Ingólfur Sverrisson í FRBL: Lærum af reynslunni

Í Fréttablaðinu í dag er að finna áhugaverð grein um ESB-málið, eftir Ingólf Sverrisson, forstöðumann málm- og véltæknisviðs hjá Samtökum Iðnaðarins. Fyrisögnin er "Lærum af reynslunni." 

Hann skrifar til að byrja með: ,,Fyrir eitt hundrað árum voru flestar þjóðir Evrópu mjög uppteknar af því að blása upp taumlausa þjóðernishyggju innan sinna landamæra. Hún byggðist á því að viðkomandi þjóð væri sérstakari, klárari og merkilegri á alla lund en aðrar þjóðir á meginlandinu og þess vegna flest leyfilegt.

Þetta kemur vel fram í þeirri merku bók „Veröld sem var" eftir Stefan Zweig sem lýsir því hvernig skólarnir voru nýttir til að innræta nemendum sínum dýrkun á öllu því sem þýskt var og um leið fyrirlitningu á nágrönnum sínum. Þetta voðalega fólk væru einlægt að troða illsakir við þá og því væri fátt göfugra en að lemja á þegnum þessara þjóða með vel heppnuðu stríði til að leysa þar með öll þessi leiðindi."

Svo segir Ingólfur: ,,Nú gerast hins vegar þau undur að hið virtasta fólk hér á landi telur engum vafa undirorpið að Evrópubúar vilji fá okkur í ESB til þess eins að svipta okkur auðlindunum, komast yfir allt sem fémætt getur talist og skilja okkur svo eftir í eymd og volæði. Þessu til sönnunar eru útfærðar hinar ótrúlegustu hvatir stjórnenda ESB gagnvart Íslandi og sagðar tröllasögur sem við nánari skoðun eiga sér enga stoð í raunveruleikanum.

Allur þessi málflutningur minnir á frásagnir kennara Stefans Zweig í bókinni, sem áður er nefnd, þegar hann þrumaði yfir nemendum sínum um yfirburði Þjóðverja og öll þau ósköp sem aðrar þjóðir vildu gera á hlut þeirra. Því væri fátt göfugra fyrir unga menn en að falla í stríði fyrir keisarann og fjölskyldu hans, eins og góði dátinn Svejk orðaði það.

Svipuð viðhorf virðast því miður vera enn landlæg hér á landi og ekki batnaði það eftir að kreppan skall á. Þá svall mönnum móður yfir því að við gátum ekki farið okkar fram í einu og öllu gagnvart Evrópubúum, sem ekki skyldu yfirburði okkar og snilld á fjármálasviðinu þrátt fyrir ítarlegar útskýringar! Þar var innræti þessa Evrópufólks vel lýst og því hljótum við að vera tilbúnir að fara nýja för til Sviðinsstaða að hætti áðurnefndra fóstbræðra og láta finna fyrir okkur. Við getum líka refsað ESB-þjóðum með því að einangra okkur hér við ysta haf, gefið þeim langt nef og treyst á eigin ágæti í anda sjálfbærrar þróunar. Þá munu Evrópubúar komast að því fullkeyptu, leggja niður skottið og hætta öllum áformum um að ræna Ísland!"

Öll grein Ingólfs 

Athugasemdir

[Stefán Júlíusson (IP-tala skráð) 15.12.2010 kl. 13:10]

Þetta er frábær grein.  Þetta er nákvæmlega það sem ég finn þegar ég er hér á landinu.  Furðuleg þjóðernishyggja.  Hún er einnig mjög sterk í Samfylkingunni sem kemur fram í því hvernig hún hagar sér gagnvart einstaklingum sem notfærðu sér EES samninginn.  En einstaklingar missu öll réttindi í október 2008. 

Þar á bæ segja menn að nú verði menn að fórna sér.  Hætta í samböndum erlendis og flytja til Íslands.

Sorglegt, sorglegt, sorglegt.  

Algerlega veruleika fyrrt lið.