Við eigum okkar ,,dröchmu" ! (Grímur Atlason)

Grímur Atlason, skrifar skarpan pistil á blogg sitt um Grikkland og fleira. Hann segir m.a.:

,,Við erum í vanda á Íslandi ekki síst vegna þess að við eigum okkar eigin litlu dröchmu sem kallast króna. Hrunið varð vegna brjálsemi í kringum þennan fáránlega gjaldmiðil. Við eigum líka okkar spilltu stjórnmálamenn og viðskiptalega fábjána sem þessir sömu stjórnmálamenn gáfu þjóðarauðinn. Að þessi króna sé að bjarga okkur út úr einhverju er hreinlega fásinna. Hún kom okkur í vandann og meintir kostir hennar í dag eru eftirfarandi: Með gengisfellingunni  og verðbólgunni lækkuðu laun almennings umtalsvert. Hækkun lána og hrun húsnæðismarkaðarins hefur gert þúsundir heimila gjaldþrota."

Hér má lesa rest

Jónas Haralz: Skylduhlustun!

Jónas H. Haralz er einn af okkar fremstu hagfræðingum og fáir sem komast með tærnar þar sem hann hefur hælana í þeim efnum.

Þann 4. maí var viðtal við hann um hagstjórn og stjórnmál á Íslandi í Speglinum. Skylduhlustun!

 

 

ESB stofnar neyðarsjóð - viðbrögð jákvæð

Á www.visir.is í dag er að finna frétt um aðgerðir ESBvegna skuldavanda Grikklands:

,,Evrópskar hlutabréfavísitölur hækkuðu mikið í gær eftir að Evrópusambandið tilkynnti að stofnaður yrði neyðarsjóður til að koma í veg fyrir að fjárhagsvandi Grikklands breiddi úr sér til annarra landa sambandsins.

Aðildarríki Evrópusambandsins (ESB) hafa samþykkt að leggja 750 milljarða evra, jafnvirði ríflega 123 þúsund milljarða íslenskra króna, í neyðarsjóðinn. Aðildarríki munu geta fengið lán úr sjóðnum til að koma í veg fyrir að þau lendi í svipuðum skuldavanda og Grikkir.

Evrópski Seðlabankinn mun einnig hefja mikil uppkaup á skuldum aðildarríkja ESB og einka­aðila til að halda mörkuðum stöðugum og lækka kostnað við lántökur. Bandaríski seðlabankinn mun styðja við aðgerðirnar með því að setja aftur í gang gjaldmiðlaskiptasamninga við Evrópska seðlabankann."

Öll fréttiin

Ásmundur Einar: Vill ekki breyta neinu - ekki rétti tíminn

Strax og ríkisstjórnin hittist til þess að ræða efnahagsaðgerðir fer málið líka að snúast um ESB.

Allir vita að Jón Bjarnason (mynd) landbúnaðar og sjávaútvegsráðherra er á móti ESB. Forsvarsmenn þessara greina og margir innan þeirra eru það líka.

Nú þegar rætt er um að stokka upp ráðuneytin er sagt að það eigi að fórna Jóni Bjarna (sem annars, lét frá sér stórkostlega ,,perlu“ í sjónvarpsfréttum í kvöld).

En nú, segja andstæðingar ESB, má ekki stokka upp ráðuneytin, m.a. vegna þess að nú sé Ísland komið í aðildarferli að ESB!! Svo segir allavegana þingmaðurinn, VG-liðsmaðurinn og Heimssýnarformaðurinn, Ásmundur Einar Daðason. Í frétt RÚV stendur:

,, Ásmundur Einar Daðason, þingmaður Vinstri grænna, telur ekki tímabært að fara í þessa sameiningu núna. Margir telji að það veiki stöðu þessara atvinnugreina og setji stjórnsýsluna í þessum málaflokkum í algjört uppnám. Það megi ekki gerast á meðan aðildarferlið standi yfir. Ekki megi veikja stöðu þessara atvinnugreina sem allir viti að þurfi að fórna mestu ef Ísland gangi í Evrópusambandið. Auk þess velti hann því fyrir sér hvort til standi að kasta út eina ráðherranum sem greiddi atkvæði gegn umsókn um ESB aðild.“

Hvernig veit Ásmundur að þessar atvinnugreinar þurfi að fórna mestu, eða þurfi að fórna einhverju yfir höfðuð? Með ,,finnsku leiðinni“ og ,,norðursvæðaákvæðum“ mættu íslensk yfirvöld halda óreyttum stuðningi við íslenskan landbúnað.

Alls ekki er víst að miklar breytingar yrðu í sjávarútvegsmálum, tillögur um heildarkvóta kæmu frá íslenskum vísindamönnum og yrðu afgreiddar í Brussel samkvæmt því. Landhelgin myndi ekki fyllast af togurum annarra þjóða.

Það er þessvegna ekkert víst að um einhverjar svakalegar fórnir yrði að ræða. Slíkt er bara hræðsluáróður og hluti af þeirri orðræðu að hér ,,leggist landbúnaður af við aðild" og svo framvegis. Það hefur hvergi gerst!

Enginn á Íslandi veit í raun hverjar afleiðingar aðildar verða, fyrr en aðildarsamningur og ákvæði hans liggja fyrir. Þá fyrst er hægt að gera sér einhverja mynd af því. Þessvegna er mikilvægt að viðræður hefjist sem fyrst á milli Íslands og ESB.

En mál þetta þetta hefur orðið nokkrum bloggurum að umtalsefni og er ágæt færsla um þetta hjá Gísla Baldvinssyni.

Til hamingju með daginn, Evrópusinnar!

Evrópudagurinn er í dag, 9.maí. Evrópusamtökin óska öllum Evrópusinnum til hamingju með daginn.

Ársins 2010 verður e.t.v. minnst sem ,,Grikklandsársins" og ekki að ástæðulausu. Grikkir glíma við mikinn vanda, en þetta er ekki bara próf fyrir þá, heldur einnig Evrópu og ESB.

Vandamál Grikkja eru einnig dæmi um þann samvinnuvilja meðal Evrópuþjóða. Aðildarlönd ESB hafa ákveðið að koma Grikkjum til aðstoðar, sum með semingi.

Auðvelt væri að segja ,,látum Grikki sigla lönd og leið, þeir geta bara bjargað sér sjálfir." Þetta er hinsvegar hættuleg afstaða.

Sem betur fer er ESB til staðar, ekki er erfitt að sjá fyrir sér hvernig staðan væri í Evrópu ef öll ríki Evrópu væru ein síns liðs að glíma við þau vandamá sem þau standa frammi fyrir.

Líklegt er að and-lýðræðisleg öfl myndu nota það sér til framdráttar. Við höfum ,,góð" dæmi um það frá Evrópu hvað efnahagslegt og pólitískt öngþveiti getur leitt af sér. Evrópusambandið er einmitt svar gegn því, enda eru mannréttindi eitt af leiðarljósum sambandsins.

Sú þróun sem nú er í gangi í Ungverjalandi er einnig dæmi um það sem mögulega getur gerst. Þar hafa þjóðernissinnaðir og fasískir flokkar fengið um 70% þingsæta í nýafstöðnum kosningum.

Svona þróun má ekki endurtaka sig í Evrópu!

Ísland er Evrópuþjóð, við tilheyrum evrópskum menningararfi, uppruni okkar er í Evrópu. Við erum sem stendur með annan fótinn inni, hinn úti og áhrif okkar á þróun mála í Evrópu eru hverfandi.

Við getum hinsvegar orðið hluti af þessari þróun með fullri aðild að ESB. Orðið ,,eðlilegur samstarfsfélagi," en ekki einhverskonar utangátta aðili, sem bara tekur á móti, en ekkert gefur af sér.

Við getum það hinsvegar á mörgum sviðum þar sem þekking okkar er framúrskarandi, dæmi; sjávarútvegsmál og orkumál.

Enn og aftur Evrópusinnar, til hamingju með daginn og látum til okkar taka!

 

Þorsteinn Pálsson um gjaldmiðilsmál

Þorsteinn Pálsson skrifar góða grein í Fréttablað helgarinnar um gjalmiðiilsmál og ber m.a. saman stöðu Grikklands og Íslands. Hann segir m.a.:

,,Til framtíðar litið eru Íslendingar því í þrengri stöðu en Grikkir vegna þess að kostnaðurinn við að halda sjálfstæðri mynt kemur fram í hærri vöxtum og gjaldeyrishöftum. Það hamlar raunverulegum hagvexti. Þetta þýðir að Íslendingar geta aðeins bætt samkeppnisstöðu landsins með lægri lífskjörum til frambúðar.

Eðlilega hræðast margir evruna í slíkum ólgusjó sem hún er. Sumir efast um að hún haldist á floti. Ástæðulaust er að loka augunum fyrir þessum aðstæðum. Við sitjum hins vegar uppi með gjaldmiðil sem sökk með skelfilegum afleiðingum. Sterkar sjálfstæðar myntir eins og sterlingspundið eiga líka í vök að verjast."

Meira hér eða hér.

Hægrimenn og öfgasinnar á skriði í Ungverjalandi

Hægri-öfgaflokkurinn Jobbik, sem fer ekki leynt með áhrif frá Nasismanum, fékk jók verulega við fylgi sitt í þingkosningum sem haldnar voru í Ungverjalandi fyrir skömmu og fékk flokkurinn 56 þingsæti af 386 og um 17% atkvæða. EU-Observer greinir frá þessu.

Stefnumál flokksins eru m.a. að útrýma glæpum meðal sígauna, berjast gegn eiturlyfjanotkun, alþjóðlegum fyrirtækjum og því sem flokkurinn kallar ,,landvinningum Ísraels" í Ungverjalandi. Flokkurinn hefur verið kenndur það sem á ensku er kallað ,,post-fascism" en getur kallast á íslensku ,,ný-fasismi."

Fasismi byggir á hugmyndafræði Benito Mussolini, leiðtoga fasistaríkisins á Ítalíu á tímum seinni heimsstyrjaldar.

Sá flokkur sem fékk flest atkvæði og tók við völdum í Ungverjalandi er annar þjóðernissinnaður hægri-flokkur, Fidez. Hann fékk 263 af 386 þingsætum. Samanlagt fengu þessir flokkar því um 70% af þingsætum ungverska þingsins.

Margir fréttaskýrendur telja Ungverjaland á leið í mjög öfgasinnaða átt og að staða þessara flokka sé staðfesting á því.

Í grein í sænska DN er meðal annars sagt að þessir flokkar vilji lögleiða mismunun gegn sígaunum og gyðingum í landinu.

Ástæður velgengni flokkanna er sögð vera óánægja Ungverja með viðbrögð fyrri stjórnvalda við efnahagskrísunni, sem komið hefur illa við marga Ungverja.

Ný og spennandi staða í Bretlandi

Kosningarnar í Bretlandi leiddu af sér það sem kallað er ,,hung parliament", þ.e.a.s enginn hinna þriggja stóru flokka fékk hreinan þingmeirihluta. Óhætt er að segja að það ríki því mikil spenna í breskum stjórnmálum.

Framan af föstudegi voru menn að meta stöðuna, en síðan biðluðu bæði Gordon Brown, leiðtogi Verkamannaflokksins (og sitjandi forsætisráðherra) og David Cameron, leiðtogi Íhaldsflokksins, til Nick Clegg, leiðtoga Frjálslynda flokksins. Bæði Brown og Cameroon þurfa á stuðningi frá Clegg að halda, þar sem engin hefð fyrir minnihlutastjórnum er fyrir hendi í Bretlandi.

Frjálslyndir fengu næstum jafnmörg atkvæði og Verkamannaflokkurinn, en 200 færri þingsætum! Þetta er hið mikla óréttlæti í bresku kosningakerfi og bitnar illilega á Frjálslynda flokknum (Liberal Democrats)

Nick Clegg heftur barist fyrir endrbótum á þessu kerfi og nú hefur hann e.t.v. spil á hendi í þessu máli.

Mjög fróðlegt verður að sjá útkomuna úr því sem er að gerast, en samkvæmt venju er það Gordon Brown, sem enn situr sem forsætisráðherra. Það er venjan komi ,,hung-parliament"  staðan upp.

Eins og fram hefur komið eru brýn verkefni fyrir höndum í Bretlandi og pólitísk óvissa eitthvað sem menn þar vilja ekki sjá.

Ps. Mogginn var fljótur að lýsa yfir falli Brown í blaði dagsins: Stjórn Brown's fallin, var fyrirsögn á forsíðu. Sjálfsagt eru einhverjir í Hádegismóum sem eiga sér þann draum að Íhaldsmenn komist til valda í Bretlandi.

Sorglegur atburður í Grikklandi

Sá sorglegi atburður átti sér stað í Grikklandi í gær að þrír saklausir bankastarfsmenn létu lífið í mótmælum í Aþenu, höfuðborg landsins.

Var bensínsprengju (Moltov-kokteil) kastað inn í banka, sem síðan stóð í ljósum logum. Þrír starfsmannaanna flúðu upp á þak og svalir, en köfnuðu þar.

Grísk yfirvöld, sem nú glíma við mesta efnahagsvanda í sögu þjóðarinnar, kalla atburðinn morð.

Óskandi er að nokkuð sem þetta gerist ekki aftur í þeirri öldu mótmæla sem nú gengur yfir landið.

Mikil umfjöllun er um Grikkland á BBC og í gær kom það fram í mörgum viðtölum að grískur almenningur gerði sér grein fyrir og sætti sig við þær aðgerðir sem stjórnvöld þurfa að grípa til.

Einn viðmælandi BBC sagði á þá leið að nú væri grískur almenningur á ,,reiðistiginu" eftir að hafa farið af ,,afneitunarstiginu." Það er því líka hellings sálfræði í þessu dæmi!

ESB og AGS hafa sett saman aðstoðarpakka til handa Grikkjum sem nemur um 20.000 milljörðum íslenskra króna.

Í dag tekur gríska þingið ákvörðun um þennan pakka. Samkvæmt fréttum er mikil ,,refskák" í gangi inni á gríska þinginu.

Kosningar í Bretlandi-Gæsahúð?

Þingkosningar eru í einu stærsta ríki Evrópu og ESB, Bretlandi, í dag. Baráttan stendur að venju á milli stærstu flokkanna, Verkamannaflokks, Íhaldsflokksins og Frjálslyndra Demókrata. Í undanförnum kosningum hefur raunin orðið sú að atkvæði greidd FD, hafa verið svokölluð ,,dauð atkvæði," vegna sérkennilegs kosningakerfis í landinu.

Nú er önnur staða uppi og hefur Evrópusinnin, Nick Clegg, heldur betur hrært upp í hlutum og gert kosningabaráttuna núna þá mest spennandi í áraraðir. (Mynd)

Samkvæmt nýjustu könnunum er það hinsvegar Íhaldsflokkurinn, með yfirstéttarmanninn David Cameroon í farabroddi, sem fær mest fylgi.´

Sitjandi forsætisráðherra (PM) Gordon Brown, leiðtogi Verkamannaflokksins hefur átt undir högg að sækja í barátunni en hefur að sögn fréttaskýrenda sótt í sig veðrið á endasprettinum.

Hvernig sem úrslitin verða, er ljóst að það verður enginn dans á rósum hjá verðandi PM Bretlands. Landið er eitt það skuldugasta í Evrópus/ESB, en þær nema um 11% af þjóðarframleiðslu. Á sama tíma eru Bretar mest ,,Euró-skeptíska" þjóðin í Evrópu, þ.e.a.s. sú þjóð þar sem andstaða gegn ESB er hvað mest.

Í sambandi við skuldavanda Grikkja eru margir andstæðingar ESB sem benda á að öll vandræði Grikkja séu ESB að kenna.

Bretar eru ekki með Evruna (enda talin vera nokkuð haldssöm þjóð, mæla í pundum, hafa vinstri umferð o.s.frv.), en samt er um að ræða þennan gríðarlega skuldavanda þeirra!

Er það þá ekki líka ESB að kenna?

Meiri fróðleikur á fimmtudegi...

Evrópusamtökin minna á á nýjan fund í röðinni Fróðleikur á fimmtudegi:

Á morgun fimmtudaginn 6. maí kl. 17.00 talar Jón Karl Helgason, bókmenntafræðingur, um íslenska menningu og ESB.

Sjá nánar á www.sterkaraisland.is

Að vera eða vera ekki sagnfræðingur: Þorskastríðin, ESB

Einn af áköfustu Nei-sinnum Íslands er Hjörtur nokkur Guðmundsson. Hann ritar grein í Morgunblaðið í gær (en blaðið er jú helsta athvarf andstæðinga ESB á Íslandi). Reyndar er eitt sem stingur í augun við lesturinn, sem er að ekki er á hreinu hvort Hjörtur sé enn sagnfræðinemi eða sagnfræðingur.  Sagnfræðinemi er hann við myndina, en hefur svo breyst í sagnfræðing í lok greinarinnar! En hvað um það.

Meginpunkturinn í máli hans er að með aðild að ESB muni árangur þorskastríðanna glatast. Fyrir þessu hefur Hjörtur hinsvegar engin dæmi eða fullnægjandi rök. Hvað þá að ESB taki auðlindir af aðildarríkjum, eins og Nei-sinnar babbla stöðugt um, en geta aldrei komið með nein dæmi um.

Hjörtur lítur kalt á ,,forræðismálin“ innan ESB og segir framkvæmdastjórnina hafa lokaorðið um sjávarútvegsmálin.

Hinsvegar lítur Hjörtur framhjá tvennu: a) Að þetta lokaorð yrði samkvæmt ráðleggingum ÍSLENSKRA VÍSINDAMANNA og b) Innan ESB eru svokallaðar ,,sérlausnir“ mikið notaðar, til þess einmitt að gæta hagsmuna umsóknar og aðildarríkja. Þá er öll veiðireynsla okkur Íslendingum í hag samkvæmt reglunni um ,,hlutfallslegan stöðugleika."

Rétt eins og margir NEI-sinnar, fellur hann í þá gröf að túlka ESB á þrengsta mögulega máta og líta framhjá öllu þessu. Eitt gott dæmi um sérlausnir eru ákvæðin um Norðurskautalandbúnað, sem er að finna í aðildarsamningum Svía og Finna!

Hver eru svo sterkustu rök okkar fyrir því að halda okkar miðum og fiskveiðilandhelgi, sem einu brýnasta hagsmunamáli þjóðarinnar? Jú, það eru einmitt ÞORSKASTRÍÐIN og sú barátta sem við höfum háð, til þess að ná 200 mílna lögsögu.

Það verður að teljast afar ólíklegt að ESB muni horfa blákalt framhjá þeirri staðreynd, en við Íslendingar þurfum líka að standa fast á okkar!

 

Tyrkland og ESB á VoxEu.org (Gylfason/Wijkman)

Dr. Þorvaldur Gylfason (H.Í.) og Per Magnus Wijkman, frá háskólanum í Gautaborg, rita grein um Tyrkland og ESB á vefsíðuna www.voxeu.org. Þeir stinga meðal annars upp á því að Tyrklandi verði boðin aðild að Evrópska Efnahagssvæðinu (EES).  Þannig sé t.d. hægt að efl viðskiptaleg tengsl milli Tyrklands og Evrópu. Í Tyrklandi búa um 73 milljónir manna.

Greinin er hér

Hefði gjaldþrot Grikklands verið betra?

Efnahagsvandræði Grikkja er mikil og að lang stærstum hluta heimatilbúin í Grikklandi. Fjallað hefur verið ítarlega um ástæður vandræða Grikkja hér á síðunni, http://evropa.blog.is/blog/evropa/entry/1014711/,

Hinsvegar er staðan þannig að nú þarf Grikkland aðstoð, frá ESB og Alþjóða gjaldeyrissjóðnum, sem nemur allt að 120 milljörðum Evra.

Því má hinsvegar velta fyrir sér hvað myndi gerast ef Grikkland myndi fara á hausinn.  Eitt er vitað að þá myndu mjög margir aðilar tapa gríðarlegum fjármunum. Líklega myndi þjóðargjaldþrot leiða til mikils stjórnmálalegs óstöðugleika og samfélagslegrar hættu. Vert er að minna á að herforingjastjórn var eitt sinn við völd í Grikklandi, áður en landið gerðist aðili að Evrópusambandinu.

Því má segja að það séu tveir slæmir kostir í stöðunni, a) að láta Grikkland "rúlla" eða b) að veita Grikklandi aðstoð. Seinni kosturinn hefur verið valinn samkvæmt beiðni Grikkja sjálfra.

Þeir hafa viðurkennt að þeir eru hjálpar þurfi. Því er gott að geta leitað til aðila sem geta veitt slíka hjálp. Það kemur í veg fyrir þróun, sem í versta falli gæti orðið skelfileg fyrir land og þjóð (11 milljónir Grikkja).

Til eru þeir aðilar hérlendis sem hefði þótt það gott að sjá Grikkland fara í þrot, Evruna og myntbandalagið hrynja til grunna og ólgu skapast í Evrópu. Vonandi verður þeim ekki að ósk sinni!

Myndum við vilja sjá Ísland fara gjörsamlega á hausinn?

Vestfirðingar í samevrópsku orkuverkefni

RÚV greindi í gær frá mjög áhugaverðu sam-evrópsku orkuverkefni, sem Fjórðungssamband Vestfjarða (FV) hefur gerst aðili að. Það snýst m.a. um þróun endurnýjanlegra orkugjafa. Hér má heyra frétt RÚV

Verkefnið heitir RENREN og eru m.a. aðilar frá Þýskalandi og N-Svíþjóð aðilar að því. Hér er heimasíða þess, en þetta verkefni er hluti af LEONARDO áætlun ESB.

Ástæða er til að óska FV velfarnaðar í þessu verkefni, sem segja má að sé gott dæmi um verkefni þar sem sam-evrópsk þekking safnast saman og er nýtt í almannaþágu. Verður spennandi að fylgjast með þessu!

Mynd: FV