Er öryggi smáríkja í Evrópu tálsýn? Clive Archer í nýrri fundarröð

Dr. Clive Archer, Emeritus og Jean Monnet prófessor við Manchester Metropolitan háskólann í Bretlandi, heldur erindi um öryggi smáríkja í Evrópu á vegum Alþjóðamálastofnunar Háskóla Íslands og Rannsóknaseturs um smáríki, föstudaginn 9. september frá 12-13 í Odda 201 í Háskóla Íslands.

Á fyrirlestrinum mun Dr. Archer fara yfir stöðu smáríkja í Evrópu og hvað þau hafa gert í sínum öryggis-og varnarmálum eftir lok kalda stríðsins.  

Dr. Archer er einn helsti sérfræðingur Evrópu á sviði öryggismála smáríkja með sérstaka áherslu á Norðurlöndin og Eystrasaltsríkin. Hann hefur skrifað og ritstýrt fjölda bóka um Evrópusamrunann, alþjóðlegar stofnanir og síðast en ekki síst öryggismál Norður Evrópu og Eystrasaltsríkjanna.  

Fundurinn fer fram á ensku og fundarstjóri er Alyson Bailes, aðjúnkt við stjórnmálafræðideild HÍ.

Þessi fundur er fyrsti fundurinn í fundaröð Alþjóðamálastofnunar Evrópa: Samræður við fræðimenn veturinn 2011-2012. Stofnunin hlaut Jean Monnet styrk til að stuðla að upplýstri umræðu um Evrópumál á Íslandi og mun því bjóða upp á fjölmarga fyrirlestra erlendra fræðimanna á föstudögum í vetur.

Meira um Dr.Archer

Sema Erla til starfa fyrir Já-Ísland

Já-Ísland hefur fengið öflugan liðsauka. Sema Erla Serdar hóf störf sem verkefnastjóri þann 1. september sl.

Sema  Erla er stjórnmálafræðingur með framhaldsmenntun frá Edinborg í Evrópufræðum og var til skamms tíma formaður Ungra Evrópusinna.

Evrópusamtökin óska Semu velfarnaðar í starfi. Framkvæmdastjóri Já-Íslands er Bryndís Ísfold Hlöðversdóttir.

Ekki er að efa að Já Ísland er í góðum höndum hjá þessum kjarnakonum.

ESB-viðræður í góðum gír!

Þrátt fyrir að sitt lítið af hverju gangi í sambandi við landbúnaðarmálin, ganga viðræðurnar við ESB vel. Þetta kemur fram á RÚV.is: "Samkvæmt rýniskýrslu ESB um landbúnaðar- og byggðaþróunarmál þarf að gera umfangsmiklar breytingar á stjórnsýslu landbúnaðarmála hérlendis ef af ESB-aðild verður. Utanríkisráðherra segir viðræður um aðild að Evrópusambandinu ganga mjög vel þrátt fyrir að ESB telji ekki hægt að hefja viðræður um landbúnað að svo stöddu. 15 nýir samningskaflar verði opnaðir fyrir áramót.

Evrópusambandið birti í gær rýniskýrslu sína um landbúnaðarmál og byggðaþróun hér á landi. Skýrslan er niðurstaða gaumgæfilegrar skoðunar á þeim lögum og reglum sem gilda um þessa málaflokka hér á landi. Þar eru tiltekin fjölmörg atriði sem eru ekki í samræmi við þær reglur sem gilda innan Evrópusambandsins og þarf að taka sérstaklega fyrir í viðræðum um aðild Íslands. Þar ber helst að nefna að innleiða þarf beingreiðslukerfi ESB með tilheyrandi lagabreytingum og breytingum á stjórnsýslunni. Sérstaklega þarf að huga að því að setja upp stofnun sem sér um greiðslur til bænda og samræmist kröfum ESB. Sú stofnun bæri ábyrgð á því að styrkir ESB til landbúnaðar og byggðaþróunar hér á landi færu á réttan stað.

Verði af aðild þarf að innleiða reglur um stuðning við framleiðslu flestra landbúnaðarafurða. Núgildandi reglur um landbúnaðarstyrki hér á landi samræmast í flestum tilfellum ekki reglum ESB og um það þarf að fjalla."

Öll frétt RÚV

ESB-málið er heitt!

ESB-málið er ásamt máli Huang Nubo, það heitasta á landinu þessa dagana. Enn og aftur vegna landbúnaðarmála, þar sem greinileg togstreita er á milli manna.

Hér er listi yfir nokkrar fréttir sem tengjast þessu:

http://www.ruv.is/frett/personuleg-afstada-ekki-vandamalid

http://mbl.is/frettir/innlent/2011/09/06/opnunarskilyrdi_af_halfu_esb/

http://www.ruv.is/frett/esb-vidraedur-gangi-vel

http://eyjan.is/2011/09/06/bjorgvin-g-jon-i-motsogn-vid-sjalfan-sig-hlydi-hann-ekki-alyktun-althingis-um-esb/

http://visir.is/section/MEDIA99&fileid=VTV4E644BD2-88A6-4253-AC8B-4E5B8DB7C755

Friðrik Jónsson með nýjan Eyjupistil

Eyjubloggarinn Friðrik Jónsson er með skemmtilegan pistil nú i byrjun hausts/loka sumars. Hann segir:

" Eftir að hafa þurft að hlusta á þus, röfl og raup andaðildarsinna árum, og já áratugum saman, um hið gagnstæða, kemur enn einu sinni fram að Evrópusambandið tekur tillit til sérstöðu aðildarríkja þar sem það á við. Þrátt fyrir að vera mestmegnis samband um almennar, sameiginlegar leikreglur um samskipti og viðskipti ríkja er ESB nógu öflugt, þroskað og já, tillitssamt og praktískt til þess að þola það og skilja að það er samband fullvalda og sjálfstæðra ríkja sem öll hafa sín sérmál sem þarf að vera hægt að taka tillit til.

Og nú erum við með það skriflega á blaði frá sambandinu sjálfu. Allt sem þarf er að Ísland setji fram eigin kröfur og skilgreiningar á því hverjar þær þarfir eru og hvernig íslendingar telji og vilji að þeim sé mætt t.d. innan sameiginlegrar landbúnaðarstefnu sambandsins, sjá bréf fastafulltrúa Póllands, formennskuríkis ESB:

"Iceland presents a a strategy including a planning schedule of measures to be taken progressively in order to ensure full compliance with the acquis under chapter 11 Agriculture and rural development by the date of accession as regards agricultural policy, legislation and administrative capacity, taking into account the specific circumstances for agriculture in Iceland."

 

Reyndar er rýniskýrslan sem fylgdi með hrein skyldulesning líka, en þar má einmitt rýna milli lína hvurslags fúsk og frat íslenskt landbúnaðarkerfi er, án skilvirks eftirlits eða hæfra stofnanna með fulla getu til að framfylgja markaðri stefnu (hvað er íslenska orðið yfir "competent"?)."

 

Allur pistill Friðriks

 

Möl í tannhjólunum?

Á Eyjunni stendur: "Evrópusambandið vill leita sérsniðinna lausna fyrir Íslendinga í landbúnaðarmálum en telur að Íslendingar séu ekki nægilega vel undirbúnir til þess að hægt sé að hefja viðræður um landbúnaðarmál í tengslum við aðildarviðræðurnar. Ástæðan er neitun Jóns Bjarnasonar landbúnaðarráðherra við að vinna að breytingum á landbúnaðarkerfinu og stjórnsýslu landbúnaðarmála samhliða aðildarviðræðum.

Af þessum ástæðum hefur ESB með bréfi til samninganefndar Íslands lýst því yfir að viðræður um landbúnaðarmál muni ekki hefjast fyrr en Íslendingar hafa lagt fram tímasetta áætlun um hvernig þeir ætli að standa að innleiðingu löggjafar ESB á sviði landbúnaðarmála þannig að Ísland verði að fullu reiðubúið til þess að njóta þess ávinnings og axla þær skyldur sem aðildarsamningi fylgja frá fyrsta degi aðildar, samþykki íslenska þjóðin aðildarsamning í þjóðaratkvæðagreiðslu.

Þetta kemur fram í bréfi sem Jan Tombinski, fastafulltrúi Póllands hjá Evrópusambandinu, hefur skrifað íslenskum stjórnvöldum um leið og lögð var fram rýniskýrsla sambandsins um landbúnað og dreifbýlisþróun hér á landi sem er liður í aðildarviðræðunum.

Í bréfinu kemur einnig fram að ESB telji að vegna aðstæðna hér á landi muni verða að leita sérlausna fyrir Ísland í landbúnaðarmálum í aðildarviðræðunum. Öll frétt Eyjunnar

Í viðbrögðum við þessu stendur á vef ráðuneytis Jóns Bjarnasonar: "Ráðherra sjávarútvegs- og landbúnaðarmála mun hér eftir sem hingað til leggja áherslu á að fylgja samþykkt alþingis um aðildarviðræður en að sama skapi er brýnt að þau verkefni sem ráðist er í rúmist innan þeirra heimilda sem Alþingi hefur veitt."

Alþingi Íslendinga hefur ákveðið að hefja aðildarviðræður við ESB, sem eru jú hafnar. Jón Bjarnason er hinsvegar ekki á þeim buxunum og tefur málið. Það er mikið vald. Er það réttlætanlegt? Gengur hann gegn samþykkt Alþingis?

Róm,ESB, einsræðisherrar og "mútufé"

Höfundur Reykjavíkurbréfs Morgunblaðsins fer mikinn í helgarblaðinu, sem kom út síðastliðinn laugardag, líkir ESB við Rómaveldi, sem stóð í um 1000 ár og liðaðist svo í sundur. Ekki verður farið nánar hér út í skýringarnar á falli Rómaveldis, sem eru fjölmargar.

Grundvallarmunurinn á ESB og Rómaveldi er hinsvegar sá ESB er samband 27 fullvalda lýðræðisríkja, en enginn hafði neitt um það að segja hvort viðkomandi vildi vera í Rómaveldi, sem byggði á meðvitaðri útþenslu.

Sögulegar samlíkingar sem þessar eru vandmeðfarnar og geta beinlínis skekkt stórkostlega hið sögulega samhengi.

Og það er ausið úr skálum í Reykjavíkurbréfinu:

"Og enn eru sameiningartilburðir uppi og enn eru þeir byggðir á sáttmálum frá Róm. Og rökin sem notuð eru um nauðsyn þess snúast enn um vald og stöðu Evrópu. Lönd álfunnar verði að sameinast undir einni stjórn í tilteknum (og sífellt fleiri) málum, eigi álfan að geta att valdakappi við Norður-Ameríku annars vegar og Austrið hins vegar. Þetta voru þó ekki rökin í öndverðu. Út á við snerust þau um tolla. En rökin sem dugðu vissu fyrst og fremst inn á við. Evrópusamband var sagt forsenda þess að ríki álfunnar gætu verið til friðs hvert gagnvart öðru. Saga styrjalda var rakin og örðugt er að neita því að slóð hennar er ekki bara blóði drifin. Stundum hafa beinlínis flóðbylgjur blóðs fallið yfir velli álfunnar. Síðasta kastið voru þeir Napóleon, Vilhjálmur II og Hitler helstu forsprakkar slíkra illinda. Og vafalítið er að hefði þeim tekist ætlunarverk sín, hverjum og einum, hefði vísast verið friðsamlegt mjög á þeirra yfirráðasvæðum þótt að öðru leyti væri ekki fundin uppskrift að sönnu sæluríki. En þann frið vildu þjóðirnar ekki kaupa, þökk sé þeim."

Svo virðist sem bréfritari geti ekki slitið sig frá Adolfi H:

"Bréfritari er eins og sagði í upphafi bréfs mjög veikur fyrir Evrópu, þjóðum hennar og náttúru, menningarsögu, byggingum hennar í borgum og búsældarlegum sveitum. Og hann hefur ekki neinar áhyggjur af bullinu um að »falli evran, fellur Evrópa.« Evran er frá upphafi stórgölluð hugmynd og því vond. En hún er ekki verri en allt sem vont er. Og miklu síst er hún verri en Hitler. Og þrátt fyrir allt þá hefur Evrópa komist yfir tilraunina ógurlegu með hann, þótt það kostaði fórnir. Evran er misheppnuð hagfræðileg tilraun og mun ekki skilja önnur ör eftir sig til lengdar en sært stolt sanntrúaðra. En á hinn bóginn er ástæða til að hafa nokkrar áhyggjur af hinni álappalegu umræðu um Evrópusambandsaðild á Íslandi, einkum nú þegar mútugreiðslurnar verða látnar flæða yfir litla landið, í trausti þess að það sé veikt fyrir eftir hrunið."

Hér er versti leiðtogi Evrópu afgreiddur á einfaldan hátt sem "tilraun." Það hlýtur að teljast vafasöm sagnfræði, því áætlanir Hitlers og félaga voru einmitt það, vandlega úthugsaðar áætlanir.

Evran er hinsvegar tæki til að stuðla að einu helsta markmiði ESB, sem er að halda frið í Evrópu. Það hefur tekist. Engin stórstyrjöld hefur brotist út í Evrópu eftir stofnun ESB. Evran auðveldar einnig viðskipti og minnkar viðskiptakostnað.

Svo má bréfritari til með að skella vondum merkimiðum á hlutina, þegar hann talar um "mútugreiðslur" frá ESB, sem eru fjármunir sem ætlaðir eru til kynningar á sambandinu, til þess að fólk hér á Íslandi geti áttað sig betur á hvað þetta fyrirbæri er.

Í þessu samhengi er svo vert að benda á aðsamtök Nei-sinna, Heimssýn og Evrópuvaktin, annað fyrirbæri sem berst hatrammlega gegn ESB-aðild (og er stjórnað að Birni Bjarnasyni og Styrmi Gunnarssyni), hafa þegið "mútufé" frá þessu sama ESB og höfundur Reykjavíkurbréfs gerir iðulega lítið úr!

Það hlýtur að teljast athyglisverð staðreynd! 

Skynsamar konur í Framsókn!

Framsóknarkonur héldu landsþing um helgina og þar var samþykkt að halda áfram samningaviðræðum Íslands og ESB. Á mbl.is segir:

"Landsþing Landssambands framsóknarkvenna samþykkti ályktun um helgina þar sem lýst er heils hugar stuðningi við ályktun Framsóknarflokksins um að Íslendingar skuli áfram leita eftir samstarfi við þjóðir innan og utan Evrópusambandsins.

Í ályktunni er lýst stuðningi við ályktun Framsóknarflokksins þar sem segir að „Íslendingar skulu áfram leita eftir samstarfi við þjóðir innan og utan Evrópusambandsins á grundvelli frjálsra og sanngjarnra samninga og samvinnu sem byggir á jöfnuði og ábata allra aðila. ... Þjóðin skuli ætíð eiga beina aðkomu með þjóðaratkvæðagreiðslu að ákvörðunum um stórmál eins og aðild að Evrópusambandinu.“"

Kristbjörg Þórisdóttir var kjörinn formaður Landsambands framsóknarkvenna um helgina.

Uppfært: Eyjan er með áhugaverða frétt um þetta landsþing, þar sem fram kemur að mikil átök hafi verið á þinginu um forystu þess.

 

Össur um "eistneska kúrinn" í FRBL

Við endurbirtum þessa færslu, með þeirri von að notendur þessa bloggs geti hagað sér eins og menn í athugasemdakerfinu!

 

Össur Skarphéðinsson utanríkisráðherra skrifar góða grein í Fréttablaðið í dag um aðild Eistlands að ESB, en landið fékk aðild árið 2004. Össur skrifar:

"Breytingarnar í Eistlandi á síðustu 20 árum eru nánast kraftaverk“ sagði Carl Bildt, hinn annars orðvari utanríkisráðherra Svíþjóðar, í pallborðsumræðum sem við tókum þátt í fyrir skemmstu í Tallinn. Niðurstaða Eistanna sjálfra var að Evrópusambandið hefði ráðið úrslitum um efnahagslega endurreisn landsins.

Eftir upptöku evrunnar nam hagvöxtur 8% á fyrsta ársfjórðungi þessa árs. Útflutningur jókst í maí um 53% milli ára (maí til maí) og atvinnuleysi er á niðurleið eftir dýfuna 2008. Erlendar fjárfestingar hafa streymt inn í landið og nema nú 80% af landsframleiðslu. Skuldir Eistlands eru þær lægstu í Evrópu og eru aðeins 6% af VLF.

Ungt fólk sem áður sá framtíð sína utan Eistlands festir nú rætur heima fyrir. Skapandi greinar og listir eru á fleygiferð samhliða iðnaði og öðrum hefðbundnum atvinnugreinum. Alþjóðleg stórfyrirtæki á borð við Skype hafa flutt höfuðstöðvar sínar til Tallinn – og þau eru ekki á förum. Eistlandi hefur tekist að byggja upp þróttmikið, fjölbreytt og nútímalegt atvinnulíf. Eistar eru stoltir af sínu þjóðerni og þeir eru stoltir af því að tilheyra Evrópu."

Össur lýkur svo grein sinni með þessum orðum: "Af hverju er ég að segja frá þessu? Jú, Eistland er lítil þjóð eins og við Íslendingar. Þeir, eins og svo margir aðrir, lentu vissulega í efnahagshremmingum árið 2008. En eistneska leiðin – aðild að ESB og upptaka evrunnar ásamt sterkri áherslu þeirra í samvinnu við Evrópusambandið á nýsköpun, fjárfestingar og fjölbreytt atvinnulíf sýnir að það er hægt að ná miklum árangri með réttri stefnu. Þetta er eistneski kúrinn."

Enn kvarnast úr Framsókn - formaður SUF segir sig úr flokknum vegna þjóðernishyggju

Enn kvarnast úr Framsóknarflokki og nú hefur (hvorki meira né minna en) formaður ungra framsóknarmanna sagt sig úr flokknum.

Í frétt á www.visi.is segir: " Formaður Sambands ungra Framsóknarmanna (SUF) Sigurjón Norberg Kjærnested, hefur sagt sig úr Framsóknarflokknum. Hann fylgir því á eftir Guðmundi Steingrímssyni sem sagði sig úr flokknum í síðustu viku og situr sem óháður þingmaður. Þá sagði Einar Skúlason, varaþingmaður, sig einnig úr flokknum."

Sigurjón sendi fjölmiðlum fréttatilkyningu í gær þar sem hann útskýrir afsögn sína og í hennis segir meðal annars:

" Síðasta hálmstráið sem olli því að ég yfirgef núna Framsóknarflokkinn er að mér þykir hann vera að sækja á mið óheilbrigðar þjóðernishyggju. Ég geri engar athugasemdir við að fólki þyki vænt um land og þjóð – mér þykir það líka. Það er notkun slíkrar þjóðernishyggju í pólitískum tilgangi sem ég geri athugasemdir við – og neita að skrifa undir.“

ESB og umhverfismálin í Iðnó 10.september

Umræðufundur um Evrópusambandið og umhverfismál verður haldinn laugardaginn 10. september klukkan 11 - 13 í Iðnó í Reykjavik.

Frummælendur fundarins eru; Svandís Svavarsdóttir, umhverfisráðherra og Árni Finnsson, formaður Náttúruverndasamtaka Íslands , sem  flytur erindi með nafninu ,,Hvaða erindi á Ísland í ESB?".

Einnig taka til máls Þórunn Sveinbjarnardóttir, fyrrverandi umhverfisráðherra, sem ræðir umhverfisstefnu Evrópusambandsins og Páll Ásgeir Ásgeirsson, rithöfundur og leiðsögumaður, en hans erindi ber yfirkskrftina  ,,Enga merkimiða takk".

Fundastjóri er Björg Eva Erlendsdóttir, framkvæmdastjóri Norðurlandasamstarfs Vinstri - Grænna flokka.

ESB-aðild hindrar ekki innflutning á Cheerios!

Allskyns hindurvitni eru áberandi í ESB-umræðunni, t.d. að ESB vilji sölsa undir sig og ná yfirráðum yfir náttúruauðlindum landsins. Annað snýr t.d. að matvælum, til dæmis hvort bannað væri að flytja inn Coco Puffs (Kókópöffs) ef Ísland gengi í ESB. Sem er náttúrulega ekki rétt. Íslendingar fá sitt Kókópöffs áfram, kjósi Ísland að ganga í ESB. 

Á Evrópuvefnum er að finna spurning um Cheerios (Sjéríos), aðra vinsæla vöru frá henni Ameríku. Spurningin hljómar svona: "Hvers vegna er Cheerios bannað í sumum löndum ?"

Í svarinu segir meðal annars:

"Eftir því sem Evrópuvefurinn kemst næst er sala á Cheerios-morgunkorni hvergi bönnuð. Sú tegund af Cheerios sem Íslendingar þekkja best, í gula pakkanum (sjá vinstra megin á mynd), er hins vegar yfirleitt ekki í boði í verslunum í Evrópusambandinu. Þess vegna hefur sú sögusögn gengið manna á milli að sala á Cheerios sé bönnuð innan sambandsins. Af því hafa síðan sprottið getgátur um að Cheerios yrði ekki lengur til sölu hér á landi ef Ísland gengi í Evrópusambandið. Hið rétta er að íslenskir innflutningsaðilar gætu áfram flutt inn og selt hefðbundið Cheerios í gulum pökkum frá Bandaríkjunum þó svo að Ísland gengi í ESB, en búast mætti við að söluverð hækkaði vegna aukinna tolla.

Evrópusambandið er tollabandalag, sem lýsir sér í niðurfellingu tolla milli ESB ríkja og sameiginlegum ytri tollum gagnvart ríkjum utan sambandsins. Þannig hafa einnig verið leiddar líkur að því að Cheerios sé ekki selt innan ESB vegna þess að framleiðslan sé bandarísk og svo háir tollar lagðir á hana að hún sé ekki samkeppnishæf á evrópskum mörkuðum. Staðreyndin er hins vegar sú að framleiðandi Cheerios í Bandaríkjunum, General Mills, á í samstarfi við evrópska matvælaframleiðandann Nestlé, sem framleiðir nú tvær tegundir af Cheerios og dreifir á evrópskum markaði."

Aðdáendur Cheerios (og Kókópöffs) hafa því ekkert að óttast í sambandi við ESB-aðild!

 

Dalia Grybauskaité: Fullveldi Litháens ekki fórnað með ESB-aðild, það styrktist!

Eins og kunnugt er var forseti Litháens, Dalia Grybauskaité, hér í opinberri heimsókn í síðustu viku. Um heimsókn hennar er fjallað á vef Já Íslands og þar stendur: "

"Aðspurð um hvort hún teldi ekki hluti að fullveldi Litháenhefði verið fórnað með aðild svaraði hún að henni þætti þvert á móti aðild hefði styrkt fullveldi Litháa. ,,Af því smáþjóðir lifa aðeins af ef þær eru stoltar af uppruna sínum og rækta sögu sína, tungu, menningu og uppruna; allt sem máli skiptir“ En bætti við að þetta snérist ekki um þjóðerndiskennd heldur stolt.  ,,Einmitt í ESB er hver þjóðin annarri frábrugðin. Þetta er bandalag afar ólíkra þjóða, sem fúsar og frjálsar taka þátt í því og ákveða sjálfar hver þróunin verður. Hver þjóð, jafnvel sú smæsta, eins og Litháen eða Íslendingar, ef þeir vilja, hefur neitunarvald. Og aðeins með þátttöku getið þið haft áhrif og breytt einhverju.

Ef þið eruð fyrir utan getið þið aðeins borið upp umkvartanir, rætt málin og fylgist með – en þið standið úti. En ef þið viljið láta í ykkur heyra á alþjóðavettvangi, hafa áhrif á alþjóðavettvangi er betra að vera einhversstaðar innandyra heldur en að standa fyrir utan."

Viðtal við Dalíu í Kastljósi

Styrkjum til fræðslu um ESB úthlutað

Á RÚV stendur: "Evrópuvaktin, Heimssýn og Já Ísland hafa verið styrkt um 27 milljónir króna í því skyni að stuðla að opinberri og upplýstri umræðu og fræðslu um Evrópusambandið.

Úthlutunarnefnd skipaðri af forsætisnefnd Alþingis bárust átján umsóknir og uppfylltu átta þau skilyrði sem kveðið var á um í úthlutunarreglunum. Í tilkynningu frá Alþingi segir að við úthlutun hafi sérstaklega verið gætt að því að fjárveitingar til andstæðra sjónarmiða til Evrópusambandsaðildar væru sem jafnastar."

En þetta mál, sem unnið er á LÝÐRÆÐISLEGAN hátt, vilja formenn tvegga flokka draga til baka! 

Einnig má lesa um þetta hér.

 

Styrkir ESB samgöngumál? Spurning á Evrópuvefnum - svarið er já!

Mjög áhugaverða spurningu er að finna á Evrópuvefnum um samgöngumál, en hún hljómar einfaldlega svona: Myndi Evrópusambandið veita styrki til að byggja jarðgöng eða brýr á Íslandi ef til aðildar kæmi?

Svarið byrjar svona: "Tæpum þriðjungi af uppbyggingarsjóðum Evrópusambandsins er varið til að bæta samgöngur í aðildarríkjunum á tímabilinu 2007-2013. Ef Ísland gerðist aðili að sambandinu má gera ráð fyrir að stuðningur til slíkra verkefna fengist einnig hér á landi. Ákvörðun um hvaða verkefni hlytu stuðning, jarðgöng, brúarsmíði, almenningssamgöngur eða annað, yrði í flestum tilfellum tekin af íslenskum stjórnvöldum í samræmi við forgangsatriði byggðastefnu ESB, leiðbeiningar framkvæmdastjórnarinnar og aðstæður á Íslandi.

***

 Samanlagt renna 28% úr uppbyggingarsjóðunum til samgöngumála eða tæpir 77 milljarðar evra á tímabilinu 2007-2013. Tæp 19% sjóðanna (50 milljarðar evra) eru þar að auki eyrnamerkt umhverfismálum en samgönguverkefni sem hafa bætt áhrif á umhverfið geta einnig fallið í þann flokk. Langstærstur hluti framlaganna úr uppbyggingarsjóðunum rennur til fátækustu svæða sambandsins (rúm 80%) en um skiptingu sjóðanna á milli svæða má lesa í svari við spurningnni Hver er byggðastefna ESB? (Leturbreyting, ES-blogg)

Svarið í heild sinni er hér