Umsókn þegar verið afhent

Helstu fjölmiðlar hafa greint frá því að ríkisstjórn Íslands hefur þegar lagt inn umsókn Íslands að Evrópusambandinu, ESB.

Sjá m.a á MBL og RÚV

Á www.visir.is segir: ,,Guðmundur Árni Stefánsson, sendiherra Íslands í Stokkhólmi, gekk í dag á fund ráðuneytisstjóra sænska utanríkisráðuneytisins og afhenti umsókn Íslands. Á sama tíma kynnti Stefán Haukur Jóhannesson, sendiherra Íslands gagnvart Evrópusambandinu, umsóknina fyrir framkvæmdastjórn sambandsins."

Jón Sigurðsson á www.pressan.is

Jón Sigurðsson skrifar yfirvegaða og málefnalega grein á pressan.is í dag um þessa samþykkt ESB-tillögunnar, undir yfirskriftinni ,,Áhrifamikil stefnuyfirlýsing Íslendinga". Þar segir Jón meðal annars:

,,Samþykkt Alþingis um aðildarumsókn að Evrópusambandinu er sögulegur atburður og mikilvægur áfangi í sögu þjóðarinnar. Samþykktin er í mörgum skilningi áhrifamikil stefnuyfirlýsing Íslendinga. Þessi samþykkt ber með sér framtíðarsýn sem getur haft mótandi áhrif á flesta þætti þjóðmálanna og þjóðlífsins. Með þessu ákveða Íslendingar að stefna að opnu samfélagi, að þátttöku og samvinnu við aðra, en hverfa markvisst frá einangrunarstefnu og afturhaldi. Þessi stefnumótun markar öll svið samfélags-, efnahags- og menningarmála.

Með þessari samþykkt er mótuð stefna fyrir þá endurreisn fjármála- og bankakerfis sem fyrir dyrum stendur á Íslandi. Þeirri skoðun er hafnað að stefna eigi í átt að gamla lokaða og ríkisrekna krónukerfinu, millifærslu- og sjóðabákninu sem einkenndi Ísland áður fyrr. Sannleikurinn er sá að við gátum ekki beðið deginum lengur eftir þessari stefnuákvörðun. Við urðum einmitt núna að taka stefnuna í þessum mikilvæga málaflokki.

Samþykkt Alþingis er metnaðarfull og sýnir að Íslendingar stefna fram á leiðina undir fullum seglum. Þessi samþykkt vekur góðar vonir og bjartsýni. Hún sýnir að Íslendingar hafa ekki kiknað undir erfiðleikunum og horfið inn í sjálfa sig. Þjóðin hefur burði og metnað til að sækja í sig veðrið."

Hægt er að lesa greinina í heild sinni hér

 

Leiðarar MBL og FRBL

Bæði MBL og FRBL skrifa um ESB-málið í leiðurum sínum í dag.

Í Morgunblaðinu segir m.a.: ,,Ísland á heima í Evrópusambandinu. Vitaskuld eru bæði kostir og gallar við aðild. Taka ber mark á áhyggjum í sjávarútvegi og lykilatriði að gæta þeirra hagsmuna í samningunum. Mikið hefur verið talað um að íslenskum landbúnaði stafi ógn af Evrópusambandinu, en það er flóknara mál og misjafnt eftir landbúnaðargreinum hver niðurstaðan yrði. Aðildin snýst hins vegar ekki bara um sérhagsmuni, heldur einkum hagsmuni almennings. Færa má margvísleg rök að því að aðild að Evrópusambandinu myndi bæta hag neytenda."

Sjá: http://morgunbladid.blog.is/blog/morgunbladid/entry/915780/

Í Fréttablaðið ritar Jón Kaldal leiðara og segir m.a.: ,,Það er athyglisvert að velta fyrir sér viðbrögðum þriggja hagsmunasamtaka við þeirri ákvörðun að sækja skuli um aðild að Evrópusambandinu. Bændasamtökin og Landssamband íslenskra útvegsmanna harma þessa niðurstöðu Alþingis á sama tíma og Alþýðusambandið fagnar henni eindregið.

Þetta kemur á engan hátt á óvart. Afstaða þessara þriggja samtaka hefur legið fyrir um langa hríð. Það er hins vegar eitthvað sérstaklega táknrænt við að hagsmunagæslusamtök atvinnurekenda gamla Íslands, bænda og útgerðarmanna, berjist gegn framgangi máls sem er stutt af samtökum kenndum við alþýðuna."

Sjá:http://visir.is/article/20090717/SKODANIR04/854887296/-1

Sterk staða Íslands segir Carl Hamilton

Sænski þingmaðurinn, Carl B. Hamilton, segir í viðtali við finnska Hufvudstadsbladet í gær að það sé vel mögulegt fyrir Ísland að halda fiskveiðistefnu sinni innan ESB. Hann telur það vera kost fyrir Ísland að standa eitt í viðræðum við ESB, en t.d. ekki í samfloti við Norðmenn og þetta styrki því stöðu Íslands. Hamilton, sem er doktor í hagfræði, hefur fylgst vel með Íslandi í fjölda ára og er einn virtasti þingmaður sænska Þjóðarflokksins (Folkpartiet.)

Ragnar og Þorsteinn í Kastljósi

Ragnar Arnalds, frá Heimssýn og Þorsteinn Pálsson, fyrrverandi ritstjóri Fréttablaðsins, mættust í Kastljósinu í gærkvöldi og ræddu þar m.a. atburði gærdagsins. Ragnari staldraði mjög mikið við þá skoðun sína að Íslendingar ,,þyrftu nú að notast við krónuna," og að það tæki allt upp í 20 ár að fá Evruna. Það verður hinsvegar að benda á þá staðreynd að það tók Finna fimm ár að taka upp Evru og Slóvenar, sem gengu í ESB 2004, hafa nú þegar tekið hana upp. Einnig fimm ár. Tímarammmi Ragnars verður því að teljast furðulegur. Ein leið er líka að tengja íslensku krónuna við gengi Evrunnar, líkt og Danir gera. Það væri mögulegur millileikur í stöðunni.

Að mati bloggara er það hinsvegar verkefni næstu ára að stuðla að efnahagsstefnu sem almennt miðar að því að stuðla að stöðugleika og aðgerðum sem miða að því að hér verði við lýði nothæfur gjaldmiðill fyrir fjölskyldur og atvinnulíf. Þetta benti Þorsteinn Pálsson m.a. réttilega á. Annars einkenndist viðtalið af sjónarmiðum óbreytts ástands(RA) og sjónarmiðum nýrrar hugsunar og nauðsynlegra breytinga (ÞP).

Hér má sjá spjall Ragnars og Þorsteins: http://dagskra.ruv.is/sjonvarpid/4473199/2009/07/16/0/

Skynsemin réði

„Ég er mjög ánægður og tel að skynsemin hafi verið látin ráða á Alþingi í dag,“ segir Andrés Pétursson, formaður Evrópusamtakanna. Þetta kemur fram á www.mbl.is og er öll fréttin hér

Viðbrögð við viðbrögðum

Athyglisvert er að ,,skima" yfir viðbrögð manna við aðildarmálinu í blöðunum. Það sem bloggara finnst athyglisverðast er að sjálfsögðu viðbrögð forystumanns Bændasamtakanna, Haraldar Benediktssonar, sem segir að ,,...Nú hilli undir endalok þess búskapar sem er í dag." Hann segir ennfremur að ,,laun bænda muni hverfa" og notar orðið ,,ólíft" yfir sveitir landsins og telur að býlum muni fækka verulega.

Bloggari veltir því þessvegna fyrir sér hvort almenningur hérlendis þurfi að hafa áhyggjur af svokölluðu fæðuöryggi, sem bændur tala svo mikið um? Eða er hægt að snúa þessu við og líta á tímann framundan sem undirbúningstíma fyrir samtök bænda, til að gera íslenskan landbúnað enn betri, vistvænni, hagkvæmari og sterkari?

Friðrik J. Arngrímsson, framkvæmdastjóri LÍÚ, segir að nú verði auðlindum landsins fórnað og á RÚV.is segir orðrétt: ,,Hann hefur trú á því að viðræðurnar sigli í strand á fyrsta degi."

Bloggari leyfir sér að draga þessi orð stórlega í efa og varpa upp þeirri spurningu hvort með væntanlegri aðild geti Ísland skipað sér fremst í flokk útvegsþjóða innan ESB? Sú þekking og kunnátta sem fyrirfinnst hér á landi í sjávarútvegsmálum er einstök. Gætum við miðlað þessari þekkingu á jákvæðan hátt innan ESB og sem ESB-land, ef við gerumst aðilar? Hefur Friðrik velt þessu fyrir sér?

Viðbrögð annarra aðila eru m.a. þessi: Vilhjálmur Egilsson, framkvæmdastjóri SA telur þetta efla traust á Íslandi og að við séum að ,,fara í rétta átt." Samtök Iðnaðarins fagna niðurstöðunni og telja að við ,,munum rísa upp úr öskustónni." Jón Steindór Valdimarsson, frkvstj. SI segir ákvörðunina ,,langþráð skref í átt að stöðugleika þar sem gjaldmiðillinn spili stórt hlutverk." ASÍ fagnar þessari niðurstöðu og ,,að þetta mál verði leitt til lykta," segir Gylfi Arnbjörnsson, forseti ASÍ.

Jonas Gahr Støre vill meta áhrif á Noreg

Samþykkt Alþingis í dag um að leggja inn umsókn um aðild að ESB er þegar farin að hafa áhrif í Noregi. Á vef NRK, norska ríkisútvarpsins er haft eftir Jonas Gahr Støre utanríkisráðherra að Norðmenn verði nú að setja í gang vinnu við að meta áhrif mögulegrar aðildar Íslands að ESB á Noreg. Í því sambandi talar hann um að meta áhrifin á EES-samninginn. Hann telur einnig eðlilegt að endurmeta EES eftir 15 ára notkun.

Fréttina í heild sinni má lesa hér

Eiríkur í The Guardian

Eiríkur Bergmann, stjórnmálafræðingur, ritar grein í gæðablaðið Guardian um ESB-málið á vef blaðsins, þar sem hann rekur m.a. aðdraganda ESB-málsins. Lesið hér: 

Viðbrögð Samtaka Iðnaðarins

Viðbrögð Samtaka Iðnaðarins er að finna á vefsíðu þeirra, www.si.is

,,Alþingi hefur samþykkt að sækja um aðild að Evrópusambandinu. Þar með eru orðin kaflaskil í Evrópumálum. Samtök iðnaðarins hafa lengi haft þá stefnu að sækja beri um aðild að Evrópusambandinu. Sú stefna var mótuð löngu áður en núverandi efnahagserfiðleikar komu til og mótast því ekki af þeim.

Í hönd fara samningaviðræður þar sem mikilvægt er að halda vel á heildarhagsmunum þjóðarinnar. Samtök iðnaðarins munu hér eftir sem hingað til leggja sig fram um að halda fram hagsmunum iðnaðarins í þessu máli. Mikilvægt er að halda öllum hagsmunum til haga og leggja þá á vogarskálarnar þegar gengið er frá samningi og hann að lokum lagður í dóm þjóðarinnar.

Samtök iðnaðarins bjóða fram krafta sína í því mikilvæga ferli sem fram undan er og treysta því að vera höfð með í ráðum á öllum stigum málsins frá upphafi til enda."