Andrea Pappin í heimsókn - erindi á aðalfundi Evrópusamtakanna

Andrea Pappin, formaður írsku Evrópusamtakanna, verður sérstakur gestur á aðalfundi (íslensku) Evrópusamtakanna, sem fram fer kl. 20.00 á fimmtudaginn, Skipholti 50a.

Andrea er fædd í Dublin og hefur starfað sem stjórnmálaráðgjafi undanfarin ár, en árið 2008 varð hún formaður írsku Evrópusamtakanna. Þá hefur hún starfað náið með Margot Wallström, fyrrum varaforseta framkvæmdastjórnar ESB. Hér að neðan er enskur texti sem kynnir Andreu Pappin og hér má lesa Linked-in síðu um hana.

Andrea Pappin is a political communications consultant, specialising in European and Irish political campaigning. A Dublin native, Andrea has been involved in general election and in particular referendum campaigning for over ten years, in particular in her work with European Movement Ireland, which she ran since 2008. A previous Special Advisor to Margot Wallström, Vice President of European Commission, Andrea was also a former press advisor to the leader of the Irish Labour Party and worked in Department of Foreign Affairs during Ireland's last EU Presidency.

ESB og finnska stjórnsýslan - H.Í. á morgun

Alþjóðamálastofnun Háskóla Íslands í samstarfi við utanríkisráðuneytið stendur fyrir opnum fundi með Eiju-Leenu Linkola frá finnska utanríkisráðuneytinu, miðvikudaginn 4. maí frá kl. 12:00 til 13:00 í stofu 101 í Odda. Fundurinn fer fram á ensku.

Fundarstjóri er Auðunn Atlason, deildarstjóri upplýsingamála í utanríkisráðuneytinu.

Skilvirk þátttaka í Evrópusambandinu - reynsla finnskrar stjórnsýslu

Fjallað verður um undirbúning finnsku stjórnsýslunnar fyrir inngöngu í Evrópusambandið. Hagnýt nálgun á það hvernig undirbúningur stjórnsýslu fyrir inngöngu í Evrópusambandið gengur fyrir sig. Hvaða lærdóma hefur finnska stjórnsýslan dregið af inngöngu í ESB? Í þessu ljósi og í samanburði við reynslu annarra umsóknarríkja verður lagt stutt mat á það hvaða þættir það eru innan íslenskrar stjórnsýslu sem eru líklegir til árangurs í umsóknarferlinu.

Sjá frétt

Forseti Slóveníu heimsækir Ísland

Forseti Slóveníu, ásamt föruneyti, verður hér í opinberri heimsókn næstu daga. Á www.visir.is stendur:

"Opinber heimsókn forseta Slóveníu hingað til lands hefst í dag á Bessastöðum. Forsetinn, Dr. Danilo Türk og eiginkona hans, frú Barbara Miklič Türk hitta þar Ólaf Ragnar Grímsson forseta Íslands. Með í för eru þrír ráðherrar í ríkisstjórn Slóveníu auk embættismanna.

Þá fylgja forseta Slóveníu viðskiptasendinefnd, með fulltrúum ríflega 20 slóvenskra fyrirtækja, og blaðamenn. Heimsóknin stendur í tvo daga og verða forsetahjónin meðal annars viðstödd opnunartónleika Hörpu á morgun."

Slóvenía, sem var eitt lýðvelda gömlu Júgóslavíu, gekk í ESB árið 2004 og notar Evruna sem gjaldmiðil. Hér má lesa mikið um Slóveníu, en þar búa tvær milljónir manna.

Í fyrramálið mun Danilo Türk, ávarpa málþing um Slóveníu og ESB í H.Í. (hátíðarsal).

Frétt á Bylgjunni

Áhugavert spjall um sjálfstæði, fullveldi, þjóðerni!

Í Silfri Egils í gær áttu þeir Egill Helgason og Dr. Eiríkur Bergmann áhugavert spjall um sjálfstæði, fullveldi og annað sem tengist þessu. Fram kemur í viðtalinu að fullveldið sé einskonar "tabú" og að það sé í raun bannað að ræða inntak þessa orðs: fullveldi.

Horfa má á viðtalið hér

E. Bergmann var líka gestur á Bylgjunni (Í bítið) um þetta sama efni og hér er viðtal:

 

Ísland fyrirmynd ESB í nýjum tillögum um fiskveiðimál

Í Fréttablaðinu í dag kemur fram: "Evrópusambandið (ESB) virðist stefna á að taka upp marga meginþætti íslenska fiskveiðistjórnunarkerfisins. Framseljanlegar aflaheimildir og bann við brottkasti eru þar veigamestar en hugmyndafræðin er sú sama og íslenskra stjórnvalda við innleiðingu breyttrar veiðistjórnunar á sínum tíma.

Framkvæmdastjórn ESB vinnur nú að því að móta tillögur að breytingum á sameiginlegu fiskveiðistjórnunarkerfi sambandsins sem munu líta dagsins ljós í júlí næstkomandi. Tillögurnar miða að því að snúa við óheillaþróun síðustu ára og bjarga ofveiddum fiskistofnum fyrir árið 2015. Þetta er takmark Maríu Damanaki, sjávarútvegsstjóra ESB, að sögn dagblaðsins Europolitics, eða að fiskveiðar innan ESB verði sjálfbærar hið fyrsta.

Tillögurnar kallast mjög á við íslenska kerfið eins og það er í dag. Framseljanlegar aflaheimildir yrðu teknar upp með kvóta á einstök skip. Framsal á milli skipa sem gera út undir sama fána yrði leyft. Þetta yrði ekki síst gert til að minnka evrópska flotann sem er allt of stór miðað við mögulega veiði. Framkvæmdastjórnin íhugar jafnframt að banna brottkast sem hefur lengi verið ljóður á kerfinu og þyrnir í augum allra sem koma að útgerð."

Öll frétt FRBL

...segir meira en 1000 orð!

Halldór, teiknari Fréttablaðsins, segir allt sem segja þarf með þessari útfærslu sinni á samtökum NEI-sinna. Tær snilld!

http://www.visir.is/halldor-28.04.2011/article/2011110429308

Gylfi Arnbjörnsson: Aðild að ESB tryggir stöðugleikann og trúverðugleikann sem við þurfum

Í ræðu sinni á Akureyri í dag sagði Gylfi Arnbjörnsson, forseti ASÍ, að með aðild að ESB fengi Ísland þann stöðugleika sem sárlega skorti hér á landi: „Þann stöðugleika og trúverðugleika sem okkur vantar svo sárlega nú, höfum við einstætt tækifæri til að ná með því að ljúka viðræðum okkar við Evrópusambandið um aðild, þar sem við stöndum fast á samningsmarkmiðum okkar í sjávarútvegi, landbúnaði og byggðamálum og stefnum að upptöku evru í framhaldi af því.“

Til gamans má kíkja hér á frétt Vísis.is um málið og frétt MBL.is um sama mál, en hjá síðarnefnda miðlinum er ekkert talað um ESB, eins og ESB sé ekki til! Sennilega draumsýn þeirra sem ráða á þeim bænum!

 

1.maí haldinn hátíðlegur

Evrópusamtökin óska hinum vinnandi stéttum til hamingju með daginn, 1.maí! Barátta verkafólks fyrir auknum réttindum og framförum á mörgum sviðum er með því mikilvægasta sem gerðist á liðinni öld.

Hagsmunir verkafólks og Evrópusinna fara saman á mörgum sviðum; bættar aðstæður, umhverfismál, neytendamál, félagsmál, lægra vöruverð, aukinn kaupmáttur, alvöru gjaldmiðill, eru nokkur atriði sem mætti nefna.

ASÍ hefur til dæmis mjög ákveðna Evrópustefnu og hana má lesa hér.

Aðalfundur Evrópusamtakanna haldinn þann 5. maí

Aðalfundur Evrópusamtakanna verður haldinn að Skipholti 50a fimmtudaginn 5. maí kl.20.00. 


Dagskrá:

1. Hefðbundin aðalfundarstörf (skýrsla stjórnar, reikningar og kosning stjórnar). 
2. ,,Evrópumaður ársins" útnefningin tilkynnt. 
3. ,,Írland og efnhagslífið í Evrópu" Andrea Pappin framkvæmdastjóri írsku Evrópusamtakanna.
4. Önnur mál.


Aðalgestur fundarins verður Andrea Pappin, framkvæmdastjóri írsku Evrópusamtakanna. Hún er ung og kraftmikil kona sem hefur vakið athygli á Írlandi fyrir ferska og nútímalega nálgun á Evrópumálin.


Allt áhugafólk um Evrópumál er velkomið.

Hallur Magnússon: Hættum barnalegri þrætupólitík

Hallur Magnússon, forsvarsmaður Evrópuvettvangsins, hefur birt nýjan pistil um Evrópumál á bloggi sínu og segir þar: "Evrópusambandið hefur ákveðið að hefja eiginlegar samningaviðræður við Íslendinga um mögulega aðild Íslands að Evrópusambandinu. Það var í raun endanlega staðfest á fundi sameiginlegrar þingmannanefndar Alþingis og Evrópuþingsins í vikunni. Mikilvægt skref.

Fjarvera fulltrúa hingað til mikilvægs stjórnmálaflokks á Íslandi á þessum mikilvæga fundi sameiginlegrar þingmannanefndar vakti athygli mína og áhyggjur. Slík fjarvera er ekki Íslandi til framdráttar á alþjóðavettvangi hvað sem mönnum finnst um ESB.

Fyrstu kaflarnir sem opnaðir verða í aðildarumræðunum eru um opinber útboð, samkeppnismál, upplýsingatækni og fjölmiðlun, vísindi og rannsóknir og menntun og menningu. Reyndar höfum við undanfarna tæpa tvo áratugi notið öflugs stuðnings Evróðusambandsins í flestum þessum málaflokkum – en látum það vera á þessari stundu. Nú erum við farin að ræða mögulegan aðildarsamning.

Nú þurfa stjórnmálamennirnir að hætta barnalegri þrætupólitíkinni og fara að ræða þau pólitísku markmið sem Ísland vill ná í aðildarviðræðunum í hverjum kafla í aðildarviðræðna fyrir sig. Þar skiptir miklu máli í þeirri umræðu að fá áherslur þeirra sem eru gegn aðild ekki síður en þeirra sem eru jákvæðir fyrir mögulegri inngöngu í ESB."

Alllur pistill Halls 

ESB reiðubúið fyrir viðræður

Fram kom á Stöð tvö í kvöld að ESB er reiðubúið að hefa aðildarviðræður við Ísland. Þetta kemur fram í yfirlýsingu sem gefin var út í kjölfar fundar sameiginlegrar þingmannanefndar ESB og Íslands, sem haldinn var í þjóðmenningarhúsinu í gær.

Að sögn Eiríks Bergmanns, stjórnmálafræðings eru þetta miklar fréttir fyrir Ísland og jafnvel er talið að viðræðurnar geti hafist formlega þann 17.júní næstkomandi. Þá er einmitt eitt ár liðið frá því að Ísland var samþykkt formlega sem "kandídat" að ESB.

 

Grímur Atlason um gamla vonda siði!

Grímur Atlason er einn af mörgun annars ágætum bloggurum þessa lands og er nú aftur byrjaður að láta í sér heyra á Eyjunni. Í nýjum pistli þar skrifar hann um Evrópumál undir fyrirsögninni: Að míga í sauðskinnsskó er gamall vondur íslenskur siður! og Grímur byrjar svona:

"Andstæðingar Evrópusambandsaðildar Íslands hafa farið mikinn upp á síðkastið. Þeir hafa gengið úr stjórnarliði, fagnað krónunni og bent á aðrar þjóðir fullir heilögum íslenskum anda: „Sjáið bara hvernig fór hjá þeim – þessum þarna ESB löndum!“ Já, það er þjóðleg stemming víða í hornum og Morkinskinna er dregin fram og sögð mamma Hringadróttinssögu og annarra bókmennta svo ekki sé minnst á allar Hollywoodmyndirnar. Ormurinn langi er endurgerður en nú ekki færeyskur heldur íslenskur. Þetta er vondur staður að vera á. Steingrímur Joð hitti naglann ágætlega á höfuðið þegar hann sagði: „Uppgangur þjóðrembu-, sérgæsku- og einangrunarsjónarmiða er nákvæmlega jafn óskemmtilegur hver sem kveikjan kann að vera.“"

Síðan segir Grímur: "Hvað er síðan svona frábært við hina íslensku leið? Um mitt ár 2007 var gengisvísitalan um 110 en er í dag 215. Evran hefur styrkst gagnvart krónu um tæp 100% á þessu tímabili. Við búum við gjaldeyrishöft sem koma í veg fyrir algjört hrun þessa gjaldmiðils sem fólk er að fagna. Þrátt fyrir það hefur krónan verið að síga síðustu vikurnar. Verðmæti bankanna felast m.a. kröfum sem ættu með réttu að vera afskrifaðar en eru það ekki svo plúsinn batni í bókhaldinu. Sjávarútvegurinn nær ekki að standa í skilum við lánadrottna sína þrátt fyrir 100% forgjöf í gengisfellingunni. Lánsfé til handa greininni er ekkert og það hefur ekkert með ríkisstjórnina að gera – það er bara ekki hægt að lána gjaldþrota grein peninga. Atvinnuleysið margfaldaðist á einni nóttu – þrátt fyrir að nær allt erlent vinnuafl, sem var hér við störf fyrir hrun, hafi yfirgefið landið. Þetta eru afleiðingar vitleysunnar – mikilmennskubrjálæðisins."

Og Grímur endar pistil sinn á þessum orðum: "Það er mér því algjörlega hulið hvernig getur fólk haldið því fram að það skaði Ísland að láta reyna á samninga við Evrópusambandið. Í þeirri stöðu sem við erum í núna getum við ekki leyft okkur að sýna dæmigerða íslenska minnimáttarkennd sem felst í því að við erum best í öllu. Við erum það hreint ekki og okkar leið út úr kreppunni er hvorki gallalaus eða betri en það sem gerist annarstaðar.

Við vitum hreinlega ekkert um hvernig fer – það á bara eftir að koma í ljós. Þangað til skulum við kanna möguleika Evrópusambandsaðildar – það er forheimska að gera það ekki!"

 

Kolbrún Bergþórsdóttir um þá sem hrópa hæst gegn ESB: Slappið af - þjóðin mun greiða atkvæði um ESB!

Kolbrún Bergþórsdóttir, blaðamaður á Morgunblaðinu, skrifar áhugaverða grein í blaðið í dag. Þar gerir hún meðal annars stjórnmál og öfga, einangrunartilhneigingar og Evrópusambandið að umtalsefni.

Kolbrún gerir fyrst að umtalsefni þá tilhneigingu manna að skipta fólki í hin mismunandi lið og segir: "Þeir sem skipta fólki í lið með og á móti líta nánast á það sem svik ef einhver í fylkingunni tekur skyndilega undir málflutning hins liðsins. Um leið er viðkomandi dæmdur sem svikari. Það veit til dæmis Bjarni Benediktsson. Og ætli Siv Friðleifsdóttir þekki þetta ekki sömuleiðis?

Þessi liðsskipting er gamaldags pólitík sem í dag virkar öfgafull. Fæstir eru öfgamenn. Flestir eru miðjufólk sem hallast svo annaðhvort örlítið til hægri eða vinstri, en í grunninn er þetta fólk sammála um flesta hluti. Það þarf ekki að tala sig upp í æsing og á yfirleitt ekki í neinum vandræðum með að ná samkomulagi um hlutina.

Þetta er ósköp einfalt. Meirihluti fólks kýs ekki öfgar. En þeir öfgalausu eru yfirleitt þannig gerðir að þeir hafa ekki ýkja hátt. Þeir sjá enga ástæðu til þess."

Síðan víkur Kolbrún að þeim sem hafa allt á hornum sér og sjá rautt þegar minnst er á Evrópusambandið. Kolbrún segir þenna fámenna hópa láta hátt:

"Þessi hópur spólar ógurlega ef hann veit af því að verið sé að ræða mál sem hann er algjörlega andsnúinn. Eins og til dæmis hugsanlega inngöngu Íslands í Evrópusambandið. Mál sem einmitt er ástæða til að ræða. En það má víst alls ekki. Sem lýsir furðulegri einangrunarstefnu.

Nú skal því ekki haldið fram að Ísland sé best komið í Evrópusambandinu. Vel má vera að svo sé og svo getur einnig verið að það henti engan veginn. En það er full ástæða til að ræða það mál. Alveg eins og rík ástæða er til að ræða kvótakerfið. Umræða um þessi mál er nauðsynleg og verður að fara fram af skynsemi og yfirvegun. Þar er engin ástæða til að öskra sig hásan."

Í lokin hvetur Kolbrún þennan hóp hreinlega til þess að slappa af og að það verði þjóðin sem muni taka endanlega ákvörðun um aðild í þjóðaratkvæði:

"Af hverju eru æsingamennirnir svona yfirmáta æstir yfir því? Þeir ættu að reyna að slappa af. Um leið mun þeim líða betur."   

 

 

 

 

Árni Þór Sigurðsson: ESB-málið í eðlilegu ferli - sprellifandi mál! Dúndurfrétt Evrópuvaktar Björns og Styrmis!

Árni Þór Sigurðsson ræddi við Rás-2 í dag, en hann var á fundi á vegum sameiginlegrar þingmannanefndar Íslands og ESB, sem haldinn var í dag. 

Fram kom í máli Árna að málið er í eðlilegum farvegi og sprelllifandi, þrátt fyrir ummæli ýmissa manna um annað.

Ýmis mikilvæg mál voru rædd á fundinum í dag Hér er allt viðtalið við Árna. 

Samkvæmt Árna hefjast samningaviðræður Íslands og ESB í júní. 

Evrópuvaktin birti hreint magnaða frétt sem tengist þessu, þar sem rætt er um einhver "óviðunandi drög" sem samkvæmt einhverjum heimildarmönnum Evrópuvaktarinnar (les: Björn Bjarnason og Styrmir Gunnarsson) eiga að hafa séð og þykja ekki góður pappír í þeirra augum. Orðrétt segir í þessari "dúndurfrétt" Evrópuvaktarinnar:

"Heimildarmenn Evrópuvaktarinnar, sem séð hafa drög að ályktun fundarins segja, að þau séu algerlega óviðunandi frá sjónarhóli þeirra, sem andstæðir eru aðild Íslands að Evrópusambandinu." 

Og þá vaknar spurningin: Eru til einhver möguleg drög að einhverju sem tengist ESB á einhvern hátt sem gætu talist viðunandi frá sjónarhóli þeirra sem eru andstæðingar aðildar Íslands að ESB?

Er það ekki bókstafstrú á Evrópuvaktinni að vera á móti ESB og öllu sem því tengist? 

Franz Gunnarsson á DV-bloggi: Eru hagsmunir Ásmundar Einars ofar hagsmunum landsmanna?

Franz Gunnarsson, gítarleikari og söngvari hljómsveitarinnar Ensími, semur ekki bara rokk og ról, hann bloggar líka á DV. 

Í nýjasta pistli sínum tekur hann "snúning" á "snúningum" Ásmundar Einars Daðasonar, Nei-foringja Íslands. Fyrisögnin er: Eru hagsmunir Ásmundar Einars ofar hagsmunum landsmanna? 

Frans segir: "Það er mjög undarlegt að þingmaðurinn finnist í lagi að skrifa undir stjórnarsáttmála og síðan hlaupast undan skyldum sínum með úrsögn úr þingflokki en haldi svo þeirri fullyrðingu á lofti að þjóðin vilji ekki ESB. Hann segist finna fyrir miklum meðbyr vegna úrsögn úr þingflokknum en fréttir berast úr kjördæminu hans að menn þar á bæjum eru allt annað en sáttir með þessa úrsögn Einars og vilji ekkert með hann að hafa.

Bent hefur verið á tengsl Ásmundar í samfélagi bænda en Bændasamtökin hafa sett sig upp á móti ESB aðild. Því velti ég því fyrir mér hvað gengur manninum til. Er hann að taka þennan snúning fyrir sérhagsmuni bænda og síns eigin eða hvað, hver er ástæðan Ásmundur?"

Að lokum segir Franz: "Ísland er í aðildarferli sem leiðir til samnings sem þjóðin fær að kjósa um. Er það ekki bara í fínu lagi að leyfa þjóðinni að sjá samning og fá svo að vega og meta kosti og galla samningsins? Ásmundur getur þá bara kosið NEI ef hann vill ekki ESB."

Heyr heyr! 

Allur pistill Franz (Mynd: DV)