Sameinumst um hagsmuni Íslands!

Árni Þór Sigurðsson, þingmaður VG og formaður utanríkismálanefndar Alþingis skrifar áhugaverða grein um Evrópumál á www.pressan.is. Þar fjallar hann um hagsmuni Íslands í komandi aðildarviðræðum og mikilvægi þess að halda á lofti hagsmunum landsins.

Í grein sinni segir Árni m.a.: ,, Óháð því hvort Ísland gerist aðili að Evrópusambandinu eða ekki, þá varðar stefnumörkun sambandsins í sjávarútvegsmálum okkur Íslendinga.  Okkur ber því skylda til að beita áhrifum okkar í þágu íslenskra hagsmuna.  Allt framlag af þessum toga mun styrkja samningsstöðu Íslands þegar hinar eiginlegu aðildarviðræður við ESB hefjast síðar á árinu.  Um það eiga allir að geta sameinast, bæði þeir sem eru einarðir andstæðingar aðildar Íslands að ESB og eins hinir sem eru eindregnir stuðningsmenn.”

Öll greinin

Gleðilega páska!

Evrópusamtökin óska landsmönnum nær og fjær GLEÐILEGRA PÁSKA.

(Og bara til að hafa það á hreinu: Gangi Ísland í ESB, munum við halda páskaeggjunum! ESB hefur t.d. ekki enn tekið þau af Svíum!)

Úlfar svarar Helga Á. Grétarssyni

Fáir þekkja fiskveiðistjórnunarkerfi jafnvel og Úlfar Hauksson, höfundur bókarinnar ,,Gert út frá Brussel.” Fyrir skömmu ritaði hann grein í Fréttablaðið, en þar svaraði hann grein eftir Helga Áss Grétarsson. Í grein sinni segir Úlfar m.a.:

,,Helgi Áss Grétarsson, sérfræðingur við Lagastofnun Háskóla Íslands , birti grein hér í Fréttablaðinu þann 27. mars sl. undir yfirskriftinni „Söguskoðun sófaspekinga". Í greininni er Helgi að kenna íslenskum „mennta- og gáfumennum", sem hann kallar „sófaspekinga", lexíu varðandi þróun íslenska fiskveiðistjórnunarkerfisins. Helgi setur ofan í við „sófaspekingana" fyrir skort á almennri þekkingu á þróun íslensks sjávarútvegs auk þess sem hann segir þá gefa ranga mynd af samspili gengisfellinga íslensku krónunnar og afkomu sjávarútvegsins. Ekki er ætlunin að fara nánar út í gagnrýni Helga á „sófaspekingana". Hins vegar er augljóst að upprifjun Helga á handstýrðri hagstjórn fortíðar með síendurtekinni rússíbanareið gengisfellinga íslensku krónunnar er ekki neinum bjóðandi; hvorki einstaklingum né fyrirtækjum hvort heldur sem er til sjávar eða sveita. Grein Helga undirstrikar því hina hrópandi þörf fyrir stöðugleika í efnahagsmálum til framtíðar. Til að slíkt geti orðið þarf að taka upp annan gjaldmiðil. Flestir gera sér grein fyrir þessari staðreynd og jafnframt því að eini gjaldmiðillinn sem kemur til greina er evra. Auk þess gera flestir sér grein fyrir því að evra fæst ekki nema með aðild að ESB."

Öll grein Úlfars