Tekur ESB af okkur skötuna?

Í dag er messa heilags Þorláks. Forsíða Fréttablaðsins skartar skötu og í Fréttatímanum er umfjöllun um kæsingu og skötu. Ritari er alinn upp við skötuát, enda að vestan; góð skata, með soðnum kartöflum, hamsatólg, smjöri og nýju rúgbrauði er herramannsmatur og vart hægt að hugsa sér jól án skötu. 

Skötuát er hluti af arfleifð Íslendinga og þjóðleg hefð. Í umræðunni um ESB birtast allskyns goðsagnir og ein þeirra er að ESB (ef að aðild verður) muni taka frá okkur hitt og þetta; fiskinn, orkuna, fullveldið, hlutir leggist af, landbúnaðurinn rústist og hvaðeina. Ekkert af þessu á hinsvegar við rök að styðjast.

Enn hefur engum dottið í hug að "ESB taki af okkur skötuna", en það hlýtur að koma að því. Að "illir" skriffinnar í Brussel setji reglugerð sem banni skötuát!

Þetta var bara svona stutt hugleiðing um þann fáránleika sem stundum heyrist í ESB-umræðunni.

Og fyrir þá sem snæða skötu í dag: Verði ykkur að góðu! 

Ps. ESB mun EKKI taka af okkur skötuna, bara til að hafa það á hreinu! 

(Mynd: Jón Bragi Hlíðberg) 

Athugasemdir

[Stefán Júlíusson (IP-tala skráð) 23.12.2010 kl. 10:27]

ESB gæti styrkt stöðu þeirra sem búa í blokk og vilja enga skötulykt í stigaganginum;)

[Gunnlaugur I., 23.12.2010 kl. 11:52]

Það er aldrei að vita upp á hverju vitleysisgangurinn hjá skriffinnunum Brussel getur tekið, það hafa ótal dæmi sýnt okkur og reynslan kennt okkur.

Til dæmis verðum við að hætta hvalveiðum og hvaláti þá líklegast líka ef til ESB innlimunar kemur.

Við skulum ekki treysta einu né neinu sem frá spilltri valdaelítunni í Brussel kemur.