Röddunum fjölgar!

Það ánægjulega við Evrópuumræðuna undanfarnar vikur er sú staðreynd að mun fleiri og nýir álitsgjafar hafa tjáð sig um þessi mál. Í gær bentum við við á góða grein Hannesar Péturssonar skálds í Fréttablaðinu á laugardaginn. Í dag kveður Finnur Árnason, forstjóri Haga, sér hljóðs á  Pressunni. Þar segir hann meðal annars:

,,Íslenska þjóðin er í meginatriðum sammála í afstöðu sinni til aðildar að Evrópusambandinu. Í nýlegri könnun kom fram að 71% þjóðarinnar er fylgjandi aðild, svo fremi að við höldum yfirráðum yfir auðlindum okkar. Þetta er ákveðin afstaða og á sama hátt skýr skilaboð til stjórnvalda og samninganefndar okkar.

Það er augljóst að þjóðin vill aðildarviðræður, en er ekki tilbúin að gefa eftir yfirráðarétt að auðlindum, þar með talin fiskimiðin og orkuna. Þetta er skynsamleg afstaða.

Ég er í hópi 71% þjóðarinnar, sem vill kanna hvað er í boði fyrir okkur sem þjóð í viðræðum við fulltrúa Evrópusambandsins. Á sama hátt vil ég standa vörð um auðlindir okkar og að það sé tryggt að þær tilheyri þjóðinni til framtíðar. Samkvæmt framangreindri könnun er vilji til að fá niðurstöðu, þar sem kemur skýrt fram hvað okkur stendur til boða. Ef við höldum yfirráðum yfir auðlindum okkar og samningurinn er hagstæður að öðru leyti er þjóðin fylgjandi inngöngu. Ef við höldum ekki yfirráðum á auðlindum okkar og samningurinn er óhagstæður er þjóðin andvíg aðild. Eitt má þó lesa út úr niðurstöðu könnunarinnar og það er að þjóðin vill láta þessar viðræður fara fram og sjá hver niðurstaðan er."

Hægt er að lesa greinina í heild sinni á þessari slóð:

Tryggvi Haraldsson: Haltur leiðir blindan

Stjórnmálafræðingurinn Tryggvi Haraldsson skrifaði ágæta grein í Fréttablaðið þann 8. júlí um Evrópumál og þar segir hann m.a.:

"Enn einu sinni stendur fólk, sem vill upplýsta umræðu um Evrópumál og skýrar upplýsingar í aðildarsamningi frammi fyrir því að þurfa að svara fyrir lýðskrum nokkurra einstaklinga sem ekki virðast geta fellt sig við lýðræðislega ákvörðun Alþingis. Til að byrja með er auðvelt að benda þeim Unni, Ásmundi, Gunnari Braga og Birgittu á það að ef eitthvað myndi skaða orðspor landsins í því uppbyggingarferli sem það er þó lagt upp í, væri það að vera fyrsta landið til að draga umsókn sína að ESB til baka áður en aðildarviðræður hæfust. Fordæmi eru fyrir því að aðildarumsóknir hafi verið frystar en aldrei dregnar til baka, áður en þjóðin fær að taka afstöðu til aðildarsamningsins þótt umræða um slíkt hafi t.d. verið til staðar á Möltu. Þjóðir á borð við Noreg og Sviss hafa báðar hafnað aðildarsamningi og hef ég ekki vitneskju um að þær hafi nokkurn tíma skert velvilja annarra þjóða í sinn garð.

Það sér allt gagnrýnið fólk að hugmyndir um að draga umsóknina til baka eru langt frá því að vera til sóma nú þegar fólk vinnur að því hörðum höndum að skapa umhverfi og breiðari sátt fyrir upplýsta Evrópuumræðu um allt land þegar aðildarferlið hefst. Að því ferli mun koma fjöldi fólks, bæði með hjálp íslenskra stjórnvalda og framkvæmdastjórnar ESB. Það er hin eiginlega upplýsingagjöf sem fólk um land allt hefur verið að kalla eftir í mörg ár og þröngir hagsmunahópar innan t.d. stjórnmálaflokka (og þingmenn þeirra) vilja koma í veg fyrir. Ég hvet andstæðinga aðildar til að kynna sér þann stuðning sem framkvæmdastjórn Evrópusambandsins veitir umsóknarlöndum áður en hlaupið er upp til handa og fóta með upphrópunum sem eru landi og þjóð til skammar. Slík orðræða getur verið töff og virkað sterkt á einhverja en er langt frá því að vera sú umræða sem við þurfum að ganga í gegnum núna."

Öll grein Tryggva

 

Grímur með nýjan pistil

Annar góður bloggari er Grímur Atlason. Hann er á svipiðum slóðum og Guðmundur Gunnarsson, í nyjasta pistli sínu, þar sem hann segir m.a.:

"Ég hef verið að hlusta á LÍÚ og aðra afturhaldsseggi sem enn fara með allt of mikil völd á Íslandi. Tæplega 200 kvótaeigendur berjast með kjafti og klóm gegn því að Íslendingar fái að kjósa um það hvort þjóðinni yrði betur borgið innan eða utan Evrópusambandsins. Þessi hagsmunagæslukór hefur keypt sér Morgunblaðið og notar hvert tækifæri til þess að dæla út skrumskældum áróðri sínum.

Síðustu daga hef eg einnig verið að lesa í Þórbergi, Bréf til Láru er fullt af visku sem virðist eiga einkar vel við í dag. Þar segir Þórbergur m.a. frá vini sínum sem var “stokkfreðinn Morgunblaðs-maður.” En Þórbergur segir fleira:

Í heimi þessum berjast tvö andstæð megin öfl, afturhald og framsókn [ekkert tengt Sigmundi eða Hriflunni]. Afturhaldið, heimskan, deyfðin og aðgerðarleysið er í ætt við efnið og ellina. Það er stamt fyrir og skilningslaust. Hugsun þess mjakast áfram eftir spori vanans. Það streitist við að halda rás atburðanna í sama horfinu og þeir runnu í á dögum afa og ömmu. Það á enga hugsjón aðra en þá að hindra rás þróunarinnar og hrúga að sér veraldlegum gæðum. Það þekkir enga heildartilfinningu, ekkert heildarsiðferði, ekkert óeigingjarnt samstarf. Út á við fylkir það sér að vísu í heild til þess að vernda rétt sinn, en að eins meðan það hefir “praktískt” gagn af því. Innra er það saman sett af sundurlausum öflum, sem hatast og heyja látlaust kapphlaup um völd, metorð og auðæfi. Gildi hlutanna miðar það við “praktískt” gagn. Allt, sem ekki kemur að “praktískum” notum, er einskinsvert. Þetta er lífsspeki andleysisins. Það vakir yfir helgi eignarréttarins eins og villidýr yfir bráð sinni. Heimurinn er “ég” og “mitt”. Lóðin mín, húsið mitt, ó, togararnir mínir. (Bls. 12 í Stórbókinni sem kom út árið 1986)

Já, þeir berjast fyrir “sínu” fyrir “sig” og virðast því miður komast nokkuð langt með það ef marka má stöðu ýmissa mála – m.a. Evrópumálanna."

Allur Grímur

 

Guðmundur Gunnarsson: Mótsögnin blasir við...

Guðmundur Gunnarsson, Eyjubloggari, lætur ekki deigan síga í nýjasta pistli sínum og ræðir þar m.a. þá staðreynd að helstu útgerðarfélög landsins eru farin að gera upp í Evrum. Guðmundur segir m.a.:

"Mótsögnin blasir við í því að útgerðarmenn sem fjármagna þessa herferð gegn aðildarviðræðum að ESB, nota ekki krónuna til þess að gera upp sín viðskipti og þeir nota Evru, en vilja nota krónuna til þess að geta blóðsúthellingalaust haldið launum í landinu niðri. Ísland verði láglaunasvæði sem velmenntað vinnuafl flýr.

Ný könnun á vegum samtaka dönsku verkalýðsfélaganna sýnir að tugi þúsunda af hámenntuðu starfsfólki muni skorta á danska vinnumarkaðinn fram til ársins 2019 og þangað leita íslenskir menntamenn. Í niðurstöðum kemur fram að hámenntað starfsfólk skili mun meiru inn í hagkerfið en lítt menntað. Þetta helgast m.a. af því að hámenntað fólk býr við meira starfsöryggi, skilar meiri framleiðni, tekur færri veikindadaga og fer seinna á ellilífeyri en þeir lítt menntuðu.

Ef nota á krónuna verða vextir að vera hærri en í samkeppnislöndunum og verðtrygging er óhjákvæmileg. Skattar þurfa að vera hærri til að byggja upp gjaldeyrisvarasjóð og velferðarkerfið verður máttvana vegna fjárskorts. Verðtryggða krónan var innleidd sakir þess efnahagslífið gekk ekki með óverðtryggðri krónu. Það munum við vel sem vorum að reyna að koma þaki yfir okkur á árunum 1980 – 1990. En fyrir því voru líka siðferðileg rök, talið var réttlátt að þeir sem áttu aðgang að lánum greiddu þau til baka í sama verðgildi.

Málflutningur þeirra sem eru gegn því að íslendingar fái að taka málefnalega afstöðu til aðildar að ESB og þess að skipta um gjaldmiðil einkennist af einangrunarhyggju og þjóðarrembing. Ísland eigi að fá sérlausnir umfram aðra, þessu er haldið fram þrátt fyrir að erlend lönd vilja helst ekki eiga samskipti lengur við íslendinga. Þeir standa ekki við samninga og það sé nánast ómögulegt að fá niðurstöður í viðræður við samninganefndir sem koma frá Íslandi.

Nú liggur það fyrir að 71% þjóðarinnar vill fara þessa leið ef það liggi fyrir að við náum hagstæðri niðurstöðu í fiskveiðistjórnun. Báðir stjórnaflokkarnir vilja fá niðurstöður í aðildarviðræður, þó svo það liggi fyrir að VG sé á móti inngöngu. Sama má segja um stóran hóp innan Sjálfstæðisflokks og Framsóknar.

En Heimsýnarhópurinn reynir allt sem unnt er að gera lítið úr afstöðu þeirra sem vilja láta reyna á umsóknarferlið. Viðbrögð á vettvangi stjórnmálanna benda til að lítill lærdómur hafi verið dreginn af skýrslu rannsóknarnefndar Alþingis um aðdraganda og orsakir að hruni krónunnar og bankanna.

Mótsögnin hjá Heimssýnar afstaða þeirra til nauðsynlegra efnhagsráðstafana til framtíðar, þetta blasir í umræðum um dóm Hæstaréttar. Þar ætla menn að bæði að halda og sleppa og stefna með því inn á sömu braut og leiddi til Hrunsins."

Pistillinn í heild sinni

Aldrei aftur Srebrenica! 15 ár frá fjöldamorðunum í Bosníu

Þann 8. júlí voru 15 ár frá fjöldamorðunum í Srebrenica í Bosníu, en þá myrtu Bosníu-Serbar, undir stjórn herforingjans Ratko Mladic, um 8000 múslimska drengi og menn, í mestu fjöldamorðum frá lokum seinni heimsstyrjaldar. Þessa atburðar er nú minnst í Bosníu og víðar.

Á árunum 1991-1995 liðaðist gamla Júgóslavía í sundur í ógurlegum þjóðernisátökum, þar sem vægðarlaus þjóðernishyggja og þjóðernisfyrirlitning voru í aðalhlutverki.

Átökin skildu eftir sig sjö ný riki í Evrópu: Slóveníu, Króatíu, Bosníu, Svartfjallaland, Serbíu, Makedóníu og Kosovó.

Síðan átökunum lauk hafa ríkin reynt að "normalísera" (afsakið slettuna) ástandið heima fyrir og m.a. gengið í Evrópusambandið, en Slóvenía var fyrst til að gera það árið 2004. Króatía á í aðildarviðræðum og Serbía hefur sótt um aðild. Makedónía er með málið á dagskrá.

Þetta breytir því þó ekki að hin hryllilegu fjöldamorð í Srebrenica eru enn opið sár í bosnísku samfélagi og Ratko Mladic - ja, enginn veit hvort hann er lífs eða liðinn. ESB hefur gert þá kröfu á hendur Serbíu að hann verði handtekinn og færður til stríðsglæpadómstólsins í Haag.

Hér er frétt frá BBC um málið

Srebrenica á Wikipedia

Össur: Munu ekki geta gert kröfu um aflakvóta í staðbundnum fiskistofnum

"Össur Skarphéðinsson utanríkisráðherra hefur undanfarna daga heimsótt Króatíu og Ungverjaland til þess að ræða stöðu Íslands varðandi komandi samningaviðræður Íslands við Evrópusambandið. Hann segir aðrar þjóðir ekki munu geta gert kröfu um aflakvóta í staðbundnum fiskistofnum og vill að Ísland og Króatía verði samferða í aðildarviðræðum þegar Ungverjar taka við forystu sambandsins á næsta ári."

Þannig byrjar frétt Eyjunnar í dag um ferð Össurar Skarphéðinssonar, utanríkisráðherra til Ungverjalands og Króatíu fyrir skömmu. Í fréttinni segir Össur um fund sinn með utanríkisráðherra Ungverjalands, Janos Martonyi:

"„Ég fór rækilega yfir með honum þá þætti sem skipta okkur mestu, ekki síst sjávarútvegs- og landbúnaðarmál,“ segir Össur við blaðið. „Ég lagði áherslu á þann skilning Íslendinga að reglur Evrópusambandsins tryggi í reynd að aðrar þjóðir geti ekki gert kröfu um aflakvóta í staðbundnum fiskistofnum í íslenskri fiskveiðilögsögu. Það skiptir miklu máli að Ungverjar, sem munu fara með forystuna þegar viðræðurnar hefjast, hafi góðan skilning á þessu úrslitamáli.“

Öll fréttin

Stóru orðin ekki spöruð!

Það er óhætt að segja að umræðunni um ESB eru stóru orðin ekki spöruð. Gott dæmi um slíkt birtist sem athugasemd við frétt Eyjunnar í dag varðandi Össu Skarphéðinsson. Látum efni fréttarinnar eiga sig hér, en ein nafnlaus athugasemdin segir kannski allt sem segja þarf:

"Össur fífill skilur það ekki að þjóðin ætlar ekki að vera í ESB.
Hann reynir að láta fólk erlendis trúa því að á Íslandi hafi fólk áhuga á því að eyða tíma, orku og peningum í eitthvað sem hefur ekekrt með hrunið og uppgjör þess að gera eins og að bjarga til dæmis heimilum og vernda auðlindir þjóðarinnar og fara að nota þær í uppbyggingu betra lífs fyrir Íslendinga t.d. í að rækta matvæli svo ekki þurfi að koma með það með skipum hér frá öllum heimshornum fyrir milljarða á mánuði.

Hann lætur eins og hann sé ekki einn af landráðamönnunum sem eru alltaf að svíkja þjóðina.

Hann reynir að fá fólk hérlendis sem erlendis að stríðsglæpa-, hryðjuverka-, og barnamorðingjaríkin í ESB, usa, rusllandi, kínafífl og víðar séu vinir okkar í heimsþorpinu og við eigum að ganga í lið með þeim og vera hluti af glæpa- og spillingarkerfinu þeirra.

En það viljum við ekki og það erum við alltaf að segja ykkur fíflunum, þér össuri og kristjáni guy burgess landráðamanni og föðurlandssvikara (föðurland hans er reyndar norður england stundum kallað skotland).

Hvenær eigum við að byrja byltinguna ?
Ég mæti alla vegana fyrir utan AGS skrifstofuna í dag kl 12:00 á bak við Stjórnarráðið."

(Feitletrun: ES-bloggið)

Önnur tilvitnun eftir sama aðila (partur):

"Það föðurlandssvikara pakk á Íslandi sem reynir að blekkja fólk, ljúga að því eða reka áróður fyrir því að Íslenska þjóðin gangi í eitthvert bandalag með þessum viðbjóði eru landráðamenn og samverkamenn þeirra.
Farið verður með það sem slíkt þegar upp verður staðið."

Ekki nema vona að umræðan sé eins og hún er! Og að fólk sem berst  fyrir m.a. lægri vöxtum, verðbólgu, bættu viðskiptaumhverfi og nothæfum gjaldmiðli, sé kallað landráðafólk!

Þetta er í hæsta máta ósmekklegt, en að sama skapi mjög algengt. Því miður!

Hannes Pétursson og "staksteinninn"

Hannes Pétursson, skáld, skrifar athyglisverða grein í Fréttablaðið þann 10. júlí, undir fyrirsögninni Staksteinn. Þar fjallar hann m.a. um það sem hann kallar "blágræna þverpólitík" og á þar við spyrðinguna á hægri og vinstri í andstöðu sinni við ESB. Hannes skrifar m.a.:

"Orðið hefur til einhver kómískasta þverpólitík í gjörvallri kristninni, hin blágræna þverpólitík gegn aðildarumsókn Íslands að Evrópusambandinu.

Blágræna þverpólitíkin er þó ekki eingöngu kómísk, því er nú verr og miður, heldur er viss þáttur hennar beinlínis fyrirlitlegur, þetta þjóðmont sem gegnsýrir hana, í raun og veru sama þjóðmontið og ríkti á víkingaöld hinni síðari, þessi „reigingslegi þjóðarmetnaður" sem Árni Pálsson prófessor talar um í grein árið 1926. Þar ritar hann um gang mála hérlendis frá því um aldamótin 1900, nefnir það sem vel hafði verið af hendi leyst, en bætir við orðum sem hefðu getað verið sögð í gær: „Flest er hér nú ýmist í ökkla eða eyra: stórgróði og gjaldþrot, ofstæki og stefnuleysi, reigingslegur þjóðarmetnaður og nagandi óvissa um mátt þjóðarinnar til þess að ráða fram úr vandamálum sínum." Hyldýpishaf er á milli ættjarðarástar og reigingslegs þjóðarmetnaðar. Hans tekur ekki að gæta að verulegu marki meðal Íslendinga fyrr en um og upp úr aldamótunum 1900, en hefur síðan verið hagnýttur oftar en einu sinni í pólitísku skyni. Hver man til dæmis ekki fyrirganginn út af EES-samningnum. Andstæðingarnir sumir töldu hann svikráð og Vigdís Finnbogadóttir, forseti Íslands, var forsmáð af reigingslegum þjóðmetnaðarmönnum fyrir að hafa staðfest lagagildi samningsins með undirskrift sinni."

Öll grein Hannesar

 

Liðast EES í sundur?

Fréttablaðið skrifar eftirfarandi:

"Íslendingum verður væntanlega kastað út af Evrópska efnhagssvæðinu verði aðildarumsókn að Evrópusambandinu dregin til baka. Þetta er mat Eiríks Bergmanns stjórnmálafræðings. Hann segir að best væri fyrir Íslendinga að segja upp EES samningnum ef umsóknin verður dregin til baka."

Og síðar  segir ennfemur:

"Eiríkur Bergmann, stjórnmálafræðingur, segir að verði umsóknin dregin til baka muni EES samningurinn rakna upp þar sem Íslendingar uppfylla hann ekki nú þegar vegna gjaldeyrishafta.

„Það stendur beinlínis í honum að það sé skylda framkvæmdastjórnar ESB að ef eitthvert ríki uppfyllir ekki samninginn eins og við gerum ekki að einum fjórða hluta til þá beri framkvæmdastjórninni að segja upp þeim hluta samningsins."

Lesa meira hér

KREPPA!

"Það sem gerðist á Íslandi í október 2008 á sér enga hliðstæðu í heimssögunni. Hið litla efnahagskerfi varð fyrir gríðarlegu áfalli þegar þrír stærstu banka þessu hrundu."

Þannig byrjar tilkynning frá ALDE, sem er bandalag frjálslyndar og demókrata á Evrópuþinginu, en á vegum þeirra verður haldin bókakynning á bókinni KREPPA, sem fjallar um kreppuna á Íslandi.

Það eru þau Diana Wallis, Daniel Gros og Alda Sigmundsdóttir sem skrifa bókina og fer kynningin fram í Evrópuþinginu þann 14. júlí n.k.

Umræðustjórnandi verður Stefán Jóhann Stefánsson, sendiherra Íslands í Brussel og formaður íslensku samninganefndarinnar gagnvart ESB.

 

Morgunbændablaðið lesið við mjaltir?

Bjarni Benediktsson, formaður Sjálfstæðisflokksins, er í viðtali í "sumarhefti" Bændablaðsins og endurtekur þar boðskap sinn um að íslandi sé betur borgið utan ESB og allt heila klabbið sem samþykkt var á landsfundi flokksins. Þar með talið að draga umsóknina að ESB til baka, ef flokkurinn komist til valda.

Það er annars athyglisvert að velta því fyrir sér hvenær formaður þessa flokks birtist í heilsíðuviðtali í Bændablaðinu! Man það einhver?

Mogginn birtir svo frétt um þetta og "krækju" inn á Bændablaðið. Þetta sannar það að blöðin eru í miklu samstarfi, gegn aðild að ESB og eru í raun að bergmála sama áróðurinn.

Mogginn er í einkaeigu, en hverjir eiga Bændablaðið? Hvaðan koma tekjur þess? Hverjir borga eða fjármagna Bændablaðið?? Er skattfé almennings notað til reksturs blaðsins?

Það er ekkert óeðlilegt að spurningar sem þessar vakni í framhaldi af þessu.

Það er líka deginum ljósara hvaða "öxul" er verið að mynda á milli þessara tveggja fjölmiðla og lesenda þeirra.

Það á að TRYGGJA það að skoðanir lesenda þeirra á ESB verði aðeins með einum hætti, og það er að vera á móti aðild og öllu sem tengist ESB!

DV: Ritskoðun á Mogganum?

DV birti frétt í dag sem hefst svona:"Lögmaðurinn Sveinn Andri Sveinsson hélt því fram á fésbókarsíðu sinni um helgina að könnun sem unnin var fyrir Moggann um skoðanir Íslendinga á Evrópusambandsaðild hefði verið ritskoðuð í meðförum blaðsins."

Í fréttinni er gefið í skyn að spurt hafi verið um aðild að ESB ef hagstæður samningur næðist í sjávarútvegsmálum og að þá hafi um 71% sagst vera fylgjandi aðild.

Það liggur ljóst fyrir að sjávarútvegsmálin verða lykilmálið í samningaviðræðum Íslands og ESB og því óneitanlega mest spennan í kringum þann málaflokk.

Öll fréttin

Heimilin að gera upp í Evrum? Nei!

Pressan birtir afar athyglisverða frétt í dag og vitnar í viðtal í Viðskiptablaðinu. Þar segir Friðrik J. Arngrímsson, framkvæmdastjóri LÍÚ það vera ,,eðlilegt að nokkur af stærstu útgerðarfyrirtækjum landsins geri upp í erlendri mynt. Tekjur og lán séu í erlendri mynt og sveiflur á gengi krónunnar geti haft mikil áhrif á skuldir fyrirtækjanna."

Eins og sagt hefur verið frá hér á Evrópublogginu eru útgerðarfyrirtækin farin að gera upp í Evrum, það er svo mikið hagstæðara, jú vegna þess að þeirra lán og tekjur eru í erlendri mynt, oftar en ekki Evrum.

En hvað með heimilin í landinu, almenning? Er hann bara einhver afgangsstærð, sem á að sitja uppi með krónuna, en um hana segir Friðrik: ,,Krónan hefur sína kosti og galla. Það er hagstjórnin hverju sinni sem ræður því hvernig henni vegnar."

Þetta geta jú allir sagt, en raunveruleikinn hefur löngum verið þessi: Sjávarútveginn vantar meiri tekjur => gengið fellt => almenningur tekur skellinn!

Þetta er ekki heilbrigt!

Einnig segir segir á Pressunni: "Í Viðskiptablaðinu í morgun er sagt frá því að átta af tíu stærstu útgerðarfyrirtækjum landsins eru farin að gera upp ársreikninga sína í erlendri mynt. Þar af gera sex af tíu stærstu fyrirtækjunum upp í evrum."

Í framhaldi af þessu vaknar spurningin: Eru sumir "jafnari" en aðrir á Íslandi?

Hvað með öll hin fyrirtækin áÍslandi, hvað með heimilin, hvað með hagkerfið í heild sinni?

(Mynd: DV)

Á að hoppa á Kína núna?

Blogg þetta hefur margoft auglýst eftir því hvað Nei-sinnar vilja virkilega gera, þegar kemur að samskiptum við útlönd, þ.e.a.s. hin löndin í heiminum!

Evrópusinnar vilja styrkja enn frekar tengsl okkar Íslendinga við Evrópu, sem er jú okkar næsti granni og við Íslendingar erum jú Evrópubúar.

Því vakti það athygli ritara þegar hugmyndir Nei-sinna birtust í MBL í gær. Eigandi hugmyndanna er Eyþór Arnalds, Sjálstæðsmaður, poppari og stjórnarmaður í s.k. Suðurlandsdeild Nei-samtaka Íslands.

Hann ritar s.s. grein í MBL og beitir þar lýðfræðilegri nálgun með spá um samsetningu þjóðanna í Evrópu, Bandaríkjunum og á Íslandi. Taka ber fram að þetta eru engin algild vísindi, heldur spá um þróun.

Eyþór segir útlitið dökkt í ESB, en gott fyrir Ísland og USA. Hann segir ESB glíma við gjaldmiðilsvanda, "sem sér ekki fyrir endann á." Í framhaldi af þessu er hægt að benda honum á annað land sem gerir slíkt hið sama og er í enn veri málum, nefnilega Ísland, með haftakrónu, sem öll almennileg fyrirtæki reyna að forðast eins og heitan eldinn!

Rúsínan í pylsuendanum er svo þetta:"Tækifæri Íslands liggja í að virkja sjálfstæðið betur og má vel sjá fyrir sér betri samskipti við Bandaríkin, aukin viðskipti við Kína og bein samskipti við lönd eins og Noreg og Þýskaland. Aðild að ESB hefur að mínu viti alltaf verið verri kostur en að standa utan sambandsins."

Utanríkisverslun Íslands við USA er í kringum 20%, eða minna og í sambandi við Kína er athyglisvert að velta fyrir sér tölu: Þangað voru fluttar út vörur fyrir um 11 milljarða árið 2009, en bara til Bretlands voru fluttar út vörur fyrir 63 milljarða á sama tíma. 

Gerir Eyþór sér grein fyrir hvað það tæki langan tíma að byggja upp markaði í Kína, eða vill hann fara út í vöruskipti?

Til Noregs var flutt út fyrir 30 milljarða 2009 og Þýskalands fyrir 56 milljarða.  Bæði löndin í Evrópu!

Í framhaldi af þessu er eðlilegt að spyrja sig, hvaða markaði og tengsl er best a rækta?

Að auki er margt sem bendir til þess að á komandi árum og áratugum muni Kína snúa sér í auknum mæli að framleiðslu fyrir innanlandsmarkað og verði því minna háð innfluttum vörum.

Allt tal um að Kína sé lausnin fyrir okkur Íslendinga ber því að gaumgæfa vel og skoða í ljósi sögunnar. Viðskipti okkar við Evrópu eiga sér hinsvegar laaaanga sögu!

Fordæmalaus sérlausn til handa íslenskum vörubílstjórum

Athyglisverð frétt birtist í Fréttablaðinu í dag, en hún snýr að reglum um hvíldartíma vörubílstjóra. Samkvæmt henni hefur Ísland fengið undanþágu frá þeim reglum, sem gilda um alla Evrópu, eru alltsvo ESB-löggjöf.

Nei-sinnar hamra sífellt á því að ekkert tillit sé tekið til smáþjóða, engar sérlausnir sé að fá, en þetta er einmitt dæmi um hið gagnstæða.

Í fréttinni segir: "Kristján L. Möller, samgöngu- og sveitarstjórnarráðherra, ákvað að taka málið upp árið 2008 í kjölfar óska frá Samtökum atvinnulífsins, ASÍ og Starfsgreinasambandinu. Óskaði ráðuneytið eftir undanþágu þar sem aðstæður hér á landi væru að mörgu leyti frábrugðnar því sem gerist á meginlandinu.

Ráðherra segir undanþágur sem þessar fordæmalausar gagnvart öðrum EES-ríkjum og að svo virðist sem að nú sé viðurkennt að á Íslandi séu aðstæður með þeim hætti að réttlætanlegt sé að undanþágur séu gefnar frá aksturs- og hvíldartímareglum." (Leturbreyting, ES-blogg)

Öll fréttin