Erum við öll Norðmenn inn við beinið?

Um tíma var hér á landi uppi sú hugmynd að Íslendingar gætu tekið upp norska krónu eins eins og að drekka fjallavatn. Það merkilega er að þessi hugmynd er ekki alveg dauð, nema frá hendi Norðmanna sjálfra, sem grófu hana með rösklegum hætti.

Hugmyndin gengur aftur á hinum hægri og NEI-sinnaða fréttavef AMX, í formi greinar eftir höfund, sem kynnir sig svona: Ágúst Þórhallsson, hdl., MBA starfrækir einkahlutafélagið M10 sem er fyrirtækjaráðgjöf og lögmannsstofa. Ágúst lauk MBA prófi frá Edinburgh Business Scool árið 2006 með sérstaka áherslu á sögu fjármálamarkaða.

Í greininni, sem ber hina sérkennilegu yfirskrift; Svartur almúginn vill tengjast Noregi, segir hann meðal annars:

"Það hefur vakið athygli mína í viðræðum við hinn „hefðbundna“ Íslending undanfarna mánuði að hugmyndin um að taka hér upp norska krónu og mynda nánari tengsl við Noreg á mjög upp á pallborðið. Satt að segja hef ég hitt mjög fáa íslendinga sem finnst þessi hugmynd ekki skynsöm og mjög margir eru jafnvel tilbúnir að fórna hluta af sjálfstæði þjóðarinnar í skiptum fyrir öryggi um mannsæmandi líf í framtíðinni."

Bloggari veit bara að hann er ekki tilbúinn til að fórna (hluta af) sjálfstæðinu, til að bindast Norðmönnum og Noregi einhverskonar böndum. Hvað gera Norskir þegar olían fer að minnka? Hver er "þyngd" Norðmanna/Noregs í alþjóðakerfinu?

Svo kemur Ágúst með ellefu tillögur sem margar hverjar eru vægast sagt kúnstugar og án allra frekari útfærslna.

Gaman væri að sjá í könnun hver margir myndu vilja ganga í bandalag við Noreg. Hvað gæti slíkt slíkt bandalag heitið? ÍNN? Ísland nær Noregi?

Ísland og ESB - Jón Baldvin

Vert er að benda lesendum á nýjustu gein Jóns Baldvins Hannibalssonar, sem heitir einfaldlega Ísland og Evrópusambandið. Í greininni fer JBH yfir "sviðið" og þá þróun mála sem átt sér stað hér á landi á undanförnum árum. Þá kemur hann með tillögur að lausn þess mikla vanda sem Ísland glímir við. Greining birtist í Fréttablaðinu sem og á heimasíðu Jóns Baldvins

Jákvætt frá Þýskalandi og Frakklandi

Pressan.is birtir frétt um óvænta efnahagslega þróun í Þýskalandi og Frakklandi, en þar er nú orðinn jákvæður hagvöxtur, nokkuð sem menn reiknuðu ekki með. Er Evrópumótorinn að fara almennilega í gang? Hér er fréttin

Er Ísland of lítið?

Þessar spurningar spyr Þorvaldur Gylfason í grein í Fréttablaðinu í dag. Þar segir hann meðal annars: "Íslendingar tóku rétta ákvörðun í sjálfstæðismálinu á sínum tíma. Engin efnahagsáföll munu nokkurn tímann raska þeirri niðurstöðu. Mannfæð þarf ekki að standa í vegi fyrir skilvirku fullveldi, hagvexti og velferð, sé vel á málum haldið, þótt færa megi rök að því, líkt og Einar Benediktsson gerði, að fleira fólk myndi lyfta landinu. Aðild að ESB stefnir að stækkun Íslands."

Öll greinin

Grimmdarverk í Téténíu fordæmd af ESB

"Evrópusambandið fordæmir morð á yfirmanni líknarsamtaka ungmenna í Tsjetsjeníu og krefst þess að stjórnvöld í Moskvu rannsaki málið og refsi þeim seku. Zarema Sadulajeva og eiginmaður hennar, Alik Dzhabrajlov, ráku líknarsamtökin Björgum nýju kynslóðinni í Grosníj."

Svo byrjar frétt RÚV nýjasta ódæðisverkið í Téténíu, en spenna hefur aukist að undanförnu í S-Rússlandi og Kákasus-svæðinu. Grimmileg átök geisuðu á svæðinu frá 1994-2000.

Margir hafa bendlað Ramzan Kadyrov, leiðtoga Téténíu, við þessi grimmdarverk, en hann er fyrrum skæruliði, sem snerist á sveif með Rússum. Hann rekur einkaher sem talinn er vera ábyrgur fyrir mannshvörfum og öðrum ódæðisverkum á svæðinu.

ESB hvetur Rússa til þess að standa vörð um mannréttindi í Téténíu.

Einnig má lesa um þetta mál hér

Formaður finnskra bænda í RÚV

Sjónavarpið/RÚV birti í kvöld viðtal við formann finnsku bændasamtakanna, Juha Martilla, en finnskir bændur hafa verið fyirferðamiklir í landbúnaðarumræðunni hér á landi. Að vísu klikkaði textavélin í viðtalinu, en formaðurinn byrjaði á að segja að í upphafi hafi um 90% bænda verið andsnúnir ESB. Það hefði hinsvegar breyst og jákvæðni finnskra bænda gagnvart ESB hefur aukist til muna.

Viðtalið: http://dagskra.ruv.is/sjonvarpid/4467324/2009/08/12/10/

Bjart er yfir Sumarhúsum!

Í laugardagsblaði MBL birtist opnuviðtal við íslenskan bónda, Þorgrím E. Guðbjartsson, bónda, sveitastjórnarmann og VG-liðsmann. Það var áhugavert, kannski sérstaklega í ljósi stöðu hans sem bónda. Í viðtalinu segir hann frá fjölskylduaðstæðum, hvernig búskapurinn gangi. Athyglisverðast er kannski þegar hann segir: "Búskapurinn stendur undir rekstri búsins en litlum sem engum fjárfestingum."

Er hér komin staða margra íslenskra bænda í hnotskurn? Hversvegna er þetta svona? Gæti það verið vegna mikillar skuldabyrði, hárra vaxta, mikils kostnaðar við aðföng, áburð og þess háttar? Þetta rúllar, en ekki mikið meira en það, framþróun virðist samkvæmt þessum orðum hans sjálfs vera lítil sem engin! Þrátt fyrir massíva ríkisstyrki! 

Þorgrímur ræðir síðan ESB og segist ekki hafa neina trú á því. "Við Íslendingar erum ekki sambandssinnar, við fórnuðum meira að segja Samvinnuhreyfingunni. Við erum einyrkjar og viljum fá að vera í friði með okkar...Við flúðum hingað út á ballarhaf til að fá frið og geta verið kóngar, hver í sínu horni."

Bloggara er spurn: Hefur möguleg ESB-aðild eitthvað með Samvinnuhreyfinguna að gera? Var ekki hlutverki þeirrar ágætu hreyfingar lokið vegna breyttra aðstæðna í (alþjóða)umhverfinu, sem og hér heima?

Og vilja allir vera einyrkjar, er það víst? Þetta með smákóngana getur bloggari fallist á, en er það kostur?

Fyrr í viðtalinu segir Þorgrímur: "Ég held að fáum dyljist að ég er Bjartur í Sumarhúsum. Ég fer mínar eigin leiðir bæði í búskap og lífinu sjálfu...Ég veit að það eru ekki margir bændur sem hafa það gott af búskapnum eingöngu."

Er þetta eftirsóknarvert hlutskipti? Er þetta ekki frekar döpur lýsing á íslenskum landbúnaði? Er þetta landbúnaðurinn sem á að tryggja fæðuöryggi þjóðarinnar í framtíðinni? 

 

ESB fordæmir herforingjaklíku Myanmar (Búrma)

ESB fordæmir harðlega nýjan 18 mánaða fangelsisdóm sem Aung San Suu Kyi, leiðtogi stjórnarandstöðunnar í Myanmar, eða Búrma, fékk í vikunni. Dómurinn er tilkominn vegna afar sérkennilegrar sundferðar Bandaríkjamanns nokkurs, að heimili hennar. Kyy hleypti manninum í land og fékk fyrir það 18 mánaða fangelsisvist, að vísu í stofufangelsi. Í slíku "fangelsi" hefur hún verið í 14 ár. ESB fordæmir þennan dóm og leggur til hertar refsiaðgerðir gegn herforingjaklíku Myanmar, sem heldur landinu í heljargreipum og kúgar landsmenn.

Í tilkynningu frá Fredrik Reinfelt, forsætisráðherra Svía, sem fara nú með formennsku í ESB, er þess krafist að Aung San Suu Kyi, verði sleppt.

Fangelsisdómurinn kemur að öllum líkindum í veg fyrir að Kyy geti tekið þátt í kosningum, sem fram eiga að fara í landinu á næsta ári. Hún fékk friðarverðlaun Nóbels árið 1991.

Nánar: http://euobserver.com/9/28542

Uppfærsla 13.8: ESB eykur aðgerðir gegn Myanmar

http://news.bbc.co.uk/2/hi/asia-pacific/8199732.stm

Jákvæð teikn frá Lettlandi

Svo viðist sem botninum sé náð í efnahag Lettlands. Þjóðarframleiðslan dróst minna saman á fyrsta. ársfjórðungi en menn héldu. Samdrátturinn var þó mikill, eða um 18%. Landið hefur fengið stuðning frá ESB, Svíum og IMF. Peningarnir sem Lettar hafa fengið eiga samkvæmt samkomulagi við lánaaðila að fari í að fjármagna fjárlög landsins og að styðja við fjármálakerfi þess. Nú eru taldar minni líkur en meiri á því að Lettland þurfi að fella gengi latsins, en svo heitir gjaldmiðillinn. Stjórnvöld í Lettlandi einbeita sér að kostnaðaraðhaldi, en ekki skattahækkunum, til að glíma við vandann.

Heimildir: DN, SVD.

Stuðningur ESB í fjármálakrísunni

Evrópusambandið hefur veitt miklum fjármunum til stuðnings aðildarríkjanna í fjármálakreppunni. Nemur stuðningurinn alls um 33% af heildarþjóðarframleiðslu landanna 27. Árið 2008 var sú upphæð um 18.400 milljarðar dollara.  EuObserver greinir frá þessu.

Meðal annars hefur ESB veitt um 313 milljörðum evra í beinan stuðning til bankakerfa ýmissa aðildarríkja frá því í október á síðasta ári.

Þekktir Nei-sinnar hafa hamrað á því að ESB hafi gert lítið sem ekkert til að styðja aðildarríkin, en sú er ekki raunin.