Evrópusambandið og íslensk stjórnsýsla: Málþing

Félag stjórnsýslufræðinga og Stofnun stjórnsýslufræða og stjórnmála í samstarfi við
Félag forstöðumanna ríkisstofnana og Evrópustofu bjóða til málþings.

Evrópusambandið og íslensk stjórnsýsla:
Hver eru áhrif regluverks ESB og umsóknarferlis Íslands að sambandinu
á íslenskar stofnanir og sveitarfélög?

Fimmtudaginn 18. okt kl. 12-14:15 á Grand hótel Reykjavík.
Hádegisverður frá kl. 12- dagskrá hefst 12:15.
Skráning HÉR  Þátttökugjald kr. 5400.-, hádegisverður innifalinn.

Dagskrá:

1.  Setning og opnunarávarp.   Eggert Ólafsson,  formaður Félags stjórnsýslufræðinga.

2. Dr. Anamarija Musa kennari í opinberri stjórnsýslu við lagadeild Háskólans í Zagreb, Króatíu.  
Umbætur í stjórnsýslu Króatíu í tengslum við inngöngu landsins í ESB.

3.  Dr. Baldur Þórhallsson, prófessor við Stjórnmálafræðideild HÍ.
Evrópuvæðing íslenskrar stjórnsýslu - samanburður við hin Norðurlöndin.  Kynning á niðurstöðum rannsóknar.  

4.  Frá sjónarhóli sveitarfélaga
      Eiríkur B. Björgvinsson, bæjarstjóri á Akureyri frá Sambandi íslenskra sveitarfélaga

5.  Frá sjónarhóli ríkisstofnana
      Kristin Linda Árnadóttir,  forstjóri Umhverfisstofnunar
     Hrafnkell V. Gíslason, forstjóri Póst- og fjarskiptastofnunar 

Eftir framsögur verða panelumræður með frummælendum og með þátttöku Stefáns Hauks Jóhannessonar sendiherra og aðalsamningamanns vegna viðræðna um aðild Íslands að ESB. 
Fundarstjóri: Svavar Halldórsson, stjórnmála- og stjórnsýslufræðingur.

Evrópusamruninn hefur haft afgerandi áhrif á þróun íslensks samfélags í gegnum aðildina að Evrópska efnahagsvæðinu á þeim tveimur áratugum sem liðnir eru frá því að Ísland gerðist aðili að EES.  Það á ekki síst við um starfsemi og áherslur íslenskrar stjórnsýslu og opinberra stofnana á báðum stjórnsýslustigum.  Umsóknarferli Íslands að sambandinu mun hafa í för með sér breytingar á stjórnsýslunni og þá ekki síður kjósi Ísland að ganga í Evrópusambandið. 

Á fundinum  verður  m.a. leitað svara við eftirfarandi spurningum:
1. Að hvaða leyti  hefur EES samningurinn, innleiðing regluverks ESB í íslensk lög og umsóknarferli Íslands að ESB haft áhrif á og leitt til breytinga á áherslum og verkefnum íslenskrar stjórnsýslu, hjá ríki, sveitarfélögum og opinberum stofnunum?
2. Hefur það leitt til framfara fyrir starfsemina og málaflokkinn eða haft neikvæð áhrif á þróun starfsins?
3. Hver er reynsla Norðurlandanna?
4. Hver er reynsla ríkis sem fær væntanlega aðild að ESB á næsta ári?  

Frummælendur eru dr. Anamarija Musa kennari í opinberri stjórnsýslu við lagadeild Háskólans í Zagreb, Króatíu, en hún hefur í rannsóknum sínum lagt áherslu á að skoða  umbætur í opinberri stjórnsýslu í Króatíu í tengslum við aðildarumsókn landsins að ESB.

Þá mun dr. Baldur Þórhallsson, prófessor við Stjórnmálafræðideild HÍ  fjalla um niðurstöður umfangsmikillar samanburðarrannsóknar  um Evrópuvæðingu stjórnsýslunnar  á Norðurlöndum. 

Eiríkur B. Björgvinsson, bæjarstjóri á Akureyri frá Sambandi íslenskra sveitarfélaga  mun síðan ræða efnið f rá sjónarhóli sveitarfélaga og Kristin Linda Árnadóttir,  forstjóri Umhverfisstofnunar og Hrafnkell V. Gíslason, forstjóri Póst- og fjarskiptastofnunar frá sjónarhóli stofnana sinna.  

Eftir framsöguerindi verða pallborðsumræður með þátttöku frummælenda, en auk þeirra mun Stefán Haukur Jóhannesson sendiherra og aðalsamningamaður Íslands í aðildarviðræðum við Evrópusambandið taka þátt í pallborði og bregðast við erindum.  

Fundarstjóri og stjórnandi pallborðs er Svavar Halldórsson, stjórnmála- og stjórnsýslufræðingur.

Dr. Anamarija Musa sem er sérstakur gestur ráðstefnunnar er kennari við lagadeild Háskólans í Zagreb, Króatíu.  Hún er lögfræðingur að mennt og hefur sérhæft sig í stjórnsýslulögum og opinberri stjórnsýslu m.a. með áherslu á Evrópufræði og evrópska stjórnhætti.   Hún  hefur tekið þátt í mörgum evrópskum verkefnum á sínu rannsóknarsviði og skoðað m.a. Evrópuvæðingu stjórnsýslunnar í Króatíu í tengslum við umsókn landsins að ESB og ritað fjölda greina og bókakafla um þessi efni.

Athugasemdir

[Sigurgeir Jónsson, 9.10.2012 kl. 03:17]

Var hætt við að bjóða borgarstjóranum í Aþenu.Og af hverju.Hafa ekki Grikkir meiri reynslu af ESB en Króatar.Nei við ESB og áróðri þess.En snjallt hjá ESB í áróðrinum að fá einn helsta ESBfréttamann rúv til að stjórna áróðurssamkundunni og stofna til hennar.Tilgangur ESB helgar meðul þess.Nei við sóðalegum ESBáróðri.Nei við ESB.

[Sigurgeir Jónsson, 9.10.2012 kl. 03:22]

Og þurfti að laga obinbera stjórnsýslu í Króatíu eftir áratuga stjórn kommúnista á landinu.Það kemur á óvart.Það er ekki einu sinni hægt að hlæja að þessum Króatíska prófessor og ESB-ruv.Nei við ESB.

[Sigurgeir Jónsson, 9.10.2012 kl. 03:35]

Og  forstjóri Póst og Fjar ætlar ekki að sitja hjá við að koma boðskap ESB guðs síns Steingríms J. til skila.Og allir vita hvaða guð Umhverfistofnun tilbiður.Nei við ESB.

[Þorsteinn Briem, 9.10.2012 kl. 03:39]

"Evrópuherinn" yrði nú ekki í vandræðum með að drekkja Sandgerðismóra.

Í annað sinn.

[Þorsteinn Briem, 9.10.2012 kl. 03:49]

8.10.2012 (í gær):

Björn Valur Gíslason segir já við góðum ESB-samningi - Sjálfstæðisflokkurinn ósamstarfshæfur

[Þorsteinn Briem, 9.10.2012 kl. 04:01]

8.10.2012 (í gær):

"Ekki er raunhæft að ætla að aðildarviðræðunum við ESB ljúki fyrir þingkosningarnar í apríl, að mati Árna Þórs Sigurðssonar, þingmanns VG og formanns utanríkismálanefndar.

Árni Þór segir það hvergi hafa verið skrifað niður að viðræðum skyldi lokið á kjörtímabilinu."

"Það er [...] brýnt að það verði íslenska þjóðin sem ákveður framtíð sína hvað tengslin við Evrópu áhrærir og sá réttur verði ekki af henni tekinn.

Og því [...] væri misráðið að slíta viðræðum nú."

Útséð um að viðræðum ljúki fyrir kosningar

[Þorsteinn Briem, 9.10.2012 kl. 04:10]

8.10.2012 (í gær):

ESB ekki fyrirstaða frekara samstarfs við Samfylkinguna

[Þorsteinn Briem, 9.10.2012 kl. 04:18]

8.10.2012 (í gær):

ESB féllst á opnunarviðmið um landbúnað