Andrés Pétursson í FRBL: Hvað meinar þú Ögmundur?

Andrés Pétursson, formaður Evrópusamtakanna, skrifaði grein í Fréttablaðið þann 17.1 um Evrópumálin. Greinin birtist hér öll með leyfi höfundar.

Hvað meinar þú Ögmundur?

Allt frá því að aðildarviðræður við Evrópusambandið hófust árið 2009 hafa andstæðingar aðildar reynt með alls konar brögðum að torvelda ferlið. Alls kyns gróusögum um ímyndaðar hindranir hefur verið haldið á lofti, meðal annars að Íslendingar þyrftu að senda hermenn í einhvern ímyndaðan Evrópuher og að landsmenn yrðu að breyta ýmsu í sinni stjórnsýslu áður en af aðild yrði. Eftir því sem viðræðunum hefur miðað áfram hefur komið í ljós að flestar ef ekki allar þessar flökkusögur hafa ekki átt við nein rök að styðjast.

Ein af lífseigustu sögunum hefur verið sú að það hafi skaðað hagsmuni Íslendinga að fara af stað í þennan leiðangur án nægjanlega sterks pólitísks baklands á Íslandi. Samhentari ríkisstjórn hefði sjálfsagt haldið betur á málinu en ég hef aldrei skilið þetta „bjölluats"-tal sem andstæðingar hafa klifað á. Staðreyndin er sú að Íslendingar uppfylla öll skilyrði Evrópusambandsins fyrir aðild, meðal annars að hér sé virkt markaðshagkerfi og virðing fyrir mannréttindum sé í hávegum höfð. Alþingi Íslendinga sótti um aðild með öruggum meirihluta. Þingið hefur einnig þegar einu sinni fellt tillögur um að hætta aðildarviðræðunum. Hvað er ekki rétt við þetta ferli?

Þvæla

Það væri óðs manns æði að reyna að leiðrétta alla þá þvælu sem öfgafyllstu andstæðingar aðildar hafa haldið fram. En þegar ágætlega vel gefnir menn eins og Ögmundur Jónasson innanríkisráðherra halda fram órökstuddum fullyrðingum um skaðsemi aðildarviðræðna þá verður maður að drepa niður penna. Í grein í Morgunblaðinu nýverið hélt ráðherrann því fram að Norðmenn hefðu skaðast af því að sækja um aðild. „Er það mál manna að Norðmenn hafi lengi þurft að súpa seyðið af því að draga ESB-ríkin á asnaeyrum," segir Ögmundur í greininni.

Ég fór því á stúfana og talaði við vini mína í norsku utanríkisþjónustunni og norska fræðasamfélaginu og spurði þá út í þessar yfirlýsingar. Einnig ræddi ég við embættismenn í íslenska utanríkisráðuneytinu. Enginn kannaðist við að Norðmenn hefðu verið látnir gjalda fyrir að fara í það lýðræðislega ferli að sækja um aðild að Evrópusambandinu og láta síðan norsku þjóðina kveða úr um það hvort landið yrði meðlimur eður ei. Í þessu sambandi má einnig benda á að ég spurði Joe Borge, fyrrum utanríkisráðherra Möltu, þegar hann var hér í heimsókn árið 2010 hvort það hefði skaðað hagsmuni Maltverja að umsóknarferli þeirra dróst mjög á langinn. „Nei, alls ekki. Evrópusambandið gengur út á pólitískar lausnir. Þeir hafa því mikinn skilning á að stundum þurfa þjóðir lengri tíma til að útkljá svona stórt pólitískt hitamál," var svar þessa reynda stjórnmálamanns.

Veit Ögmundur um einhver dæmi sem hann getur deilt með okkur hinum um þessi meintu vandamál Norðmanna? Ef ekki þá bið ég hann og aðra að ræða þetta mikla hitamál af yfirvegun en ekki sleggjudómum eða órökstuddum fullyrðingum.

Athugasemdir

[Ómar Bjarki Kristjánsson, 17.1.2013 kl. 12:54]

Auðvitað getur Ömmi ekki komið með nein dæmi eða rök. þetta er einn versti pólitíkus íslandssögunnar.

[Sigurgeir Jónsson, 17.1.2013 kl. 13:28]

Þú skilur ekki Ögmund Andrés.En liggur það ekki fyrir og hefur það ekki legið fyrir að líkurnar á því að íslendingsr myndu hafna inngöngu í ESB væru yfirgnæfandi.Var það ekki næg ástæða til þess að sækja ekki um.Því miður sitja íslendingar nú uppi með það að þeir séu ómerkingar og umsókninn hafi verið gerð í fíflagangi.Það er ekkert grín.Best fer á því að setja tímamörk á umsóknina og ef ekki verður komin niðurstaða eftir átta mánuði þá verði kosið um hvort halda skuli áfram.Það verður trúlega skást að fara þá leið svo landið verði sér ekki meira til skammar en orðið er.Vitanlega þarf líka að fara strax eftir kosningar í viðræður við lykilþjóðir ESB til að kynna þeim að málið hafi allt verið mistök frá upphafi til enda.Nei við ESB.

[Sigurgeir Jónsson, 17.1.2013 kl. 13:38]

Það þjónar einfaldlega ekki hagsmunum Íslands sem er hugsanlega á leiðinni í annað hrun,að ESB komist upp með að setja umsóknina í frost .Krefjast verður niðustöðu í málið.En formaður Evrópusamtakanna virðist nú telja í lagi að engin niðurstaða fáist fyrr en eftir kanski 10-20 ár samanber Tyrki.Hvaða heimild hefur þú til þess að koma með þessa afstöðu fyrir hönd Evrópusamtakanna Andrés.Ég veit ekki til þess að neinn fundur hafi verið haldinn í Evrópusamtökunum, þar sem þessi afstaða þín hefur verið samþykkt.Er ekki rétt að þú farir að boða okkur félaga í Evrópusamtökunum til fundar, þar sem þessi afstaða þín verður tekin fyrir.Nei við ESB, og einræðisttilburðum aftaníossa þess.