Benedikt í Bæjarins besta á Ísafirði um "Orustuna um Ísland"

Á vefnum JáÍsland.is er sagt frá grein eftir Benedikt Jóhannesson, formann Sjálfstæðra Evrópumanna, sem hann ritar í Bæjarins besta á Ísafirði um ESB-málið. Í grein sinni segir Benedikt:

"Nýlega var kynnt á vefsvæðinu visir.is könnun Evrópusambandsins, Flash Euro-barometer on Youth, sem gerð var meðal ungs fólks í 31 Evrópulandi í byrjun árs. Hún sýndi að um 85 prósent íslenskra ungmenna hafa áhuga á því að vinna í öðru Evrópulandi í framtíðinni. Þar af hafa rúmlega 40% áhuga á því að flytja þangað og vinna þar til langtíma.

Hlutfall þeirra sem vilja flytja til útlanda til vinnu reyndist hæst meðal ungmenna á Íslandi. Ungt fólk í mörgum Evrópulöndum vill gjarnan vinna utan heimalands síns, en ekki er vitað til þess að Ísland sé vinsæll áfangastaður. Ungir Tyrkir eru heimakærastir, en 15% þeirra hafa áhuga á því að flytja úr landi.

Könnunin hefur ekki vakið mikinn áhuga stjórnmálamanna enn sem komið er, en hún sýnir vanda þjóðarinnar í hnotskurn. Unga fólkið sem vorkennir bændum og útgerðarmönnum og vill leyfa þeim að halda sig utan Evrópusambandsins vill langflest sjálft ganga í þetta sama samband til lengri eða skemmri tíma. Ástæðan er einföld. Ungmennin telja að þeirra eigin framtíð sé bjartari innan Evrópusambandsins en utan. Þau hyggjast greiða atkvæði með fótunum en vilja leyfa íslenskum bændum að búa við óbreytta tollvernd og styrki. Þeir sem eftir verða geta borgað brúsann."

Greinin í BB 

Athugasemdir

[Haraldur Hansson, 22.6.2011 kl. 17:32]

Ég var einn af fyrstu starfsmönnum Bæjarins besta, fyrir um aldarfjórðungi, sem þá var aðeins til á pappírsformi. Skiljanlega þykir mér vænt um þennan öfluga landsbyggðarmiðil og því þykir mér dapurt að sjá þessi rökleysuskrif Benedikts birtast á vefútgáfu þess.

Í grein sinni tekst Benedikt að bera saman epli og ígulker og útkoman er eftir því.

Annars vegar að unga fólkið hafi áhyggjur af stöðu landbúnaðar og sjávarútvegs innan Evrópusambandsins, sem þó rímar vel  við það sem sviðstjóri stækkunarskrifstofu ESB sagði í fyrirlestri í Háskóla Íslands í gær.

Hins vegar að unga fólkið hafi áhuga á að fara út í hinn stóra heim, freista gæfunnar og kynnast lífinu í öðrum löndum. Er það ekki eitthvað sem allt ungt fólk lætur sig dreyma um?

Út úr þessu fær Benedikt þá niðurstöðu að unga fólkið vilji ganga í Evrópusambandið en „leyfa“ sjómönnum og bændum að standa utan þess, af vorkunn! Og þá verði Ísland „annars flokks um alla framtíð“.

Þvílík endemis della í manninum.

[Þorsteinn Briem, 22.6.2011 kl. 23:21]

Sauðfjárbúum hefur fækkað um þriðjung hérlendis og kúabúum um rúman helming frá árinu 1990, síðastliðin 20 ár.

Skýrsla nefndar um landnotkun - Febrúar 2010, sjá bls. 35-36

Útgjöld hins opinbera til landbúnaðar hérlendis voru um tólf milljarðar króna árið 2007.

Sænskir bændur fá um 135 milljarða íslenskra króna á ári í styrki frá Evrópusambandinu, meira en nettótekjur bændanna, en rúmlega helmingur allra útgjalda sambandsins er til landbúnaðarmála.

Árið 2008 störfuðu hér 2,5% vinnuaflsins við landbúnað, sem var þá 1,4% af landsframleiðslunni.

Meðalaldur búfjáreigenda hérlendis er 54 ár og margir þeirra eru með mjög lítil sauðfjárbú, þannig að þeir vinna einnig utan búanna, sem verða sumarbústaðir þegar þeir bregða búi.

Árið 2008 voru hér 1.318 sauðfjárbú, þar af 1.083, eða 82%, með 400 ærgildi eða færri.

Fastur kostnaður meðalsauðfjárbús var þá 249 þúsund krónur á mánuði, að meðtöldum launum eigendanna.

Neysla á kindakjöti á öðrum Norðurlöndum er mjög lítil og engin ástæða til að reikna hér með innflutningi á kindakjöti í einhverjum mæli.

Við flytjum út um fjögur þúsund tonn af sauðfjárafurðum á ári, þar af um 1.200 tonn af kindakjöti, langmest til Evrópska efnahagssvæðisins, 2.200 tonn af gærum og 500 tonn af ull.

Árið 2009 voru flutt hér út 1.589 lifandi hross, um 90% til Evrópska efnahagssvæðisins.

[Þorsteinn Briem, 23.6.2011 kl. 01:28]

"Erasmus er flaggskip Evrópusambandsins á sviði menntasamstarfs og á hverju ári gerir Erasmus um tvöhundruð þúsund evrópskum stúdentum kleift að nema eða vinna erlendis."

Erasmus - Flaggskip Evrópusambandsins á sviði menntasamstarfs

The Erasmus Programme

[Þorsteinn Briem, 23.6.2011 kl. 04:45]

Í fyrra, árið 2010, fengu 2.248 Íslendingar lán hjá Lánasjóði íslenskra námsmanna til að stunda nám erlendis og þar af stunduðu 1.850, eða 82,3%, nám á Evrópska efnahagssvæðinu og 1.263, eða 56,2%, í löndum sem eru með evru eða gjaldmiðil bundinn við gengi evrunnar.