Forseti og utanríkisráðherra valdir

Herman Von Rompuy var í kvöld valinn til embættis forseta ESB. Hann er núverandi forsætisráðherra Belgíu og þykir slyngur samningamaður og góður sáttasemjari. Einnig var útnefnt í embætti utanríkisráðherra (High Representative) og þar hlutu Bretar hnossið; fyrir valinu varð Catherine Ashton. Hún hefur undanfarin ár starfað við gerð viðskiptasamninga fyrir ESB og þótti standa sig vel þegar sá stærsti, við S-Kóreu, var gerður á sínum tíma. BBC telur að val þeirra endurspegli ákveðna varfærni hjá ESB við það að "sjósetja" þessar tvær nýju stöður innan þess. Sú staðreynd að þetta ferli tók skamman tíma þykir vera rós í hnappagat Svía, sem ljúka formennsku sinni í ESB nú um áramót. Spánverjar taka við af þeim.

Sjá nánar á vef BBC

Einnig fréttaskýring EurActiv

Athugasemdir

[Gunnar Rögnvaldsson, 20.11.2009 kl. 00:19]

Leiðrétting:

Enginn var kosinn. Það var útnefning sem fór fram í Brusselgarði í dag, samkvæmt venju. Enginn var kosinn.

Þetta var líka gert svona þegar útnefning til embætta var framkvæmd á sovéskan máta í Sovétríkjunum. Þetta minnir eiginlega minnir mest á þegar valinn var nýr maður til að gegna embætti aðalritara kommúnistaflokks Sovétríkjanna. Fyrirmyndin er sennilega sótt þangað.

Sá flokkur, kommúnistaflokkurinn, þjóðnýtti stjórnmál í Sovétríkjunum öllum. Alveg eins og nú hefur gerst í Evrópusambandinu - öllu.

Kveðjur

[Hjörtur J. Guðmundsson, 22.11.2009 kl. 11:20]

Hvaða alþjóðastofnun þarf forseta og utanríkisráðherra? Barroso, forseti framkvæmdastjórnar Evrópusambandsins, sagði að nú gætu Bandaríkjamenn hringt í eitt símanúmer ef þeir vildu ræða við sambandið og ríki þess um utanríkismál, númerið hjá utanríkisráðherranum. Sambandsríki Evrópu er svo gott sem tilbúið.