Makríllinn á Rás 2 - Einar K. notaði allt "vopnabúrið" gegn ESB

Makríldeilan milli Íslands. Noregs. Færeyja, ESB, Bretlands og Rússlands(!), var rædd á Rás 2 í morgun. Þar mættu Einar K. Guðfinnsson, fyrrum sjávarútvegsráðherra og sjálfstæðismaður og Ólína Þorvarðardóttir, frá Samfylkingu.

Einar, sem á rætur í útgerðarveldi á Bolungarvík, er mikill andstæðingur ESB og hann notaði allt "vopnabúrið" og ræddi um "óbilgirni", "hörku", "fantaskap", "kúganir", "hótanir" og "ögranir" frá ESB, en forðaðist að nota orðið Noregur í þessu samhengi. Norðmenn og ESB hafa ákveðið veiða um 90% af makrílkvótanum. Norðmenn eru ekki í ESB, en aðilar að EES, eins og við Íslendingar. Einar K. viðurkenndi að við hefðum farið okkur "óðslega" í byrjun makrílveiða hér um miðjan þennan áratug.

Ólína Þorðvarðardóttir (sem einnig notaði orðið "óbilgirni" ) benti á að við hefðum nú kannski ekki hegðað okkur mjög vel í sambandi við makrílinn og mokað honum upp í bræðslu. 

Makríll þykir fyrirtaks matfiskur víða í Evrópu og er t.d. reyktur og grillaður makríll lostæti. Ritari sá t.d. danskan þátt á RÚV um daginn, þar sem dönsk kona gerði ljúffenga máltíð úr grilluðum makríl.

Makríllinn er flökkustofn, sem þýðir að hann flakkar á milli lögsagna landanna hér á norðurhveli jarðar. Það er s.s. ekki um s.k. staðbundinn stofn að ræða, en langstærstur hluti stofna hér við land eru staðbundnir. "Flakkið" á makrílnum gerir málið því flókið og erfitt og snúnara.

 Ólína benti á að þetta væri langtímaverkefni. Þetta mál er að öllum líkindum ekki búið, heldur kannski rétt að byrja. 

MBL með frétt um hrygningu makríls hér við land. 

Athugasemdir

[Gunnlaugur I., 15.12.2010 kl. 10:17]

Makríllinn og deilan um hann er skólabókardæmi um það hvers vegna hagsmunum okkar í bráð og lengd er betur borgið sem fullvalda og sjálfstæðs strandríkis heldur en inna ESB helsisins !

Munurinn á ESB og Noregi í þessu sambandi er sá að Noregur hefur ekki verið með hótanir um refsingar og viðskiptaþvinganir gagnvart okkur íslendingum.

En það hafa hrokagikkirnir í ESB einmitt gert því að þeir hafa nú marg hótað okkur viðskiptaþvingunum og refsiaðgerðum af ýmsu tagi og sýnt okkur megnustu lítilsvirðingu á ýmsan hátt eins og hvað það ætti að þýða að svona fámenn þjóð gæti fengið að veiða svona mikið úr þessum flökkustofni.

Þeir ættu svo ekki að vera að hreykja sér neitt af því hvað þeir séu til fyrirmyndar um verndun fiskstofna og góða sjávarútvegsstjórn. Þvert á móti.

Þeirra fiskstofnar eru allir meira og minna í rúst sökum slaklegrar stjórnunar og virðingarleysi útgerðar- og sjómanna innan ESB fyrir handónýtum regluverkum skriffinnanna í Brussel.

Í öllu brölti og ráðslagi ESB furstanna sést sést best hvað hagsmunir okkar mættu sín einskis og yrðu einungis fótum troðnir innan um þessa stórkalla og hrokagikki valdsins.

Vörn okkar, hagsmunir okkar og öryggi þjóðarinnar felst fyrst og fremst í fullveldi okkar og óskoruðu sjálfstæði þjóðarinnar yfir öllum auðlyndum okkar, án ESB helsis !