Hvað er sjálfsaflafé bænda?

Fréttin um stuðning Bændasamtakanna við samtök Nei-sinna, Heimssýn, vekur athygli. Lykilorð í fréttinni er SJÁLFSAFLAFÉ bænda.

Eins og kunnugt er fá Bændasamtökin um 500 milljónir á ári frá ríkinu til reksturs samtakanna.

Er sjálfsaflafé félagsgjöld bænda eða umsýsluþóknun samtakanna fyrir að sjá um styrkjakerfið?

Kemur það ekki frá ríkinu (les almenningi?).

Hvað tekna afla Bændasamtökin sjálf?

Gaman væri að heyra frá lesendum bloggsins um þetta mál!

Þetta þarf að komast upp á yfirborðið - verða gagnsætt.

En það er einmitt markmiðið með þeirri "aðlögun" sem menn eru að tala um í sambandi við ESB-aðildina.

Það er, að hætta öllum feluleik!

Athugasemdir

[Marinó G. Njálsson, 31.10.2010 kl. 21:10]

Eru Evrópusamtökin að segja að bændur megi ekki styrkja þá sem standa með þeirra málflutningi vegna þess að ríkið borgar með rollunum þeirra og mjólk?  Mér finnst þetta ekki vera málflutningur sem er samtökunum til framdráttar.

Annað, má bara nota opinber framlög til að styðja við "réttan" málstað en ekki ef hann er "rangur"?  Ef svo er, hver er þá hinn "rétti" málstaður og hver er hinn "rangi"?  Ef fulls jafnræðis gætti, þá myndu stjórnvöld og ESB setja jafn háa upphæð til þeirra sem eru andsnúnir aðild og þeir fá sem eru hlyntir.

Nú hef ég ekki tekið afstöðu í þessu máli og vil því gjarnan heyra góðan og rökfastan málflutning úr báðum "herbúðum". Svona færsla hefur ekkert með málefnin að gera, heldur er eingöngu sett fram til að reyna að draga úr trúverðugleika hins aðilans, en endar á því að draga úr trúverðugleika Evrópusamtakanna.

Varðandi spurninguna, þá eru menn líklega að vísa til félagsgjalda, þjónustugjalda og annars sem Bændasamtökin fá fyrir að það sem þau gera.  Ég get ekki séð að það komi málinu nokkur skap við hvort greiðandinn er ríkið eða einhver annar, þar sem "ríkið" hefur ekki tekið ákvörðun um inngöngu, eingöngu að gengið sé til viðræðna.

Af hverju þarf að vera gagnsæi í því hvaðan þessir peningar koma?  Skiptir það nokkru máli hvaðan peningarnir koma?  Er um slíka gagnsæi að ræða þegar kemur að Evrópusamtökunum eða á krafan bara við um þá sem voga sér að vera mótfallnir inngöngu í ESB?

[Pétur Guðmundur Ingimarsson (IP-tala skráð) 31.10.2010 kl. 21:19]

Talandi um feluleiki.

Hafa endurskoðendur getað skrifað upp á reikninga Bændasamtaknanna síðustu tvo áratugi?

Hvað um ESB?

[Evrópusamtökin, www.evropa.is, 1.11.2010 kl. 17:43]

@MGN: Af hverju þarf að vera gagnsæi? Vegna þess að ógagnsæi opnar fyrir spillingu.

Skiptir máli hvaðan peningarnir koma? Já, ef um er að ræða opinbert fé, þá örugglega alveg fullt af fólki sem er því andvígt. T.d. Evrópusinnar!

Í færslunni voru birtar spurningar sem vöknuðu hjá ritstjórn í kjölfar fréttarinnar. Er t.d. hægt að sjá og finna upplýsingar um það hvað sjálfsaflafé Bændasamtakanna er? Svarið er nei! Það var reynt í kjölfar fréttarinnar.

Færslan er aðeins einn angi af þessu stóra máli.

Þú veist sjálfsagt líka um að Ríkisendurskoðun hefur gert alvarlegar athugasemdir við framkvæmd búvörusamninga, t.d. vill RE að gagnsæi búvörusamninga verði aukið. Þú getur lesið um það hér .

Einnig vill RE að gerðir verði formlegir samningar um ýmsar þóknanir hjá Bændasamtökunum.

Íslenskir skattgreiðendur eiga þá kröfu að ALLT bókhald Bændasamtakanna sé opið og gagnsætt, vegna þess, jú, þau eru rekin fyrir almannafé!