Af lífeyrisskatti og byggðamálum

Fram hefur komið í fréttum að ríkistjórnin hyggst leggja á skatt á hreinar eignir lífeyrissjóðanna, til að greiða niður hjá öðrum, eða eins og segir á RÚV: "Nýr skattur á lífeyrissjóði verður til þess að lífeyrisinneign þeirra sem hafa ekki efni á eigin húsnæði rennur til að greiða niður vexti þeirra sem lent hafa í vandræðum við húsnæðiskaup."

Þetta er aðeins ein birtingarmynd af því skuggalega vaxtaumhverfi sem til staðar er hér á landi, en eins og komið hefur fram í fréttum eru vextir husnæðiseigenda hér á landi um tvöfalt hærri en í Evrópu. Þetta myndi t.d. lagast með upptöku alvöru gjaldmiðils, en eins og allir vita keyrir krónan upp vaxtastigið hér á landi.

Einnig hefur komið fram í fréttum að nánast engar framkvæmdir verða á sviði jarðgangagerðar næstu þrjú árin! Allt sett á salt.

Byggðaáætlanir ESB gera ráð fyrir að hægt sé að styrkja framkvæmdir sem þessar í formi mótframlags hjá viðkomandi aðildarríki (t.d. Brenner-járnbrautagöngin í Austrurríki, 55 km. löng). 

Enda eru t.d. menn á Vestfjörðum byrjaðir að hugsa sem svo: "Það er kannski bara best að ræða beint við Brussel i sambandi við byggðamál." Því það er viðurkennd staðreynd að hér á landi er nánast engin byggðastefna rekin, aðeins "vísir" að slíkri stefnu. T.d. er viðurkennt að ENGIN stefna sér til fyrir tiltekin svæði! Sjá frétt um þetta hér.

Byggðastefna ESB felur í sér margskonar möguleika til uppbyggingar hér landi. 

Athugasemdir

[Þorsteinn Briem, 12.12.2011 kl. 00:14]

Nefndarálit meirihluta utanríkismálanefndar Alþingis um aðild Íslands að Evrópusambandinu:

Byggðamál:

"Er einboðið að sveitarfélögin gegni lykilhlutverki í viðræðum um byggðamál, enda verða hagsmunir sveitarfélaga og byggða ekki aðgreindir. Að mati meiri hlutans þarf að tryggja byggða-, umhverfis-, atvinnu-, og nýsköpunarstuðning til dreifðra byggða.

Allt frá því að stækkunarferli Evrópusambandsins hófst í byrjun sjöunda áratugar síðustu aldar hefur sambandið haft í forgrunni efnahagslega uppbyggingu á þeim svæðum aðildarríkjanna sem lakast standa efnahagslega.

Nú er gert ráð fyrir að á tímabilinu 2007 til 2013 verði varið alls 350 milljörðum evra til málaflokksins.

Stærsti hluti þess fjár rennur til nýrra ríkja Evrópusambandsins í Austur-Evrópu sem lakast standa efnahagslega, auk Spánar, Portúgals, Grikklands og Möltu.

Auk þess eru verulegir fjármunir til ráðstöfunar í öðrum aðildarríkjum Evrópusambandsins á tilteknum forsendum sem meðal annars mundu ná til Íslands að óbreyttum reglum.

Meiri hlutinn bendir á að Ísland hefur lagt sitt af mörkum í þessu efni allt frá gildistöku EES-samningsins með fjárframlögum í þróunarsjóð EFTA sem veitt hefur fjármagn til þessara sömu ríkja og svæða innan Evrópusambandsins.

Hins vegar hafa svæði á Íslandi í sambærilegri stöðu ekki notið aðgangs að slíku fjármagni með sama hætti."

[Þorsteinn Briem, 12.12.2011 kl. 00:16]

ÍSLENSK SVEITARFÉLÖG Í EVRÓPUSAMBANDINU.

RÚMLEGA ÞRIÐJUNGI af fjárlögum Evrópusambandsins, um 347 milljörðum evra, verður varið til BYGGÐAMÁLA á tímabilinu 2007-2013.

Byggðaþróunarsjóður.

Sjóðnum er ætlað að jafna stöðu einstakra svæða. Áhersla er til dæmis lögð á nýsköpun í þekkingariðnaði og rannsóknum, umhverfismál og samgöngur en sérstök áhersla er lögð á dreifbyggð svæði og erfið.

Samstöðusjóður.

Sjóðnum er ætlað að styrkja ríki sem verða fyrir verulegu tjóni af völdum náttúruhamfara, til dæmis veðurs.

Aðlögunarsjóður.

Sjóðnum er ætlað að styrkja væntanleg aðildarríki og veita þeim aðstoð við að undirbúa og uppfylla ýmis nauðsynleg skilyrði fyrir inngöngu í Evrópusambandið.

Félagsmálasjóður.

Sjóðnum er ætlað að jafna félags- og fjárhagslega stöðu íbúa í álfunni. Áhersla er lögð á ýmiss konar menntun og að styrkja stöðu hópa sem eiga undir högg að sækja, til dæmis innflytjenda, fatlaðra, ungs og gamals fólks á vinnumarkaði.

Landbúnaðarsjóður.

Sjóðurinn skiptist í tvennt, annars vegar er um að ræða styrki til bænda og hins vegar styrki til dreifðra byggða.

Styrkir til sjávarbyggða.

Evrópusambandið veitir styrki til sjávarbyggða úr sjóði sem heitir European Fisheries Fund og stuðningurinn byggir á fjórum stoðum:

• Aðlögun flotans.

• Fiskeldi, vistvænar veiðar, vöruþróun og markaðssetning.

• Veiðistjórnun og öryggismál.

• Stuðningur við byggðir sem eru að verulegu leyti háðar fiskveiðum og til að stuðla þar að fjölbreyttari atvinnuvegum.

Íslensk sveitarfélög í Evrópusambandinu

[Þorsteinn Briem, 12.12.2011 kl. 00:21]

Aukin áhrif íslenskra sveitarfélaga í Evrópusambandinu - Mastersritgerð 2009