Orðið á götunni...

Fátt hefur meira verið rætt en "Heimssýnar-tillaga" Vigdísar Hauksdóttur og Ásmundar Einars Daðasonar, sem lögð var fram (meingölluð) á Alþingi. Eyjan fjallar um þetta í "Orðið á götunni," en þar segir:

,,Orðið á götunni er að minnkandi virðing fyrir Alþingi geti varla komið á óvart ef litið er til vinnubragða sem þar þrífast, frammi fyrir alþjóð.

Í gær greindi Eyjan frá því að sjö þingmönnum úr fjórum stjórnmálaflokkum hefði yfirsést eitt af grundvallarákvæðum nýlegra laga um þjóðaratkvæðagreiðslur, en þar segir að ekki sé hægt að boða til þjóðaratkvæðagreiðslu innan þriggja mánaða (nema þegar forseti synjar lögum staðfestingar). Þetta ákvæði hefur ávallt verið talið mikilvægt til að tryggja að stjórnvöld boði ekki til þjóðaratkvæðis með skömmum fyrirvara og án kynningar á viðkomandi málefni. Vekur því furðu að þingmönnunum hafi ekki verið kunnugt um þetta grundvallaratriði

Ekki batnaði staðan þegar fyrsti flutningsmaður tillögu um að boða til þjóðaratkvæðis eftir aðeins rúman mánuð – andstætt fyrrnefndum lögum – reyndi að skýra mál sitt í útvarpi í gær. Sagðist hún einfaldlega hafa gleymt þessu ákvæði og að „skammtímaminnið“ hefði brugðist. Þó sat hún sjálf í allsherjarnefnd, sem samdi og samþykkti frumvarpið um þjóðaratkvæði í sumar.

Enn lægra lagðist þingmaðurinn svo með því að skella skuldinni á starfsmenn Alþingis – að þeir hefðu átt að reka augun í þessa villu í hennar tillögu, vera einhverskonar öryggisnet gagnvart hennar eigin afglöpum." Lesa meira hér 

Fréttablaðið greinir svo frá því að tillagan komist sennilega ekki á dagskrá fyrr en í Nóvember, eftir kjördæmaviku Alþingis.

Formaður Evrópusamtakanna: Sönn lýðræðisást (FRBL)

Andrés Pétursson, formaður Evrópusamtakanna, skrifar grein í Fréttablaðið í dag um hina kostulegu þingsályktunartillögu  sem Heimssýn lagði fram á Alþingi í vikunni (að vísu var Vigdís Hauksdóttir fyrsti flutningsmaður, en tillagan gengur almennt undir nafni Nei-samtakanna).

Grein Andrésar barst okkur og er svona:

"Nú hafa nokkrir þingmenn innblásnir af lýðræðisást lagt fram þingsályktunartillögu að samhliða kjöri til stjórnlagaþings skuli einnig greitt atkvæði um hvort haldið skuli áfram viðræðum við Evrópusambandið. 

Þetta er auðvitað stórsnjöll tillaga enda slær hún tvær flugur í einu höggi. Í fyrsta lagi kemur þetta í veg fyrir að við fáum að vita hvað hægt er að fá út úr viðræðum við þetta ferlega fyrirbæri sem ESB er og í seinna lagi þá sparar þetta þingmönnunum það ómak að leggja fram aftur tillögu sína að draga eigi umsóknina til baka. Af einhverjum ástæðum voru þeir hálf-hræddir að hún myndi ekki vera samþykkt á Alþingi.

Í anda þessarar lýðræðisástar eiga þessir þingmenn auðvitað að víkka út þessa þjóðaratkvæðishugmynd og taka fleiri kosningar inn í pakkann. Til dæmis væri þjóðráð að kjósa hvort viðhalda eigi núverandi kvótakerfi í sjávarútvegi. Einnig mætti kjósa um hvort hækka eigi skatta eða lækka þá. Svo mætti taka inn þjóðlendumálin og kjósa um þau um allt land. Í einstökum kjördæmum mætti til dæmis kjósa um opnun áfengisverslunar eða hvort sameina eigi fleiri sveitarfélög. Kópavogsbúar og Reykvíkingar gætu hæglega kosið um hugmynd borgarstjórans að sameina þessi tvö sveitarfélög. Álftesingar gætu tekið afstöðu til sameiningar við Hafnarfjörð, Garðabæ eða Reykjavík. Þetta er nefnilega gullið tækifæri til að láta hið fullkomna lýðræði verða að veruleika.

Þessari áskorun er hér með komið á framfæri við þessa sjö mjög svo verðugu fulltrúa okkar á Alþingi. Allt í nafni þess að þjóðin fái nú örugglega ekki að kynna sér hugsanlegan samning við Evrópusambandið og að kjósa um slíkan samning."

Ásmundur Einar vill tvíhliða viðskiptasamning við USA (er í VG!)

Það er margt skrýtið í kýrhausnum! Lög hefur verið fram þingsályktunartillaga um að kanna möguleikana á tvíhliða viðskiptasamningum við Bandaríkin. Hljómar kannski ekkert sérkennilega - fyrr en maður les nöfn flutningsmanna, en þar er að finna Ásmund Einar Daðason, þingmann VG og formann Nei-samtakanna, Heimssýnar!

Gerum ráð fyrir að ÁED sé sósíalisti, jafnvel kommúnisti. Hann er allavegana í VG og þar eru jú þeir allra róttækustu til vinstri í pólitíkinni.

Ásmundur segir að hann geri þetta til þess að "hugsa úr fyrir rammann" En er hann ekki bara lengst úti á túni? Ásmundur er jú búfræðingur og bóndi.

Fjallað er um málið á www.visir.is og þar segir: ,,Málið var síðast rætt á Alþingi fyrir tæpu ári, en þá svaraði Össur Skarphéðinsson utanríkisráðherra því til að niðurstaðan af slíkum athugunum hafi jafnan verið á þá leið að slíkt þyki ekki fýsilegt, bæði vegna þess að Bandaríkin hafi ekki sýnt neinn áhuga á tvíhliða fríverslunarsamningi við Ísland, en einnig vegna þess að Bandaríkin hafi gefið skýrt til kynna „að forsenda fríverslunarsamnings væri sú að markaðsaðgangur fyrir landbúnaðarvörur, þar með taldar viðkvæmar landbúnaðarvörur, svo sem kjöt og mjólkurvörur, yrði bættur mjög verulega frá því sem nú er"."

Ásmundur Einar berst eins og hann getur gegn ESB, m.a. með þeim rökum að að sé gert vegna íslenskra bænda, að landbúnaðurinn hrynji (sem hefur hvergi gerst), m.a. vegna innflutnings á landbúnaðarvörum.

Finnst sama Ásmundi þá allt í lagi að fluttar séu inn bandarískar landbúnaðarvörur, eða vill Ásmundur hafa samninginn þannig að HANN ákveði hvað Bandaríkjamenn mættu eða ættu að flytja hingað inn? Það væri nokkuð dæmigert fyrir íslensk stjórnmál...sem eru bara illskiljanleg á köflum.

Þetta er kannski ágætt dæmi um það!

Svo segir Ásmundur: ,,„Auðvitað eru víða hindranir í vegi svona samninga," segir Ásmundur Einar Daðason, þingmaður Vinstri grænna, og einn af fjórum flutningsmönnum tillögunnar. Hann telur þó enga ástæðu til að láta þær hindranir koma í veg fyrir að menn reyni eins og hægt er að ná samningum."

Halló! Er ekki hægt að segja það sama um ESB og samningaviðræðurnar við það? Þar eru hindranir, en alls engin ástæða til koma í veg fyrir að sé reynt að ná hagstæðum samningi!

Sem er akkúrat það sem Ásmundur er að reyna að gera!

Er heil brú í þessu?

Frétt Vísis

Steinunn Stefánsdóttir: Er furða að traustið sé lítið?

Steinunn Stefánsdóttir skrifar góðan leiðara í FRBL í dag og fjallar þar um traust á Alþingi og hina "mögnuðu"  "Ég gleymdi þessu bara"- þingsályktunartillögu Vigsdísar Hauksdóttur og Ásmundar Einars Daðasonar, sem sagt hefur verið frá í fjölmiðlum.

Steinunn skrifar: ,,Á þriðjudag lögðu nokkrir þingmenn úr öllum flokkum nema Samfylkingu fram þings­ályktunartillögu um að fela dómsmálaráðherra að efna samhliða kosningunni til stjórnlagaþings til þjóðaratkvæðagreiðslu um hvort halda eigi áfram aðlögunar- og viðræðuferli um aðild Íslands að Evrópusambandinu.

Kosið verður til stjórnlagaþings eftir liðlega fimm vikur. Alþingi samþykkti hins vegar í sumar mótatkvæðalaust lög um framkvæmd þjóðaratkvæðagreiðslu þar sem kveður á um að til hennar skuli gengið í fyrsta lagi þremur mánuðum og í síðasta lagi einu ári eftir að tillaga um þjóðaratkvæðagreiðslu hefur verið samþykkt á þingi.

Fyrsti flutningsmaður þingsályktunartillögunnar, Vigdís Hauksdóttir, úr Framsóknarflokki segist einfaldlega hafa gleymt þessu tímarammaákvæði laganna sem hún samþykkti sjálf fyrir aðeins fjórum mánuðum! En hún brá skjótt við og skellti í breytingartillögu á lögunum þar sem tímaramminn er rýmkaður.

Einn meðflutningsmanna Vigdísar í þingsályktunartillögu um þjóðaratkvæðagreiðslu um framhald Evrópusambandsviðræðna er Ásmundur Einar Daðason úr Vinstri grænum. Hann er líka einn flutningsmanna þingsályktunartillögu um að efnt verði til viðræðna um tvíhliða fríverslunarsamning við Bandaríkin."

Leiðaranum lýkur svona: ,,Báðar þessar þingsályktunartillögur eru dæmi um illa undirbúin og illa ígrunduð mál sem lögð eru fyrir þingið sem þar með þarf að verja tíma til umfjöllunar um þau. Það er líklega ekki nema von að traust íslensks almennings á Alþingi sé lítið?"

ESB-umræðan á fullu

Það er óhætt að bullandi ESB-umræða sé í samfélaginu. Spegill RÚV í kvöld var t.d. nánast alfariðum Evrópumál, með viðtölum við Eirík Bergmann og Pat Cox. Heyra hér.

Í Kastljósinu mættus þeir Ásmundur Einar Daðason, formaður Heimssýnar og Jón Steindór Valdimarsson, formaður Sterkara ísland og ræddu m.a. hina meingölluðu þingsályktunartillögu sem Ásmundur og Nei-liðar standa fyrir á Alþingi. Horfa hér

 

 

Evrópuþinmgið samþykkir lengra fæðingarorlof

Á www.ruv.is segir: "Evrópuþingið hefur samþykkt að lengja fæðingarorlof mæðra í aðildarríkjunum í tuttugu vikur á fullum launum. Tillagan var samþykkt í þinginu með miklum meirihluta atkvæða í gær. Leiðtogaráðið á eftir að fjalla um málið.

Fram til þessa hafa konur getað tekið að minnsta kosti fjórtán vikna fæðingarorlof í aðildarríkjunum. Í sumum aðildarríkjunum geta mæður tekið lengra fæðingarorlof, jafnvel allt að átján mánuðum. Ekki er hróflað við þeim rétti með samþykkt Evrópuþingsins heldur er aðeins verið að leggja til lágmarks fæðingarorlof."

Öll fréttin

Össur í DV: Sveitir, sjór og ESB

Össur Skarphéðinsson, "utanríkis", skrifar grein í DV í dag um landbúnaðar og sjávarútvegsmál. Hann byrjar svona:

,,Flestir Íslendingar eru, líkt og utanríkisráðherrann, komnir af smábændum og sjómönnum. Sveitin og sjórinn eru rík í eðli okkar allra. Margir af minni kynslóð hafa verið á sjó, eða unnið í fiski. Þannig var ég sjómaður á ungum aldri á Vestfjörðum á sama tíma og sá eldri af ritstjórum DV og við slörkuðum saman í landlegum. Ég ólst líka að hálfu leyti upp innan um virðulegar og gáfaðar verðlaunakýr á Mýrunum. Allir,sem hafa sjóinn og sveitina í blóðinu, vilja hag starfsstéttanna sem þeim tengjast sem bestan. Efasemdir sumra um Evrópusambandið tengjast því. Þeir heyra sönginn úr Mogganum sem náttangt og daglangt klifar ranglega á því að fiskimiðin verði tekin af okkur, og bændastéttinni verði hent fyrir björg ef þjóðin samþykkir aðildarsamning. Hvoru tveggja er rangt, og byggt á misskilningi.

Bábiljan um ræningjaflotann
Við heyrum því oft haldið fram að gengi Ísland í Evrópusambandið liði varla dagur áður en sjóræningjaflotar frá Evrópu væru komnir inn fyrir lögsöguna að stela íslenskum fiski. Þetta er hrein bábilja, sem byggir á mikilli vanþekkingu. Engin þjóð innan Evrópusambandsins mun geta fært sannfærandi rök fyrir kröfu um aflaheimildir úr staðbundnum stofnum Íslendinga. Reglur Evrópusambandsins eru ekki þannig, og það hefur legið fyrir um árabil."

Gleðileg rest, hér

Kristján Vigfússon: Pólitík fyrst, svo almenningur?

Í nýjum pistli á Pressunni, gerir Kristján Vigfússon, svokallaða IPA-styrki að umtalsefni sínu. Athygli hefur vakið að nokkrir ráðherra VG, ætla ekki að nýta sér þá eða nota í sínum ráðuneytum. Kristján skrifar:

,,Fréttir berast af því úr röðum Vinstri Grænna að ráðherrar þar á bæ ætli ekki að nýta sér styrki frá Evrópusambandinu sem miða að því að færa stjórnsýslu til betra horfs á Íslandi til hagsbóta fyrir almenning.

 Þessir styrkir eru kvaðalausir og ekki eru fordæmi fyrir því að ríki sem hefur sótt um aðild hafi hafnað þessum styrkjum. Nægir þar að nefna frændur okkar Svía og Finna. Ég veit ekki hvort viðkomandi ráðherrar hafa lesið nýlega skýrslu starfshóps forsætisráðherra frá því í maí sl. um viðbrögð stjórnsýslunnar við skýrslu rannsóknarnefndar Alþingis. Ef þeir hafa ekki lesið hana þá vildi ég minna þá á að stjórnsýslan er fyrir almenning.  Grípum aðeins niður í þeirri skýrslu og þeirri einkunnagjöf sem íslenska stjórnsýslan fær:
„Íslensk stjórnsýsla, eins og hún birtist í skýrslu rannsóknarnefndar Alþingis, „Aðdragandi og orsakir falls íslensku bankanna 2008 og tengdir atburðir“, er brotakennd og einkennist af skorti á ábyrgð.“
 Hinn faglegi grundvöllur stjórnsýslunnar er veikur, ekki bara vegna ómarkvissra pólitískra inngripa í störf hennar heldur einnig vegna smæðar eininga hennar, persónutengsla og ónógrar áherslu á faglega starfshætti."

Kristján ræðir svo áfram um skýrsluna og kemur m.a. inn á starfsmanna og ráðningamál í ráðuneytum, en það nokkuð sem hefur verið í umræðunni að undanförnu, m.a. vegna ráðningar í starf upplýsingafulltrúa í Sjávarútvegsráðuneytinu.

Í lok pistilsins segir Kristján: ,,Ég trúi því ekki að þessir styrkir verði afþakkaðir en ef það verður reyndin þá er ljóst að viðkomandi stjórnmálamenn láta pólitík koma á undan hagsmunum borgaranna."

Pistillinn í heild sinni

Er þetta ekki bara gamla "Bjarts-í-Sumarhúsum"-syndrómið" að birtast? Að berja höfðinu í steininn, hvað sem á dynur!

Pat Cox: Lausn möguleg á fiskveiðimálum

RÚV birtir frétt um Pat Cox á vef sínum í kvöld sem hefst svona: ,,Pat Cox, fyrrverandi forseti Evrópuþingsins, telur lausn mögulega í fiskveiðimálum í aðildarviðræðum Íslands við Evrópusambandið." Lesa meira hér

Eva Joly: Ísland á að ganga í ESB - Nei-sinnar "hoppandi"!!

DV greinir frá í litlu "Sandkorni" að Nei-sinnar Íslands séu hoppandi fúlir yfir ummælum Evu Joly í Silfri Egils um síðustu helgi, þess efnis að Ísland ætti að ganga í ESB og rétti staðurinn fyrir landið væri innan sambandsins, en ekki áhrifalaust fyrir utan.

Þetta er nefnilega sannleikur sem Nei-sinnar þola ekki að heyra. 

Joly er þingmaður Evrópuþingsins og þekki ESB vel, talar því af reynslu. Eva, er líka, eins og margar konur - skynsöm kona.

Hvað segja t.d. húsmæður Íslands um möguleikann á 10-20% lækkun matvæla? Þær kaupa flestar inn.

Fyrir meðalfjölskyldu myndi lækkun matarverðs við aðild þýða sparnað sem nemur flugferð fjögurra manna fjölskyldu til Bretlands eða Norðurlandanna, á ári! Við erum s.s. að tala um umtalsverðar upphæðir!

Viðtal Egils og Joly:

Sandkorn DV

Reykjavík vill verða "Græn borg Evrópu"

MBL segir frá því í dag að Reykjavíkurborg og fulltrúar frá henni taki nú þátt í ráðstefnu þar sem "grænar borgir" verða valdar. Í fréttinni segir: ,,Að sögn S. Björns Blöndals, aðstoðarmanns borgarstjóra, mun Jón halda kynningu á ráðstefnunni „European Green Capital“ á morgun. Þá verða grænu borgir Evrópu fyrir árin 2012 og 2013 útnefndar og segir Björn að Reykjavík komi þar til greina."

Jón Gnarr mun flytja erindi á ráðstefnunni.

Hamborg er græna borgin í ár, en hér má lesa allt saman um þetta.

Það væri nú spennandi að sjá Reykjavík takast á við að að vera "græn borg." Þær verða m.a. að vera til fyrirmyndar í umhverfismálum og setja sér metnaðarfull markmið á því sviði.

Pat Cox: ESB ásælist ekki auðlindir Íslands!

Eyjan segir frá: ,,Pat Cox, fyrrverandi þingmaður á írska þinginu og fyrrverandi þingmaður á Evrópuþinginu, hvetur Íslendinga til að hugsa með stolti og sjálfstrausti til aðildar að Evrópusambandinu. Þá segir hann það lýsa vanþekkingu á ESB að halda að sambandið ásælist auðlindir Íslands.

Pat Cox er forseti European Movement International og hélt fyrirlestur í dag í boði Alþjóðamálastofnunar H.Í. og Sterkara Íslands – samtaka sem mæla með aðild að ESB.

Pat Cox segir Íra eiga tvo fullveldisdaga – hinn fyrri miðast við sjálfstæði landsins frá Bretum árið 1922, en hinn síðari með ákvörðun um að ganga í Evrópubandalagið árið 1972 og með fullri inngöngu ári síðar.

„Fyrri áfanginn skýrir sig sjálfur, en með þeim síðari byggðum nýja brú fyrir meira frelsi og fleiri tækifæri fyrir alla Íra,“ sagði Cox og benti á að innganga í ESB hefði aukið umsvif Íra í Evrópu án þess að dregið hefði úr viðskiptum við Bandaríkin. Þetta hafi því verið „win-win“ staða.

ESB ásælist ekki auðlindir Íslands

Cox ræddi efnahagsástandið á Írlandi, sem átt hefur undir högg að sækja undanfarin misseri. Sagði hann Íra, rétt einsog fleiri, einfaldlega hafa gengið of langt þegar lausafé flæddi yfir hinn vestræna heim.

„Við þurfum þó ekki aðstoð Alþjóðagjaldeyrissjóðsins og við þurfum ekki gjaldeyrishöft, enda staða okkar varin með evrunni,“ sagð hann og bætti við að á Írlandi hefðu hvorki verðbólga né vextir hækkað, líkt og á Íslandi.

Cox sagði það lýsa vanþekkingu á Evrópusambandinu að halda því fram að sambandið hyggðist ásælast auðlindir Íslands. Slíkt hefði sambandið hvergi gert. „Evrópusambandið gæti hagnast á því ef þið finnið nýjar orkuauðlindir – en þá þarf það líka að borga fyrir það fullu verði,“ sagði hann."

Öll frétt Eyjunnar

Fjöldi manns hlýddi á Pat Cox í hátíðarsal H.Í. í dag.

Vigdís Hauksdóttir: Almenningsálitið skiptir ekki máli - Klúðrið algert!

Málið er mjög vandræðalegt! Í því afhjúpast örvænting Nei-sinna, kunnáttuleysi og flumbrugangur, sem miðar að því að hindra íslensku þjóðina í að fá að taka upplýsta afstöðu til aðildarsamnings að ESB.

Vigdís Hauksdóttir (Framsóknarflokki)  fór mikinn á Rás 2 seinnipartinn, en þar var hún að reyna að verja sig og sína samflutningsmenn í þessu hallærislega máli. Þetta "gleymdist" sagði hún og hún sagðist ekkihafa ,,munað eftir því" að þriggja mánaða frestur verður að vera frá því að þingályktunartillaga er samþykkt, þangað til að hægt er að greiða þjóðaratkvæði um hana. ,,Ég hefði átt að vita þetta," sagði Vígdís, sem er lögfræðingur að mennt og samþykkti sjálf lögin á sínum tíma, sem hún gleymdi að reikna með!

Það sama má segja um formann Nei-sinna, Ásmund Einar Daðason, sem einnig samþykkti þessi lög á sínum tíma.

Þá reyndi hún einig að skella skuldinni á starfsfólk Alþingis, sjá hér. Þaðverður að teljast ómaklegt.

Nú vill Vigdís láta breyta ný-samþykktum lögum um þjóðaratkvæði og láta breyta þeim, eins og hentar ÞEIM og ÞEIRRA áhugamálum! Svona gera menn ekki, eins og einhver sagði!

Vigdís sagði að í raun snerist þetta ekki um ESB, heldur að rjúfa kyrrstöðuna í samfélaginu. Hún fullyrti að það ,,væri svo mikið álag" á stjórnkerfinu að það réði ekki við ESB-málið líka!

Málið er í góðri vinnslu hjá Utanríkisráðuneytinu, en þeir sem leggja kannski helst stein í götu málsins eru ákveðnir ráðherrar, sem virðast vera búnir að ákveða að þeirra ráðuneyti og þeirra svið verði illa undir aðild búin, ef til aðildar kemur!

Vigdís sagði almenningsálitið litlu máli skipta í þessu samhengi, en samkvæmt könnunum vill meirihluti Íslendinga láta viðræðurnar hafa sinn ganga og greiða síðan atkvæði um aðildarsamninginn.

Þetta þola Nei-sinnar ekki. Þessvegna er gripið til þessara ráða. Þeim ferst það bara ekki betur úr hendi en raun ber vitni. Mál Nei-sinna er algjört klúður!

 

Tillaga um áframhaldandi frost!

Eins og fram hefur komið í fréttum hefur lítill hópur þingmanna lagt fram þingsályktunartillögu þess efnis að samhliða atkvæðagreiðslu um stjórnlagaþing verði einnig greitt um það að draga aðildarumsókn Íslands að ESB til baka. Tillagan er hér. 

Í "röksemdarfærslunni" með tillögunni segir m.a: ,,Naumur og ósannfærandi meirihluti á Alþingi fyrir aðildarumsókninni gefur ríka ástæðu til að kanna hug þjóðarinnar til málsins." Það var MEIRIHLUTI fyrir tillögunni á sínum tíma! Þannig virkar MEIRIHLUTALÝÐRÆÐI. Vita viðkomandi þingmenn (og formaður Nei-hreyfingarinnar, Ásmundur Einar Daðason) ekki þetta?

Það væri nú hægt að fara fram á kosningu um ansi mörg mál ef hugtakið "ósannfærandi" ætti að ráða för!

Svo er nöldrað yfir kostnaði: ,,Ekki verður séð að samhliða verði svigrúm hjá löggjafanum að innleiða þær reglugerðir og tilskipanir sem Evrópusambandið krefst á aðlögunarferlinu. Að auki hleypur kostnaðurinn við aðlögunarferlið á hundruðum milljóna sem ríkissjóður hefur ekki tiltækar nú um stundir. Rekstur ríkissjóðs er meira og minna fjármagnaður með erlendum lánum og virðist lítil breyting á þeirri staðreynd í sjónmáli. Rétt er að forgangsraða í ríkisrekstrinum og óhæfa að leggja af stað með svo kostnaðarsamar aðgerðir þegar svo stendur á." (Feitletrun ES-blogg)

Já, hversvegna er ríkissjóður jafn illa staddur og raun ber vitni? Fróðlegt væri að heyra svar frá þeim tveimur þingmönnum Sjálfstæðisflokksins, sem eru flutningsmenn, um ástæður þess!

Kostnaður við aðildarumsókn eru smápeningar miðað við þær hrikalegu afleiðingar sem slök efnahagsstjórn hefur kostað Íslendinga á liðnum árum, jafnvel áratugum. Við aðild að ESB er talið að Íslendingar muni spara um 70-80 milljarða á ári í minni vaxtakostnað. Þetta nægir í raun til þess að láta á málið reyna!En rökin fyrir aðild eru mun fleiri, sjá t.d. hér.

Svo kemur þetta eins og (léleg) rúsína í pylsuendanum: ,,Evrópusambandið stendur frammi fyrir miklum erfiðleikum og mun fara í gegnum róttæka endurskoðun á starfsháttum sínum næstu missiri og ár. Á meðan framtíðarhorfur Evrópusambandsins eru í óvissu er óskynsamlegt af Íslendingum að sækjast eftir aðild án þess að meiri hluti þjóðarinnar sé að baki umsókninni."

Mjög mörg lönd standa frammi fyrir miklum erfiðleikum um þessar mundir. Ekki er atvinnuástand glæsilegt í Bandaríkjunum. Og hvaða róttæka "endurskoðun án starfsháttum" er verið að tala um? Okkur hér á blogginu er ekki kunnugt um þær! Þvert á móti er stjórnkerfi ESB vel "fúnkerandi" og þar eru teknar mikilvægar ákvarðanir á hverjum degi. Ákvarðanir sem sumar hverjar hafa áhrif á okkur Íslendinga. En við höfum ekkert um þær að segja! Erum á hliðarlínunni  - og með gjaldmiðil í öndunarvél, sem enginn þorir að láta "anda" á eigin spýtur. Til mikilla hagsbóta og framfara fyrir atvinnulíf og fjölskyldur þessa lands. Eða hittó!

Þeir sem flytja þessa tillögu vilja hindar þjóðina í að taka afstöðu í þessu mikilvæga mála, hindra hana í því að fá að kjósa um aðildarsamning. Hún er flutt í þeirri von að þjóðin segi NEI og að umsóknin verði dregin til baka. Kannanir sýna hinsvegar að þjóðin vill aðildarviðræður og samning til að kjósa um.

Maltverjar stigu það ógæfuskref af leggja umsókn um aðild að ESB á ís. Þetta var það versta sem gerðist í þeirra aðildarferli, segja kunnugir! Maltverjar hafa það fínt innan ESB.

En sú tillaga sem runnin er undan rifjum Nei-hreyfingarinnar, er tillaga um áframhaldandi frost, um kyrrstöðu, um óbreytt ástand.

Á tímum þegar Ísland þarf einmitt að stórefla samskipti og samvinnu við aðrar þjóðir.

Verkefni með einhverfum styrkt af Leonardo (ESB)

Í Fréttablaðinu kemur fram í dag: ,,Allt að átján íslenskir einstaklingar með einhverfu verða þjálfaðir til starfa við hugbúnaðarprófanir á Íslandi á hverju ári hér eftir. Það eru Sérfræðingarnir, sem er sjálfseignastofnun nátengd Umsjónarfélagi einhverfra, sem sér um verkefnið.

Fram kemur á vefnum New Europe að verkefnið byggi að danskri fyrirmynd en þar hefur fólk með einhverfu unnið að hugbúnaðarprófunum fyrir fyrirtæki á borð við Microsoft, Oracle, Cisco og Lego. Hjörtur Grétarsson, stjórnarformaður Sérfræðinganna, segir að gert sé ráð fyrir að þjálfun fyrstu einstaklinganna hefjist fyrir jól."

Verkefnið er styrkt af Leonardo, menntaáætlun ESB 

Öll frétt FRBL