Barroso fagnar ákvörðun Alþingis

Eyjan birti eftirfarandi:

Í yfirlýsingu frá Jose Manuel Barroso, forseta framkvæmdastjórnar ESB segir að ákvörðun Alþingis sé til marks um lífsþrótt Evrópusambandsins og þá von sem menn beri í brjósti til Evrópu.

“Ísland er Evrópuland með langar, djúpar lýðræðisrætur. Nú er það íslensku ríkisstjórnarinnar að fylgja þessu eftir með því að sækja formlega um til forysturíkisins,” segir ennfremur í yfirlýsingunni.

Viðbrögð og umfjallanir erlendis

Strax að lokinni atkvæðagreiðslu Alþingis um ESB-málið birtust fréttir í erlendum vefmiðlum um niðurstöðuna. Allir helstu fjölmiðlar Norðurlanda hafa birt fréttir um málið, BBC og fleiri. Norska Dagbladet er með stríðsfyrirsögn: http://www.dagbladet.no/2009/07/16/nyheter/utenriks/island/7228918/

Aftenposten skrifar að nú verði að endurmeta EES-samninginn: http://www.aftenposten.no/nyheter/uriks/article3172038.ece og því er bætt við að þetta muni væntanlega hleypa af stað nýrri ESB-umræðu þar í landi.

Allir helstu miðlar í Svíþjóð og Danmörku fjalla um málið.

T.d.: http://jp.dk/udland/article1756455.ece og http://www.svd.se/nyheter/utrikes/artikel_3213093.svd

Á heimasíðu sinni segir Carl Bildt, utanríkisráðherra Svíþjóðar (sem gegnir formennsku í ESB) að hann hafi fengið upphringingu um niðurstöðuna. ,,Að sjálfsögðu fögnum við þessari niðurstöðu og að sjálfsögðu verður séð til þess að umsóknin fái rétta meðferð," segir hann á bloggi sínu. Fredrik Reinfelt, forsætisráðherra Svía fagnar einnig niðurstöðunni.

Þá fjalla Financial Times og Der Spiegel einnig um málið:

http://www.ft.com/cms/s/0/69e7e5e4-721e-11de-ba94-00144feabdc0.html?nclick_check=1

http://www.spiegel.de/politik/ausland/0,1518,636587,00.html

 

TIL HAMINGJU ÍSLAND!

Skynsemin vann! Alþingi samþykkti með 33 atkvæðum gegn 28 (2 sátu hjá) að sækja um aðild að ESB og þar með hefja aðildarviðræður.  Þessi niðurstaða er án efa ein sú mikilvægasta sem um getur í sögu Íslands.

Evrópusamtökin óska öllum Íslendingum til hamingju með þessa niðurstöðu, en þó sérstaklega öllum Evrópusinnum. Málið snýst um framtíðarhagsmuni, framtíðarstöðu, framtíðarafkomu íslensku þjóðarinnar.

Framundan eru aðildarviðræður, þar sem tryggja þarf hagsmuni Íslands. Niðurstöður þeirra verða lagðar í dóm þjóðarinnar.

MBL.is birti þetta yfirlit:

Já sögðu:

Samfylkingin

Jóhanna Sigurðardóttir, Helgi Hjörvar, Valgerður Bjarnadóttir, Steinunn Valdís Óskarsdóttir, Össur Skarphéðinsson, Sigríður Ingibjörg Ingadóttir, Skúli Helgason, Ásta Ragnheiður Jóhannesdóttir, Árni Páll Árnason, Katrín Júlíusdóttir, Þórunn Sveinbjarnardóttir, Magnús Orri Schram, Björgvin G. Sigurðsson, Oddný Guðbjörg Harðardóttir, Róbert Marshall, Kristján Möller, Guðbjartur Hannesson, Ólína Þorvarðardóttir, Sigmundur Ernir Rúnarsson, Jónína Rós Guðmundsdóttir.

Vinstri græn

Árni Þór Sigurðsson, Álfheiður Ingadóttir, Svandís Svavarsdóttir, Lilja Mósesdóttir, Ögmundur Jónasson, Steingrímur J. Sigfússon, Bjarkey Gunnarsdóttir, Katrín Jakobsdóttir.

Sjálfstæðisflokkur

Ragnheiður Ríkharðsdóttir.

Framsóknarflokkur

Siv Friðleifsdóttir, Birkir Jón Jónsson, Guðmundur Steingrímsson

Borgarahreyfingin

Þráinn Bertelsson.

Nei sögðu:

Sjálfstæðisflokkur

Illugi Gunnarsson, Pétur H. Blöndal, Ólöf Nordal, Birgir Ármannsson, Bjarni Benediktsson, Jón Gunnarsson, Ragnheiður Elín Árnadóttir, Árni Johnsen, Unnur Brá Konráðsdóttir, Kristján Þór Júlíusson, Tryggvi Þór Herbertsson, Ásbjörn Óttarsson, Einar K. Guðfinnsson og Guðlaugur Þór Þórðarson.

Vinstri græn

Atli Gíslason, Þuríður Backman, Lilja Rafney Magnúsdóttir, Ásmundur Daði Einarsson, Jón Bjarnason.

Framsóknarflokkur

Sigmundur Davíð Gunnlaugsson, Vigdís Hauksdóttir, Eygló Harðardóttir, Gunnar Bragi Sveinsson, Höskuldur Þórhallsson, Sigurður Ingi Jóhannsson.

Borgarahreyfingin

Þór Saari, Birgitta Jónsdóttir, Margrét Tryggvadóttir. Þess skal getið að Margrét sat hjá þegar greidd voru atkvæði um breytingartillögu meirihluta utanríkismálanefndar.

Sátu hjá:

Sjálfstæðisflokkur

Þorgerður Katrín Gunnarsdóttir

Vinstri græn

Guðfríður Lilja Grétarsdóttir

Reynsla Svía í Speglinum

Gunnar Hólmsteinn Ársælsson, stjórnmálafræðingur og stjórnarmaður Evrópusamtakanna, var gestur Spegilsins í gærkvöldi og ræddi þar m.a. reynslu Svía af ESB. Svíþjóð tók við formennsku í ESB þann fyrsta júlí og gegnir henni út árið. Heyra má viðtalið við Gunnar á eftirfarandi krækju:

http://dagskra.ruv.is/ras1/4463036/2009/07/15/2/

Ögurstund í sögu lýðveldisins

Í dag, á hádegi, mun Alþingi kjósa um hvort ganga eigi til aðildarviðræðna við Evrópusambandið,ESB. Sjaldan hefur Alþingi fjallað um jafn mikilvægt mál og því ekki að furða að tilfinningar fólks, bæði innan og utan þings, séu miklar. Það er þó sérkennilegt að fylgjast með andstæðingum aðildarviðræðna flykkjast um tillögu um svokallaða tvöfalda þjóðaratkvæðagreiðslu þótt ljóst sé að stór hluti þessa fólk er algjörlega á móti aðildarviðræðum.

Svo hljóta menn að setja spurningamerki við upphlaupið varðandi þessa svokölluðu landbúnaðarskýrslu í gær. Ekki er víst að andstæðingar aðildar séu sérlega ánægðir með  birtingu skýrslunnar því það var í sjálfu sér lítið nýtt sem kom þar fram.

Þó var hnykkt á því að þessar hefðbundnu greinar eins og sauðfjárrækt og mjólkuriðnaður myndu að öllum líkindum koma ágætlega út úr inngöngu í ESB ef við fengjum sambærilegan samning og Finnar. Einnig kom fram að verð til neytenda (þ.e. mikill meirihluti íslensku þjóðarinnar!) myndi lækka töluvert og þar með myndu lífskjörin batna!

Hér má lesa skýrsluna í heild sinni.

Umræðan um íslenskan landbúnað varð Magnúsi Geir Eyjólfssyni bloggara á Pressunni og doktorsnema í stjórnmálafræði umhugsunarefni og skrifaði hann ágæta grein þar í gær. Magnús segir meðal annars: ,,En aftur að umfjöllunarefninu sem er landbúnaður. Enn sem komið er hafa Bændasamtökin ekki komið fram með sannfærandi rök af hverju landbúnaður ætti að leggjast af ef Ísland gengur í ESB. Geta þau bent á fordæmi? Nei, þvert á móti hefur landbúnaður í nágrannalöndunum eflst. Blekkingaleikur samtakanna um finnsku leiðina er kómískur, en annar Framsóknarmaður hefur þegar svarað því á sannfærandi hátt.

Ég myndi kannski kaupa rök samtakanna ef landbúnaður hér á landi stæði í fullum blóma. Er það svo? Ekki samkvæmt samtökunum sjálfum sem segja horfur í íslenskum landbúnaði mjög slæmar. Þrátt fyrir það kerfi sem samtökin standa svo mikinn vörð um. Raunar er það þannig að flest það jákvæða sem gerst hefur í íslenskum landbúnaði hefur gerst þrátt fyrir kerfið, en ekki vegna þess. Það er í gegnum einkaframtak bændanna sjálfra. Ég nefni kornrækt, ferðaþjónustu, beint frá býli svo eitthvað sé nefnt.

Og að halda því fram að landbúnaður leggist af innan ESB er hreint og beint súrrealískt. Halda þessir menn virkilega að bændur hætti bara að rækta landið? Eru samtökin að segja að skjólstæðingar séu duglausar liðleskjur?"

Hægt er að lesa alla greinina á http://www.pressan.is/pressupennar/LesaMagnusGeir/eigum-vid-ad-raeda-landbunad

Evrópusamtökin hvetja alla til að mæta á þingpalla kl. 12.00 í dag og sjá þingmenn kjósa um þetta mikilvæga mál. Þar sem rými er takmarkað hvetjum við fólk til að mæta snemma.

Tengill inn á ESB hjá Alþingi

Vert er að benda áhugasömum á þessa vefsíðu hjá Alþingi, en á henni er að finna efni sem tengist ESB-málinu, m.a. nefndarálit Utanríkismálanefndar ofl:

http://www.althingi.is/dba-bin/ferill.pl?ltg=137&mnr=38

Dómsdagur nú?

Haraldur Benediktsson, formaður Bændasamtaka Íslandsritar grein í MBL í dag undir fyrirsögninni ,,Endalok nútímalandbúnaðar á Íslandi?" Þar segir hann m.a. að nú sé verið að ,,véla" um sjálfstæði Íslands og það um hábjargræðistímann! Hann segir stjórnarmeirihlutann vilja leggja út í ,,hættulega vegferð" (með því að fara út í samningaviðræður við ESB).  Þá segir hann það vera mikilvægan dag fyrir bændur þegar ,,ákveðið verður að sækja um aðild að ESB..." Í lok greinarinnar segir Haraldur orðrétt: ,,Þau sem styðja aðildarumsókn eru að senda bændum skilaboð um að huga sem minnst að framtíðaruppbyggingu búa sinna. Undirbúa undanhaldið. Skilaboð þeirra eru að það dregur hratt að endalokum nútímalandbúnaðar á Íslandi. Því ekki sækjum við um til að hafna síðan aðild?"

Fyrst vill bloggari benda á að Norðmenn hafa gert slíkt í tvígang. Ekki verður farið nánar út í það hér.

En, getur aðild Íslands þýtt einmitt hið gagnstæða fyrir íslenska bændur? Að hér geti byggst upp enn skilvirkari, nútímalegri og afkastameiri landbúnaður en ella? Að með aðild fylgi t.d. tækifæri til nýsköpunar og tilkomu enn umhverfisvænni landbúnaðar í takt við kröfur nútíma neytenda? Sem er stefnan í Danmörku, Finnlandi og Svíþjóð.

Bændasamtökin tala mun minna um sænskan landbúnað en finnskan, enda klaga sænskir bændur ekki undan ESB og hafa nýtt sér tækifæri til að nútímavæða enn frekar landbúnað sinn. Samkvæmt nýjustu fréttum streyma sænskar konur inn í landbúnaðinn, það er ,,inni" að vera bóndi í Svíþjóð. Sænskir bændur eru stoltir af störfum sínum.

Bloggari telur að þetta snúist í raun um að horfa framhjá tækifærum sem í aðild gætu falist, en ekki að hér sé um að ræða einhvern ,,Dómsdag nú," fyrir íslenskan landbúnað.

Að lokum má benda á að samtök bænda segja alfarið NEI við aðildarviðræðum. Er það lýðræðisleg afstaða?

Nýr forseti Evrópuþingsins

Jerzy Buzek, fyrrverandi forsætisráðherra Póllands er nýkjörinn forseti Evrópuþingsins. Hann fékk 555 atkvæði af 736 í fyrstu umferð kosninganna.  Buzek er fyrsti fulltrúi fyrrverandi kommúnistaríkjanna sem kjörinn er til þessa embættis. Jerzy Buzek er 69 ára gamall íhaldsmaður, en miðhægrimenn eru fjölmennasti hópurinn á Evrópuþinginu.  Buzek hefur átt sæti í þinginu frá árinu 2004.

Einhver Svíi?

Í umræðum um ESB-málið í kvöld sagði Pétur Blöndal, þingmaður Sjálfstæðisflokks, að ,,einhver Svíi stjórnar nú Evrópusambandinu." Veit Pétur Blöndal ekki að ,,þessi Svíi," er Fredrik Reinfelt, formaður sænska Hægriflokksins, systurflokks Sjálfstæðisflokksins? Kannski Pétur þurfi að kynna sér málið betur?

Að spara aurinn en kasta krónunni?

Talsvert hefur borið á í ESB-umræðunni að menn velti fyrir sér kostnaðinum við aðild. Gjarnan eru það þeir sem eru á móti aðild sem velta uppi þessari hlið málsins. Sjá t.d. hér

Ekki það að kostnaðurinn skipti ekki máli. En það fer hinsvegar minna fyrir vangaveltum um það sem Ísland gæti "grætt". Það er reynsla nær allra ríkja sem gerast aðili að verslun og viðskipti aukast. Þá er það er mikið undir löndum sambandsins hvernig þeim tekst að nýta sér aðild. Nýlega birturst t.d. fréttir um miklar opinberar framkvæmdir í Póllandi, sem fjármagnaðar eru með aðstoð ESB.

Um er að ræða stórar framkvæmdir á sviði vega og samgöngumála. Meðal annars hefur sænska verktakafyrirtækið Skanska fengið þar samninga. Fyrirtækið hefur einnig nýlega gert stóran samning í Tékklandi á sama sviði. 

Hér á Íslandi má margt betur fara í samgöngumálum, væri þetta t.d. svið sem við gætum ,,grætt" á því að vera í ESB? Aukið umferðaröryggi fækkar slysum, betri samgöngur spara tíma og fyrirhöfn, um það eru allir sammála.

Gildir í þessari umræðu; ,,spörum aurinn, en köstum krónunni?"