Sérkennileg afturköllun á umsókn um rannsóknarfé hjá Matís

Athygli hefur vakið að Matís hefur dregið til baka umsókn til Evrópusambandsins vegna eiturerfnamælinga í matvælum. Um er að ræða 300 milljónir króna. Vert er að benda á nokkrar staðreyndir í málinu:

1) Matís getu sótt um þetta fé vegna þess að Ísland stendur í aðildarviðræðum við ESB, en þó við gengjum inn gæti ESB ekki krafið okkur til baka um styrkinn 2) Matís hefur síðan 1994 fengið ýmiskonar styrki sem tengjast innlendri matvælaframleiðslu og 3) Markaðir í Evrópu er þeir mikilvægustu fyrir íslenskar afurðir, það er algert samkomulag um þá staðreynd!

Á RÚV stendur: "Matís sótti um styrkinn fyrr á árinu en hefur nú ákveðið að draga umsóknina til baka. Styrkurinn er ætlaður ríkjum sem eiga í aðildarviðræðum við Evrópusambandið. Andvirði styrksins átti að nota til að taka upp mælingar á eiturefnum í matvælum en um áramót rennur úr gildi undanþága sem Ísland hefur frá EES-reglum um mælingar á um þrjú hundruð eiturefnum. Friðrik Friðriksson, stjórnarformaður Matís, bendir á að aðildarviðræður Íslands við Evrópusambandið séu umdeildar. Matís er opinbert hlutafélag og fer landbúnaðar- og sjávarútvegsráðherra með eignarhlut ríkissjóðs í félaginu. Friðrik segir að stjórnin hafi horft til þess hvað umsóknin hefði geta haft í för með sér fyrir félagið og samskipti þess við eigandann til lengdar. Það liggi fyrir að engin sérstök hrifning hafi verið yfir umsókninni.

Matvælastofnun sendir sýni til rannsóknar hjá Matís. Jón Gíslason, forstjóri Matvælastofnunar, er ekki ánægður með að hætt hafi verið við umsóknina. Hann segir þetta spurningu um hvort hægt sé að greina eiturefni og hættuleg efni í matvælum. Það að senda öll sýni til útlandia seinki rannsóknum og hugsanlegum aðgerðum Matvælastofnunar. Auk þess sé það dýrara."

Er þetta ekki að ganga út í öfgar? Er ástæða til að hætt við umsókn um styrk vegna eiturefnamælinga í matvælum, vegna þess að ESB-umsóknin er umdeild? Hverslags eiginlega aðferðafræði er það?

Kemur þetta niður á matvælaöryggi í þeim matvælum sem verið er að rannsaka? Nei-sinnar, með landbúnaðarráðherra í broddi fylkingar eru jú alltaf að tala um þetta matvælaöryggi og hvað umsóknin að ESB sé dýr, en svo virðast menn hafa efni á þessu! Gaman væri að fá uppgefið hvað þetta eykur kostnað í sambandi við matvælarannsóknirnar mikið!

Á vefsíðu Matís segir:

"Hjá Matís starfa margir af helstu sérfræðingum landsins í matvælatækni og líftækni; matvælafræðingar, efnafræðingar, líffræðingar, verkfræðingar og sjávarútvegsfræðingar. Einnig starfar fjöldi M.Sc. og Ph.D. nemenda við rannsóknartengt nám hjá Matís. 

Helstu markmið Matís eru: 

Efla nýsköpun og auka verðmæti matvæla
Stuðla að öryggi matvæla
Stunda öflugt þróunar- og rannsóknastarf
Efla samkeppnishæfni íslenskrar matvælaframleiðslu á alþjóðlegum vettvangi"

(Leturbreyting, ES-bloggið)

Nú ef Matís vill ekki hafa þessi mikilvægu verkefni með höndum, þá hlýtur að vera hægt að fá einhvern annan innlendan aðila í málið. Þannig væri hægt að leysa úr þessu.

Athugasemdir

[Sleggjan og Hvellurinn, 29.11.2011 kl. 09:25]

Þetta er alveg með ólíkindum.

[Jón Valur Jensson, 29.11.2011 kl. 11:14]

Það er ANNAÐ, sem er með ólíkindum hér. Það er sko ekki það sama Jón og séra Jón í þessum málum, það geta menn séð í forsíðufrétt í Mbl. í dag – afhjúpandi, vil ég segja: IPA-styrkþegar fá undanþágu frá skattalögum, með undirfyrirsögn: Enginn virðisaukaskattur og engir tollar vegna ESB-styrkja. Þar kemur fram, hvernig peningasæknir styrkþegar (sem Esb þókknast að reyna að hafa góða, hafa þá sín megin) fá að njíta hér skattfrelsis, meðan aðrir borga sitt allt upp í topp!

Finnst ykkur það í alvöru í lagi? Og sjáið þið ekki, hversu vafasamir þessir styrkir eru, hvað þá heldur áróðurspeningarnir frá Esb. (230 milljónir í 1. lagi í gegnum Athygli hf. og eflaust stefnt á miklu meira seinna)?

Í moggafréttinni segir m.a.:

"Í fyrirhuguðum samningi mun meðal annars vera kveðið á um að styrkþegarnir séu undanþegnir virðisaukaskatti hér á landi vegna þeirra starfa sem unnin eru í tengslum við IPA-styrkina. Ennfremur mun þar vera kveðið á um að innflutningur þeirra sem þiggja IPA-styrkina verði undanþeginn tollum og öðrum gjöldum á innfluttar vörur. Þá eru þeir samningar sem fjármagnaðir eru með IPA-styrkjum undanþegnir opinberri skráningu, stimpilgjöldum eða þess háttar skattheimtu.

Persónulegar eignir þeirra einstaklinga, sem flytja til landsins og starfa á grundvelli IPA-styrkjanna, munu verða undanþegnar tollum og hvers kyns annarri skattheimtu. Loks eru einstaklingar og fyrirtæki sem þiggja IPA-styrki, en starfa eða hafa starfstöð utan Íslands, undanþegin íslenskum tekjuskatti."

ÞETTA ER HNEYKSLI.

[Sleggjan og Hvellurinn, 29.11.2011 kl. 13:46]

Þegar fólk er rökþrota vegna eins málefnis þá draga þeir annað málefni upp úr hatti sínum og röfla um það.

Smjörklípa.

[Jón Valur Jensson, 30.11.2011 kl. 04:00]

Smjörklípa?! Er þetta eina svarið? Var svona erfitt að verja sig?!

[Sleggjan og Hvellurinn, 30.11.2011 kl. 10:56]

Jón Valur. Þú veist það sjálfur að þú varst að skipta um umræðuefni.

Hvernig væri að ræða um málefnið í bloggfærlsunni..

Þú byrjar "Það er ANNAÐ, sem er með ólíkindum hér"

já ANNAÐ????

Hvernig væri að ræða um málefnið sem er til umfjöllunar?

[Jón Valur Jensson, 30.11.2011 kl. 14:48]

Ég skipti ekki um umræðuefni, ég ræddi þarna alfarið um IPA-styrkina og sagði frá frétt í Mbl. um þá forréttindastöðu sem verið er að veita styrkþegunum af hálfu skattayfirvalda hér með ALGERU skattfrelsi, og það hefði líka átt við um Matvís-menn, hefðu þeir fengið styrk. Er það þá ekki HNEYKSLI að ykkar eða þínu mati, Sleggja og/eða Hvellur? Eða treystið þið ykkur einfaldlega ekki til að ræða það?

Vitað er, að Jón Bjarnason stendur drengilegast allra í stjórnarráðinu gegn ásækni Esb-aflanna hér á landi sem í Brussel, og þess vegna eruð þið og evrókratískir ráðherrar og þingmenn að ráðast á hann.

Jón á heiður skilinn fyrir stöðuglyndi sitt og varðstöðu um rétt landsins og mætti gjarnan verða heiðursgestur á samkomu stúdenta á morgun, á fullveldisdegi íslenzku þjóðarinnar, eða er það ekki einmitt meiningin: að halda upp á fullveldi okkar og sjálfstæði, eða eru einnig þeir farnir að gera skammsýna málamiðlun við þá, sem sækja að þjóðfrelsi okkar?

Esb. myndi leggja undir sig æðstu fullveldisréttindi okkar á sviði löggjafar, dómsmála og framkvæmdavalds, sjá hér: Öll frumatriði fullveldis mæla gegn innlimun okkar í Evrópubandalagið!

En 58,9% þeirra, sem afstöðu taka í MMR-könnun, vilja að umsókn um aðild að Esb. verði dregin til baka.