Verbólgan keyrir upp vextina

Vextir hækka á Íslandi í dag um 0.25%. Á www.visir.is segir: "Í tilkynningu á vefsíðu Seðlabankans segir að hækkun vaxta Seðlabankans er í samræmi við nýlegar yfirlýsingar peningastefnunefndar og markast af því að verðbólguhorfur til næstu tveggja ára hafa versnað enn frekar frá síðasta fundi nefndarinnar. Nýjustu hagtölur og uppfærð spá bankans sem birtist í Peningamálum í dag benda að auki til meiri vaxtar innlendrar eftirspurnar og atvinnu á þessu ári en búist var við í síðustu spá.

Síðar segir: "Aukin verðbólga skýrist m.a. af lágu gengi krónunnar og verðhækkunum húsnæðis og olíu. Umsamdar launahækkanir munu auka verðbólguna enn frekar á næstunni þrátt fyrir lítils háttar styrkingu gengis að undanförnu. Miðað við núverandi gengi krónunnar eru horfur á að verðbólga aukist fram á næsta ár og að verðbólgumarkmiðið náist ekki að nýju fyrr en á seinni hluta ársins 2013."

Ergo: Lán landsmanna hækka enn frekar og það verður dýrara að taka lán!

Athugasemdir

[Guðmundur Ásgeirsson, 17.8.2011 kl. 16:58]

Sleppum því þá að taka lán. Við hefðum mjög gott af því.

Að gera lán dýrari með vaxtahækkun er eina verkfærið sem seðlabankinn hefur til að hamla gegn frekari skuldsetningu. Hér er hann að senda slík skilaboð og við ættum kannski að taka mark á þeim.

Þetta hefur hinsvegar engin áhrif á lánskjör þeirra heimila sem þegar eru skuldsett upp fyrir haus. Það eina sem getur lækkað kostnað þeirra vegna áhvílandi skulda er lækkun vísitölu neysluverðs. Seðlabankinn hefur engin tök á því að breyta henni, hinsvegar er það á færi Alþingis og stjórnvalda. Það má til dæmis gera með því að breyta samsetningu vísitölunnar og reikniaðferðum eins og hefur nokkrum sinnum verið gert í gegnum tíðina, eða með því að breyta álagningu hinna ýmsu gjalda semvega þungt í vísitölunni svo sem neysluskattar, vörugjöld og tollar, og neyslustýring á borð við bensínsgjald og áfengisgjald.

Staðreyndin er sú að verðlagi, og þar með vísitölu neysluverðs og verðtryggingu húsnæðislána, er að miklu leyti handstýrt af stjórnvöldum sjálfum til þess að blása út efnahagsreikninga gjaldþrota bankakerfis. Það er því ekki furða að 67,1% landsmanna skv. nýlegri könnun MMR telji ríkisstjórnina leggja meiri áherslu á afkomu banka en heimila. Því til stuðnings má benda á að frá því nýju bankarnir hafa verið stofnaðir hafa þeir hagnast um á annað hundrað milljarða króna, þrátt fyrir afskriftir vegna tapaðra útlána til braskfyrirtækja og vegna ólögmætis gengistryggingar. Á sama tíma standa skuldir heimila í stað og ríkissjóður er rekinn með geysilegum halla sem verður ekki fjármagnaður nema með skattahækkunum. Í stað þess að sækja þá skatta í bankakerfið stendur nú til að hækka virðisaukaskatt á nauðsynjavöru. Þetta eru fyrirætlanir ríkisstjórnarinnar, ekki seðlabankans.