Framsóknarflokkurinn hefur farið nokkra hringi í þessu máli, eins og stundum vill verða í þeim ágæta flokki.

Hvað sem því líður virðist afstaða Guðmundar og Sivjar Friðleifsdóttur vera mun meira í takti við niðurstöðu flokksþings Framsóknar en afstaða annarra þingmanna flokksins, sem ætla sér að greiða atkvæði með tillögu Sjálfstæðisflokks um tvöfalda atkvæðagreiðslu.

Vilji flokksþings Framsóknar var skýr

Það vill svo til að ég sat flokksþing Framsóknar í janúar síðastliðnum sem blaðamaður Morgunblaðsins. [...]

Eftir langa umræðu voru greidd atkvæði um ályktun sem lá fyrir fundinum og hún var samþykkt. Í ályktuninni er skýrt að sækja eigi um aðild að Evrópusambandinu með umboði frá Alþingi. Hvergi er minnst á tvöfalda atkvæðagreiðslu."

"Tvöfalda leiðin var lítið rædd

Ég minnist þess ekki að í löngum og fræðandi umræðum á flokksþingi Framsóknar hafi nokkur þeirra þingmanna, sem nú vilja greiða atkvæði með Sjálfstæðismönnum, komið í pontu og lagt til að fremur yrði farin leið tvöfaldrar atkvæðagreiðslu. Misminni mig skal ég gjarnan leiðrétta það.

Sjálfstæðisflokkurinn samþykkti hins vegar tvöföldu atkvæðagreiðsluleiðina á sínum landsfundi og stendur fast við þá afstöðu.

Landsfundur Vinstri grænna tók ekki afstöðu til þess hvort leiða ætti málið til lykta í einni eða tveimur þjóðaratkvæðagreiðslum, heldur var einungis lögð á það þung áhersla að þjóðin hefði úrslitavald.

Þess vegna kemur ekki á óvart að þingmenn VG greiði sumir atkvæði með tvöföldu leiðinni en aðrir með tillögu ríkisstjórnarinnar um þjóðaratkvæðagreiðslu á grundvelli fyrirliggjandi samnings, þegar þar að kemur.

Persónulega tel ég að það skipti ekki höfuðmáli hvort haldin verði ein eða tvær atkvæðagreiðslur. Hins vegar er þetta mál þannig að kominn er tími til að leiða það til lykta á lýðræðislegan hátt. Fyrsta skrefið á þeirri vegferð verður stigið þegar þingmenn ganga til atkvæða á Alþingi í dag."

Virðum ólíkar skoðanir gagnvart ESB

[Sigurður Þórðarson, 7.8.2010 kl. 22:27]

Ögmundur skýrir afstöðu sína ágætlega í rökfastri og yfirvegaðri grein á vef sínum ogmundur.is

[Jón Frímann Jónsson, 8.8.2010 kl. 08:30]

Sigurður, Hann hefur ekki gert neitt slíkt. Ögmundur er hinsvegar kominn í nauðvörn þeirra sem vita að þeir hafa skrifað sig útúr umræðunni.

[Guðjón Eiríksson, 9.8.2010 kl. 10:34]

Ögmundur veit það kannski ekki, en evrópuþjóðir færðu okkur annað en glerperlur og eldvatn við hrunið.

Þær lánuðu okkur pening.

Alvörupeninga, gjaldeyrir sem hægt er að nota í viðskiptum við aðrar þjóðir.

 Peninga sem viðn áttum ekki til.

Vegna þess að Íslandi hafði verið stjórnað af óhæfu fólki.

Fólki sem við kusum.