Bryndís Ísfold með skemmtilegt innlegg á Eyjunni!

Bryndís Ísfold Hlöðversdóttir, framkvæmdastjóri hjá Já-Íslands, skrifar skemmtilegan pistil á Eyju-blogginu og segir þar meðal annars:

"Nú þegar hausta tekur og inn um lúguna streyma tilboð um leiðina að granna mittinu, sléttum maga – vil ég minna á að áhrifaríkasta megrunin er alveg ókeypis.

Í kúrnum felst nefnilega sú staðreynd að hér í Krónulandi hækka verðbólga og vextir jafnt og þétt og því má gera ráð fyrir að afar lítill peningur sé eftir á hverju heimili til að kaupa mat.   Nú ef einhver afgangur er,  má reyna að skrapa saman fyrir íslenskri mjólkur- og kjötframleiðslu en verðinu á þeim nauðsynjavörum er tryggilega haldið uppi með sérstaklega háum verndartollum sem heldur þjóðinni frá alfarið frá öllu ofáti.

Það gleymist gjarnan að höfum þegar niðurgreitt tvisvar sinnum meira til þessarar framleiðslu en nágrannar okkar í Evrópusambandinu gera fyrir sambærilega landbúnaðarframleiðslu.  En allt skal í sölurnar lagt til að forðast fitudrauginn ógurlega.

Fæstir hafa auðvitað ekki efni á þessu varning hvort eð er og geta haldið sér gangandi á bankabyggi og grænkáli.  Ekki má lengur flytja inn kjöt og mjólkurvörur erlendis frá nema á því séu um 600% tollar og krónugreyið dugar skammt í slíkum kaupum."

Síðar segir Bryndís: "Fyrir þá sem vilja endilega troða sig út af útlenskum varningi þá er gaman að segja frá því að þrátt fyrir ítrekaðar hörmungaspár Evrópuandstæðinga þá gengur bara býsna vel í ESB og áhugavert að bera Krónukúrinn við þann í Evrópusambandinu.   Það er tollafrelsi á milli ríkjanna og bara heilmikið í boði og bæði verð á matvælum almennt lægra og það sem besta er – engin verðtrygging.

Standard & Poor gefur 21 ESB ríki betra lánshæfismat en Íslandi, 15 þeirra nota evru. Þrjú ríki ESB fá lakari lánshæfismat en Ísland og aðeins eitt þeirra notar Evru.  Svipaða sögu er að segja af einkunnargjöf Fitch þegar það kemur að lánshæfismati.  26 ESB ríki fá betri lánshæfismat en Ísland, 16 þeirra nota evru. Aðeins eitt ríki innan ESB fær lakari lánshæfismat og notar evru.

En þetta eru auðvitað bara fitubollur."

 

Áhugavert í Sprengisandi

Í Bylgjuþættinum Sprengisandi síðastliðinn laugardag var rætt við Dr. Þórarinn Pétursson aðalhagfræðing Seðlabanka Íslands um verðtryggingu og fleira. Þar kom meða annars fram að litlum gjaldmiðlum fylgdu gjarnan töluverðar sveiflur. Hlusta má á þetta hljóðbrot hér.

Í seinni hluta þáttarins var svo rætt við fyrrum utanríkisráherra, Jón Baldvin Hannibalsson um þátt Íslands í viðurkenningu Íslands á sjálfstæði Eystrasaltsríkjanna. Jón kom einnig töluvert inn á ESB-málið og stöðuna í gjaldmiðilsmálum. Hlusta má fyrrihlutann hér og seinnihlutann hér.

Bendum einnig á ritgerð Þórarins um verðbólgumarkmið og gengissveiflur.

Bryndís Gunnlaugsdóttir um ástæður afsagnar varaþingmennsku fyrir Framsókn

Eins og sagt hefur verið frá hér, þá sagði fyrrum formaður Sambands ungra framsóknarmanna (SUF) af sér varaþingmennsku fyrir flokkinn í vikunni.

Um er að ræða Bryndísi Gunnlaugsdóttur, forseta bæjarstjórnarinnar í Grindavík. Í pistli á Eyjunni skýrir hún frá ástæðum afsagnar sinnar og segir þar meðal annars:

"Ég hef marg oft orðið vitni af lélegum vinnubrögðum og hvernig brugðist er við ábendingum um æskilegri vinnubrögð. Viðbrögð við gagnrýni á vinnubrögð flokksins á landsvísu eru þau að útiloka gagnrýnendur frá starfi flokksins og tryggja að já-menn séu í öllum nauðsynlegum stöðum. Slíkt er ekki vænlegt til árangurs og líkurnar á því að Framsóknarflokkurinn verði í fararbroddi við að innleiða ný vinnubrögð í pólitík eru litlar að ég tel.

Stefna Framsóknarflokksins tók miklum breytingum á flokksþingi flokksins nú í apríl frá árinu 2009. Ég er ekki að tala eingöngu um stefnu flokksins varðandi Evrópusambandið líkt og svo margir hafa bent á, heldur líka framsetningu á stefnumálum flokksins. Allir þeir sem lesa ályktanir frá 2009, sem er um 50 bls. og bera þær saman við stefnuna sem var samþykkt í ár, sem er rétt rúmar 20 bls., sjá mikla stefnubreytingu.Flokkurinn fór frá hnitmiðaðri og ítarlegri stefnuskrá svo ljóst væri hverju grasrótin vildi stefna að, yfir í loðna og óljósa stefnu þar sem hver og einn framsóknarmaður túlkar stefnuna eftir sínu nefi.(sbr. ESB stefnu flokksins núna, sumir segja að það megi draga til baka viðræður og aðrir ekki og ég get ekki metið hvor hefur rétt fyrir sér enda var bæði fellt að draga til baka viðræður og að halda áfram viðræðum og leggja samning fyrir þjóðina). Ég vil þó ítreka að stefnubreytingin var samþykkt á flokksþinginu og það er meirihlutinn sem ræður – það er lýðræði. Það þýðir samt ekki að ég verði að styðja þá stefnu ef ég hef ekki sannfæringu fyrir henni.

Í ljósu óánægju minnar með vinnubrögð flokksins og þeirra stefnubreytinga sem orðið hafa á stefnu flokksins á landsvísu frá því í seinustu alþingiskosningum þykir mér rétt að segja af mér varaþingmennsku."

 

Fyrrum formaður SUF segir sig úr Framsókn

Á Eyjunni stendur: "

„Falleg orð um ný stjórnmál skipta engu máli ef bak við tjöldin er enþá starfað eftir gömlu leikreglunum,“ segir Bryndís Gunnlaugsdóttir, forseti bæjarstjórnar Grindavíkur og fyrrverandi formaður Sambands ungra framsóknarmanna, „líkurnar á því að Framsóknarflokkurinn verði í fararbroddi við að innleiða ný vinnubrögð í pólitík eru litlar að ég tel.“

Bryndís segir í bloggi á Eyjunni,  að hún hafi nú sagt af sér sem varaþingmaður Framsóknarflokksins í Suðurkjördæmi. Hún ætlar áfram að sitja í bæjarstjórninni í umboði Framsóknarfélags Grindavíkur."

Mál Sigmundar Davíðs hrekja enn fólk úr Framsóknarflokknum.

 

Enginn keypti upp laxveiðiár - Kínverji kaupir land - hyggst fjárfesta!

Í morgunútvarpinu á Útvarpi Sögu í gær var rætt við Guðmund Kjartansson, ferðamálafrömuð og spjallið barst að EES-samningnum og hræðsluáróðri andstæðinga hans um að hér myndu útlenskir aðilar kaupa upp allar laxveiðiár og önnur áhugaverð hlunnindi. Guðmundur sagði að EKKERT slíkt hefði gerst!

ES-bloggið vill hinsvegar benda á að með EES-samningum fékk Íslans og Íslendingar markaðsaðgang að Evrópu í magni og umfangi sem aldrei hafði þekkst áður! Tækifæri til viðskipta stórjukust!

Svo eru athyglisverðar fréttir að berast af miklum landakaupum kínversks fjárfestis upp á um 10-20 milljarða, háð samþykki stjórnvalda. Umræddur fjárfestir heitir Huang Nobu og kemur alls ekki frá ESB. Sem er einföld staðreynd!

Á Möltu jukust fjárfestingar Kínverja um 80% eftir aðild. Aðild að ESB kemur því alls ekki í veg fyrir fjárfestingar frá öðrum löndum. Sem er einnig staðreynd!

Áhugavert um matvælalöggjöf ESB

Fréttablaðið birti í dag áhugaverða grein um matvælalöggjöf ESB, en síðari hluti hennar tekur gildi hér á landi í nóvember. Í greininni segir meðal annars:

"Markmið matvælalöggjafarinnar er að vernda líf og heilsu manna og tryggja jafnframt frjálst flæði vöru á Evrópska efnahagssvæðinu. Þá eiga reglurnar að tryggja hagsmuni neytenda og til að mynda gera þeim kleift að rekja feril matvæla á öllum stigum framleiðslu og dreifingar.

"Ég held að þessar reglur séu vandaðar og settar að mjög vel skoðuðu máli. Almennt séð held ég að þær séu til bóta og þetta sé góð löggjöf," segir Sigurður Örn Hansson, forstöðumaður matvælaöryggis og neytendamála hjá Matvælastofnun, um nýju reglurnar."

Síðar segir: "Íslensk sláturhús hafa að sögn Sigurðar haft útflutningsleyfi til Evrópuríkja frá árinu 1992. Nú hafi öll sauðfjársláturhús, nokkur stórgripahús og öll stóru mjólkurbúin slíkt leyfi.

Matvæla- og dýralækningastofnun ESB sótti Ísland heim í september á síðasta ári. Markmiðið var að meta framleiðsluferla við kjöt- og mjólkurframleiðslu á Íslandi hjá fyrirtækjum sem flytja út til ríkja

ESB og ganga úr skugga um hvort framleiðslan væri í samræmi við reglur. Voru heimsótt fimm fyrirtæki sem öll höfðu hlotið útflutningsleyfi.

Hjá öllum fimm fyrirtækjum var hins vegar misbrestur á því að reglunum væri framfylgt. Engin gögn voru til staðar um það hvort fyrirtækin hefðu uppfyllt gæðastaðla áður en þau hlutu leyfið. Þá kom í ljós skortur á skipulagi, aðstöðu, tækjum og viðhaldi í þeim öllum auk þess sem ýmsar aðrar athugasemdir voru gerðar við starfsemi þeirra.

Í einu kjötframleiðslufyrirtæki þóttu aðstæður fullkomlega óviðunandi og var þess þegar krafist að leyfið yrði dregin til baka. Í öðru sláturhúsi þótti vera töluverð hætta á smitum milli tegunda auk þess sem skortur var á merkingum. Mjólkurbúin tvö sem heimsótt voru uppfylltu hins vegar kröfur að mestu leyti. Þá töldu skoðunaraðilarað heilbrigði fólks stæði ekki ógn af framangreindum vanköntum.

"Það var strax tekið á þessum athugasemdum held ég. Almennt er ástandið nokkuð gott en ef þú ferð í svona matvælafyrirtæki má lengi finna eitthvað sem er að. Auðvitað má ýmislegt bæta," segir Sigurður, spurður um þessa gagnrýni." (Leturbreyting - ES-blogg)

Þetta er gott dæmi um góða löggjöf frá ESB, sem er í þágu bæði framleiðenda og ekki síst neytenda.

 

 

Krónan er dýr!

Pressan.is skrifar: "Veikist krónan mikið meira eru raunverulegar líkur á að Orkuveitan lendi í greiðsluþroti. Forstjóri fyrirtækisins vonast eftir fjármagni frá lífeyrissjóðunum þrátt fyrir lánshæfismatslækkun frá Moody’s.

Í viðtali við Morgunblaðið í dag segir Hjörleifur Kvaran Orkuveituna þola núverandi ástand á gengi íslensku krónunnar en veikist hún hins vegar mikið meira eru raunverulegar líkur á greiðsluþroti. Segir hann þetta staðan hjá flestum fyrirtækjum landsins í dag og Orkuveituna ekki vera neitt einsdæmi.

Hjörleifur segist hafa beðið lengi eftir að krónan styrktist: ,,stjórnvöld hafa æ ofan í æ sannfært okkur um að það sé að fara að gerast. Fyrst átti krónan að styrkjast með því að Icesave-málið leystist. Svo átti hún að styrkjast með endurskoðun á efnahagsáætlun Alþjóðagjaldeyrissjóðsins. Hvorugt hefur gerst.“"

Þetta vekur upp þá spurningu: hvernig getur gjaldmiðill í höftum styrkst eitthvað að ráði? En eitt er víst: Krónan er íslensku efnahagslífi dýr! Þetta er sama krónan og átti að bjarga öllur hér!

Samkvæmt greiningu Íslandsbanka eru afar litlar líkur á að krónan styrkist á næstum mánuðum.

Þorgerður vill samning og þjóðaratkvæði

Eyjan skrifar: "Þorgerður Katrín Gunnarsdóttir, þingmaður og fyrrverandi varaformaður Sjálfstæðisflokksins, er ósammála Bjarna Benediktssyni, flokksformanni, um að draga eigi til baka umsókn Íslands um aðild að ESB. Hún vill að viðræður verði kláraðar og að þjóðin fái síðan að kjósa um samning.

„Mín skoðun hefur ekki breyst,“ sagði Þorgerður Katrín í fréttum Stöðvar 2 í kvöld. „Við eigum að klára þetta mál og leyfa síðan þjóðinni að koma að málinu og kjósa um það.“

„Við eigum að treysta þjóðinni, alveg eins og í Icesave, við eigum að fjölga valkostum en ekki ýta þeim út af borðinu,“ sagði hún."

Hversu lágt er hægt að leggjast?

Hún er nokkuð "athyglisverð" greinin sem foringi íslenskra Nei-sinna, Ásmundur Einar Daðason, þingmaður í þokkabót, skrifar í Morgunblaðið í dag. Greinin fjallar að sjálfsögðu um ESB-málið.

Ásmundur kemur með gamlar tuggur um fæðuöryggi, aðlögun og annað sem nei-sinnar hafa verið að hamra á í málefnafátæktinni.

En kannski það alvarlega í grein Ásmundar er sú staðreynd að hann sakar forseta ASÍ Gylfa Arnbjörnsson og Dr. Þórólf Matthíasson um að vera svokallaða leigupenna:

"Þessir og fleiri leigupennar virðast alltaf vera til staðar þegar nauðsynlegt er að verja vondan málstað. Þjóðin lætur hinsvegar ekki segjast og skoðanakannanir sýna að Íslendingar taka málefnalega umræðu fram yfir pólitískan áróður ættaðan frá ESB. Það er vonandi að svo verði áfram."

Þarf Ásmundur ekki að færa sannanir fyrir máli sínu þegar hann ber á borð jafn alvarlegar ásakanir sem þessar?

Hve lágt er hægt að leggjast?

Ekki er þetta allvegana til þess fallið að hefja umræðuna á hærra plan!

 

Formaður ungra framsóknarmanna íhugar úrsögn

Á RÚV.i segir: "Formaður Sambands ungra framsóknarmanna íhugar alvarlega að segja sig úr Framsóknarflokknum vegna óánægju með stefnu flokksins. Hann á von á að fjöldi ungra framsóknarmanna muni segja sig úr flokknum, en varaformaður sambandsins og gjaldkeri hafa nú þegar sagt skilið við hann."

Og síðar segir: "Sigurjón Norberg Kjærnested, formaður SUF, segir mikla óánægju meðal ungra frjálslyndra framsóknarmanna. Flokkurinn hafi breytt um stefnu en loforð um ný vinnubrögð í pólitík hafi verið brotin.

Sigurjón íhugar alvarlega að segja sig úr flokknum vegna þessa og telur að fjöldi ungra frjálslyndra framsóknarmanna segi skilið við flokkinn á næstunni. Brotthvarf Guðmundar Steingrímssonar úr flokknum hafi verið kornið sem fyllti mælinn."

Björgin G. Sigurðsson um alþjóðahyggju og útlendingafóbíu

Björgvin G. Sigurðsson, alþingismaður og fyrrum ráðherra, skrifar pistil um Evrópumál á Pressuna.is og nefnir hann Af alþjóðahyggju og útlendingafóbíu. Björgvin skrifar:

"Umræðan um kosti og galla aðildar hefur ekki alltaf verið á háa planinu síðustu misserin. Hræðsluáróður og gylliboð á víxl sem springa út í rammri þjóðernishyggju með öllum sínum sótsvörtu hliðum. Einangrunarhyggju og útlendingafóbíu hverskonar.

Staðreyndin er sú að kosti og galla aðildar tókum við að miklu leyti út með aðildinni að EES á sínum tíma. Þá fór fullveldisframsalið eða deilingin á fullveldinu fram, eftir því hvernig á það er litið. Fjórfrelsið með sínum miklu kostum og  göllum var innleitt með samningnum og æpandi lýðræðishallinn var staðreynd.

Full aðild réttir þessa ágalla af. Ísland tekur þátt í gangverki lýðræðisins innan ESB og hefur kost á aðild að myntbandalagi sem reisir vörn gegn gengissveiflunum og frumskógarlögmálum fjármálamarkaðanna.

Helstu ágallar aðildar felast án efa í því að við niðurfellingu verndartolla á landbúnaðarvörur verða tilteknar greinar landbúnaðar fyrir ágjöf á meðan aðrar færast í aukana og nýjar spretta upp.

Þessu þarf að mæta með harðsnúinni samningalotu sem færir okkur aukna beina styrki til framleiðanda í stað verndartollanna. Líkt og gert var með breiddargráðu ákvæðinu vegna landbúnaðar í Finnlandi og Svíþjóð. Ekki með heimsendaspádómum og linnulausum hræðsluáróðri um endalok íslenskrar landbúnaðarframleiðslu, líkt og nú er haldið gangandi.

Tækifærin eru til staðar. Þau felast í auknu alþjóðasamstarfi en ekki einangrunarhyggju þeirri sem Framsókn og Sjálfstæðisflokkur boða nú. Stórum hópi opinhuga kjósenda í kringum miðju stjórnmálanna til mikilla vonbrigða.

Enda hafa báðir flokkarnir og formenn þeirra á öðrum tíma viðurkennt og talað fyrir upptöku annarrar myntar en krónu. Gjaldmiðils sem færði okkur afnám verðtryggingar, stöðugleika í gengismálum og varanlega lága vexti í stað sveiflnanna sem við höfum mátt þola og búa við áratugum saman."

Allur pistill Björgvins

Svo lengi sem hver lifir?

Á MBL.is stendur: "Talsmaður sænska Jafnaðarmannaflokksins í efnahagsmálum segir í viðtali í dag, að hann útiloki að Svíar taki þátt í evrusamstarfinu á meðan hann lifir. Tommy Waidelich lætur þessi ummæli falla í viðtali við vefinn europaportalen.se."

Hver lifir? Flokkurinn eða talsmaðurinn? 

En svona án gríns: Það eru væntanlega stofnanir flokksins, t.d. flokksþing, sem ákveður stefnu flokksins í gjaldmiðilsmálu, ekki einn einstakur maður. Það er ekki lýðræði!

Evran þýddi 18% aukningu í erlendri fjárfestingu í Eistlandi

Páll Stefánsson, ritstjóri hjá Iceland Review, skrifar skemmtilega og áhugaverða grein í Fréttablaðið í dag um heimsókn sína á sjálfstæðishátíð í Eistlandi um helgina. Og það sem Páll segir um Eistland og Evruna (sem þeir tóku upp um áramótin), en hann segir:

"....maður fann vel fyrir gríðarlegum velvilja til okkar Íslendinga frá Eistum, Þjóð sem hefur verið frjáls í aðeins tuttugu ár, en það er met, því nú hefur sjálfstæðið enst ári lengur en fyrra frelsið, sem varði einungis í nítján ár, frá 1920 til 1939.

Og fullveldið, sjálfstæðið er þeim ALLT. Þess vegna skildu þeir ekki spurningu mína um hvort vera þeirra í Evrópusambandinu skerði ekki þeirra nýfundna frelsi.

„Nei, veran í Evrópusambandinu er trygging fyrir því að við erum þjóð meðal þjóða. Það er hlustað á okkur, og við erum hluti af ákvarðanatöku og regluverki þjóða Evrópu.“

Það eru bara rúmir sjö mánuðir síðan þeir tóku upp evru. Sem hefur strax skilað sér í 18% aukningu á erlendum fjárfestingum í landinu.

„Nú erum við loksins með alvöru gjaldmiðil, sem býr til festu fyrir heimilin, ríkið og fyrirtækin í landinu.“"

Það er þetta með 18% sem er svo sláandi skemmtilegt! Við Íslandi búum hinsvegar við gjaldmiðil í höftum! Það er sláandi leiðinlegt!

Mynd: Visir.is

Guðmundur skýrir afsögn sína úr Framsókn

Afsögn Guðmundar Steingrímssonar úr Framsókn hefur vakið mikla athygli á landinu undanfarna sólarhringa. Á bloggsíðu sinni hefur Guðmundur birti pistil þar sem hann gerir grein fyrir ákvörðun sinni og segir þar meðal annars:

"Ég aðhyllist frjálslynda hugmyndafræði í stjórnmálum. Andstaðan við frjálslyndi er m.a. forræðishyggja, sérhagsmunagæsla og þjóðernishyggja. Þetta þrennt veður uppi í þjóðfélaginu að mínu mati. Ég tel því miður Framsóknarflokkinn vera orðinn um of vettvangur slíkra afla. Þar með skilja leiðir.

Efnislegur ágreiningur minn við málflutning Framsóknarflokksins hefur verið þó nokkur. Ég vil til dæmis nálgast aðildarviðræður við Evrópusambandið með opnum huga og faglegum. Því lofaði ég í síðustu kosningum. Ég tel að í góðum samningi geti falist lykillinn að langþráðum stöðugleika íslensks samfélags sem og auknum möguleikum íslenskra þegna til að nýta hæfileika sína. Ég tel að um þetta stóra hagsmunamál, um samninginn þegar hann liggur fyrir, eigi almenningur að fá að kjósa. Það er grundvallaratriði.

Ég tel líka að það verkefni að koma á skynsamlegum lánamarkaði á Íslandi og þar með að leysa til framtíðar skuldavanda heimila og fyrirtækja verði ekki leyst með ónýtum gjaldmiðli. Mér sýnast sterk rök hníga að því að krónan sé þjóðfélaginu allt of dýr og sé í raun rót óvissu, lífskjaraskerðinga og óréttlátra tilfærslu fjármuna milli þjóðfélagshópa. Í rökræðunni um peningamálastefnuna felst því að mínu viti djúp rökræða um framtíðarsýn fyrir íslenskt samfélag."

Síðar segir Guðmundur:

"Grænn, alþjóðlega sinnaður, víðsýnn, frjálslyndur flokkur þarf að verða til á Íslandi.

Slík hreyfing þarf að vinna að öðruvísi stjórnmálum heldur en þeim sem við höfum mátt þola um langt árabil og af vaxandi þunga undanfarið í landsmálunum. Stjórnmál eiga að vera skemmtileg, gefandi og uppbyggileg. Við verðum að leggja flokkstrúna og stundarhagsmuni flokka og flokksleiðtoga til hliðar, hætta að hugsa um pólitík sem keppni, og stunda samræðu við hvert annað af meiri sanngirni og virðingu, án töfralausna, sakbendinga og alhæfinga."

Undir lok pistilsins segir Guðmundur svo þetta: "Að síðustu vil ég segja þetta: Úrsögn mín varðar ekki bara einstök mál, vinnubrögð í flokksstarfi og annað slíkt, þótt mikilvægt sé. Ég tel að djúpstæð hugmyndafræðileg átök eigi sér stað undir niðri í íslensku samfélagi og víðar. Í þeirri rökræðu vil ég staðsetja mig rétt og vil skora á aðra að gera slíkt hið sama. Þessi víglína þarf að koma upp á yfirborðið til hreinskiptinnar og heiðarlegrar rökræðu.

Annars vegar blasir við ofuráhersla á þjóðernishyggju og afturhvarf til einangrunar, með tilheyrandi skertu frelsi einstaklinga og undirtökum þröngra hagsmunaafla. Hins vegar blasir við leið alþjóðasamvinnu sem felur í sér viðurkenningu á því að stærstu úrlausnarefni samtímans eru þjóðum sameiginleg."

Pistill Guðmundar í heild sinni

 

 

Össur vill opna kaflana um sjávarútveg og landbúnað - setja aukinn hraða í aðildarviðræður við ESB

Stöð tvö sagði frá því í kvöldfréttum að stefna íslenskra stjórnvalda að greiða atkvæði um ESB-aðildarsamning nokkrum mánuðum fyrir alþingiskosningar, sem fara eiga fram í apríl 2013. Á vef Vísis stendur: "Aðildarviðræðum við ESB verður hraðað og er stefnt að því að þjóðaratkvæðagreiðslan verði nokkrum mánuðum fyrir þingkosningar sem eru fyrirhugaðar í apríl 2013.

Össur Skarphéðinsson, utanríkisráðherra, fundaði með forystumönnum ESB á ríkjaráðstefnunni í júní þegar aðildarviðræður hófust formlega. Össur hefur lýst því yfir að hraða beri viðræðunum."

Að sögn Össurar gefur ESB verið gefið það til kynna að Ísland vilji setja aukinn hraða í viðræðurnar og opna kaflana um landbúnað og sjávarútveg.

Samdóma álit manna er að það séu erfiðustu kaflarnir.

Í samtali við Stöð tvo sagði Össur Skarphéðinsson, utanríkisráðherra: "Ég hef lagt áherslu á það til dæmis að menn vinni eins hratt og hægt er hér heima, ekki bara að fiskveiðimálunum eins og unnið er að, heldur einnig landbúnaðarmálunum."