Lissabon-sáttmálinn gengur í gildi

Á morgun, 1. desember, 2009, tekur Lissabon-sáttmáli ESB, formlega gildi. Í tilefni af því ritar forseti Evrópuþingsins, Jerzuy Buzek, grein í alþjóðaútgáfu Der Spiegel. Þar rekur hann þær umbætur og breytingar sem sáttmálinn hefur fyrir ESB og Evrópu.

Hann segir m.a.:The EU is a Europe based on common values, notably freedom and solidarity. The treaty promotes the Union's values, introducing the Charter of Fundamental Rights into European primary law, ensuring better protection of European citizens. The charter is a guarantee that Union institutions and law cannot violate basic standards of human rights -- European institutions will have to respect them. The charter has the European Union's full support, even though the United Kingdom, Poland and the Czech Republic have all negotiated opt-outs, thus demonstrating the EU's ability to apply flexible arrangements in respect to the sensitivities of individual member states."

Hér má lesa alla greinina

Nei-sinnar í víking til Norjé!

Morgunblaðið birti í gær frétt sem byrjar svona: ,, Í morgun fór sendinefnd níu Íslendinga til Noregs til að taka þátt í aðalfundi Nei til EU í Noregi, en það eru systursamtök Heimssýnar á Íslandi. Í sendinefndinni eru m.a. þrír þingmenn frá jafn mörgum flokkum."

Þeir þingmenn sem um ræðir eru: Ásmundur Einar Daðason (VG), Vigdís Hauksdóttir (Framsókn) og Unnur Brá Konráðsdóttir (S).

Í frétt MBL er einnig sagt: ,,Ísland er eitt meginþema aðalfundarins, sem haldinn er á Gardemoen..."

Sé dagskráin hinsvegar skoðuð er Ísland á dagskrá kl. 14.30-1545 og 16.10-16.30 á laugardeginum. Dagskráin byrjar kl. 06.30 og er til 18.00 þann daginn. Varla getur þetta talist ,,meginþema" ?

Á sunnudeginum er samkvæmt prógrammi ekkert fjallað um Ísland, en þá mun hinsvegar norski Nei-kórinn syngja!

Athyglisvert hlýtur að vera stærð sendinefndar Nei-sinna og af því að við Íslendingar erum alltaf að tala um hina margfrægu höfðatölu, þá væri þetta svona svipað og að Bandaríkjamenn myndu senda nefnd upp á rúmlega átta þúsund (8000) til erindagjörða fyrir sig. Nei-sinnar eru því virkilega GRAND á því um þessar mundir!

ESB og "herinn": Grímur Atlason þreyttur á staðreyndabrenglun

Ein draugasaga sem ætlar að verða lífsseig er sú að Evrópusambandið sé að koma sér upp her.

Grímur Atlason, sveitarstjóri í Dalabyggð (mynd), er skemmtilegur bloggari og kemur víða við í hugleiðingum sínum. Hann fjallaði um þetta mál í nýlegu bloggi sínu. Þar segir hann meðal annars:

,,Tökum dæmi um fullyrðingu sem virðist vera álitin staðreynd á Íslandi: Evrópusambandið er að fara að koma sér upp her - það er eitt helsta markmið Lissabonsáttmálans.

Þessi fullyrðing heldur álíka vel og söguskoðun Hriflujónasar sem sumir - sérstaklega Hádegismóri og forveri hans - álíta enn vera rétta. En er Evrópusambandið að fara koma sér upp her? Svarið er nei. Það er undir ríkjunum sjálfum komið hvort þau taki þátt í afvopnunarverkefnum, friðargæslu, mannúðarverkefnum og björgunarleiðöngrum.

Persónulega hef ég ímugust á hernaðarbrölti hvers konar. En ég hef líka óþol þegar rangfærslur eru meðvitaðar settar fram til að afvegaleiða fólk.  Lissabonsáttmálinn snýst þannig ekkert um stofnun sameiginlegs hers Evrópu.

Þeir sem vilja skoða hvað þessi sáttmáli þýðir geta lesið um hann hér. Heimssýn og aðrir benda án efa á önnur svör – en það er líka bara allt í lagi."

Hægt er að lesa bloggið í heild sinni á þessari slóð:

http://blog.eyjan.is/grimuratlason/2009/11/20/eintona-pip/

 

Jón Bjarnason talar: Hvert tækifæri notað...

Jón Bjarnason, sjávarútvegs og landbúnaðarráðherra hélt ræðu á þingi um strandfiskveiðar í vikunni. Þar notaði hann tækifærið til þess að ítreka andstöðu sína við ESB. Gott og blessað, allir hérlendis vita að Jón Bjarnason er á móti ESB. En Jón vill kannski líka að eins margir útlendingar og hægt er viti þetta einnig.

Það er hinsvegar athyglisvert að skoða ræðu Jóns, en það má gera hér. Sé textinn settur inn í Word kemur í ljós að hún er 2272 orð. Almennt er talið að það taki um eina mínútu að lesa hundrað orð og Jón flutti þetta á ensku. Reiknum því með 1.5 mín per hundrað orð. Ræða Jóns var því rúmur hálftími að lengd. Erfitt er að halda fullri athygli manna í svo langan tíma.

Eins og skrattinn úr sauðaleggnum kemur svo í lokin 218 orða kafli þar sem Jón lætur þá sem enn höfðu fulla athygli vita að hann sé á móti ESB. Þar segir hann meðal annars (á ensku):,,Last summer the Icelandic Parliament, Althingi, decided, to apply for EU membership. The process has already begun, although nobody knows how much time is needed for the negotiations."

Vissulega vita menn ekki upp á hár hvað ferlið tekur langan tíma, en almennt er talið að undir eðlilegum kringumstæðum muni þetta taka 18-24 mánuði, þegar viðræðurnar hefjast. Þetta veit Jón að öllum líkindum fullvel, en lætur þess ógetið.

Og hann hélt áfram: ,,Iceland is a small island situated in the middle of the Atlantic Ocean with just over 300 thousand inhabitants....We can enjoy wide-ranging international cooperation without being tied up in the EU framework. Given these circumstances, it is my firm belief that the future of our country is will be much better off outside European Union than inside."

En bloggara er spurn: Hvernig vill Jón starfa með Evrópu? Hverjar eru hans hugmyndir um tengsl Íslands og Evrópu? Vill hann auka samstarfið við Bandaríkin, Kanada, Kína? Er þá ekki bara betra að segja Ísland frá öllum tengslum við meginland Evrópu, sem kaupir t.d. 70-80% sjávarútvegsafurða okkar og eru málaflokkur Jóns?

Væri ekki nær að reyna að efla enn frekari viðskiptatengsl okkar við Evrópu, lönd og menningu sem við þekkjum og höfum árhundruða reynslu af viðskiptum við?

Stundum er eins og það sé ekki 21.öldin!

Það er fylgst með Íslandi...

Frændur okkar á Norðurlöndunum fylgjast grannt með þróun mála hér á Íslandi. Á krækjunni hér að neðan er að finna rafrænt fréttabréf, gefið út af danska Alþýðusambandinu.

Þar er fjallað um stöðuna í Evrópumálunum á Íslandi og rætt meðal annars við Jón Steindór Valdimarsson framkvæmdastjóra Samtaka iðnaðarins, Eggert Benedikt Guðmundsson framkvæmdastjóra Granda og Bjarna Benediktsson formann Sjálfstæðisflokksins.

Rafbréfið

Mörður "stútar" málflutningi Bjarna Ben!

Um síðustu helgi birtist viðtal við Bjarna Benediktsson, Sjálfstæðisformann, í Fréttablaðinu undir fyrirsögninni ,,ESB-ríkin vilja stúta EES" Þar lýsir BB yfir þeirri furðu sinni að Ísland fái ekki að taka upp Evruna í skjóli EES-samningsins. Mörður Árnason gerir þetta (viðtal) að umfjöllunarefni í pistli á www.herdubreid.is og segir m.a.: ,,Bjarni Benediktsson hefur nú komist að því að hið mikla ESB-veldi hafi vígbúist og gert árás … á EES.

Þetta segir hann okkur í Fréttablaði dagsins, og árásin felst í því að Evrópusambandið skuli ekki fyrir lifandis löngu hafa boðið EES-ríkjunum að ganga í myntbandalagið og taka upp evru. Það sé nánast rof á EES-samningunum.

Evran var frá upphafi bundin við ríki Evrópusambandsins og byggist á sameiginlegum ákvörðunum þeirra um efnahagsmál, þar á meðal stöðu ríkissjóðs hvers og eins ríkis í myndbandalaginu (sem þeim gengur sjálfum nógu illa að stilla af!). Þessar sameiginlegu ákvarðanir og hið sameiginlega stjórnkerfi sem þeim fylgir með deildu fullveldi í peningamálum, og líkamnast í Seðlabanka Evrópu, er grundvöllur evrusamstarfsins. Þeir sem vilja uppskera, þeir þurfa líka að sá.

Undanfarin ár – líka fyrir hrun – hefur verið hlaupin hver atrennan af annarri hér heima við að fá evru án þes að ganga í Evrópusambandið, en þær hafa allar fjarað út á þessu einfalda atriði: Evran er gjaldmiðill Evrópusambandsríkjanna í myntsamstarfinu. Ekki annarra."

Öll færsla Marðar er hér

Ps. Bjarni sagði líka: ,,Ég er Evrópusinni og við erum hluti af þessari Evrópufjölskyldu."

Heyr, heyr!

Aðildarviðræður að hluta til hérlendis

Í fyrsta sinn munu aðildarviðræður við ESB fara að hluta til fram í umsóknarlandinu, í þessu tilfelli Íslandi. Þessu skýrði RÚV frá í dag og hafði eftir Össuri Skarphéðinssyni, utanríkisráðherra. Þessi hluti mun ná yfir þá kafla sem snúa að EES-samningnum. M.a. er þetta gert til þess að draga úr kostnaði við aðildarviðræðurnar, sem og að gefa fulltrúum ESB færi á að kynnast betur aðstæðum hérlendis.

Frétt RÚV

Guðmundur Gunnarsson bloggar

Guðmundur Gunnarsson, Eyjubloggari, skrifar ágætan pistil þar í dag. Þar veltir hann fyrir sér m.a. siðferðinu í íslenskum stjórnmálum. En hann kemur líka inn á Evrópumálin og segir þar: ,,Við búum við lítið hagkerfi, örmynt sem einstaklingar sem hafa aðgang að fjármagni spila á. Það blasir við að öll stærri fyrirtæki verða að flytja höfuðstöðvar sínar erlendis og taka upp Evru. Einhliða upptaka erlenda gjaldmiðils er ekki raunhæfur kostur og því eru aðildarviðræður við ESB eina leiðin til aukins trúverðugleika og trausts og þá verða íslenskir stjórnmálamenn að fara að haga sér eins og kollegar þeirra í nágrannalöndum okkar." (Mynd: DV)

Pistill Guðmundar í heild sinni

Valur Ingimundarson í Krossgötum

Krossgötur Hjálmars Sveinssonar er yfirleitt með afar athyglisvert efni og á síðasta laugardag var fyrsti gestur þáttarins Dr. Valur Ingimundarson, sagnfræðingur. Hann og Hjálmar ræddu m.a ,,sannleiksnefndir", alþjóðamál, viðbrögð við hruni, stöðu íslands í samfélagi þjóðanna o.s.frv. Óhætt er að mæla með þessu spjalli þeirra félaga, en það er að finna hér

Af dalamönnum (og öðrum mönnum)

Styrmir Gunnarsson(mynd), fyrrum ritstjórarefur Moggans, hefur mikið verið í kastljósi fjölmiðla upp á síðkastið, eða síðan bók hans UMSÁTRIÐ kom út. Þar fjallar hann um ýmis málefni, hrun, fjölmiðla, lýðræði o.s.frv. Styrmir er líka, eins og kunnugt er orðinn fastapenni hjá Mogganum. ,,Það er engin leið að hætta,” eins og segir í laginu.

Í síðasta pistli Styrmis segir af dalamanninum og nýjum formanni samtaka Nei-sinna á Íslandi, Ásmundi Einari Daðasyni, en ÁED segist ætla að gera Samfylkingunni lífið leitt sem sem formaður Nei-sinna. Það þýðir með öðrum orðum að hann ætlar að vera leiðinlegur við Samfylkinguna. Bloggari hélt að Dalamenn væru þekktir fyrir að vera skemmtilegir, en það er kannski liðin tíð.

Almenn leiðindi eru því það sem Samfylkingarfólk má því búast við af dalamanninum Ásmundi Einari!

En orðrétt segir Styrmir í pistli sínum: ,, Nú er kominn fram á sjónarsviðið nýr pólitískur foringi á þeirra vettvangi, sem ástæða er til að fylgjast vel með á næstu árum, þar sem er bóndinn úr Dölum. Maður, sem augljóslega er tilbúinn til að berjast fyrir pólitískri sannfæringu sinni. Þetta er Samfylkingarmönnum auðvitað ljóst og þess vegna gera þeir tilraun til að stoppa hann af. En í þeirri tilraun opinbera þeir afstöðu til lýðræðislegra skoðanaskipta, sem er engum stjórnmálaflokki sæmandi.

Þessi viðbrögð við kjöri Ásmundar Einars Daðasonar til formennsku í Heimssýn boða ekkert gott þegar horft er til væntanlegra samningaviðræðna við ESB. Í stjórnarsáttmálanum er lofað gagnsæi í stjórnsýslu. Það eru meiri líkur en minni á, að í framkvæmd verði reynt að halda frá þjóðinni öllum upplýsingum sem máli skipta um gang samningaviðræðna. Þar hljóta Vinstri grænir að láta til sín taka og tryggja, að almenningur á Íslandi fái samstundis aðgang að öllum upplýsingum um gang samningaviðræðna. Í þeim efnum verða aðrir að reiða sig á þá. Það er komin of löng reynsla af því að Samfylkingin segi eitt en geri annað.”

Hér setur Styrmir s.s. fram þá tilgátu sína að hætti þeirra sem lifa og hrærast í heimi samsæriskenninga, að Samfylkingin muni reyna eftir fremsta megni að halda frá þjóðinni ,,öllum upplýsingum sem máli skipta...”

En það er rétt að benda Styrmi á að fram hafa komið kröfur um hið gagnstæða, m.a. frá ungum Evrópusinnum um að ferlið verði allt opið og gegnsætt. Fullyrða má að það gildi einnig um aðra Evrópusinna.

Svo má spyrja í lokin, hvort var það ,,prívatpersónan” Styrmir Gunnarsson eða stjórnarmaður í Heimssýn, samtökum Nei-sinna á Íslandi, sem var að skrifa í helgarblað Moggadoggans?