Tvær góðar greinar í Fréttablaðinu: Ávinningur af menntasamstarfi og aðildarsamningurinn

Á Eyjunni stendur: "Íslenskir aðilar hafa með mennta- og vísindasamstarfi sínu við Evrópusambandið síðastliðin fimmtán ár fengið sem nemur tíu milljörðum króna hærri framlög en greitt hefur verið í þáttökugjöld. Eru þá ótalin mikil verðmæti sem felast í aðgengi að upplýsingum og samstarfi hvers konar við evrópska vísindasamfélagið.

Skrifar Ágúst Hjörtur Ingþórsson, forstöðumaður Rannsóknarþjónustu Háskóla Íslands, um þetta í Fréttablaðið í dag þar sem hann áréttar mikilvægi slíks samstarfs fyrir íslenska aðila burtséð frá því fjármagni sem hingað skilar sér frá ESB."

Dr. Baldur Þórhallsson skrifar einnig grein í FRBL í dag um mikilvægi góðs aðildarsamnings við ESB og segir:

"Íslenskum stjórnvöldum hefur gengið misvel að semja við nágrannaþjóðir okkar. Samningar um útfærslu landhelginnar voru flestir vel heppnaðir en Icesave-samningarnir voru óásættanlegir að mati meirihluta þjóðarinnar. Þegar horft er til samningaviðræðna um bættan aðgang að mörkuðum Evrópu er stórmerkilegt hversu vel hefur tekist til.

Þetta á við um alla þrjá helstu samningana, þ.e. inngönguna í EFTA árið 1972, fríverslunarsamninginn við ESB tveimur árum síðar og aðildina að EES árið 1994. Það sama má segja um Schengen-samninginn. Íslendingar náðu nær öllum kröfum sínum fram í þessum viðræðum um bættan markaðsaðgang og verndun sjávarútvegs og landbúnaðar."

Öll grein Baldurs

Athugasemdir

[Haraldur Hansson, 29.6.2011 kl. 17:12]

Vek athygli á þessum orðum Ágústs Hjartar:
" ... Ísland hefur tekið fullan og virkan þátt í samstarfi á þessu sviði allar götur frá árinu 1994."

Það þarf sem sagt ekki að ganga í Evrópusambandið til að taka virkan þátt í evrópsku rannsóknar- og menntastarfi. Við erum nú þegar fullgildir þátttakendur og á fleiri sviðum en einu. 

Það sem Ágúst Hjörtur segir um að Íslendingar hafi "náð fram" lækkun á skólagjöldum í Bretlandi er beinlínis rangt. Það þurfti ekki einu sinni að semja um það, sbr. upplýsingar á Evrópuvefnum.