Ingvar Gíslason fyrrum ráðherra: Óskyldum málum blandað saman (ESB-Icesave)

Grein Ingvars Gíslasonar, fyrrum alþingismanns og ráðherra, um Icesave, í Fréttablaðinu í gær, hefur vakið athygli ritstjórnar. Ekki síst vegna þess að Ingvar er andvígur ESB-aðild og í samtökum þeirra sem tala gegn aðild.

Reynt hefur verið í umræðunni að splæsa saman ESB-málinu og Icesave. En það er einmitt þetta sem Ingvar gerir að umtalsefni sínu. Ingvar segir: "Ferill málsins sveigðist inn á þá braut að verða milliríkjamál, hvort sem mönnum líkar betur eða verr. Þegar svo er komið er langeðlilegast að gera út um slík mál með samningum. Sögulega séð hafa Íslendingar yfirleitt tekið samningaleið framyfir dómstólaleið í milliríkjadeilum."

Og í lokin segir Ingvar: "Ef samningaleiðin er farin hafa íslensk stjórnvöld vald á málsmeðferð með virkum hætti að sínu leyti, eða eins og gerist í samningaviðræðum. Núverandi samningur í Icesavemálinu felur í sér viðunandi lausn deilunnar, tryggir góð málalok. — Fráleitt er að túlka samninginn sem "aðgöngumiða að Evrópusambandinu". Þar er blandað saman óskyldum málum."

Kannski dæmi um það þegar menn geta vegið og metið málin með skynsamlegum hætti - þrátt fyrir að vera á móti ESB.

(Leturbreyting, ES-bloggið). Mynd: Visir.is

Athugasemdir

[Gunnar Heiðarsson, 24.3.2011 kl. 17:54]

Það er ótrúlegt hvað ESB sinnar geta barið hausnum endalaust við stein.

Enn eru menn að skrifa greinar um að ESB umsókn og icesave deilan séu ótengd, jafnvel þó stöðuskýrsla frá ESB um framgang viðræðna, sem kom út fyrir tveim dögum segi skírt að þessi tvö mál séu samtengd!

Það má svo sem satt vera að samþykkt icesave sé ekki "aðgöngumiði inn í ESB", en ef hann verður felldur er ljóst að innganga er fyrir bí.