Á móti internetinu?

"Að vera á móti evrunni er eins og að vera á móti internetinu!" sagði finnski utanríkisráðherran á norrænni ráðstefnu um Evrópumál í Osló fyrr á þessu ári. Þetta kemur fram í grein Eddu Rósar Karlsdóttur, hagfræðings og forstöðumanns greiningardeildar Landsbankans, sem skrifar mjög beinskeitta grein í ,,Markaðinn" fylgirit Fréttablaðsins í gær. Þar talar hún mjög opinskátt um erfiða stöðu íslensku krónunnar og segir meðal annars:

Hafa þarf í huga að sumir af helstu kostum krónunnar eru ekki þeir sömu og áður. Meðal mikilvægustu raka fyrir sjálfstæðri mynt er að hún getur hjálpað ef stóráföll dynja yfir. Dæmi um slík áföll væri hrun fiskistofna eða náttúruhamfarir sem eyðileggja virkjanir eða önnur framleiðslutæki og kippa þannig stoðunum undan tekjumöguleikum þjóðarinnar. Snörp veiking krónunnar myndi milda mjög afleiðingar slíkra áfalla, með því að bæta samkeppnisstöðu íslenskra fyrirtækja gagnvart erlendum. Nú hafa tímarnir breyst og flest bendir til þess að krónan geti verið sjálfstæð uppspretta stóráfalla. Sviptingar á alþjóðamörkuðum geta valdið gríðarlegum sveiflum í gengi krónunnar og breytt aðgengi fyrirtækja og heimila að fjármagni á einni nóttu. Slíkar sveiflur valda stórskaða. Þær draga þróttinn úr atvinnulífinu, sem aftur kann að draga úr aðgengi Íslands að alþjóðlegum fjármálamörkuðum.

Greinina er hægt að lesa þessari slóð: http://vefblod.visir.is/index.php?s=2056&p=55012

Viðvarandi skammtímavandi

Jón Steindór Valdimarsson, framkvæmdastjóri Samtaka iðnaðarins, skrifar góðan leiðara í nýjasta tölublað fréttabréfs SI. Þar ræðir hann meðal annars um hin sérkennilegu rök andstæðinga aðildar Íslands að Evrópusambandið að aðild sé ekki lausn á skammtímavanda þjóðarinnar. Þetta er kallað í rökfræði ,,afvegaleiðing" (red herring á ensku eða Smoke screen) þar sem andstæðingum er borið á brýn ákveðin skoðun og svo eru færð rök gegn þeirri skoðun.

Við sem teljum að aðild Íslands að Evrópusambandinu sé af hinu góða höfum aldrei haldið því fram að þetta sé skammtímalausn heldur fyrst og fremst langtímalausn á miklum sveiflum í íslensku efnhagslífi. Jón Steindór segir meðal annars í leiðara sínum:

Samtök iðnaðarins hafa alla tíð verið óþreytandi að benda á nauðsyn stöðugleika og jafnvægis. Það sé forsenda þess að geta byggt upp alþjóðlegt og samkeppnishæft atvinnulíf og halda því í landinu. Langt er síðan Samtökin hófu að benda á að með því að skipta um umgjörð efnahags- og gjaldeyris mála skapast skilyrði til þess að vinna bug á þessum viðvarandi vanda. Aðild að Evrópusambandinu og upptaka evru er að mati Samtaka iðnaðarins besta leiðin til þess. Það er ekki nein skyndihugdetta sem orðið hefur til á síðustu mánuðum þegar gefið hefur á bátinn. Aðild að ESB er ekki skyndilausn og hún leysir okkur alls ekki undan því að kunna fótum okkar forráð í efnahagsmálum. Hún er hins vegar upphafið að því að losna undan samfelldum skammtímavanda.

Leiðarann er hægt að lesa á vef Samtaka iðnaðarins.

Úr efnahagsþrengingum í ESB? - Kappræður í HÍ

Mánudaginn 19. maí mun hagfræðideild Háskóla Íslands bjóða til kappræðna um framtíðarstefnu Íslands gagnvart Evrópusambandinu.

"Úr efnahagsþrengingum í ESB?"

Ragnar Arnalds og Þorvaldur Gylfason
Mánudagur 19. maí, 12-13.30
Háskólatorg, Háskóla Íslands, stofa HT- 101

Segja má að þetta sé framhald af fundum Evrópusamtakanna og Heimssýnar á Akureyri og Ísafirði í fyrra en það voru einmitt Þorvaldur Gylfason og Ragnar Arnalds sem rökræddu þessi mál þar.

Jón Baldvin mundar stílvopnið í Evrópuumræðunni

Ágæta áhugafólk um Evrópumál, Jón Baldvin Hannibalsson skrifar sterka grein í Morgunblaðið í dag. Greinilegt er að gamla utanríkisráðherranum er misboðið með leiðaraskrifum Morgunblaðsins að undanförnu og lætur hann leiðarahöfund fá það óþvegið. Eins og Jóns Baldvins er von og vís mundar hann stílvopnið að snilld og segir hann meðal annars:

Er það boðlegt að bera okkur Evrópusinnum á brýn uppgjöf í sjálfstæðisbaráttunni eða vilja til “að afhenda yfirráð yfir auðlindum okkar til embættismanna í Brussel”, þótt við viljum “endurheimta með samtakamætti alþjóðlegs samstarfs þau áhrif, sem hnattvæðingin hefur fyrir löngu svipt hverja ríkisstjórn fyrir sig.” Þetta eru að vísu ekki mín orð. Þetta er orðrétt tilvitnun í leiðara í 24-stundum, aukaútgáfu Morgunblaðsins þann 26. apríl s.l., eftir Ólaf Þ. Stephensen ritstjóra. Og Ólafur bætir við: “Alþjóðlegt samstarf sviptir ríki ekki sjálfstæði sínu, enda geta þau hvenær sem er sagt sig frá því ef þau kjósa það." Við þessi orð væntanlegs eftirmanns núverandi ritstjóra Morgunblaðsins hef ég engu að bæta.

Við mælum með því að lesa þessa grein.

Evrópudagurinn í dag - Samkoma á Hótel Sögu kl.12.00

Í dag er Evrópudagurinn og mikið stendur til hjá Evrópusamtökunum. Í dag kl.12.00-13.30 stöndum við fyrir samkomu á Hótel Sögu í Yale salnum (gamla Skála) og tökum svo þátt í umræðum síðar í dag um öryggismál í Evrópu. Evrópusamtökin munu tilkynna hver hefur hlotið útnefninguna ,,Evrópumaður ársins" fyrir árið 2007. Sérstakur gestur fundarins verður Rina Valeur Rasmussen, framkvæmdastjóri dönsku Evrópusamtakanna. Hún mun fjalla um aukið vægi Evrópuþingsins og hvernig Danir haga sinni pólitík í ljósi þróunarinnar í Evrópu. Í upphafi mun tónlistarmaðurinn Jakob Frímann Magnússon flytja ,,Óð til Evrópu" eins og honum er einum lagið og boðið verður upp á léttan hádegismat.

Síðar í dag taka Evrópusamtökin þátt í áhugaverðri umræðu;

Öryggismál í Evrópu: Er Ísland með?

Málstofa á vegum utanríkisráðuneytisins, Alþjóðamálastofnunar Háskóla Íslands og Evrópusamtakanna, föstudaginn 9. maí frá 15:00 til 16:30 í stofu 101 í Lögbergi

Guðni vekur athygli

Ræða Guðna Ágústssonar formanns Framsóknarflokksins á vorfundi flokksins á laugardaginn og ummæli hans um þjóðatkvæðagreiðslu um Evrópumál hefur vakið töluverða athygli. Baldur Þórhallsson, prófessor við HÍ, skrifaði grein í 24 Stundir í gær og sagði meðal annars

Enn eitt skrefið nær aðildarumsókn að ESB hefur verið stigið. Á ný leiðir gamli bænda- og landsbyggðarflokkurinn Evrópuumræðuna, nú undir forystu Guðna Ágústssonar. Hver hefði trúað því fyrir nokkrum vikum?

Ólafur Stephensen ritstjóri skrifar leiðara um sama mál í dag í 24 Stundir. Hann segir meðal annars:

Tillaga formannsins að leið út úr þeim ógöngum er að halda þjóðaratkvæðagreiðslu um hvort Ísland eigi að sækja um aðild að ESB, og svo verði aðildarsamningurinn lagður fyrir þjóðina í annarri atkvæðagreiðslu. Guðni er fyrsti flokksformaðurinn, sem leggur þetta til, en forystumenn annarra flokka ættu að hafa ástæðu til að skoða tillöguna með opnum huga. Fyrir því eru margar ástæður. Í fyrsta lagi hefur þeirri skoðun vaxið ásmegin undanfarin ár, að ástæða sé til að nýta kosti beins lýðræðis á Íslandi; leyfa almenningi að kjósa beint um stór mál. Eru mörg mál stærri en þetta? Hvorki andstæðingar né fylgismenn ESB-aðildar hafa ástæðu til að leggjast gegn þessari lýðræðislegu leið; þeir hljóta að hafa nægilega trú á málstað sínum og sannfæringarkrafti.

Við minnum líka á Evrópudaginn á morgun föstudag í Yale salnum (gamla Skála) kl.12.00-13.30.

Leiðari fréttablaðsins í dag

Þorsteinn Pálsson ritstjóri Fréttablaðsins skrifar ágætan leiðara í dag um sjávarúvegsstefnu Evrópusambandsins. Þar rekur hann kosti og galla þess fyrir sjávarútveg að Ísland gangi í Evrópusambandið. Í lokin segir hann;

Af þessu má ráða að sameiginlega fiskveiðistefnan og erlend fjárfesting gætu falið í sér ákveðið óhagræði og minniháttar áhættu. Með rökum verða þessi atriði hins vegar ekki metin svo þung á vogarskálunum að þau útiloki aðild að Evrópusambandinu og samkeppnishæfu myntsamfélagi sem er sjávarútveginum ekki síður mikilvægt en öðrum atvinnugreinum.

Við minnum líka á fund Evrópusamtakanna á Hótel Sögu í hádeginu á föstudaginn.

Evrópudagurinn 9. maí

Í tilefni af Evrópudeginum (Schumann deginum) föstudaginn 9. maí halda Evrópusamtökin samkomu á Hótel Sögu frá kl.12.00-13.30. Evrópudagurinn 9 maí er rakinn til svokallaðrar Schuman yfirlýsingar frá árinu 1950. Þann dag klukkan 18:00 lýsti Robert Schuman, þáverandi utanríkisráðherra Frakklands, því yfir að samrunaferli Evrópu væri hafið. Yfirlýsingin leiddi til undirritunar Parísarsáttmálans um kola- og stálbandalag Evrópu um það bil ári síðar. Sex Evrópuþjóðir; Belgía, Frakkland, Holland, Ítalía, Lúxemborg og Þýskaland ákváðu þá að vinna saman að ákveðnum sameiginlegum viðfangsefnum. Síðan hefur samstarf lýðræðisaflanna í Evrópu verið í sífelldri þróun og mótun.

Evrópusamtökin á Íslandi munu þá tilkynna hver hefur hlotið útnefninguna ,,Evrópumaður ársins" fyrir árið 2007. Sérstakur gestur fundarins verður Rina Valeur Rasmussen, framkvæmdastjóri dönsku Evrópusamtakanna. Hún mun fjalla um aukið vægi Evrópuþingsins og hvernig Danir haga sinni pólitík í ljósi þróunarinnar í Evrópu. Í upphafi mun tónlistarmaðurinn Jakob Frímann Magnússon flytja ,,Óð til Evrópu" eins og honum er einum lagið.

Boðið er upp á léttan hádegisverð. Allt áhugafólk um Evrópumál velkomið. Fundurinn er haldinn í samvinnu við Dansk-íslenska félagið á Íslandi.