Evrópuvefur opnaður í júní

RÚV segir frá: "Vísindavefur Háskóla Íslands og Alþingi hafa gert með sér samning um svonefndan Evrópuvef sem er ætlað að veita málefnalegar og óhlutdrægar upplýsingar um Evrópusambandið og Evrópumál.

Vefurinn verður opnaður formlega þann 23. júní og samningurinn sem gerður hefur verið um hann nær að svo stöddu fram til næstu áramóta. Í fjárlögum ársins 2011 er framlag til að koma vefnum á fót í tilefni af aðildarumsókn Íslands að Evrópusambandinu."

Öll frétt RÚV

Ný stjórn Evrópusamtakanna

 

Ný stjórn Evrópusamtakanna var kjörin á aðalfundi þeirra í gærkvöldi, en hún lítur svona út:

Andrés Pétursson, fjármálastjóri, formaður
Sigrún Gísladóttir,fyrrum skólastjóri, Garðabæ
Gunnar Hólmsteinn Ársælsson, stjórnmálafræðingur
G.Pétur Matthíasson, upplýsingafulltrúi
Einar Kárason, rithöfundur
Eva Einarsdóttir, borgarfulltrúi

Anna Margrét Guðjónsdóttir Evrópumaður ársins - fyrsta konan sem hlýtur titilinn

Anna Margrét Guðjónsdóttir, varaþingmaður, var valin Evrópumaður ársins árið 2010, á aðalfundi Evrópusamtakanna, sem fram fór í gærkvöldi. Hún er fyrsta konan sem hlýtur þessa viðurkenningu.

Anna Margrét var áberandi í Evrópuumræðunni  í fyrra og sýndi  að hún er mikil hugsjónamanneskja og hefur mikla þekkingu á málaflokknum.Þá er hún hvergi smeyk við að segja skoðanir sínar og sýndi það á árinu að hún getur tekist á við miklar áskoranir á þessu sviði.

Þetta var í sjöunda sinn sem Evrópusamtökin veita þessa viðurkenningu, en það var Andrés Pétursson sem veitti viðurkenninguna. Hann var á fundinum endurkjörinn sem formaður Evrópusamtakanna.

Forseti Slóvena: Taka verður fullt tillit til sérstöðu Íslands

Á RÚV.is stendur: "Forseti Slóveníu og fyrrverandi forseti Evrópusambandsins segir að taka verði fullt tillit til sérstöðu Íslands sem fiskveiðiþjóðar í viðræðunum um ESB-aðild. Verði það ekki gert eigi Íslendingar að leita annarra leiða til að haga samskiptum sínum við sambandið.

Danilo Türk hafði einungis verið forseti í átta daga, þegar Slóvenar tóku við stjórn forsætisnefndar Evrópusambandins, - í ársbyrjun 2008. Í Slóveníu búa rúmlega tvær milljónir manna, þannig að ríkið er eitt hið fámennasta í ESB. Forsetinn segir að smáríki eigi þangað fullt erindi.

"Ég held að kostir þess, fyrir smáríki að ganga í Evrópusambandið, liggi í augum uppi. Þegar þau verða hluti af miklu stærra markaðssvæði opnast alls kyns möguleikar á alþjóðlegu samstarfi og gefur smáríkjunum rödd á alþjóðavettvangi. Slóvenar eru einnig hluti af myntbandalaginu og okkar reynsla er sú að evran veiti stöðugleika og vernd fyrir sveiflum á fjármálamörkuðum," segir Türk.

"Við höfum skilning á sérstöðu Íslands, í landfræðilegum skilningi. Það er aðdáunarvert hvernig Íslendingar hafa byggt upp iðnað í kringum fiskveiðar sínar. Þið eruð stórveldi þegar kemur að fiskveiðum og auðvitað þarf að taka sérstaklega tillit til þess í viðræðum um aðild að Evrópusambandinu."

Öll fréttin (texti)

Sjónvarpsfréttin

Glaðir Grandamenn í Brussel

Á vipskiptavef Vísis stendur: ",,Sýningin hefur farið mjög vel af stað. Það er stöðugur straumur gesta hér á sýningarbásnum okkar og menn eru mjög áhugasamir," segir Eggert Benedikt Guðmundsson, forstjóri HB Granda á sjávarútvegssýningunni í Brussel sem nú stendur yfir.

Eggert segir ennfremur að erlendir markaðir séu heilbrigðir og traustir og spurn eftir sjávarafurðum er mjög mikil. „Þá má ekki gleyma því að hér eru haldnir fjörlegir fundir og nú í hádeginu stóð Íslandsstofa fyrir mikilvægum kynningarfundi vegna Icelandic Responsible Fisheries vottunarmerkisins á Holiday Inn hótelinu hér við sýningarhöllina, en þangað var fjölda kaupenda og áhrifaaðila í sjávarútvegi boðið," segir Eggert.

Fjallað er um málið á vefsíðu HB Granda. Þar segir að sýningarnar hófust í gærmorgun og munu þær standa yfir í þrjá daga. Þetta eru fjölsóttustu sýningar sinnar tegundar í heiminum í dag en rúmlega 700 fyrirtæki víðs vegar úr heiminum taka þátt í ESE sjávarafurðasýningunni og rúmlega 200 fyrirtæki kynna framleiðsluvörur sínar á véla- og tækjasýningunni SPE sem haldin er samhliða.

Íslensk fyrirtæki eru áberandi á sýningunum líkt og undanfarin ár en í ár taka 26 íslensk fyrirtæki þátt. Íslandsstofa hefur haft veg og vanda af því að skipuleggja þátttökuna en nefna má að þetta er í 19. sinn sem íslensku fyrirtækin kynna afurðir sínar og framleiðslu á sameiginlegu sýningarsvæði."

Öll fréttin

"Ég er maður fullveldisins - fullveldið er lifandi"

Forseti Slóveníu, Dr. Danilo Türk, sagði á málþingi í H.í. í dag, það vera borðleggjandi að fullveldi ríkja væri virt innan ESB og að í tilfelli Slóveníu hefði þetta þýtt tækifæri fyrir landið að samlagast Evrópu og ESB sem sjálfstætt og fullvalda ríki. "Ég er maður fullveldisins, fullveldið er lifandi," sagði Türk.

Í erindi á málþinginu fór hann yfir þróun mála í Slóveníu, frá því að landið braust undan oki kommúnismans í Júgóslavíu, sumarið 1991, en þá lýstu þetta fyrrum lýðveldi Júgóslavíu yfir sjálfstæði. Frá þeim tímapunkti var markið sett á aðild að ESB og árið 2004 gekk Slóvenía í ESB og tók upp Evruna sem gjaldmiðil árið 2007.

Dr. Danilo Türk, sagði Evruna hafa veitt landinu (íb. 2 milljónir) dýrmætt skjól og öryggi.

Hann sagði ennfremur að Slóvenar vildu láta til sín taka utan ESB og nefndi þar Öryggisráð Sameinuðu þjóðanna sem dæmi. Hann lagði einnig á það mikla áherslu að landið hefði haldi sínu efnahagslega sjálfstæði og væri stöðugt að leita að samstarfsaðilum á því sviði.

Það kom fram í máli Dr. Danilo Türk að það hefði verið mjög dýrmætt fyrir land eins og Slóveníu að taka að sér formennsku í ESB og það væri gríðarlega hvetjandi fyrir landið sem heild. Slóvenar voru í því hlutverki seinni hluta ársins 2008.

Af máli Dr. Danilo Türk mátti ráða að mikil ánægja er með aðild landsins að ESB og sér hann mikil tækifæri, þó svo að reynslan af aðild sé enn takmörkuð, enda hefur landið aðeins verið í ESB í sjö ár.

Sérstakur gestur á málþinginu var forseti Íslands, Dr. Ólafur Ragnar Grímsson.

Hér má lesa um sjálfstæðisbaráttu Slóvena og forsetatíð Dr. Danilo Türk. Frétt frá Stöð tvö í kvöld um framsögu Dr. Danilo Türk í H.Í. í dag.

JÁ-Ísland flettiskilti: Bætum lífskjör og sköpum tækifæri!

Samtökin JÁ-Ísland hafa sett upp flettiskilti á höfuðborgarsvæðinu, sem eru í algerri andstöðu við hin barnalegu NEI-takk skilti Nei-sinna, sem hafa verið uppi í heilt ár.

Á skiltum JÁ-Íslands stendur: Bætum lífskjör og sköpum tækifæri!

Aðild Íslands að ESB skapar tækifæri á fjöldamörgum sviðum, um það eru margir sammála. Hér má sjá yfirlit yfir nokkra þætti sem felast í fullri aðild. Þetta er texti frá 2008, en fleiri ríki hafa t.d. tekið upp Evruna, alls eru þau 17 núna.

 

Aðal-Nei-sinni gerir hosur sínar GRÆNAR gagnvart Framsókn

Það eru farin að sjást þess merki að hatrömmustu andstæðingar ESB-aðildar eru farnir að gera hosur sínar grænar gagnvart Framsókn. Þetta sést best á þessari færslu framkvæmdastjóra samtaka Nei-sinna.

Morgunblaðið hefur líka farið afar fallegum orðum um Framsókn, bæði fyrir og eftir að flokkurinn samþykkti um daginn á flokksþingi að "hagsmunum Íslands væri betur borgið utan ESB en innan."

Þetta small eins og flís við rass hjá eldri ritstjóra blaðsins (og kannski þeim yngri líka)!

Nei-sinnar ætla sér kannski að INNLIMA Framsókn? Taka af flokknum fullveldið?

Aðstoðarutanríkisráðherra Póllands: Bændur hagnast hvað mest á ESB-aðild!

Mikolaj Dowgielewicz,aðstoðarutanríkisráðherra Póllands (mynd),sér um Evrópumál þar í landi. Í gær birtist mjög áhugavert viðtal við hann í Fréttablaðinu. Pólland gekk í ESB árið 2004 og er eitt stærsta ríki sambandsins, með rúmlega 38 milljónir íbúa og tekur við formennsku í ESB um mitt þetta ár.

En kíkjum aðeins á viðtalið, sem Klemens Þrastarson tók. Um hræðsluna við ESB, sem margir andstæðingar ESB ala stöðugt á segir Mikolaj: 

"Þegar við sömdum við ESB óttuðumst við margt. Við vorum hrædd um að Þjóðverjar myndu kaupa landið okkar og eignir, við vorum hrædd um landbúnaðinn og hefðir okkar og fullveldi en ég get sagt þér að eftir sjö ára veru í ESB hefur komið í ljós að engin þessara efasemda, ekki ein einasta, átti við rök að styðjast. Sjálfsmynd okkar sem þjóðar hefur ekki dofnað á nokkurn hátt. Okkur finnst við miklu sterkari sem hluti ESB og aðildin er hluti af okkur." (Leturbr. ES-blogg)

Um pólska bændur og hlut þeirra eftir aðild Póllands segir hann: "Ísland hefur einstakt tækifæri til að hagnast á aðildarferlinu. Ég tala fyrir hönd ríkis sem gekk í ESB fyrir sjö árum og hefði ekki farið í gegnum efnahagskrísuna með jákvæðan vöxt í efnahagslífinu annars. Fyrir aðild voru margir hópar í Póllandi mótfallnir ESB, til dæmis bændur. En þeir hafa hagnast mest allra á inngöngunni og nú eru 70% bænda hlynnt aðild, því hún hefur bætt lífsskilyrði til sveita en ekki verið róttæk umbylting og tortíming eins og óttast var." 

Skyldu íslensku Bændasamtökin vita af þessu? Sennilega ekki, enda er nær einungis skrifað um neikvæða finnska bændur í Bændablaðinu (með fullri virðingu fyrir finnskum bændum og landbúnaði!)

Um EES segir Mikolaj og kemst að kjarna málsins: "Stærsta vandamál ykkar í EES er að þið hafið engin áhrif á ferlið heldur samþykkið bara það sem aðrir ákveða fyrir ykkur." 

Glöggt er gests augað! 

Um Evruna segir Mikolaj: "Pólland mun taka upp evruna þegar tækifæri gefst og það hefur uppfyllt skilyrðin, segir Dowgielewicz, sem er sannfærður um að sameiginlegi gjaldmiðillinn sé á bataleið. Hann kannast ekki við að í Póllandi séu efasemdir um Evrópusamstarfið.

"Pólverjar eru með helstu stuðningsmönnum ESB, ekki bara af því að fólk trúir á hið pólitíska verkefni, samruna Evrópu, heldur af því að allir sjá og finna kosti aðildarinnar á eigin skinni. Hvort sem er Schengen-samstarfið, innri markaðurinn, landbúnaður eða menntun og að fá að fara og læra í öllum þessum löndum, Pólverjar kunna svo sannarlega að meta þetta frelsi. Á pólska þinginu er enginn sem efast um aðildina að ESB. Menn eru auðvitað með mismunandi áherslur en í það heila deilir enginn um að Pólland hefur hagnast gífurlega á aðildinni." 

Hér er viðtalið í heild sinni

Andri Geir: Hvar er kaupmátturinn?

Í nýjum Eyju-pistli veltir Andri Geir Arinbjarnarson fyrir sér spurningunni: Hvar kaupmátturinn? Andri skrifar: "Eru raunveruleg lífskjör á Íslandi svo mkilu lægri en á hinum Norðurlöndunum og ef svo er, hvers vegna er staðan sú, þrátt fyrir háa landsframleiðslu?  Hvar eru þessir peningar?  Stærð og einangrun landsins gerir auðvita hagkerfið hér óhagkvæmara og dýrara en varla skýrir það allan muninn.  Eitthvað annað kemur til.

Hér spilar inn í lítil framlegð, ófullkomið fjármálakerfi, óskynsamlegar skuldir og óvirkur gjaldmiðill.  Þá er líka rétt að líta á tekjudreifinguna, það hljóta margir að hafa það ansi gott í íslensku kreppunni (og líklega vill þessi hópur litlu breyta).

Það er ekki nóg að auka bara landsframleiðsluna með nýjum fjárfestingum.  Við verðum líka að fara að finna leiðir til að auka framlegð og gera hagkerfið hér skilvirkara.  Nýr og alvöru gjaldmiðill spilar hér lykilhlutverk.  Án hans er lítil von um raunverulega kaupmáttaraukningu í framtíðinni handa þorra fólks." (Leturbr. ES-bloggið)

Orð í tíma töluð!!