"Ég er maður fullveldisins - fullveldið er lifandi"

Forseti Slóveníu, Dr. Danilo Türk, sagði á málþingi í H.í. í dag, það vera borðleggjandi að fullveldi ríkja væri virt innan ESB og að í tilfelli Slóveníu hefði þetta þýtt tækifæri fyrir landið að samlagast Evrópu og ESB sem sjálfstætt og fullvalda ríki. "Ég er maður fullveldisins, fullveldið er lifandi," sagði Türk.

Í erindi á málþinginu fór hann yfir þróun mála í Slóveníu, frá því að landið braust undan oki kommúnismans í Júgóslavíu, sumarið 1991, en þá lýstu þetta fyrrum lýðveldi Júgóslavíu yfir sjálfstæði. Frá þeim tímapunkti var markið sett á aðild að ESB og árið 2004 gekk Slóvenía í ESB og tók upp Evruna sem gjaldmiðil árið 2007.

Dr. Danilo Türk, sagði Evruna hafa veitt landinu (íb. 2 milljónir) dýrmætt skjól og öryggi.

Hann sagði ennfremur að Slóvenar vildu láta til sín taka utan ESB og nefndi þar Öryggisráð Sameinuðu þjóðanna sem dæmi. Hann lagði einnig á það mikla áherslu að landið hefði haldi sínu efnahagslega sjálfstæði og væri stöðugt að leita að samstarfsaðilum á því sviði.

Það kom fram í máli Dr. Danilo Türk að það hefði verið mjög dýrmætt fyrir land eins og Slóveníu að taka að sér formennsku í ESB og það væri gríðarlega hvetjandi fyrir landið sem heild. Slóvenar voru í því hlutverki seinni hluta ársins 2008.

Af máli Dr. Danilo Türk mátti ráða að mikil ánægja er með aðild landsins að ESB og sér hann mikil tækifæri, þó svo að reynslan af aðild sé enn takmörkuð, enda hefur landið aðeins verið í ESB í sjö ár.

Sérstakur gestur á málþinginu var forseti Íslands, Dr. Ólafur Ragnar Grímsson.

Hér má lesa um sjálfstæðisbaráttu Slóvena og forsetatíð Dr. Danilo Türk. Frétt frá Stöð tvö í kvöld um framsögu Dr. Danilo Türk í H.Í. í dag.

Athugasemdir

[Che, 4.5.2011 kl. 19:02]

[Che, 4.5.2011 kl. 19:29]

Slóvenía var fullvalda frá árslok 1991, þegar landið fékk sjálfstæði frá Júgóslavíu og þangað til 2004, þegar landið fékk aðild að ESB. Í samfleytt 12 ár.

Allar götur síðan árið 1 og til 1991-1992 var landið (eða landsvæði Slóvena) undir erlendum yfirráðum og/eða innlimað í önnur ríki. Og tólf árum síðar, í staðinn fyrir að halda dýrmætu sjálfstæði sínu sem Slóvenar börðust fyrir í fimm ár, var landið innlimað í ESB árið 2004 og sjálfstæðinu kastað á glæ. Úr öskunni (Júgóslavíu) í eldinn (ESB).

Það virðist vera sameiginleg árátta hjá ríkisstjórnum ríkja, sem aldrei hafa upplifað sjálfstæði, eins og A-Evrópa, eða hafa svipaða margraára fasíska fortíð eins og S-Evrópa, að þau ráða ekki við þá hugsun að stjórna sér sjálfir. Hins vegar hafa Svisslendingar verið sjálfstæðir í fleiri aldir og myndu ekki dreyma um að tapa sjálfstæði sínu með því að leggjast undir ok EES eða ESB.

[Jón Frímann Jónsson, 4.5.2011 kl. 19:59]

Che, Samkvæmt Sameinuðu Þjóðunum og sáttmálum ESB þá er Slóvenía fullvalda og sjálfstætt ríki.

Þessar fullyrðingar sem þú setur fram hérna um sjálfstæði og fullveldi Slóveníu eiga sér enga stoð í raunveruleikanum. Enda ber að afgreiða þessar fullyrðingar sem slíkar.

Slóvenía verður marga áratugi að jafna sig eftir stríðsátökin og annað slíkt sem slóvenska þjóðin hefur lent í. Hinsvegar hjálpar ESB aðildin þeim mikið með þetta og tryggir stöðugleikan sem þeir þurfa.

[Evrópusamtökin, www.evropa.is, 4.5.2011 kl. 22:47]

Veistu það Che, að þetta er svo mikið bull í þér að þetta er ekki svaravert! Reyndu að segja eitthvað af viti næst þegar þú leggur eitthvað til málanna!

[Che, 4.5.2011 kl. 23:50]

Hvenær ætli Slóvenía fari sömu leið og Grikkland, Írland og Portúgal?

[Jón Frímann Jónsson, 6.5.2011 kl. 10:47]

Che, Það eru engar líkur á því að gerist. Enda reka slóvenar ábyrga fjármálastefnu í ríkisfjármálum. Eftir því sem ég kemst næst. Því háttar einnig þannig til að dregið hefur úr kreppunni í Evrópu. Efnahagskreppan virðist ekki hafa haft mikil áhrif á Slóveníu. Þannig að það eru engar líkur á því að það breytist á næstunni.