Höftin verða að hverfa - ekki þó vitað hvenær

Fréttablaðið birtir í dag frétt um gjaldeyrishöftin og þar af leiðandi gjaldmiðilsmál. Það er áhugavert að kíkja á fréttina, en í henni segir m.a.:

,,Um leið kom fram í máli Más (Guðmundssonar, Seðlabankastjóra, innskot ES-blogg) að ekki væri hægt að útiloka að Alþingi samþykkti að framlengja gjaldeyrishöftin á næsta ári, en samkvæmt lögum rennur gildistími þeirra út í ágúst 2011.

Fulltrúar í pallborði lýstu margir hverjir efasemdum um að hægt yrði að aflétta höftum í bráð, enda hefðu þau staðið í áratugi í einhverri mynd áður en þeim var aflétt á tíunda áratug síðustu aldar.

Arnór Sighvatsson aðstoðarseðlabankastjóri sagði aðstæður í dag hins vegar aðrar á tímum alþjóðlegra viðskipta og því afar ólíklegt að höftin vörðu lengi. "Svo lengi sem við erum aðilar að Evrópska efnahagssvæðinu sé ég ekki fyrir mér að við getum verið lengi með höftin," sagði hann og benti á að þeim yrði ekki viðhaldið nema í skjóli samþykktar Alþjóðagjaldeyrissjóðsins. Hann benti á að efnahagsáætlun stjórnvalda rynni út í ágúst á næsta ári og ekki seinna en þá þyrfti að liggja fyrir tímasett áætlun um afnám hafta.

Arnór sagði jafnframt ljóst að ef þjóðin hafnaði aðild að Evrópusambandið þyrfti að bæta framkvæmd peningastefnunnar. "Við þurfum einhvers konar viðbótartæki til viðbótar við vaxtatækið til að minnka veltinginn," sagði hann en taldi "draumóra" að gera ráð fyrir því að sveiflur á gengi krónunnar hyrfu."

Hér á árum áður lifðu Íslendingar við allskyns haftakerfi, fólk t.d. fékk gjaldeyri með því að þekkja fólk í bönkunum. Við höfðum vöruskipti við þáverandi Sovétríkin o.s.frv.

Ísland árið 2010 er hinsvegar nútímahagkerfi (eða það er allavegana meiningin). Getur slíkt hagkerfi haft gjaldmiðil í höftum?

Nú eru allavegana tveir gjaldmiðlar í notkun, króna og Evra (t.d. greiðir CCP öllum starfsmönnum sínum í Evrum og sjávarútvegsfyrirtækin eru byrjuð að gera upp í Evrum.) en almennir launamenn fá greitt í krónum.

Einnig er athyglisvert að rýna í hvað Arnór Sighvatsson, aðstoðarbankastjóri Seðlabankans segir. Hann talar s.s. um að ef þjóðin hafni aðild að ESB, þá þurfi bankinn "viðbótartæki" til að minnka "veltinginn". Hann telur það "draumóra" að gera ráð fyrir að sveiflur á gengi krónunnar hverfi.

Sem er alveg rétt, en sveiflur krónunnar hafa verið skuggalegar í gegnum tíðina.

Sjá t.d. hér: http://m5.is/?gluggi=gjaldmidill&gjaldmidill=1 

Og hér: http://m5.is/?gluggi=gjaldmidill&gjaldmidill=4 

Menn geta svo sjálfir dæmt hvort þetta sé framtíðin! 

Ný spurningasíða um Evrópumál! Kannski.is!

Það er allt á fleygiferð varðandi ESB-málið! 

Í Fréttatímanum í dag er sagt frá nýrri síðu um ESB-málið, sem er komin á netið: www.kannski.is 

Í Fréttatímanum segir: ,,Elvar Örn Arason og Arnar Ólafsson settu upp vefsvæðið kannski.is þar sem leitast verður við að varpa ljósi á kosti og galla þess að Ísland gangi í Evrópusambandið.Þessi hugmynd mótaðist í samræðum okkar á milli. Ég er stjórnmálafræðingur og Arnar er tölvunarfræðingur,“ segir Elvar Örn Arason um þá hugmynd hans og vinar hans Arnars Ólafssonar að stofna vefsvæðið kannski.is, upplýsingavef um kosti og galla aðildar Íslands að Evrópusambandinu. Vefsvæðið verður opnað á hádegi í dag, 5. nóvember."

Eyjan er einnig með frétt um málið 

Hér er er svo dæmi um spuringu, sem margir velta fyrir sér: http://kannski.is/answer.php?id=78 

Ný (myndbanda)síða um Evrópumál - Þjóð.is

Búið er að hleypa af stokkunum mjög áhugaverðri heimasíðu um Evrópumál.

Síðan nefnist Þjóð og er slóðin: http://thjod.is

Þar er rætt við fólk úr ýmsum atvinnugreinum, bæði hérlendis og erlendis. Þar má til dæmis nefna Auði Jónsdóttur rithöfund, Valgeir Guðjónsson,tónlistarmann, Gísla Tryggvason talsmann neytenda, Jón Baldvin Hannibalsson frv. utanríkisráðherra, G. Valdimar Valdimarsson kerfisfræðing, Jón Karl Helgason framkvæmdastjóra, Felix Bergsson leikara, Maríönnu Friðjónsdóttur kvikmyndargerðarkonu, Berg Ebba Benediktsson lögfræðing og marga fleiri.

Einhver fínpússun á eftir að eiga sér stað, en smám saman verður bætt inn fleiri viðtölum.

Sjón er sögu ríkari!  

Carl Bildt í DV: Aðlögunin hluti af endurreisn Svíþjóðar og viðspyrna

DV birtir í dag viðtal við Carl Bildt, utanríkisráðherra Svía, sem var staddur hér á landi í tilefni þings Norðurlandaráðs. Kíkjum á bút úr viðtalinu, en það er Jóhann Hauksson, blaðamaður, sem spyr:

,,Þú varst forsætisráðherra þegar bankakreppa skall á í Svíþjóð í byrjun níunda áratugarins. Hvaða aðgerðir til endurreisnar skiluðu mestum árangri?

„Þetta var margt sem leiddi til þess að okkur tókst að ná okkur upp úr kreppunni á þeim tíma. Eftir á að hyggja heppnaðist okkur vel að endurreisa bankakerfið sjálft og leysa vandann sem því fylgdi. Við gripum til ýmissa yfirgripsmikilla kerfisbreytinga. Þetta fór síðan saman við inngöngu okkar í Evrópusambandið. Það leikur enginn vafi á því að eftir að við vorum gengin í ESB hafði það góð áhrif og stuðlaði að auknum stöðugleika efnahagslífsins og þróun þess. Þetta fólst sem sagt í aðgerðum innan fjármálakerfisins, umbótum í efnahagslífinu og inngöngu í Evrópusambandið.“

Íslendingar eru í þeim fasa að reyna að ná sér á strik eftir bankahrun og hafa sótt um aðild að Evrópusambandinu. Umsóknin er umdeild og mætir andstöðu til dæmis innan sjávarútvegs og landbúnaðar. Hvernig hefur sænskum landbúnaði vegnað innan ESB?

„Sænskum landbúnaði vegnar mjög vel innan Evrópusambandsins. Hann hefur fengið sinn stuðning og jafnvel of mikla aðstoð því hún er kostnaðarsöm. En almennt séð má segja að aðlögunin að Evrópusambandinu á sínum tíma hafi veitt viðspyrnu og hafi gefið sænsku efnahagslífi aukið þrek. Ef við berum alþjóðakreppuna nú saman við kreppuna snemma á tíunda áratugnum má sjá að Evrópa kemst miklu betur frá henni nú en þá. Þetta má rekja til miklu nánari samvinnu landanna innan ESB. Þetta var miklu erfiðara þá en nú og það má rekja beint til samstarfsins innan Evrópusambandsins.“  

(Leturbreyting: ES-bloggið) 

Evrópuþingið vill styrkja rétt Internetnotenda: Þú átt að geta "eytt" þér af netinu!

Margir sem nota internetið gera sér grein fyrir því að það er erfitt að "eyða" sér af netinu og taka það út það sem maður hefur sett inn. T.d. eyðist ekki Facebokk-síða, þó notandinn eyði henni. Hún er aðeins sett í geymslu!

Þá eru dæmi um að fólk hafi verið rekið úr vinnu vegna mynda og brandara sem það hefur sett á netið. Það skiptir því máli hvernig notendur "hegða" sér á netinu, sem virðist ekki "gleyma."

Þing Evrópuþingsins ræðir nú þessi mál og hyggst endurskoða löggjöf um þessi mál, frá 1995, áður en Google og Facebook urðu til.

Markmiðið er að styrkja rétt internet-notenda á þessu sviði.

EU-Observer greinir frá þessu á vef sínum og lesa má fréttina hér 

Ps. Þar kemur einnig fram að s.k. tölvuþrjótar hafi "hakkað" sig inn í tölvukerfi OECD, til að nálgast þar fjármálaupplýsingar. 

Össur í FRBL: Valkostur Heimssýnar? Ekki til!

Össur Skarphéðinsson, utanríkisráðherra, skrifar ein greinina í viðbót um ESB-málið í FRBL í dag. Össur segir:

,,Aðild smáríkja eins og Íslands að Evrópusambandinu virðist leiða til verulegrar aukningar á erlendum fjárfestingum hjá þeim. Þegar umsvif fyrirtækja í þeim eru skoðuð kemur líka í ljós að fjárfestingar þeirra margfölduðust í öðrum ríkjum á fjórum fyrstu árunum eftir aðild, mest í löndum Evrópusambandsins. Þannig virðist full þátttaka í samstarfi Evrópuþjóðanna á sviði efnahags- og viðskiptamála skapa fyrirtækjum nýtt svigrúm til að vaxa og fjölga störfum. Þetta kemur í ljós þegar menn skoða opinberar tölur um fjárfestingar sem tengjast fimm smáríkjum sem gengu í Evrópusambandið árið 2004.

Jákvæð Evrópuskref

Staðreyndin er sú, að í hvert skipti sem Ísland hefur stigið skref í átt að nánari samruna við Evrópu, þá hafa erlendar fjárfestingar stóraukist á Íslandi. Um leið hafa orðið til ný störf. Það gerðist með aðildinni að EFTA á sínum tíma. Það gerðist aftur þegar við urðum hluti af EES-samningnum. Það mun endurtaka sig enn einu sinni þegar við göngum í Evrópusambandið. Það getum við lært af reynslu Maltverja, Kýpverja, Slóvena, Slóvaka og Eistlendinga. Hugsanlega gerist það einnig, þegar kemur að því að Íslendingar taka upp evruna.

Þvert á það sem haldið er fram af Heimssýn og þeim „innmúruðu og innvígðu" á Evrópuvaktin.is (sem formaður utanríkismálanefndar kallar „hægriöfgamennina") þá er sú aukning sem varð í erlendum fjárfestingum hér á landi í kjölfar EES-samningsins rök með því - en ekki gegn - að hvert skref til nánari samvinnu við Evrópu eykur traustið á Íslandi. Það leiðir til meiri fjárfestinga hér á landi. Það eykur svigrúm fyrirtækja til að vaxa og það skapar ný störf. Þurfum við ekki á nýjum störfum að halda? Jú, - svo sannarlega."

Og síðar segir Össur:

,,Hver er valkostur Heimssýnar?

Það er fullkomlega lögmæt afstaða að hafna Evrópuleiðinni. Menn verða þá að gera það á grundvelli raka. Við, sem fylgjum Evrópuleiðinni, eigum þá kröfu á hina, sem hafna henni, að þeir sýni fram á betri leið út úr vandræðum Íslands. Þeir verða að sýna að þeir hafi betri aðferðir til að útrýma atvinnuleysi á Íslandi.

Hver er valkostur Heimssýnar? Það hefur enginn maður heyrt af honum.

Hann er ekki til."

Öll greinin 

Baldur Kristjánsson: Þurfum að vera fullgild í hópi Evrópuþjóða

Baldur Kristjánsson, guðfræðingur, er með áhugaverða hugleiðingu á Eyju-bloggi sínu. Við bendum á það og krækjan á færsluna er hér. (Mynd: Smugan.is)

Vertu með - sköpum Sterkara Ísland!

Viljum minna alla áhugamenn um Evrópusamvinnu að samtökin STERKARA ÍSLAND berjast fyrir aðild Íslands að ESB.

Hvetjum fólk til þess að vera með! Á þessari síðu er hægt að skrá sig í samtökin og gerast virkur í því að skapa STERKARA ÍSLAND!

Einnig: http://www.sterkaraisland.is/skraning/

Eru krónan og höftin meiriháttar viðskiptahindrun?

Þessa dagana er mikið rætt um þörfina á erlendri fjárfestingu hér á landi. Össur Skarphéðinsson, "Utanríkis" bendir á þetta í grein fyrir skömmu.

Þeir sem fylgjast með efanahagsmálum vita að lönd þurfa erlenda fjárfestingu og lönd vilja fjárfesta hvort í öðru. Þetta er hluti af því sem kallað er alþjóðleg viðskipti.

En við þetta vaknar spurningin hve fýsilegt fyrir fjárfesta að koma hingað til lands eins og staðan er í gjaldmiðilsmálum, krónan er jú "innilokuð" í höftum. Sem samkvæmt fréttum verða að minnsta kosti fram á næsta vor.

Gerist eitthvað á meðan svo er? Er hægt að "vinna" með gjaldmiðil sem er í slíku ástandi? Gjaldmiðil sem ekki er treystandi til þess að vera hluti af og í frjálsu markaðshagkerfi?

Þetta hlýtur að flokkast sem meiriháttar viðskiptahindrun! 

Sverrir Jakobsson í FRBL: Svik við málstaðinn?

Sverrir Jakobsson skrifar grein í Fréttablaðið í dag um ESB-málið og rifjar þar m.a. upp þá staðreynd að gert var samkomulag um ESB-málið í samstarfsyfirlýsingu ríkisstjórnarinnar. Þá talar hann um þá aðlögun sem menn hafa verið að tala um og segir:

,,Þetta aðlögunarferli er hins vegar ekki nýtt af nálinni heldur hefur það verið í gildi síðan Ísland gekk í evrópska efnahagssvæðið fyrir hartnær tveimur áratugum. Í ferlinu sjálfu felst ekki óafturkræf nálgun við Evrópu­sambandið sem kemur í veg fyrir að þjóðin geti hafnað aðild að ríkjasambandinu. Það sjáum við af reynslu Noregs, sem tvisvar hefur farið í gegnum slíka aðlögun án þess að landið sé nú hluti af ESB. Það hafa því engar forsendur breyst frá því að VG kaus að setjast í ríkisstjórn með þessa stefnu. Þetta viðurkennir Hjörleifur Guttormsson í grein í Smugunni 26. október og kallar þá ákvörðun „reiðarslag". En hvað með þann þorra flokksstjórnarmanna sem, ólíkt Hjörleifi, studdi stjórnarsamstarf á grundvelli þessarar samstarfslýsingar vorið 2009? Hafa þeir endurskoðað sína afstöðu og vilja nú hætta stjórnarsamstarfi við Samfylkinguna? Þeirri spurningu verða hundraðmenningar að svara hreinskilnislega, ef ekki sameiginlega þá hver fyrir sig. Forystumenn VG eru jafnbundnir af þeirri samþykkt flokksins, að ganga til stjórnarsamstarfs á grundvelli áðurnefnds samstarfssáttmála, og þeir eru af öðrum stefnumótandi samþykktum flokksins.

Það er ekkert vafamál að sá hluti samstarfsyfirlýsingar ríkisstjórnarinnar sem tekur til Evrópusambandsins ber meira mót af stefnu Samfylkingarinnar heldur en stefnu VG. En svo er ekki um alla hluta hennar. Í samstarfsyfirlýsingunni segir t.d. líka: „Umhverfisvernd sem hefur sjálfbæra þróun samfélags og efnahags að leiðarljósi er sá grunnur sem ný atvinnu- og auðlindastefna stjórnarinnar byggir á. Þannig eru tekin mikilvæg skref í átt til hins nýja græna hagkerfis sem skilar jöfnum vexti, og tryggir að ekki sé gengið á höfuðstól auðlindanna." Það er eðlileg krafa helsta flokks umhverfis­sinna á Íslandi að ríkisstjórnin starfi í anda þeirrar atvinnustefnu sem hún hefur sjálf markað og að aðilar innan hennar vinni hvorki í orði né verki gegn anda samstarfsyfirlýsingarinnar."

Allur pistill Sverris (Mynd: FRBL)