Íslendingar kusu Evrópu!

Niðurstöður hinna sögulegu kosninga í lok apríl 2009 sýna að:

Íslendingar kusu Evrópu og aðildarviðræður við ESB um framtíðarstefnu í peninga og utanríkismálum landsins. Kjósendur höfnuðu Sjálfstæðisflokknum og refsuðu harkalega og þar á líklega óskýr og margklofin stefna flokksins gagnvart Evrópu og ESB, stóran hlut að máli. Sjálfstæðisflokkurinn ber höfðinu í steininn í þessum málum, svo úr blæðir. Bjarni Benediktsson, nýr formaður, glataði sögulegu tækifæri til að taka flokkinn út úr þeirri þoku sem flokkurinn hefur vaðið í Evrópumálum og gera hann að nútímalegum hægriflokki. Í staðinn hlekkjaði Bjarni sig við drauga fortíðar og flokkurinn klofnaði.

Útkoma Vinstri-Grænna var ekki eins glæsileg og spár gerðu ráð fyrir. Stuðningur við afdráttarlausa NEI-stefnu VG gagnvart ESB, sem samstaða varð um á aðalfundi fyrir skömmu hlýtur því mun minna fylgi en liðsmenn VG höfðu vonast.

Útkoma Framsóknarflokksins var betri en kannanir gáfu til kynna. Framsókn vill ganga til aðildarviðræðna við ESB.

Borgarahreyfingin, nýtt afl úr grasrót íslenskra stjórnmála, fær fjóra þingmenn og er þetta mikill sigur fyrir hreyfinguna. Hreyfingin vill aðildarviðræður við ESB.

SKILABOÐIN ERU SKÝR: ÍSLAND Á AÐ FARA Í AÐILDARVIÐRÆÐUR VIÐ ESB!

Til hamingju Evrópusinnar, til hamingju Ísland!

 

 

Kjósum viðræður!

Ágæta áhugafólk um Evrópumál, við hvetjum alla til að kjósa á morgun þau stjórnmálaöfl sem vilja hefja viðræður við Evrópusambandið, án frekari málalenginga.

Við bendum einnig á grein Eyjubloggarans Guðmundar Gunnarssonar á Eyjunni, en þar skrifar hann:

Algengt viðkvæði stjórnmálamanna sem verja krónuna er að benda á lönd innan ESB og segja að þar séu mikil vandamál.

Ég hef áður bent á að það sé einkennilegt og óábyrgt hjá stjórnmálamönnum að bera okkur saman við lönd án þess að taka tillit til þess að þau eru með verðbólgu sem er innan við 4 - 5% og vexti á svipuðu stigi. Lönd þar sem fólk er ekki að tapa eignum sínum vegna ónýts gjaldmiðils, ofurvaxta og verðtryggingar.

Ekkert land í Evrópu hefur orðið fyrir jafnmiklu kerfistjóni og Ísland, það er vegna hruns krónunnar.

Ekkert Evruríki hefur orðið fyrir jafnmiklu tekjutapi og hér, það er vegna hruns krónunnar. Fram hefur komið að tekjustofnar ríkissjóðs hafi hrunið um tugi prósenta og sé í raun stærsta vandamálið sem komandi ríkisstjórn þarf að glíma við.

Ísland er fullkomlega rúið efnahagslegu trausti, það er vegna krónunnar.
Hér má m.a. mörgu öðru vísa til ummæla forsvarsmanna atvinnulífsins undanfarna daga.

Íslenskt atvinnulíf getur ekki endurfjármagnað sig, það er vegna krónunnar. Lönd sem eru með Evru eru ekki í sömu vandræðum. Hér vísa ég einnig til ummæla forvarsmanna atvinnulífsins og hagdeilda aðila vinnumarkaðs.

Hvergi á Norðurlöndunum eða í vestan-verðri Evrópu hefur kaupmáttur fallið eins mikið og hér, það er vegna hruns krónunnar. Kaupmáttur hefur fallið um á annan tug prósenta síðustu 10 mán.

25% af launum íslendinga fara í aukakostnað vegna krónunnar. Til þess að hafa svipuð laun og annarsstaðar á norðurlöndunum þurfum við að skila 25% lengri vinnuviku.

Hvergi hefur eignatap einstaklinga orðið eins mikið og hér, það er vegna hruns krónunnar

Hluti af verðfalli eigna lífeyrissjóða og sjóða þar sem fólk geymir sparifé sitt er vegna þessa kerfisfalls krónunnar og þessi hluti stefnir í að verða langstærsti þátturinn í verðfallinu.

Vextir hér á landi eru töluvert hærri en annarsstaðar og vaxtamunur verður alltaf a.m.k. 5% hærri á Íslandi en innan Evrusvæðisins vegna krónunnar. Ef fjölskylda sem kaupir sér eitt hús á Íslandi og önnur kaupir sér hús t.d. í Danmörku. Þá er staðan sú eftir 20 ár að þá hefur íslenska fjölskyldan greitt sem svarar andvirðis tveggja húsa, séu greiðslur bornar saman við endurgjald dönsku fjölskyldunnar.

Krónan heldur íslendingum í efnahagslegum þrælabúðum.Við viljum efnahagslegt frelsi takk fyrir.

Blogg Guðmundar: http://gudmundur.eyjan.is/

Öflugur Auðunn

Auðunn Arnórsson, skrifar öflugan leiðara í Fréttablaðið í dag.

Þar segir hann meðal annars:

,,Annar valkosturinn er þessi: að láta „bjartskt", skynsemi­sneytt stolt og eðlislæga einangrunarhyggju eyjarskeggjans hafa yfirhöndina og reyna að láta eins og íslenzka krónan sé enn þá nothæf mynt, þótt það kosti að stórdragi úr utanríkisviðskiptum, hér verði haftabúskapur varanlegur, vextir haldist háir, fyrirtæki hafi ekki aðgang að lánsfé og neyðist því ýmist til að hætta starfsemi eða flytja úr landi. Það myndi fjöldinn allur af fólki líka gera, ekki sízt það sérhæfðasta og menntaðasta. Eftir stæði einangrað samfélag sem byggði afkomu sína á hálfgerðum sjálfsþurftarbúskap með tilheyrandi rýrnun lífskjara.

Hinn valkosturinn er þessi: að sækja um aðild að félagsskap annarra Evrópuþjóða samkvæmt þeim leikreglum sem þær hafa komið sér upp og ber nú nafnið Evrópusambandið. Strax með ákvörðun um að setja stefnuna á aðildarumsókn gæfu Íslendingar skýr skilaboð til umheimsins um að þeir hygðust ekki láta hina eðlislægu einangrunarhyggju eyjarskeggjans hafa yfirhöndina, heldur sýndu þeir metnað til að eiga samleið með næstu grannþjóðum sínum og öðrum þjóðum álfunnar í að finna leiðir út úr kreppunni. Því að finna þær leiðir er viðfangsefni sem á tímum hnattvæðingar verður ekki leyst með því að hvert og eitt þjóðríki reyni að loka sig af í þeirri trú að þannig geti þau einangrað sig frá verstu áhrifum kreppunnar. Heldur einmitt hið gagnstæða; þjóðir heims, og þá sérstaklega þær sem sameinast hafa um hinn sameiginlega innri markað Evrópu, verða að taka saman höndum um vænlegustu leiðirnar út úr kreppunni."

Krækja: http://www.visir.is/article/20090424/SKODANIR04/491119299/-1

Tæp 3.5% þjóðarinnar SAMMÁLA!

Nú hafa vel yfir 10.500 manns skráð sig á vefsíðuna www.sammala.is þar sem hvatt er til aðildarumsóknar að ESB. Þetta gera tæplega 3.5% íslensku þjóðarinnar! Evrópusamtökin hvetja alla sem styðja málið að skrá sig. Oft var þörf, en nú er nauðsyn!

Þór Sigfússon hvetur til ESB-aðildar

Þór Sigfússon, ný-endurkjörinn formaður Samtaka atvinnulífsins(SA) hvetur til þess að Ísland sæki um aðild að ESB. Hið sama gerði Jóhanna Sigurðardóttir, en þau töluðu bæði á aðalfundi SA, sem haldinn var í gær. Þetta kemur m.a. fram á www.visir.is. Í fréttinni segir m.a. ..,,lögðu bæði áherslu á að sótt verði um aðild að Evrópusambandinu sem fyrst og stefnt að upptöku evru..." Ennfremur sagði Andri Þór Guðmundsson, forstjóri Ölgerðarinnar ,,viðskipti með krónuna líkari fjárhættuspili en eðlilegum viðskiptum."

Fréttin í heild sinni er hér

 

Gylfi og Illugi vekja athygli

Gylfi Zoega, prófessor í viðskipta- og hagfræðideild Háskóla Íslands, segir á þessu myndbandi að innganga í ESB sé leiðin til að forðast mannflótta og fátækt. Gylfi, sem er einn snjallasti hagfræðingur landsins, hefur ekki áður tala svona opinskátt um þetta mál.

Sjá http://www.youtube.com/watch?v=FCSERJBFa2I

Einnig vekjum við athygli á snjöllum pistli Illuga Jökulssonar í Fréttablaðinu í dag

Þar segir Illugi meðal annars:

,,Evrópusambandið er ekki paradís á jörð. Það gæti meira að segja komið í ljós við aðildarviðræður að kostnaður af aðild væri meiri en ávinningurinn. Sá kostnaður þarf þá reyndar að vera mikill og hár, því ávinningurinn verður óhjákvæmilega eftirsóknarverður – almennilegur gjaldmiðill og stóraukinn stöðugleiki á alla lund.

En látum svo vera, ef kostnaðurinn verður of hár, þá skal ég fyrstur manna greiða atkvæði á móti aðild. Lofa því hér með!

En það er þvílík fásinna að grípa ekki fyrsta tækifæri til að komast að því hvort aðild að þessum klúbbi geti hentað okkur, að ég get eiginlega ekki skilið það. Það hlýtur að vera eintómri hræðslu um að kenna, hræðslu við umheiminn stóra."

Pistill Illuga:
http://www.visir.is/article/20090422/SKODANIR03/210679876

Við bendum einnig á leiðara Svanborgar Svavarsdóttur í  Fréttablaðinu  í dag og grein Reynis Kristinssonar í Markaðnum, fylgiblaði Fréttablaðsins.

Evrópusamtökin hvetja alla til að kjósa á laugardaginn þau stjórnmálaöfl sem hafa á stefnuskrá sinni að hefja án undanbragða aðildarviðræður við Evrópusambandið.

 

SAMMÁLA að ná 10.000!

Vel yfir 9000 einstaklingar hafa skráð sig á www.sammala.is sem er vefsíða sem berst fyrir aðildarviðræðum við ESB.  Greinilegt er að um er að ræða fjöldahreyfingu fólks, sem berst fyrir skynsamlegri nálgun að ESB: AÐ SÆKJA UM OG SJÁ HVAÐ KEMUR ÚT ÚR ÞVÍ.

Evrópusamtökin hvetja alla þá sem eru sammála að fara inn á heimasíðu samtakanna  og skrá sig.

Össur á www.evropa.is

Össur Skaprhéðinsson, utanríkis og iðnaðarráðherra skrifar góða grein um Ísland og ESB í Morgunblaðið í dag. Þar segir hann m.a.:

Aðild að ESB og upptaka evru við fyrsta tækifæri er besta og hraðvirkasta leiðin til að endurnýja traustið á íslenskt efnahags- og atvinnulíf. Aðrar leiðir, sem nefndar hafa verið, eins og að taka einhliða upp evru með aðstoð AGS – nýjasta skyndilausn Sjálfstæðisflokksins – hafa reynst pólitískar brellur sem standast ekki skoðun. Evrópustefna Samfylkingarinnar með upptöku evru mun hins vegar draga úr gengissveiflum í viðskiptum við útlönd, og útflutningsviðskipti munu aukast með aðild að stærra myntsvæði. Viðskiptakostnaður sem nú nemur milljörðum mun minnka. Matvælaverð mun lækka. Við þurfum líka á evrunni að halda til að fá erlenda fjárfesta með fjármagn inn í atvinnulífið til að tryggja farsæla endurreisn efnahagslífsins.

Greinina er að finna í heild sinni á nýrri vefsíðu Evrópusamtakanna, www.evropa.is

 

Sammála heldur fund í Iðnó á morgun (21.4.09)

Ágæta áhugafólk um Evrópumál!

Félagið, sem stendur að undirskriftasöfnun á vefnum sammala.is, þar sem hvatt er til þess að Ísland sæki um aðild að Evrópusambandinu, efnir til borgarafundur í Iðnó síðdegis á morgun, þriðjudaginn 21.apríl.

Á fundinum munu sjö af þeim sem skráð hafa sig á listann skýra hvers vegna þeir eru sammála um að ríkisstjórnin, sem tekur við að loknum kosningum, eigi að hafa sem eitt af sínum forgangsverkefnum að hefja aðildarviðræður við Evrópusambandið og bera aðildarsamning undir þjóðaratkvæði.

Til máls taka Auður Jónsdóttir rithöfundur, Guðmundur Gunnarsson formaður Rafiðnaðarsambandsins, Guðrún Pétursdóttir háskólakennari, Hilmar Veigar Pétursson framkvæmdastjóri CCP, Hörður Arnarson verkfræðingur, Óttar Proppé tónlistarmaður og bóksali og Ragnhildur Helgadóttir fyrrverandi ráðherra.

Athygli vekur að framsögumenn koma úr öllum flokkum og utan flokka.

Fundurinn, sem hefst kl. 16.30,  er öllum opinn.

Einn helsti bakhjarl undirskriftasöfnunarinnar er Benedikt Jóhannesson framkvæmdastjóri Talnakönnunar og ritstjóri vikuritsins Vísbendingar.

Félagið hefur undanfarna daga staðið fyrir heilsíðuauglýsingum í dagblöðum þar sem baráttumál þess er kynnt.

Myndband um ESB

Ungir jafnaðarmenn hafa útbúið stutt en snjallt myndband um kosti þess fyrir ungt fólk að Ísland gangi í Evrópusambandið. Sjón eru sögu ríkari!

http://www.youtube.com/watch?v=2It3cFjwRjM