45% minni hagvöxtur á milli ára - hvar eru kraftaverk krónuhagkerfisins?

Á RÚV segir: "Hagvöxtur á síðasta ári var langt innan við það sem spáð hafði verið. Hagvöxtur síðasta árs nam 1,6 prósenti samkvæmt riti Hagstofunnar um Landsframleiðsluna 2012 sem gefið var út í morgun.

Það er mikill samdráttur frá árinu 2011 þegar hagvöxtur var 2,9 prósent og var það fyrsta hagvaxtarárið eftir tvö samdráttarár.

Hagvöxturinn í fyrra er mun minni en spár gerðu ráð fyrir, þó spárnar hafi verið lagfærðar síðustu misseri og spár um hagvöxt lækkað. Þannig var spáð 3,4 prósenta hagvexti á síðasta ári í þjóðhagsspá Hagstofunnar 2010. Síðasta vor og sumar gerðu flestar spár ráð fyrir tveggja og hálfs til 3,3 prósenta hagvexti. Lægstu hagvaxtarspárnar voru frá Alþýðusambandi Íslands og Alþjóða gjaldeyrissjóðnum sem bæði spáðu liðlega tveggja prósenta hagvexti. Raunin var 1,6 prósenta hækkun."

Þetta er að sjálfsögðu mun minni hagvöxtur en þarf til að skapa ný störf, standa undir greiðslum af lánum ríkisins (svo viðunandi sé) og svo framvegis. Hvar eru kraftaverkin sem krónuhagkerfið átti að framkvæma?

Jörðin er flöt!

Nú er "ritskoðunarsinninn" Vigdís Hauksdóttir alveg að missa sig yfir ESB-málinu og hatur hennar á ESB og öllu sem því tengist virðist næsta takmarkalaust.

Vigdís er ein af þeim sem í alvöru talar um að láta loka Evrópustofu. Vinnubrögð sem þessi tíðkast helst í ríkjum sem einkennast af einhverju allt öðru en lýðræði og opinni umræðu.

Í fyrirspurnartíma á Alþingi gekk Vigdís svo skrefinu lengra og sagði að starfsmenn Evrópustofu færu um landið og reyndu að heilaþvo landsmenn! Um þetta var fjallað í hádegisfréttum RÚV þann 8.3.

Í viðtali á Útvarpi sögu um daginn sagði Vigdís einnig að einn helst hvatinn að ESB-málinu væri embættismannakerfið og þar hefðu menn vonir um að fá feitar stöður í Brussel. Í sama viðtali sagði hún að einkavæðing íslensku bankanna hefði fariðí gangn vegna krafna sem kæmu frá EES-samningum. Sem er að sjálfsögðu kolrangt, hvort tveggja.

Þegar fólk fer um ljósvakann með jafn mikið bull og þetta, veit maður ekki hvort maður á að hlæja eða gráta!

Og það versta er kannski að í kjölfar kosninganna er alvöru hætta á því að umræddur þingmaður verði ráðherra!

Guð blessi Ísland!

Tvær góðar greinar í FRBL

Vert að vekja athygli á tveimur góðum greinum í FRBL í dag. Sú fyrri er eftir Helga Magnússon, fyrrum formann Samtaka iðnaðarins en hann er m.a að velta fyrir sér eftirköstunum eftir landsfund Sjálfstæðisflokksins. Helgi skrifar m.a. annars um þá ákvörðun landsfundarins að hætta beri aðildarviðræðum við ESB:

"Ekki er unnt að draga aðra ályktun af þessu en þá að flokkurinn treysti þjóðinni ekki til að taka þessa mikilvægu ákvörðun. Ef menn trúa því að kjósendur fari sér að voða í þjóðaratkvæðagreiðslu um ESB þá er það ekkert annað en grímulaus forsjárhyggja og hún er Sjálfstæðisflokknum ekki samboðin og fellur ekki að grunnstefnu hans.

En hvers vegna verður þá einangrunarstefna ofan á þegar landsfundur ályktar? Á því kunna að vera ýmsar skýringar. Ein er sú að nokkrir fyrrum ráðamenn í flokknum hafa lengi farið mikinn í öfgakenndri andstöðu sinni við Evrópusambandið og mælt eindregið gegn samningaviðræðum, hvað þá samningum, og einskis svifist í málflutningi sínum. Þeir voru fyrirferðarmiklir á fundinum og höfðu sitt fram ekki síst vegna þess að núverandi forysta flokksins er veik og ráðvillt og hefur ekki burði til að leiða stefnumótun flokksins inn á farsælar brautir. Fyrir það mun flokkurinn gjalda í komandi kosningum.

Ég hef þá trú á sjálfstæðisfólki almennt að því líki ekki við eingangrunartilburði og gamladags hræðsluáróður. Réttkjörnir forystumenn flokksins hljóta að sjá þetta en þá virðist skorta kjark og þor til að standa gegn háværum öfgaöflum."

Í þeirri síðari skrifar Magnús Þorlákur Lúðvíksson um gjaldmiðilsmál í grein sem ber yfirskriftina Sir Alex Ferguson bjargar krónunni, þar sem hann segir m.a.: "Krónan er ekkert vandamál í sjálfu sér. Vandinn er sá að hagstjórnin á Íslandi hefur ekki verið nægilega vönduð. Með agaðri hagstjórn verður krónan ekkert vandamál." Þetta er algengt viðkvæði þessa dagana þegar gjaldmiðilsmálin ber á góma og auðvitað er í þessu sannleikskorn. Það þarf ekki mikla þekkingu á efnahagsmálum til að átta sig á því að léleg hagstjórn mun meðal annars valda vandamálum sem gera vart við sig í gegnum gengi krónunnar.

Það er þó ekki þar með sagt að krónan valdi engum vandræðum jafnvel þótt hagstjórnin verði í heimsklassa. Góð hagstjórn mun ekki breyta því að gjaldeyrismarkaður með krónur og skuldabréfamarkaður í krónum munu áfram verða litlir. Og vextir fyrir vikið háir. Þá mun gengisleki áfram verða mikill, sem þýðir það að gengissveiflur krónunnar hafa meiri áhrif á verðlag á Íslandi en til dæmis gengissveiflur í dölum hafa á verðlag í Bandaríkjunum. Verðbólga verður sem sagt áfram hærri hér. Þá má að lokum nefna rannsóknir Seðlabankans sem benda til þess að krónan hafi fremur verið sjálfstæð uppspretta sveiflna í íslensku hagkerfi en dempari á þær. Loftlaus fótbolti mun hægja á spili á fótboltaliðsins jafnvel þótt Sir Alex Ferguson sé fenginn til að stýra því."

Formaður SA: Ber að klára viðræður við ESB - eina leiðin til að komast að niðurstöðu!

Á RÚV segir: "Björgólfur Jóhannsson, nýkjörinn formaður Samtaka atvinnulífsins, vill ljúka aðildarviðræðum Íslands við Evrópusambandið. Heildarhagsmunir eigi að ráða en viðunandi niðurstaða verði að fást fyrir sjávarútveginn. Það sé þó þjóðin sem eigi lokaorðið.

Björgólfur segir að málið sé í ákveðinni vegferð núna samkvæmt ákvörðun Alþingis. Það séu misjafnar skoðanir á því í samfélaginu og innan Samtaka atvinnulífsins."

Síðan segir í fréttinni að Björgólfur telji að að það verði að fá niðurstöðu í þetta mál og að hann..."sjái ekki aðra leið hvernig komast megi að þeirri niðurstöðu en að ljúka þeirri vegferð sem við séum í."

Þetta er mjög skynsamleg afstaða hjá formanni SA!

Stöðugur gjaldmiðill - raunhæf fyrstu skref - fundur á Sólon 8.mars kl. 12.00

Félag frjálslyndra jafnaðarmanna og Sjálfstæðir evrópumenn boða til hádegisfundar um leiðina út úr núverandi stöðu í peningamálum og að stöðugum framtíðargjaldmiðli.

Stöðugur gjaldmiðill er eitt brýnasta hagsmunamál fyrirtækja og heimila enda forsenda lægri verðbólgu og vaxtakostnaðar. Upptaka evru með aðild að Evrópusambandinu og aðlögun í gegnum ERM II myntsamstarfið er raunhæfasta leiðin til að tryggja þetta markmið til frambúðar. En hvaða skref þarf að stíga nú til að komast út úr núverandi stöðu íslensks hagkerfis og inn í fordyri evrunnar? Er stuðnings að vænta við verkefnið?

Georg Brynjarsson, hagfræðingur hjá Utanríkisráðuneytinu, mun flytja inngangserindi sem lýsir leiðinni og helstu hindrunum á vegferð okkar að stöðugum framtíðargjaldmiðli. Georg er starfsmaður svokallaðs AdHoc starfshóps íslenskra stjórnvalda, evrópska seðlabankans, Alþjóða gjaldeyrissjóðsins og framkvæmdastjórnar Evrópusambandsins og hefur rannsakað sérstaklega leið ríkja að inngöngu í ERM II og þau skilyrði sem þarf að uppfylla.

Þorsteinn Víglundsson, fulltrúi Sjálfstæðra Evrópumanna og Vilhjálmur Þorsteinsson, fjárfestir, fulltrúi Félags frjálslyndra jafnaðarmanna bregðast við erindi Georgs og taka svo þátt í pallborði ásamt frummælanda og svara spurningum fundargesta.

Fundurinn, sem er öllum opinn, verður haldinn föstudaginn 8. mars á 2. hæð Kaffi Sólon, Bankastræti og stendur frá kl. 12 til 13:15. 

Gestir eru hvattir til að mæta tímanlega. Hægt er að kaupa léttan hádegisverð á staðnum. 

Kaupmáttur og slæm hagstjórn - getur þetta farið saman?

Hagstjórnarhugtakið, agi í sambandi við það og annað þessu tengt er nú mikið rætt í aðdraganda kosningabaráttunnar. Meira að segja sumir örgustu andstæðingar alls sem kemur frá Evrópu hafa sagt að við Íslendingar þyrftum og ættum að stefna að því að uppfylla Maastricht-skilyrðin.

Okkur hér á blogginu var bent á áhugaverða grein eftir Hálfdán Örlygsson, hagfræðing og framhaldsskólakennara, sem var rituð eftir landsfund Sjálfstæðisflokksins árið 2007 (þegar allt lék í lyndi). Hálfdán segir í byrjun greinar:

"Er hægt að tala um slæma hagstjórn þegar kaupmáttur þjóðarinnar eykst um 60% á 10 árum? Þessari spurningu varpaði Geir Haarde fram á landsfundi Sjálfstæðisflokksins nýverið. Mér finnst með öllu ótækt að forsætisráðherra sé ekki ansað þegar hann varpar fram jafn mikilvægri spurningu og vil því leggja mitt að mörkum. Svar mitt við spurningu Geirs er já, því miður og fyrir því eru í meginatriðum þrjár ástæður.

1. Kaupmáttur sem á rót að rekja til gífurlegrar útlánaþenslu og skuldasöfnunar heimila er falskur og í raun ekkert annað en tilflutningur á kaupmætti frá framtíð til nútíðar. Stjórnvöld sem stuðla að slíku með losarabrag í peningamálastjórn geta hælt sér af veislugleði en ekki góðri hagstjórn.

2. Kaupmáttur sem á rót að rekja til skattalækkana í uppsveiflu er ágætur þangað til í ljós kemur í næstu niðursveiflu að grafið hefur verið undan tekjustoðum velferðarkerfisins. Ríkisstjórn sem ekki skilur samhengið á milli hagvaxtar og afkomu ríkissjóðs fær ekki háa einkunn fyrir hagstjórn. Nema auðvitað hjá þeim hópi frjálshyggjumanna sem enn halda á lofti hugmyndum Ronalds Reagan um ríkisfjármál. Hugmyndum sem Georg Bush eldri kallaði vúdúhagfræði eins og frægt er orðið.

3. Kaupmáttur sem byggist á ofmati á styrk íslensku krónunnar er rammfalskur og hefur í tilfelli okkar Íslendinga leitt til hrikalegs viðskiptahalla og erlendrar skuldasöfnunar. Íslenska krónan er leikfang spákaupmanna sem þessa dagana þóknast að halda henni í fáránlegum hæðum en geta án fyrirvara fleygt henni fyrir björg.

Hverju ætla stjórnvöld, sem horft hafa á þetta ástand skapast án þess að lyfta fingri, að kenna um ef svo illa fer að gengi krónunnar hrapar um tugi prósenta? Hver mun axla ábyrgðina af verðbólgugusu og kaupmáttarskerðingu sem af sliku leiðir? Framsóknarmenn? Svar mitt við spurningu Geirs er í stuttu máli að aukinn kaupmáttur og slæm hagstjórn geti hæglega farið saman og hafi svo sannarlega gert það í stjórnartíð Sjálfstæðisflokks og Framsóknar. Hinn aukni kaupmáttur stafar því miður að litlu leyti af eflingu atvinnulífs. Hér hefur hins vegar verið haldin mikil og stjórnlaus veisla út á krít að hætti Sjálfstæðisflokksins. Reikningar munu berast og eru reyndar farnir að berast íslenskum heimilum í formi ört vaxandi greiðslubyrði af lánum." 

ESB styrkir Háskólann í Reykjvík, sem fær 230 milljónir

RÚV segir frá: "Rannsóknamiðstöð í nýsköpun og frumkvöðlafræðum við Háskólann í Reykjavík hlaut nýverið styrk að jafnvirði tvö hundruð og þrjátíu milljónir króna. Styrkurinn er frá Evrópusambandinu, hluti áætlunar sem styður samstarf háskóla og atvinnulífs.

Styrkurinn telst gríðarhár á íslenskan mælikvarða, meðalhár kannski á mælikvarða Evrópusambandsins. Styrknum á að verja næstu fjögur árin til rannsókna á því hvernig lítil og meðalstór fyrirtæki í skapandi atvinnugreinum geta endurbætt viðskiptalíkön sín til að bæta árangurinn í breyttu umhverfi."

Þórarinn G. Pétursson: Spurningin um krónuna

Þórarinn G. Pétursson, aðalhagfræðingur Seðlabankans skrifaði grein í Fréttablaðið laugardaginn 2.mars og hefur hún vakið mikla athygli. Í henni setur Þórarinn fram sína sýn á gjaldmiðilsmálin, en greinin ber yfirskriftina Spurningin um krónuna. Við skulum kíkja á nokkra punkta úr henni:

...krafan um að hemja verðbólgu og draga úr hagsveiflum hávær.

...enda gæti öguð hagstjórn orðið ein mesta búbót fyrir íslensk heimili og fyrirtæki ef vel tekst til í þessum efnum.

...Bætt hagstjórn mun hins vegar ekki leysa öll þau vandamál sem tengjast sjálfstæðum gjaldmiðli á litlu myntsvæði. Enn verður það áleitin spurning hvort heppilegt sé fyrir land með jafn lítinn þjóðarbúskap og Ísland að hafa eigin gjaldmiðil.

...beinn kostnaður af því að þurfa að skipta úr einum gjaldmiðli í annan í milliríkjaviðskiptum gæti numið um 5-15 ma.kr. á hverju ári eða allt að rúmlega tíunda hluta vöru- og þjónustuafgangs síðasta árs.

...Rannsóknir sem birtar eru í skýrslu bankans gefa þannig til kynna að álag á innlenda raunvexti gæti lækkað um 1½ prósentu við það að verða hluti af stærra myntsvæði.

...Sveiflur í gengi krónunnar virðast hins vegar vera meiri en skýra má með breytingum í efnahagslegum skilyrðum þjóðarbúsins og virðast að stórum hluta sjálfsprottnar, eins og rakið er í skýrslu bankans. Slíkar sveiflur eru til þess fallnar að kynda undir óstöðugleika í stað þess að auðvelda aðlögun þjóðarbúsins að efnahagsskellum.

...Nýleg skýrsla McKinseys bendir einmitt á tiltölulega lágt framleiðnistig sem einn helsta dragbít efnahagsframfara hér á landi.

...Aðrar rannsóknir benda til þess að eigin gjaldmiðill geti virkað sem hindrun á innflæði beinnar erlendrar fjárfestingar. Þær sýna t.d. að í kjölfar upptöku evrunnar hafi bein erlend fjárfesting á milli evruríkjanna aukist um 30%, samrunum fyrirtækja þvert á landamæri evrusvæðisins fjölgað og fleiri alþjóðleg fyrirtæki valið að nota evrusvæðið sem starfsstöð sína. Aðild að stærra myntsvæði virðist einnig leiða til aukinna viðskipta við önnur lönd.

...Krónan virðist því lítt hafa dugað til að sinna því sveiflujöfnunarhlutverki sem keypt er dýru verði.

Þorsteinn Pálsson: Lokað í báða enda

Þorsteinn Pálsson, ritaði að venju helgarpistil í Fréttablaðið og það kom ekki á óvart að hann fjallaði að þessu sinni um Sjálfstæðisflokkinn:

"Fyrir landsfund Sjálfstæðisflokksins benti flest til að afstaðan til Evrópu yrði þrengd. Hitt kom á óvart að VG skyldi samþykkja að ljúka aðildarviðræðunum og verða þannig opnara fyrir þróun vestrænnar samvinnu.

Sjálfstæðisflokkurinn hefur lengst af haft forystu um ný skref Íslands í pólitísku og efnahagslegu samstarfi vestrænna lýðræðisríkja. Nú er hann í besta falli málsvari óbreytts ástands. Engar línur voru lagðar á landsfundi hans hvernig tryggja ætti stöðu Íslands í þeim miklu breytingum sem eru að verða í alþjóðlegri efnahagssamvinnu, meðal annars á milli Evrópu og Bandaríkjanna.

Landsfundurinn gekk svo langt að hafna tillögu um þjóðaratkvæðagreiðslu um framhald aðildarviðræðnanna, sem hann á hinn bóginn sagði að væri forsenda þess að halda þeim áfram. Á fundinum endurómaði það viðhorf Morgunblaðsins að fremur ætti að tefla stöðunni á innri markaði Evrópska efnahagssvæðisins í tvísýnu en að fallast á nýjar reglur um eftirlit með fjármálastofnunum. Þær eru þó sérstaklega mikilvægar hagsmunum fyrirtækja og neytenda sem vilja eiga jafnan og óskertan aðgang að alþjóðlegum fjármálamarkaði.

Ekki er unnt að segja að hugsjónir VG lúti að frjálsum gjaldeyrisviðskiptum. En öndvert við Sjálfstæðisflokkinn ætlar VG ekki fyrir fram að loka einum af helstu möguleikunum á að losa Ísland úr kvínni sem það er nú einangrað í.

Landsfundur Sjálfstæðisflokksins samþykkti að krónan væri ekki framtíðargjaldmiðill en hafnaði um leið þeim kosti sem raunhæfastur er í staðinn. Einu sinni var sagt um Framsóknarflokkinn að hann væri opinn í báða enda. Að því er peningamálin varðar sýnist Sjálfstæðisflokkurinn nú vera lokaður í báða enda."

Pawel Bartoszek: Óþarfi að láta eins og fáviti!

Pawel Bartoszek, skrifar grein í FRBL þann 1.3 og víkur í seinni hluta hennar að nýafstöðnum landsfundi Sjálfstæðisflokksins og afstöðu fundarins til ESB og aðildarviðræðna. 

"Sjálfstæðisflokkurinn hafði fyrir helgina þá stefnu að pása aðildarviðræðurnar og kjósa svo um framhaldið. Eftir helgina hefur hann þá stefnu að hætta við og kjósa ekkert sérstaklega um framhaldið.

Þar með var vikið frá ákveðinni sátt frá 2011 svo þeir sem að henni stóðu, til dæmis Ragnheiður Ríkharðsdóttir, hljóta nú vera óbundnir af henni.

En gott og vel, auðvitað getur stjórnmálaflokkur haft afdráttarlausa stefnu í ESB-málum. En eitt er að fara meðal fólks og útskýra að meirihluti Sjálfstæðismanna vilji sjá Ísland utan ESB og annað er að reyna að réttlæta þá þvælu að menn vilji loka húsnæði Evrópusambandsins vegna þess að Evrópusambandið dreifi þar bæklingum um sjálft sig. Kommon. Það þarf enginn að elska Brussel. Það er samt óþarfi að láta eins og fáviti.

Evrópuumræðan á landsfundinum var reyndar mjög athyglisverð. Það var til dæmis merkilegt að sjá að þegar Evrópumálin voru rædd í Laugardalshöllinni þá töluðu formaður Sjálfstæðisflokksins og þingflokksformaður gegn því að horfið yrði frá þeirri sátt sem náðst hafði fyrir tveimur árum. En salurinn fylgdi öðrum formanni, sem stóð út við hliðarvegg og fylgdist með meðan gamlir undirmenn hans fluttu málstað sinn í ræðupúltinu.

Þannig má segja að á landsfundi hafi myndast ágreiningur milli hinnar hálffimmtugu kjörnu forystu Sjálfstæðisflokksins og hinnar hálfsjötugu fyrrum forystu hans. Auðvitað mega allir mæta á fund og rétta upp hönd. En engu að síður: Björn Bjarnason, Davíð Oddson og Tómas Ingi Olrich þurfa ekki lengur að halda Sjálfstæðisflokknum saman. Þeir þurfa heldur ekki að mynda ríkisstjórn að kosningum liðnum. Engu að síður fara þeir gegn forystu flokksins, sem mun vonandi þurfa að gera hvort tveggja. Það er athyglisvert, svo ekki sé minna sagt. En ég ætla ekki að vorkenna forystum. Forystur verða bara að bíta frá sér. Það að vera í forystu snýst um það að leiða, en ekki bara um það að vera fyrstur."

Einn áhrifamesti stjórnmálafræðingur í heiminum í dag með fyrirlestur í HÍ

Í tilkynningu segir:

"Föstudaginn 8. mars, kl. 12:00-13:15 í Öskju 132:

Skuldakreppan: Stórveldi og smáríki innan Evrópusambandsins

Fundurinn er hluti af fundaröð Alþjóðamálastofnunar Evrópusamræður 2012-2013

Skuldakreppan í Evrópu hefur ekki einungis haft áhrif á efnahagsmál heldur einnig hið pólitíska svið. Smáríki álfunnar hafa brugðist við með því að leggja áherslu á nána samvinnu stofnana og byggja viðbrögð sín á siðferðilegum sjónarmiðum með það að markmiði að verja þá verst settu í samfélögunum. Stærri ríkin reyna hins vegar að bæta stöðu sína með því að vinna saman í stofnunum sem eru í raun gjaldþrota og hjálpa þannig þeim sterku. Í náinni framtíð munu þessar gjörólíku nálganir hafa veruleg áhrif á evrópsk stjórnmál og samskipti ríkja í heiminum.

Peter J. Katzenstein er einn áhrifamesti stjórnmálafræðingur í heiminum í dag og helsti kenningarsmiður í smáríkjafræðum. Hann fæddist í Þýskalandi en flutti til Bandaríkjanna og lauk doktorsgráðu við Harvard. Í dag er hann Walter S. Carpenter Jr. prófessor í alþjóðafræðum við Cornell háskóla. Hann er jafnframt gestafræðimaður við Princeton Institute of Advanced Study og Stanford Centre for Advanced Study in the Behavioral Sciences og var forseti the American Political  Science Association 2008-2009.  

Þátttakandi í umræðum og fundarstjóri er dr. Ólafur Þ. Harðarson, forseti Félagsvísindasviðs Háskóla Íslands.

Alþjóðamálastofnun Háskóla Íslands heldur tíu málstofur um Evrópusamrunann og Ísland í vetur. Stofnunin hlaut styrki frá Evrópustofu og úr Jean Monnet sjóði ESB til að stuðla að upplýstri umræðu um Evrópumál á Íslandi."  

 

Fínasta aðlögun!

Orðið AÐLÖGUN er notað af andstæðingum ESB-málsins og þá gjarnan þannig að það sé eitthvað hræðilegt fyrir Ísland og Íslendinga að aðlagast regluverki ESB (sem við erum í raun búin að aðlagast í nokkra áratugi).

Einn þeirra sem talar á þessum nótum er Styrmir Gunnarsson, fyrrum ritstjóri Morgunblaðsins einn af áhrifamestu aðilum innan Sjálfstæðisflokksins - og einn helsti andstæðingur ESB hér á landi.

Hann ritar hinsvegar pistil á vefsvæði sitt um aðlögun og þar er sú aðlögun sem hann ræðir hið besta mál.

Það er nefnilega ekki sama, AÐLÖGUN eða AÐLÖGUN! 

Stefán Ólafsson, háskólaprofessor gerir þetta að umtalsefni á bloggi sínu og segir þar um þetta:

"Þetta er mjög óvenjulegt og opinskátt. Ég minnist þess ekki að menn hafi talað svona áður á Íslandi. Sjálfstæði og fagmennska í stjórnsýslunni og hjá RÚV eru einskis metin í Valhöll.

Sjálfstæðismenn ætla greinilega að setja eigin pólitíska kommissara inn á RÚV, til að stýra fréttaumfjöllun í eigin þágu.

Það á sem sagt að beinstýra þessu öllu úr Valhöll, ef Sjálfstæðisflokkurinn kemst til valda.

Þöggun og pólitísk handstýring er aftur komin á dagskrá. Bláa höndin virðist ætla að vera athafnasöm – ef færi gefst!"

Tvöfalt meiri sveiflur hér en í ESB

Á Visir.is segir: "Hagvöxtur hefur verið svipaður á Íslandi og í Evrópusambandinu frá árinu 1960. Sveiflur í hagkerfinu hafa hins vegar verið tvöfalt meiri á Íslandi á þessum tíma en í ESB. Þetta kemur fram í nýju vefriti fjármála- og efnahagsráðuneytisins sem kom út í dag.

Í vefritinu segir að íslenski efnahagsvandinn endurspeglist því aðallega í óhóflegum sveiflum fremur en í litlum hagvexti undanfarna áratugi. Fjöldi rannsókna styðji þetta enda séu augljósir kerfislegir veikleikar til staðar í hagkerfinu. Útflutningsframleiðslan sé fábreytt með sjávarafurðir og ál sem undirstöðu. Í rannsókn frá McKinsey & Company árið 2012 sé bent á lága framleiðni vinnuafls í þjónustugeiranum og lága arðsemi í orkugeiranum sem helstu hindranir hagvaxtar. Að auki geti skorður við auðlindanotkun í helstu útflutningsgreinum, landfræðileg staða landsins, stærð þess og menntunarstig hamlað hagvexti. Þessu til viðbótar megi nefna óleyst vandamál frá bankahruninu 2008, t.a.m. fjármagnshöftin sem virki letjandi á hagvöxt."

23.000 milljóna hækkun á einum mánuði!

Verðtryggð lán landsmanna hækkuðu um 23.000 milljónir í febrúar vegna þeirrar óðaverðbólgu sem skall á landsmanna í febrúar. Þetta kom fram í morgunútvarpi Rásar tvö, þann 28.2. Þetta þýðir um 360.00 kr. (án skatts!) á venjulega fjölskyldu.

Alls hafa verðtryggð lán landsmanna hækkað um 67.000 milljónir á síðustu 12 mánuðum.

Menn hljóta að sjá að þetta er raunveruleg GEGGJUN!

Fjallað var um verðbólgumálin í Speglinum, hér og hér þann 27.2.

Einnig var málið rætt á Bylgjunni, Í bítið.

Orsakir verðbólgunnar eru margvíslegar, allt frá framleiðendum, verslunar, hækkana opinberra aðila og gjaldmiðilsins.

Verbólgubölið heldur áfram :(

Annað hrun?

Friðrik Jónsson, starfsmaður hjá Alþjóðabankanum og Eyjubloggari átti skemmtilegt spjall við stjórnendur Reykjavík síðdegis á Bylgjunni um efnahagsmál í landinu þann 26.2. Í því játuðu báðir þáttastjórnendur að þeir væru alveg til í að fá laun í Evrum!

Hlustið hér.