ASÍ: Veiking krónunnar veldur áhyggjum

Á RÚV segir: "Forseti Alþýðusambandsins segir sífellda veikingu krónunnar áhyggjuefni. Verulega hafi dregið úr kaupmætti almennings vegna hennar. Ná verði tökum á gjaldmiðlinum hið fyrsta.

Gengi krónunnar hefur veikst töluvert frá því í nóvember. Í markaðspunktum Íslandsbanka er vakin athygli á því að gengið hafi ekki verið lægra miðað við gengisvísitölu í tæp tvö ár.

Til að setja þetta í samhengi má nefna að evran er komin í tæpar 170 krónur og breska pundið yfir tvö hundruð krónur.

Veikari króna veldur því að verðlag á innfluttum vörum hækkar. Þá þróun óttast Gylfi Arnbjörnsson, forseti Alþýðusambandsins."

Krónan er kaupmáttarskerðir!

Eyjan: Evrópuvæðing í Noregi frá 1992

Í frétt á Eyjunni stendur: "Evrópuvæðing Norðmanna hófst í raun og veru árið 1992 og hafa þeir alla tíð síðan verið í aðlögun að regluverki sambandsins, segir norskur sérfræðingur. Þótt Norðmenn séu alla jafna sáttir við EES samninginn eins og er, þá er lýðræðishallinn mun meiri utan sambandsins en innan þess.

Í fyrirlestri í Þjóðarbókhlöðunni í hádeginu þar sem Fredrik Sejersted fór yfir stöðu Evrópumála kom fram að Noregur hefur uppfyllt 75% af skilyrðum og lagagerðum Evrópusambandsins. Á sama tíma og aðild að sambandinu sé mjög umdeild, jafnvel litin hornauga, telji Norðmenn að EES samningurinn sé fínn. Sjersted er hingað kominn ásamt Ulf Sverdrup til að kynna niðurstöður nefndar um áhrif EES samningsins og samband Noregs og Evrópusambandsins."

Krónan sekkur sem steinn - þrátt fyrir höft!

Krónan sekkur sem steinn, þrátt fyrir höft. Á www.visir.is segir:

"Gengi krónunnar er orðið veikara en það var þann 6. mars s.l. þegar Seðlabankinn ákvað að grípa inn í gjaldeyrismarkaðinn til að styrkja gengið.

Gengisvísitalan er komin í 229 stig og er það með orðin hærri en hún var fyrir þremur vikum síðan þegar Seðlabankinn seldi 12 milljónir evra eða sem svarar til rúmlega tveggja milljarða króna á gengi dagsins í dag. Evran kostar núna tæplega 169 krónur og dollarinn er kominn í rúmar 126 krónur."

Síðar segir í fréttinni: "Daginn sem Seðlabankinn beitti inngripum styrkst gengi krónunnar um rúmt prósent. Sú styrking er horfin.

Athygli vekur að síðan þessum inngripum var beitt hafa gjaldeyrishöftin verið hert að mun. Það virðist lítil sem engin áhrif hafa haft til styrkingar á gengi krónunnar."

Noregur og EES - fyrirlestur

Á vef Já-Íslands stendur: "Síðastliðin 20 ár hafa Ísland og Noregur hagað þátttöku sínni í Evrópusamrunanum á sama hátt, þ. e. með aðild að EES-samningnum og Schengen samstarfinu, sem og með annars konar samningum við Evrópusambandið.

Í janúar sl. kynnti norska endurskoðunarnefndin um EES-samninginn skýrslu sína sem greinir áhrif samningsins á Noreg og hvernig hann hefur þróast á þessu tímabili. Prófessor Fredrik Sejersted var formaður nefndarinnar og professor Ulf Sverdrup framkvæmdastjóri hennar.

Á opnum fyrirlestri með Fredrik Sejersted og Ulf Sverdrup, á vegum Alþjóðamálastofnunar og norska sendiráðsins, munu meginniðurstöður skýrslunnar vera kynntar.

Fundurinn fer fram þriðjudaginn 27. mars, milli klukkan 12.30 og 13.30 í fyrirlestrasal Þjóðarbókhlöðunnar."

Frétt á Stöð tvö, sem tengist þessu.

Umfjöllun um byggðastefnu ESB á RÚV - andstæðingar í þakið!

Þátturinn Landinn fjallaði um byggðastefnu ESB þann 25.mars s.l. og var það að mörgu leyti áhugaverð umfjöllun. Horfa má á innslagið hér.

Og þess var ekki lengi að bíða að andstæðingar ESB myndu rjúka í þakið yfir þessari umfjöllun. Fyrrum ráðherra í ríkisstjórn Íslands sakar t.d. RÚV um áróður á bloggi sínu.

Ekkert má nú! Allra síst að stuðla að opinni umræðu um ESB!

Umræðan um norska krónu ódrepandi?

Í frétt á Eyjunni stendur: "Greiningardeild Arionbanka telur að norska krónan sé mun fýsilegri kostur en Kanadadollar, ef farið verður út í það að taka upp einhliða aðra mynt."

Gott og vel, en það er aðeins einn galli á þessu: Okkur stendur einfaldlega ekki til boða að taka upp norska krónu! 

Dögun vill klára samningarferlið við Evrópusambandið

Dögun, nýtt stjórnmálaafl, sem stofnað var á dögunum, vill að samningaviðræður við ESB verði kláraðar og þjóðin fái að greiða atkvæði um aðildarsamning í þjóðaratkvæðagreiðslu. Þetta kemur fram í kjarnastefnu samtakanna á Fésbókinni:

" Við leggjum áherslu á opið og lýðræðislegt ferli, óháða upplýsingagjöf og fræðslu og treystum þjóðinni til að ráða niðurstöðunni." 

Þar með bætist Dögun í hóp þeirra sem vilja klára samningaferlið, en eins og þeir sem fylgjast með vita, þá er eitt helsta baráttumál NEI-sinna, að þjóðin fái ekki að greiða atkvæði um ESB-málið.

Dögun er velkomin í hóp þeirra sem vilja klára málið og leyfa þjóðinni að tala! 

Már Guðmundsson: Gjaldmiðilsumræðan á villigötum - Kanadadollar óraunhæfur

Á RÚV segir: "Seðlabankastjóri gagnrýnir umræðu um gjaldmiðlamál á Íslandi og segir hana á villigötum. Upptaka Kanadadollars sé meðal hugmynda sem séu óraunhæfar. Seðlabankinn vinnur nú að veigamikilli úttekt á framtíðarmöguleikum landsins í gjaldmiðlamálum. 

Seðlabankamenn hafa um nokkurt skeið unnið að skýrslu þar sem fara á yfir þá möguleika sem Ísland hefur varðandi gjaldmiðlamál. Skýrslan verður væntanlega fullbúin innan fárra vikna eða mánaða en hún ber heitið „Kostir Íslands í gjaldmiðlamálum“

„Þetta er mjög veigamikið og vandað verk og við viljum að það verði það, það veitir ekki af miðað við umræðuna á Íslandi,“ segir Már Guðmundsson seðlabankastjóri. Meðal þess sem sé skoðað er hvað fylgi því að ganga í Evrópusambandið og því að fara inn á evrusvæðið. Þá er skoðað hvernig hægt sé að halda enn í krónuna sem sjálfstæða mynt og fleiri form."

Hversvegna á að klára ESB-málið?

Gunnar Hólmsteinn Ársælsson, stjórnmálafræðingur og stjórnarmaður í Evrópusamtökunum, skrifar grein um ESB-málið á vef Skessuhorns á Vesturlandi. Hann veltir m.a. fyrir sér spurningunni hversvegna eigi að klára ESB-málið og segir: "

En hversvegna á að klára ESB-málið?

Jú, í fyrsta lagi væri það afar óheppilegt að hættaí miðju kafi, ferlið er komið vel á veg, mikil vinna hefur verið unnin. Í öðru lagi er gott fyrir íslenskt samfélag að klára málið og fá þannig hreinar línur í samskipti okkar við Evrópu og Evrópusambandið. Það er einnig hreinlega ekki gott að hafa ESB málið hangandi eins og Demoklesar-sverð yfir þjóðinni. Niðurstaða í ESB málinu myndi þá einnig varpa nýju ljósi á EES-samninginn, sem verður þá hægt að bregðast við. Í þriðja lagi hefur verið vaxandi krafa eftir október-Hrunið, árið 2008, um aukna aðkomu almennings að ákvörðunum, í formi beins lýðræðis. Þjóðaratkvæði um ESB er beint lýðræði. Fyrir ákvörðun sína þyrftu landsmenn að kynna sér málið, kosti þess og galla, sem og aðildarsamninginn sem heild. Í fjórða lagi er það einfaldlega vilji þjóðarinnar, samkvæmt skoðanakönnunum, að klára samningana við ESB.

ESB málið felur í sér mjög mikilvæga málaflokka, t.d. gjaldmiðilsmálin, sem virkilega brenna á fólki, rétt eins og umræða síðustu missera sýnir. Það má ekki gleyma því að í október 2008 hrundi íslenska krónan, gjaldmiðill Íslands. Þessi gjaldmiðill er nú í gjaldeyrishöftum og hafa virtir hagfræðingar á borð við Þorvald Gylfason bent á skaðsemi þeirra. Þá hefur Páll Harðarson, forstjóri Kauphallar Íslands, bent á að þau dragi bæði úr kaupmætti almennings, hækki fjármagnskostnað landsmanna og dragi úr tiltrú á íslenska hagkerfinu (sjá www.eyjan.is, þann 19.5.2011).

Samskipti Íslands og Evrópu verða ráðandi þáttur í utanríkismálum landsins um ókomna tíð. ESB er samstarfsvettvangur 28 lýðræðis og aðildarríkja (með Króatíu sem samþykkt hefur í þjóðaratkvæðagreiðslu að ganga inn), sem er einstakur í heimssögunni. Ísland og Íslendingar tapa ekki fullveldinu með inngöngu, það hefur engin aðildarþjóð gert! Þvert á móti mætti e.t.v. segja að Ísland fengi til baka það fullveldisframsal sem bent hefur verið á að felist í EES-samningnum."

Lítið gerst hjá Evrópunefnd Sjálfstæðisflokksins

Lítið hefur gerst á sviði Evrópunefndar Sjálfstæðisflokksins á undanförnum misserum. Reynda eru um þrjú ár frá þvi "nýtt efni" var sett inn á síðu flokksins hjá Evrópunefnd. Það var lokaskýrsla og ályktun Evrópunefndar.

Sjálfstæðisflokkurinn hefur það annars á stefnuskrá sinni að vera öflugur í vestrænni samvinnu. Skyldi Evrópa vera þar með?