Noregur og EES - fyrirlestur

Á vef Já-Íslands stendur: "Síðastliðin 20 ár hafa Ísland og Noregur hagað þátttöku sínni í Evrópusamrunanum á sama hátt, þ. e. með aðild að EES-samningnum og Schengen samstarfinu, sem og með annars konar samningum við Evrópusambandið.

Í janúar sl. kynnti norska endurskoðunarnefndin um EES-samninginn skýrslu sína sem greinir áhrif samningsins á Noreg og hvernig hann hefur þróast á þessu tímabili. Prófessor Fredrik Sejersted var formaður nefndarinnar og professor Ulf Sverdrup framkvæmdastjóri hennar.

Á opnum fyrirlestri með Fredrik Sejersted og Ulf Sverdrup, á vegum Alþjóðamálastofnunar og norska sendiráðsins, munu meginniðurstöður skýrslunnar vera kynntar.

Fundurinn fer fram þriðjudaginn 27. mars, milli klukkan 12.30 og 13.30 í fyrirlestrasal Þjóðarbókhlöðunnar."

Frétt á Stöð tvö, sem tengist þessu.

Umfjöllun um byggðastefnu ESB á RÚV - andstæðingar í þakið!

Þátturinn Landinn fjallaði um byggðastefnu ESB þann 25.mars s.l. og var það að mörgu leyti áhugaverð umfjöllun. Horfa má á innslagið hér.

Og þess var ekki lengi að bíða að andstæðingar ESB myndu rjúka í þakið yfir þessari umfjöllun. Fyrrum ráðherra í ríkisstjórn Íslands sakar t.d. RÚV um áróður á bloggi sínu.

Ekkert má nú! Allra síst að stuðla að opinni umræðu um ESB!

Umræðan um norska krónu ódrepandi?

Í frétt á Eyjunni stendur: "Greiningardeild Arionbanka telur að norska krónan sé mun fýsilegri kostur en Kanadadollar, ef farið verður út í það að taka upp einhliða aðra mynt."

Gott og vel, en það er aðeins einn galli á þessu: Okkur stendur einfaldlega ekki til boða að taka upp norska krónu! 

Dögun vill klára samningarferlið við Evrópusambandið

Dögun, nýtt stjórnmálaafl, sem stofnað var á dögunum, vill að samningaviðræður við ESB verði kláraðar og þjóðin fái að greiða atkvæði um aðildarsamning í þjóðaratkvæðagreiðslu. Þetta kemur fram í kjarnastefnu samtakanna á Fésbókinni:

" Við leggjum áherslu á opið og lýðræðislegt ferli, óháða upplýsingagjöf og fræðslu og treystum þjóðinni til að ráða niðurstöðunni." 

Þar með bætist Dögun í hóp þeirra sem vilja klára samningaferlið, en eins og þeir sem fylgjast með vita, þá er eitt helsta baráttumál NEI-sinna, að þjóðin fái ekki að greiða atkvæði um ESB-málið.

Dögun er velkomin í hóp þeirra sem vilja klára málið og leyfa þjóðinni að tala! 

Már Guðmundsson: Gjaldmiðilsumræðan á villigötum - Kanadadollar óraunhæfur

Á RÚV segir: "Seðlabankastjóri gagnrýnir umræðu um gjaldmiðlamál á Íslandi og segir hana á villigötum. Upptaka Kanadadollars sé meðal hugmynda sem séu óraunhæfar. Seðlabankinn vinnur nú að veigamikilli úttekt á framtíðarmöguleikum landsins í gjaldmiðlamálum. 

Seðlabankamenn hafa um nokkurt skeið unnið að skýrslu þar sem fara á yfir þá möguleika sem Ísland hefur varðandi gjaldmiðlamál. Skýrslan verður væntanlega fullbúin innan fárra vikna eða mánaða en hún ber heitið „Kostir Íslands í gjaldmiðlamálum“

„Þetta er mjög veigamikið og vandað verk og við viljum að það verði það, það veitir ekki af miðað við umræðuna á Íslandi,“ segir Már Guðmundsson seðlabankastjóri. Meðal þess sem sé skoðað er hvað fylgi því að ganga í Evrópusambandið og því að fara inn á evrusvæðið. Þá er skoðað hvernig hægt sé að halda enn í krónuna sem sjálfstæða mynt og fleiri form."

Hversvegna á að klára ESB-málið?

Gunnar Hólmsteinn Ársælsson, stjórnmálafræðingur og stjórnarmaður í Evrópusamtökunum, skrifar grein um ESB-málið á vef Skessuhorns á Vesturlandi. Hann veltir m.a. fyrir sér spurningunni hversvegna eigi að klára ESB-málið og segir: "

En hversvegna á að klára ESB-málið?

Jú, í fyrsta lagi væri það afar óheppilegt að hættaí miðju kafi, ferlið er komið vel á veg, mikil vinna hefur verið unnin. Í öðru lagi er gott fyrir íslenskt samfélag að klára málið og fá þannig hreinar línur í samskipti okkar við Evrópu og Evrópusambandið. Það er einnig hreinlega ekki gott að hafa ESB málið hangandi eins og Demoklesar-sverð yfir þjóðinni. Niðurstaða í ESB málinu myndi þá einnig varpa nýju ljósi á EES-samninginn, sem verður þá hægt að bregðast við. Í þriðja lagi hefur verið vaxandi krafa eftir október-Hrunið, árið 2008, um aukna aðkomu almennings að ákvörðunum, í formi beins lýðræðis. Þjóðaratkvæði um ESB er beint lýðræði. Fyrir ákvörðun sína þyrftu landsmenn að kynna sér málið, kosti þess og galla, sem og aðildarsamninginn sem heild. Í fjórða lagi er það einfaldlega vilji þjóðarinnar, samkvæmt skoðanakönnunum, að klára samningana við ESB.

ESB málið felur í sér mjög mikilvæga málaflokka, t.d. gjaldmiðilsmálin, sem virkilega brenna á fólki, rétt eins og umræða síðustu missera sýnir. Það má ekki gleyma því að í október 2008 hrundi íslenska krónan, gjaldmiðill Íslands. Þessi gjaldmiðill er nú í gjaldeyrishöftum og hafa virtir hagfræðingar á borð við Þorvald Gylfason bent á skaðsemi þeirra. Þá hefur Páll Harðarson, forstjóri Kauphallar Íslands, bent á að þau dragi bæði úr kaupmætti almennings, hækki fjármagnskostnað landsmanna og dragi úr tiltrú á íslenska hagkerfinu (sjá www.eyjan.is, þann 19.5.2011).

Samskipti Íslands og Evrópu verða ráðandi þáttur í utanríkismálum landsins um ókomna tíð. ESB er samstarfsvettvangur 28 lýðræðis og aðildarríkja (með Króatíu sem samþykkt hefur í þjóðaratkvæðagreiðslu að ganga inn), sem er einstakur í heimssögunni. Ísland og Íslendingar tapa ekki fullveldinu með inngöngu, það hefur engin aðildarþjóð gert! Þvert á móti mætti e.t.v. segja að Ísland fengi til baka það fullveldisframsal sem bent hefur verið á að felist í EES-samningnum."

Lítið gerst hjá Evrópunefnd Sjálfstæðisflokksins

Lítið hefur gerst á sviði Evrópunefndar Sjálfstæðisflokksins á undanförnum misserum. Reynda eru um þrjú ár frá þvi "nýtt efni" var sett inn á síðu flokksins hjá Evrópunefnd. Það var lokaskýrsla og ályktun Evrópunefndar.

Sjálfstæðisflokkurinn hefur það annars á stefnuskrá sinni að vera öflugur í vestrænni samvinnu. Skyldi Evrópa vera þar með?

"Hleypt út á endanum" - "...bara spurning um hvernig og hvenær" !

Í Markaðnum í Fréttablaðinu í dag er þessi fyrirsögn: "Íslenskum krónum verður hleypt út á endanum."

Það er eins og það sé verið að tala um eitthvað hræðilegt!

En það er verið að tala um krónur sem greiða á til erlendra kröfuhafa og um þetta segir seðlabankastjóri:

"Þessu verður öllu hleypt út á einhverjum tímapunkti. Þetta er bara spurning um hvernig og hvenær."

Sýnir ágætlega hverskonar ófremdarástand er í gjaldmiðilsmálum Íslands.

Það eru fleiri spurningar en svör í sambandi við krónuna!

Ps. Í þessari grein The Economist er svo gert góðlátlegt grín að gjaldmiðilspælingum Íslendinga, en DV segir einnig frá þessu.

Talar um upptöku Kanadadollar, kominn í nefnd um gjaldmiðilsmál hjá Sjálfstæðisflokki

Í sandkorni í DV segir: "Kosning Heiðars Más Guðjónssonar, fjárfestis og krónugagnrýnanda, í efnahags- og viðskiptanefnd Sjálfstæðisflokksins um síðustu helgi er áhugaverð fyrir margra hluta sakir.

Í fyrsta lagi hefur Heiðar Már talað fyrir því að Íslendingar taki upp aðra mynt en krónu, til dæmis Kanadadollar eða evru. Þessi skoðun fer þvert gegn sýn valdamanna í flokknum eins og Davíðs Oddssonar en sýnir hugsanlega að Bjarni Benediktsson er hallari undir gjaldmiðlabreytingar en hann vill vera láta."

Í Klinkinu á www.visir.is segir svo Heiðar að ..."tilrauninni með krónuna sé lokið og að nauðsynlegt sé að taka upp alþjóðlega mynt.

Hvað á Heiðar að gera í þessari nefnd Sjálstæðisflokksins? Bjarni Benediktsson, formaður Sjálfstæðisflokksins, hefur jú sagt að það eina sem komi til greina sé krónan.

Um daginn sagði svo aðili úr sjávarútveginu að best væri að taka upp Evru einhliða. Á það hefur verið bent að hátt í 300 fyrirtæki hér á landi gera upp ársreikninga sína í annaðhvort Evrum eða Dollurum.

Það eru margir að tala um allt annan gjaldmiðil en krónuna!

Makríllinn veldur deilum

Rúv segir frá: "Evrópusambandið ætlar að hraða ákvörðun um refsiaðgerðir gegn Íslandi og Færeyjum vegna makríldeilunnar. Írskir ráðamenn segja erfitt að ræða um sjávarútvegsmál í aðildarviðræðum við Íslendinga svo lengi sem deilan er óleyst.

Tveggja daga fundur sjávarútvegs- og landbúnaðarráðherra Evrópusambandsins hófst í Brussel í gær.

Að loknum fundum gærdagsins upplýsti Simon Coveney, landbúnaðar- og sjávarútvegsráðherra Írlands, í samtali við írska ríkisútvarpið, að framkvæmdastjórnin hefði fallist á tillögu Íra og Breta um að flýta ákvörðun um hugsanlegar refsiaðgerðir gegn Íslandi og Færeyjum vegna makrílveiðanna.

Þær munu beinast að sölu á makrílafurðum og fiskveiðitækni til aðildarríkjanna."

Tækifæri í ESB? Sláturfélag Suðurlands/Kjötvinnslan með útlfutningsleyfi á öllu EES-svæðinu!

Á vef Dagskrár (www.dfs.is) segir í frétt: "Sláturhús SS á Selfossi og Kjötvinnslan á Hvolsvelli hafa nú fengið útgefið starfsleyfi á grundvelli matvælareglugerðar ESB, sem tók gildi á Íslandi hinn 1. nóvember 2011. Þar með er öll starfsemi framleiðsludeilda SS skv. gildandi matvælareglugerð ESB og hefur í för með sér að heimilt er að dreifa og selja allar framleiðsluvörur félagsins á hinu Evrópska efnahagssvæði, sem skapar fjölmörg ný og spennandi tækifæri.

Sláturhúsið á Selfossi fékk leyfið útgefið hinn 1. febrúar 2012 í kjölfar skoðunar eftirlitsmanna MAST 17. janúar 2012 og Kjötvinnslan á Hvolsvelli hinn 13. mars sl. í kjölfar skoðunar MAST hinn, 29. febrúar sl. Selfoss var áður með ESB leyfi á afurðir úr hrossum og sauðfé og nú bættust afurðir úr nautgripum og svínum við. Hvolsvöllur fékk leyfi fyrir alla þætti starfseminnar." 

Getur verið að það felist mikil tækifæri fyrir íslenskan landbúnað á Evrópumarkaði? Hvað segja bændur nú?

(Leturbreyting, ES-bloggið) 

Noregur/ESB: Samið um makríl

Á mbl.is segir: "Evrópusambandið og Noregur hafa samið um makrílkvóta sín á milli það sem eftir er af þessu ári samkvæmt fréttavefnum Fishupdate.com. Samningar þess efnis voru gerðir í kjölfar þess að ekki náðist að semja um skiptingu makrílstofnsins í Norður-Atlantshafi á milli ESB, Noregs, Íslands og Færeyja á fundi sem fram fór í Reykjavík í janúar síðastliðnum.

Samkvæmt samkomulaginu fær ESB samtals kvóta upp á rúmlega 396 þúsund tonn og er í samræmi við fyrri samninga á milli sambandsins og Noregs um skiptingu makrílkvótans. Haft er eftir sjávarútvegsráðherra Noregs, Elizabeth Berg-Hansen, í fréttinni að hún sé ánægð með samkomulagið."  Hvað segja Íslendingar nú?

Öll fréttin 

Jóhanna vill ræða nýja gjaldmiðil

"Jóhanna Sigurðardóttir forsætisráðherra skorar á forystumenn allra stjórnmálaflokka að koma með opnum huga að því verkefni að undirbúa upptöku nýs gjaldsmiðils á Ísland. Hún kallar eftir þjóðarsátt um lausn á gjaldmiðilsvandanum. Jóhanna segir í aðsendri grein í Fréttablaðinu að þótt gengisskuldir heimilanna minnki hratt hafi fall krónunnar og hækkun verðlags í kjölfarið rýrt kaupmátt svo mjög að tvísýnt er um greiðslugetu stórra hópa af íbúðalánum. Stærsti vandi atvinnulífs og heimila í landinu um þessar mundir sé veikburða króna. Helmingur skulda fyrirtækja í landinu sé í erlendum gjaldmiðlum. Fyrirtæki, sem aðeins hafi tekjur í íslenskum krónum séu illa í stakk búin til að mæta frekara gengissigi." Eyjan sagði frá.

Öll fréttin á Eyjunni

Grein Jóhönnu á www.visir.is

Þröstur Ólafsson um gjaldmiðilsmál í FRBL

Þröstur Ólafsson, hagfræðingur, skrifar grein um gjaldmiðilismál í Fréttablaðið í dag og segir þar í upphafi: 

"Smám saman þrengist umræðan um gjaldmiðilsmál okkar. Flestir málsmetandi menn eru komnir á þá skoðun að ekki verði lifað áfram við íslensku krónuna. Þrátt fyrir gjaldeyrishöft fellur gengi hennar áfram og það styttist í að því gengi verði náð sem erlendir bankar settu á krónuna strax eftir hrunið. Greiningadeild ein spáir því að gengi krónunnar eigi eftir af falla enn umtalsvert næstu árin og óróleiki á gjaldeyrismarkaði muni halda áfram. Þetta segir okkur að þrátt fyrir strangar gjaldeyrishömlur er ekki hægt að halda gengi krónunnar stöðugu. Hún hefur engan grunn til að fóta sig á.

Þessu til viðbótar skulum við muna að á sveimi heima og erlendis eru yfir 400 mrð. IKR — svokallaðar aflandskrónur — sem bíða eftir því að verða breytt í gjaldeyri. Þegar það gerist mun það trauðla róa gjaldeyrismarkaðinn eða hækka gengi krónunnar. Gengi IKR er beintengt inn í vísitöluna og þar með við lán almennings og fyrirtækja. Þessi lán munu því hækka ótæpilega næstu árin um leið og greiðslugeta lántaka rýrnar ört. Þetta myndi þýða stórtæka gjaldtöku á almenning og víðtæk gjaldþrot, til viðbótar því sem þegar er orðið.

Mun örðugra yrði að glíma við þetta síðara hrun en það fyrra, því svigrúmið nú er minna. Hrun krónunnar er borgað af almenningi, sérstaklega þeim sem tekið hafa verðtryggð lán. Sveigjanleiki krónunnar er ekki kostur eins og sumir vilja vera láta, heldur versti bölvaldur almennings. Núverandi gjaldmiðill er stærsti vandi þjóðarinnar. Hann verður ekki leystur nema skipta krónunni út."

Síðan segir Þröstur: "Ef sjálfstæð króna á að eiga framtíð í heimi vaxandi hnattvæðingar og samrunaferlis þjóðríkja í öflugri efnahagsheildir, þyrftum við að umskera starfsgrundvöll fyrrnefndra atvinnuvega, hækka vexti enn frekar og skera niður ríkisútgjöld. Fyrir því er hvorki vilji né geta hjá íslenskum stjórnmálaflokkum. Þetta vita fjölmargir stjórnmálamenn og vilja því hafa gúmmígjaldmiðil áfram sem veltir röngum ákvörðunum þeirra yfir á almenning, án þess að til erfiðra lagasetninga þurfi að koma."

Um upptöku Kanadadollars segir Þröstur: "Upptaka hans myndi leiða til mikils viðskiptakostnaðar, því skipta þarf honum öllum yfir í annan gjaldmiðil í öllum okkar erlendu viðskiptum. Við værum mun betur settir með danska krónu á ný líkt og Færeyingar. Upptaka Kanadadals er víðs fjarri hagsmunum landsins og er aðeins ný, heldur kjánaleg hugmynd til að flýja undan þeim veruleika, sem blasir við." 

Svíar leggja til harðari reglur gagnvart skipulögðum glæpum

Fulltrúi Svía í framkvæmdastjórn ESB, Cecilia Malmström, lagði til síðastiliðinn mánudag að herða beri reglur og aðgerðir gegn skipulögðum glæpasamtökum og leggur það til að reynt verði að finna sárasta blettinn á glæpasamtökunum, þ.e. peningana þeirra:

"We need to hit criminals where it hurts, by going after the money, and we have to get their profits back in to the legal economy, especially in these times of crisis. Law enforcement and judicial authorities must have better tools to follow the money trail. They also need greater means with which to recover a more significant proportion of criminal assets," said Cecilia Malmström, Commissioner for Home Affairs."

Samkvæmt skýrslu frá SÞ velti skipulögð glæpastarfsemi um 2.3 trilljónum dollara árið 2009, eða um 3.6% af þjóðarframleiðslu á heimsvísu það árið.