Vegur Svíþjóðar liggur í gegnum ESB - Meirihluti fyrir Evrunni

,,Um helmingur af þjóðarframleiðslu Svía kemur í gegnum útflutning og innflutning. Þjóð sem er jafn háð innflutningi og útflutningi, getur ekki staðið á hliðarlínunni hvað varðar umræður um alheimsviðskipti. Við getum einungir spilað með í gegnum Evrópu,“ segir fjármálaráðherra Svía og einn valdamesti maðurinn í sænska Hægriflokknum, Anders Borg, í viðtali við Sænska dagblaðið í gær.

Í viðtalinu kemur einnig fram að Borg haf sannfærst um að til þess að styrkja stöðu Svía innan ESB og í alheimsviðskiptum  verði samstarf landsins í Evrunni afgerandi þáttur.  Svíar höfnuðu Evrunni í þjóðaratkvæði árið 2003, en gengi sænsku krónunnar hefur sveiflast töluvert í hremmingum fjármálakreppunnar og vill meirihluti Svía taka nú upp Evruna sem gjaldmiðil (44% á móti 42% í nýrri könnun nú um miðjan desember).

Anders Borg segir að á komandi kjörtímabili (kosið verður næsta haust) þurfi aftur að taka upp þessa spurningu.Almennt er Borg ánægður með frammistöðu Svíþjóðar sem formennskuland og er það álit flestra fréttaskýrenda að þetta hafi verið gott tímabil fyrir Svía, Lissabonsáttmálinn gekk í gegn og mikilvægar ákvarðanir voru teknar til þess að bregðast við kreppunni.

Að sögn Borg miða þessar aðgerðir að því að stuðla að hagvexti, jafnvægi í ríkisfjármálum ESB-ríkjanna og tryggja stöðugleika.En allt gekk ekki upp og nefnir Borg dæmi skattamál í því samhengi. Ástæðan sé m.a. hve flókin málaflokkur það sé.

Svíar ljúka formennsku sinni í ESB um áramótin, en þá taka Spánverjar við.

Athugasemdir

[Gunnlaugur I., 23.12.2009 kl. 14:54]

Þetta er nú mjög tæpt hvorir eru fleiri þeir sem vilja halda sænsku krónunni og þeir sem vilja taka upp Evru. Reyndar er þetta innan skekkjumarka og hvorugur hópurinn hefur meirhluta þjóðarinnar á sínu bandi.

Það hefur einmitt komið fram í fréttum að Finnar gráta nú mikið yfir því að trjáiðnaðurinn og fleiri fyrirtæki og atvinnustarfsemi er að flytjast til Svíþjóðar vegna gjaldmiðilsmálanna. En eins og þið vitið sitja Finnar frosnir með sína háu Evru á meðan Svíar ráða enn sínum eigin gjaldmiðli sem hefur gefið þeim meira svigrúm og sja´lfstæði til að vinna sig útúr kreppunni, heldur en öðrum smáríkjum sem bundnir er í fjötrum helfrosinnar Evru og mikils atvinnuleysis.

En þið gleðjist yfir hverju því sem gerir þetta apparat að einu sameinuðu altæku Stórríki, þannig að þar beri engan skugga á dýrðina og eindrægnina sem á að ríkja í Stórríki fullkomleikans.

Mikil er trú ykkar !

Að því loknu óska ég ykkur síðuhöldurum gleðilegrar hátíðar, með þökk fyrir opinn skoðanaskipti hér á síðunni á s.l. ári.

[Evrópusamtökin, www.evropa.is, 23.12.2009 kl. 18:29]

Sömuleiðis Gunnlaugur!