Agnesi svarað

Andrés Pétursson, formaður Evrópusamtakanna skrifar snarpa grein í MBL í dag, þar sem hann svarar Agnesi Bragadóttur, einum virtasta blaðamanni (konu!) blaðsins. Ummæli hennar i sunnudagspistli hennar í gær, 23. maí hafa vakið athygli, sérstaklega er hún fullyrðir að ESB muni taka yfir auðlindir landsins, ef Ísland gengur í ESB. Í grein sinni segir Andrés m.a.:

,,Það er hins vegar miklu alvarlegra þegar þú í grein þinni í sunnudagsblaði Moggans 23. maí sl. kemur enn og aftur með margleiðréttar rangfærslur að Evrópusambandið ætli sér að taka yfir auðlindir Íslands. Hvar hefur þú haldið þig undanfarin ár þegar allir helstu sérfræðingar bæði erlendir og innlendir hafa margoft bent á ruglið í þessum málflutningi?! Ég veit að það þýðir lítið að benda þér á menn eins og Eirík Bergmann, Aðalstein Leifsson, Auðunn Arnórsson, Úlfar Hauksson, Baldur Þórhallsson eða Kristján Vigfússon því í þínum huga eru þetta ekki helstu sérfræðingar þjóðarinnar í málefnum Evrópusambandsins heldur einstaklingar sem eru „illa“ haldnir af Evrópusýkinni eða aftaníossar Samfylkingarinnar og því ekki hlutlausir álitsgjafar. En gæti ekki verið að þessir aðilar hefðu hreinlega kynnt sér þessi Evrópumál af gaumgæfni og þess vegna styddu þeir Samfylkinguna!

Ég vil því benda þér á álit auðlindanefndar Sjálfstæðisflokksins (og ekki telst sá flokkur hluti af aðdáendaklúbbi ESB og því hlýtur þetta að vera marktækur álitsgjafi) varðandi hugsanlega aðild Íslands að Evrópusambandinu. Í álitinu segir meðal annars:

„Niðurstaða undirritaðra er að aðild að sambandinu muni ekki valda verulegum breytingum á málefnum er tengjast raforku, vatni, jarðvarma, olíu og gasi. Aðild að ESB hefði engin áhrif á yfirráð Íslands yfir Drekasvæðinu. Aðildin mun heldur ekki valda verulegum breytingum á regluverkinu er gildir um hálendið eða á málefni norðurheimskautsins.“

Lesa má greinina í heild sinni á www.evropa.is

Einnig er vert að benda á að á www.mbl.is/esb er að finna fjölda greina um ESB, m.a. um orku og auðlindamál. T.d. viðtal við Guðna Jóhannesson, Orkumálastjóra, þar sem hann tjáir sig um þetta. Lesið hér