Íslenskt ho ho og ESB - Sigurlaug Anna um Íslenska hestinn og ESB

Hestar og afurðir af þeim hafa verið mikið í fréttum að undanförnu og þar er Ísland ekki undanskilið. Íslenski hesturinn blandast meira að segja (á öllum fimm gangtegundunum) inn í ESB-umræðuna!

Sigurlaug Anna Jóhannsdóttir, framkvæmdastjóri Já-Íslands skrifaði grein í MBL þann 27.2 og einnig er greinina að finna á Eyjunni. Sigurlaug byrjar svona:

"Í desemberhefti Eiðfaxa skrifar Karola Schmeil undarlega grein sem ber heitið „Evrópusambandið og íslenski hesturinn“. Megin inntak greinarinnar er það að íslenska hestinum stafi af því sérstök hætta ef Ísland gangi í Evrópusambandið, aðallega vegna sjúkdóma sem kunna að berast hingað til lands og vegna blöndunar við önnur hestakyn. Þetta er mjög sérkennileg niðurstaða því það er ljóst að íslendingar fara fram á varanlega sérlausn varðandi innflutning á lifandi dýrum til landsins og ekkert sem bendir til annars en að Evrópusambandið fallist á slíka sérlausn.

Hræðsluáróður

Gaman hefði verið að lesa grein um þau viðfangsefni sem hestamenn velta sérstaklega fyrir sér í sambandi við aðildarviðræður Íslands og ESB. Grein sem hefði á faglegan og fræðandi hátt haft það að markmiði að upplýsa lesendur. Þess í stað er grein Karolu hlutdræg, gildishlaðin og augljóslega ætluð til að vekja hræðslu. Það er ekki að sjá að höfundur hafi kynnt sér viðfangsefnið sem fjallað er um.

Áfram bann á innflutningi lifandi dýra, fersku kjöti og plöntum

Ef samningsafstaða Íslands, frá því í desember 2012, í 12. kafla um matvælaöryggi og dýra- og plöntuheilbrigði er skoðuð, sést að farið er fram á að viðhaldið verði banni við innflutningi lifandi dýra, að löggjöf ESB um dýraheilbrigði og um viðskipti með lifandi dýr gildi ekki að því er varðar Ísland. Sérfræðingar á þessu sviði telja líklegt að fallist verði á slíka sérlausn fyrir Ísland vegna sérstöðu landsins á þessu sviði, komi fyrir því sterk vísindaleg rök. Hins vegar er ljóst að einungis fullbúinn samningur milli Íslands og ESB getur endanlega sagt til um hvort fallist verði á afstöðu Íslands í málinu. Einnig er farið fram á áframhaldandi bann við innflutningi fersks kjöts og plantna.

Sóknarfæri fyrir íslenskan matvælaiðnað

Íslenskir búfjárstofnar eru viðkvæmir vegna legu landsins og einangrunar og tekist hefur að miklu leyti að halda sjúkdómum í skefjum. Þetta er sérstakt afrek og eftirsóknarvert að viðhalda. Sjúkdóma- og lyfjalausar íslenskar kjötvörur eru einmitt sérstaða og sóknarfæri fyrir íslenskan matvælaiðnað við inngöngu Íslands í ESB. Þess vegna þurfum við að láta á það reyna að semja þannig við ESB að þeir hagsmunir verði tryggðir."

Hrikalegar verðhækkanir - verðtryggð lán rjúka upp!

RÚV sagði frá rosalegum verðhækkunum í febrúar, sem hafa valdið því að húsnæðislán venjulegrar meðalfjölskyldu hafi hækkað um nokkur hundruð þúsund á einum mánuði! Svo virðist sem fyrirtæki velti kostnaði út í verðlagið og að krónan keyri einnig upp verðbólguna. Þetta er s.s. ekkert nýtt. Þetta gengur hinsvegar ekki lengur og er almenningur að fá nóg!

ASÍ hefur sett í gang sérstaka síðu sem berst gegn þessu og frá henni er sagt í frétt hjá DV.

Visir.is segir einnig frá hækkunum á verðbólgunni, sem er langt umfram spár.

Samkvæmt kvöldfréttum RÚV jafngildir hækkun verðlags í febrúar um 21% ársverðbólgu!

Dollar, Yuan, Himbrimi, Yen, Evra, Pund?

Úr stjórnmálaályktun Sjálfstæðisflokksins:

"Íslenska krónan í höftum getur ekki verið framtíðargjaldmiðill þjóðarinnar ef Íslendingar eiga að taka þátt í alþjóðlegri samkeppni og afla þjóðinni tekna á heimsmarkaði. Landsfundur telur að Sjálfstæðisflokknum beri skylda til þess að setja afnám gjaldeyrishafta efst á forgangslista komist hann í ríkisstjórn.

Kanna þarf til þrautar alla möguleika fyrir Ísland í gjaldmiðla- og gengismálum, þar með talið upptöku alþjóðlegrar myntar."

1) Getur krónan verið framtíðargjaldmiðill Íslendinga án hafta?

2) Er hægt að þrengja þetta eitthvað með "alþjóðlegu myntina" ? Dollar, Yuan, Himbrimi, Yen, Evra, Pund?

Seðlabankinn hefur bent á tvo möguleika: a) Króna í höftum eða b) Evra.

Allir farnir í flug eða til að ná í mjaltir?

Ragnar Arnalds, einn helsti Nei-sinni Íslands, er yfirleitt ekki mikið fyrir að segja brandara, en svo bregðast krosstré sem önnur tré!

Í sambandi við landsfund hefur hann látið hafa það eftir sér að tillagan á landsfundi VG um að halda beri aðildarviðræðum við ESB áfram hafi verið samþykkt vegna þess að allir nei-ararnir úr dreifbýlinu hafi verið farnir af fundi, þurft að ná flugvél, rútu, eða jafnvel bara að ná fyrir kvöldmjaltir (lengri útgáfa af fréttinni er í pappírs-Mogga).

Það hafi því verið "lýðurinn á mölinni" sem hafi samþykkt þessa tillögu!

Upplýsingafulltrúi VG hafnar hinsvegar þessum skýringum Ragnars. Eyjan fjallar einnig um þetta.

En við gefum Ragnari prik fyrir húmorinn!

FRBL: Umbreytt pólitískt landslag

Í leiðara FRBL, sem Þórður Snær Júlíusson skrifar þann 27.2, segir meðal annars þetta:

"Á einni helgi hefur hið pólitíska landslag á Íslandi umbreyst. VG opnaði skyndilega á raunverulegan möguleika á ríkisstjórnaraðild með því að samþykkja að klára aðildarviðræður ESB, þrátt fyrir að vera andsnúin aðild. Á sama tíma festi Sjálfstæðisflokkur sig í sessi sem eitt róttækasta stjórnmálaafl landsins.

Í grundvallarstefnu Sjálfstæðisflokksins segir að inntak stefnu hans sé að „tryggja frelsi og framþróun í þjóðfélaginu". Frá þeirri stefnu var horfið að hluta um helgina. Í fyrsta lagi var samþykkt ályktun á landsfundi um að hætta aðildarviðræðum við ESB og svipta þar með þjóðina frelsi til að kjósa um málið. Samhliða á að loka Evrópustofu, svo almenningur hafi ekki slíkan aðgang að upplýsingum. Í öðru lagi hefur flokkurinn fallið frá þeirri stefnu að hann leggi „áherslu á að auðvelda erlendum aðilum að fjárfesta í íslensku atvinnulífi". Fyrir tveimur árum lét Bjarni Benediktsson hafa eftir sér að það væri ekki sjálfsagt að útlendingar gætu keypt stórar jarðir á Íslandi. Hann steig annað stórt skref í átt að því að skapa geðþóttastýrt, en ekki almennt, fjárfestingaumhverfi á Íslandi í síðustu viku þegar hann sagði að afskrifa ætti að verulegu leyti kröfur erlendra vogunarsjóða í þrotabú föllnu bankanna. Þessari skoðun var gerð skil í Financial Times, einni af biblíum viðskiptalífsins.

Í þriðja lagi virðist morgunljóst að hinir ungu forystumenn flokksins hafi beygt sig undir „heimsyfirráð eða dauði"-stefnu gömlu harðlínujaxlanna í flokknum. Þessi afstaða kristallaðist ágætlega í ræðu Hönnu Birnu Kristjánsdóttur, sem var vel skreytt af Davíðslegum aulahúmor á kostnað pólitískra andstæðinga. Hún hefur árum saman viljað markaðssetja sig sem sáttastjórnmálamann en steig þarna af þeirri braut."

Næsta skef: Loka öllum sendiráðum ESB-ríkja á Íslandi?

Á vefsíðu Egils Helgasonar má lesa þetta:

"Það er til marks um að harðlínan hafi sigrað í Evrópumálunum á landsfundi Sjálfstæðisflokksins að fundurinn hafi samþykkt að loka svokallaðri Evrópustofu.

Í ályktun fundarins segir:

“Landsfundurinn mótmælir íhlutun sendiherra Evrópusambandsins á Íslandi í stjórnmálaumræðu þjóðarinnar og telur óhæfu að stækkunardeild ESB haldi úti starfsemi hér þar sem lagst er á sveif með einu stjórnmálaafli gegn öðrum. Evrópusambandinu verði gert að loka kynningarskrifstofu þess hér.”

Veit Sjálfstæðisflokkurinn að það er fullt af ESB-ríkjum með sendiráð hér á landi? Það hlýtur að vera einhver skuggaleg starfsemi þar í gangi, sem grefur undan fullveldinu og reynir að heilaþvo alla Íslendinga!

Er þá ekki næsta skref að krefjast lokunar þeirra?

Ólafur Þ.Stephensen um mótsagnir til hægri....

Ólafur Þ.Stephensen, ritstjóri Fréttablaðsins, skrifaði leiðara í kjölfar landsfundar Sjálfstæðisflokksins þann 25.2 og segir þar meðal annars:

"Sjálfstæðisflokkurinn vill stuðla að hagkerfi þar sem verðtryggingin verður óþörf. Það er göfugt markmið. Til marks um að innan flokksins sé meiri skilningur á lögmálum efnahagslífsins en í mörgum öðrum flokkum, er að sjálfstæðismenn telja jafnframt að íslenzka krónan í gjaldeyrishöftum geti „ekki verið framtíðargjaldmiðill þjóðarinnar ef Íslendingar eiga að taka þátt í alþjóðlegri samkeppni og afla þjóðinni tekna á heimsmarkaði". Landsfundurinn vill kanna til þrautar alla möguleika í gjaldmiðla- og gengismálum, „þar með talið upptöku alþjóðlegrar myntar".

Þeim mun furðulegra er þá að landsfundurinn skellti dyrunum enn fastar í lás á nærtækasta og raunhæfasta kostinn um upptöku alþjóðlegs gjaldmiðils, aðild að Evrópusambandinu. Samþykktir fundarins um Evrópumálin eru raunar furðulega ofstækiskenndar, til dæmis gerð krafa um að upplýsingaskrifstofu Evrópusambandsins hér landi verði lokað.

Með þessari hörðu afstöðu í Evrópumálunum fækkar Sjálfstæðisflokkurinn annars vegar möguleikum sínum á stjórnarmyndun eftir kosningar og fórnar hins vegar atkvæðum talsverðs hóps kjósenda, sem líklegir eru til að kjósa þá Bjarta framtíð eða Samfylkinguna í staðinn. Þeir flokkar bera nú augljóslega víurnar í miðjufylgið en ýmsar ályktanir sjálfstæðismanna á landsfundinum benda til að þeir hafi lítinn áhuga á því og vilji skilgreina flokkinn þrengra sem þjóðernissinnaðan hægriflokk."

Össur las í stöðuna í Reykjavík síðdegis

Össur Skarphéðinsson, utanríkisráðherra, las í stöðuna eftir landsfundi helgarinnar, þar sem Sjálfstæðisflokkurinn málaði sig út í horn í Evrópumálunum en VG ákvað með "pragmatískum" hætti að halda viðræðum áfram og leyfa þjóðinni að kjósa um aðildarsamning.

Það voru strákarnir í Reykjavík síðdegis á Bylgjunni sem ræddu við Össur. Í viðtalinu segir Össur meðal annars að þessi afstaða Sjálfstæðisflokksins sé "verðið" sem Bjarni Ben þurfi að borga til að friðþægja and-evrópsk öfl innan flokksins.

Bendum einnig á frétt DV sem tengist þessu.

Nú er Ólafur Ragnar í París....

Þó að það sé í raun ástæðulaust að fjalla um flokk vill helst ekkert tala um og vita af Evrópu að þá er athyglisvert að heyra og sjá hvað ákveðnir "þungaviktarmenn" úr "Kaldastríðsskólanum" eru að segja á opinberum vettvangi.

Í Silfri Egils síðastliðinn sunnudag sagði t.d. Styrmir Gunnarsson (fyrrum ritstjóri Morgunblaðsins) að efna ætti til atkvæðagreiðslu um ESB-málið og framhald þess, "þegar og ef tilefni væri til." Sjálfstæðismenn passa sig að sjálfsögðu á því að hafa orðalagið mjög opið, loðið og þannig að það gefi tilefni til breiðra túlkana. Til þess einmitt að geta sagt að ekki sé tilefni til og svo framvegis. Þetta er að sjálfsögðu pólitískt klækjabragð. 

Annað sem vakti athygli okkar eru ummæli Björn Bjarnasonar, fyrrum dómsmálaráðherra á Fésbók í umræðuþræði sem Eiður Guðnason, fyrrum sendiherra, efndi til um landsfund Sjálfstæðisflokksins. Ummæli Björn (einnig úr "Kaldastríðsskólanum") eru þessi:

"Nú er Ólafur Ragnar í París og eftir það verða Íslandi allar dyr opnar utan eða innan ESB. Hann bjargaði þjóðinni frá Icesave og bjargar henni einnig frá ESB án þess að nokkur dyr lokist." Er ekki allt í lagi?"

Landsfundur Sjálfstæðisflokksins 2013 er endanleg staðfesting á því að í stað "komma" eða "Rússagrýlunnar" er komin ný grýla: "ESB-grýlan"

Viðbót: Í Staksteinum Morgunblaðsins þann 26.2 er vitnað í skrif SG um VG, sem hann kallar "rekald" en í áðurnefndum þætti Silfurs Egils sagðist Styrmir hafa verið eindreginn stuðningsmaður ríkisstjórnarsamstarfs VG og Sjálfstæðisflokks. Á fólk að trúa því í ljósi orða sem þessara?

"...mér finnst við ekkert þurfa að horfa til Evrópu" - Hanna Birna í Kastljósinu

"Ég hef það mikla trú á Íslandi, að mér finnst við ekkert þurfa að horfa til Evrópu" sagði Hanna Birna Kristjánsóttir, nýkrýndur varafromaður Sjálfstæðisflokksins í Kastljósinu þann 25.febrúar. Þar ræddu þau Björn Valur Gíslason, nýr varaformaður VG, stjórnmálin, (þar með Evrópumálin) að loknum landsfundum þessara flokka.

Hönnu Birnu finnst það kannski líka bara óþarfi að Evrópa sé markaður fyrir 70-80% af okkar útflutningi?

Hver eru eiginlega skilaboðin í orðum sem þessum? Jú, að við Íslendingar séum væntanlega miklu betri en allir aðrir og að við þurfum ekki á  neinum öðrum að halda. Að við getum staðið ein og óstudd, sama hvað á dynur!

Hvert vill þá Hanna Birna horfa? Til alræðisríkisins Kína? Indlands? Brasilíu?

Þetta er nú frekar uppblásið allt saman hjá fyrrum borgarstjóranum. Breytist allt svona mikið við að fara yfir í landsmálin?

Hin nýja Evrópustefna Sjálfstæðisflokksins

Eins og fram hefur komið lauk landsfundi Sjálfstæðisflokksins um helgina og þar var samþykkt ný stefna flokksins í Evrópumálum og hér er mynd af hinni nýju stefnu:

ESB og Kanada að ljúka fríverslunarsamningi á þessu ári?

ESB vonast eftir auknum aðgangi að kanadískum mörkuðum fyrir vörur sínar, en frá þessu er sagt í frétt á Euractive-vefnum þann 25.febrúar.

Fríverslunarviðræður ESB og Kanada hafa staðið síðan 2009, en vonast er til að þeim ljúki á þessu ári.

Bandaríkjamenn fylgjast vandlega með þessu máli, en talið er að ESB og Bandaríkin hefji fríverslunarsamninga við ESB næsta haust.

Verði af þessum samningum er talið að verslun og viðskipti milli þessara aðila geti aukist um allt að tugi prósenta.

Enda allt saman aðilar og ríki sem búa við frjáls og óheft markaðskerfi og gjaldmiðla sem eru nothæfir í alþjóðlegum viðskiptum.

Bless Jörð?

Að loknum landsfundi Sjálfstæðisflokksins eru það ef til vill Baggalútsmenn sem hitta naglann á höfuðið:

"Þau undur og stórmerki gerðust í lok landsfundar Sjálfstæðisflokks að Laugardalshöll hóf sig á loft og sagði skilið við plánetuna Jörð.

Í kjölfarið fylgdu svo bæði Valhöll og Morgunblaðshúsið, bæði stútfull af kristilega þenkjandi sjálfstæðismönnum, í sérútbúnum dáleiðsluhylkjum.

Ekki er ljóst hvað vakir fyrir Sjálfstæðismönnum, en hugsanlegt þykir að þeir ætli sér að finna gróðavænlega plánetu (langt, langt í burtu frá Evrópu) til að arðræna, með kristileg gildi að leiðarljósi — þar sem þau eiga við."

Ræðum ESB-málið af alvöru!

Á MBL.is stendur: "Steinar Harðarson telur að Vinstri grænir eigi að skoða þann valkost að fylgja eftir aðildarviðræðum í Evrópusambandið. Þar sé lýðræði og mannréttindi í öndvegi.

Slíkt sé hlutverk sem Vinstri græn eigi að líta til. Þá sé Evrópusambandið í forsvari fyrir umhverfismál. Eins sé mikilvægt að styrkja stöðu Íslands á norðurslóðum. Telur hann að aðild geti bætt pólitíska hagsmuni á alþjóða vettvangi. Þetta kom fram í almennum stjórnmálaumræðum á landsfundi Vinstri grænna sem nú stendur yfir."

Yfirskrift fréttarinnar er: ESB-aðild á að ræða af alvöru.

Þessu erum við fyllilega sammála. Staðreyndin er samt sú að hér á landi eru sterk öfl sem vinna gegn því að það sé hægt og vilja málið útaf borðinu. Það eru hinsvegar sterkir almannahagsmunir sem gera það nauðsynlegt að ræða málið til enda og kjósa um aðildarsamning. 

Sigurlaug Anna Jóhannsdóttir um hagkerfi í ógöngum í FRBL

Sigurlaug Anna Jóhannsdóttir, framkvæmdastýra hjá Já-Ísland, skrifar fína grein í FRBL þann 21.1 og þar segir hún meðal annars:

"Vaxtakostnaður Íslendinga vegna íslensku krónunnar er óásættanlegur. Mat Alþýðusambandsins og Viðskiptaráðs Íslands á fjármagnskostnaði vegna íslensku krónunnar er 4%-4,5% að meðaltali á ári til langs tíma. Það eru þeir vextir sem Íslendingar greiða, svokallað Íslandsálag, umfram evrulöndin, Bandaríkin o.fl. lönd vegna verðbólgu, verðtryggingar og óstöðugleika sem rekja má til krónunnar vegna smæðar hennar.

Skuldir ríkissjóðs eru 1.500 milljarðar. Gróflega reiknað má gera ráð fyrir því að aukakostnaður ríkissjóðs vegna Íslandsálagsins sé um 60 milljarðar á ári. Ef við veltum bara fyrir okkur 60 milljarða aukavaxtakostnaði ríkisins vegna íslensku krónunnar má til samanburðar nefna að rekstur Landspítalans kostar árlega 30 milljarða. Þessi vitneskja er óbærileg þegar niðurskurður og ástandið í heilbrigðiskerfinu er haft í huga. Um 3,8% af landsframleiðslunni fara í Íslandsálagið vegna skulda ríkissjóðs.

Samanlagðar skuldir ríkissjóðs, heimila og fyrirtækja á Íslandi eru 5.200 milljarðar. Íslandsálagið af öllum þessum skuldum var 221 milljarður árið 2011. Þessi aukakostnaður er gríðarlegur og er meiri en rekstur alls heilbrigðiskerfisins. Það munar um minna.

Þeir sem þekkja þessa stöðu hafa fyrir löngu gert sér grein fyrir því að við þetta geta heimilin og atvinnulífið í landinu ekki búið. Stór hópur þjóðarinnar sér að þessi viðfangsefni verða ekki leyst öðruvísi en með upptöku evru og inngöngu í Evrópusambandið."