Bryndís Ísfold: Þrír menn og króna

Bryndís Ísfold Hlöðversdóttir, framkvæmdastjóri Já Ísland, skrifaði grein í FRBL fyrir skömmu um gjaldmiðils og lánamál.

Hún segir: "Árið 2006 tókum við hjónin lán fyrir íbúð. Við áttum von á okkar fyrsta barni og fannst ábyrgðarlaust að vera ekki búin að festa rætur í fasteign áður en barnið kæmi. Við tókum lán upp á 18 milljónir sem stæði í dag í tæpum 27 milljónum eftir afborganir. Ákvörðun okkar um að taka lán færði nýja barninu ekki öryggi og festu, heldur gerði foreldrana að áhættufjárfestum. Íbúðina seldum við svo fyrir um ári fyrir 23 milljónir. Ef lánið hefði verið tekið í evruríki væru eftirstöðvarnar hins vegar um 15 milljónir og við værum 11 milljónum ríkari.

Eftir þessa reynslu er gremjulegt að fylgjast með stjórnmálamönnum tala um krónuna eins og hún sé bara unglingur í uppreisn. Þar eru fyrirferðamestir formennirnir Steingrímur J., Bjarni Benediktsson og Sigmundur Davíð, sem telja að vandi krónunnar sé sú uppeldisstefna sem hefur verið notuð hingað til, en ekki sú staðreynd að myntin okkar er sú eina í öndunarvél í allri Evrópu. "

Athugasemdir

[Anna Sigríður Guðmundsdóttir, 29.5.2012 kl. 09:27]

Bryndís. Það verður fundur í Iðnó í kvöld kl. 20.00. Þar verður Sturla Jónsson ásamt fleiri klárum mönnum, og án efa fræða þeir okkur um hvernig bankarnir brjóta lög. Það gera bankarnir án þess að nokkur fjölmiðill ríkisins fjalli um hvers konar banka-meðvirkni-stjórnvöld eru hér við völd.

Þú ættir að mæta á fundinn, og kynna þér málin.

M.b.kv.

[Sleggjan og Hvellurinn, 30.5.2012 kl. 13:22]

Áhugaverð grein.

Þjóðin mun átta sig á þessu fyrir þjóðaratkvæðisgreiðsluna um ESB samninginn þegar hann liggur fyrir.