Norðurlandaþjóðirna á topppnum varðandi nýsköpun í ESB

Svíar, Danir og Finnar eru á toppnum varðandi nýsköpun innan ESB, samkvæmt gögnum sem birt voru fyrir skömmu og sagt er frá á vefsíðunni Euractiv.com.

Bandaríkin og Japan leiða á heimsvísu varðandi nýsköpun og þar á eftir kemur ESB. Lönd eins og Indland og Kína sækja á og Brasilía er einnig að koma sterkt inn.

Í áætlun sem ber heitið "Evrópa 2020" eru lagðar línur varðandi nýsköpun og grænan hagvöxt til framtíðar, en einnig er núna rætt um að koma á fót því sem kallað hefur verið "Innri markaður þekkingar, rannsókna og nýsköpunar" fyrir árið 2014.

Frétt Euractiv

ESB býður fram tæknilega aðstoð við afnám gjaldeyrishafta - Árni Páll Árnason, efnahags og viðskiptaráðherra: "Mikilvægur áfangi"

Síðdegis kom fram í fjölmiðlum að ESB er reiðubúið að aðstoða við afnám gjaldeyrishafta á þessu ári, en Íslendingar hafa jú búið við gjaldmiðil í höftum undanfarin misseri.

Á RÚV segir: "Olli Rehn framkvæmdastjóri efnahagsmála ESB lofaði aðstoð ESB við að afnema gjaldeyrishöft á Íslandi á fundi sínum með Árna Páli Árnasyni efnahags - og viðskiptaráðherra fyrr í dag. Ekki hefur verið útfært í hverju aðstoðin felst en sérfræðingar ESB eru væntanlegir hingað til lands í mars og þá verður aðstoðin skýrð nánar." 

Á www.visir.is segir: "Þá sagði Árni Páll það vera eitt lykilmarkmið umsóknar Íslands um aðild að Evrópusambandinu að fá aðild að Evrópska myntbandalaginu og taka upp evru sem gjaldmiðil. Hann fagnaði stuðningi Olli við stefnu stjórnvalda um afnám gjaldeyrishafta og tilboði hans um tæknilega aðstoð í þeim efnum." 

Á Eyjunni segir: "“Þetta er mikilvægur áfangi,” segir Árni Páll Árnason í samtali við Eyjuna. “Við höfum leitað eftir stuðningi við verðmyndun á krónunni, sem skiptir miklu fyrir trúverðugleika á alþjóðamarkaði þegar höftunum verður létt. Samstarf við ESB einsog Rehn býður uppá vísar til mögulegrar upptöku evru í framhaldinu. Nú á eftir að útfæra hvernig það verður gert, en það skiptir miklu máli að markaðir hafi trú á að krónan byggi á sterkari stoðum og að gjaldeyrishöftin séu hugsuð með mögulega upptöku evru í framhaldinu.” 

Morgunblaðið fjallar einnig um málið og þar segir: "Olli Rehn, sem fer með viðskipta- og peningamál í framkvæmdatjórn Evrópusambandsins, sagði á blaðamannafundi í Brussel í dag að ESB væri reiðubúið til að veita Íslandi tæknilega aðstoð við að aflétta gjaldeyrishöftunum.

„Það er mjög mikilvægt að íslenska ríkisstjórnin er að undirbúa áætlun um að aflétta gjaldeyrishöftunum," hefur Bloomberg fréttastofan eftir Rehn. „Við erum reiðubúin til að veita tæknilega aðstoð við þessa vinnu."

Myndband frá vef framkvæmdastjórnar ESB af fréttamannafundi.

 

 

Formaður Evrópusamtakanna í MBL: Er Evrópusambandið ólýðræðislegt bákn?

Andrés Pétursson, formaður Evrópusamtakanna birtir grein í Morgunblaðinu í dag undir fyrirsögninni:Er Evrópusambandið ólýðræðislegt bákn?   Greinin birtist hér í heild sinni, en þess má geta að Frosti Sigurjónsson er fyrrverandi formaður samtaka Nei-sinna á Íslandi, Heimssýnar.

Margt er skrifað og skrafað um Evrópusambandið. Er það í sjálfu sér vel. Umræðan er nauðsynleg og vaxandi sem einungis er til þess fallið að efla þá upplýsingamiðlun sem fara þarf fram um sambandið og eðli þess.

Í því samhengi er mikilvægt að allir sem að málum koma leitist við að gæta nákvæmni í því sem fram er borið. Fólkið í landinu gerir kröfu til þess. Vonandi mun væntanleg upplýsingamiðlun á vegum Alþingis styrkja þennan þátt.

Því miður verður að segjast að grein Frosta Sigurjónssonar , eins af forystumönnum Nei-hreyfingarinnar á Íslandi, sem nokkuð hefur verið vísað til á sumum vefritum og ber yfirskriftina “Evrópusambandið er ólýðræðislegt bákn”, fellur í þann flokk að vera einstaklega ónákvæm og fara í besta falli frjálslega með staðreyndir. Það má að sjálfsögðu öllum vera ljóst að nákvæmni í þessu sambandi þjónar ekki skoðunum höfundarins.
Til upplýsingar fyrir landsmenn alla þá kýs ég að svara hér lið fyrir lið þeim rangfærslum sem grein Frosta inniheldur:

1. Lagasetning í Evrópusambandinu eru í höndum framkvæmdastjórnarinnar. Þetta er rangt. Lagasetningarvald er í höndum ráðherra 27 aðildarríkja ESB og Evrópuþingsins sem skipað er þingmönnum sem kosnir eru af íbúum aðildarríkja í beinum kosningum. Líkt og er t.d. hér á landi þá ákveða ráðherrarnir 27 og þingið oft og tíðum að heimila framkvæmdastjórn að setja tæknilegar reglur um framkvæmd lagasetningar innan ramma sem ráðherrar og þing hafa sett.
2. Þrískipting valdsins er ekki til staðar. Þetta er rangt. Löggjafarvald er í höndum ráðherraráðs og Evrópuþings, dómsvald í höndum dómsstóla ESB og framkvæmdavald í höndum framkvæmdastjórnar ESB sem stjórnað er af fulltrúum allra aðildarríkjanna.
3. Þingið getur ekki gert breytingar á lagafrumvörpum. Þetta er rangt. Evrópuþingið í takt við vaxandi hlutverk sitt gerir í sífellt vaxandi mæli breytingar á tillögum framkvæmdastjórnar ESB og ráðherraráðsins um nýja löggjöf. Dæmi eru um að þingið setji þessum tveimur stofnunum stólinn fyrir dyrnar. Aðildarríki ESB hafa falið Evrópuþinginu aukin völd í þessu tilliti einmitt til að auka lýðræði í Evrópusamvinnunni.
4. Í Brussel eru flestar ákvarðanir teknar af embættismönnum en ekki lýðræðislega kjörnum fulltrúum. Embættismenn í Brussel taka þær ákvarðanir sem ráðherraráð og Evrópuþing, lýðræðislega kjörnir fulltrúar aðildarríkjanna, hafa falið þeim að taka. Embættismenn hafa ekki lagasetningarvald.
5. Framkvæmdastjórn ESB lagði fram nýjan sáttmála um Lissabon eftir að kjósendur í Evrópu höfðu hafnað stjórnarskránni. Þetta er rangt. Stjórnarskrársáttmálanum var hafnað í í Frakklandi og Hollandi. Hann kom til atkvæða í meirihluta aðildarríkja, sumsstaðar í þjóðaratkvæði, og var samþykktur. Aðildarríkin (ekki framkvæmdastjórnin) ákváðu síðar að umbreyta stjórnarskrársáttmálanum í nýjan sáttmála sem gekk til atkvæða en var felldur á Írlandi. Ákveðið var í framhaldinu af öllum aðildarríkjum að taka tillit til tilgreindra vandamála sem írskir kjósendur gáfu til kynna og mun sáttmálanum verða breytt til samræmis. Er það ekki einmitt svona sem lýðræðið virkar best; það er komið til móts við vilja kjósenda?
6. Evrópuþingið er áhrifalaust. Það er í raun framkvæmdastjórnin sem hefur löggjafarvaldið. Það er með ólíkindum að einstaklingur sem framarlega stendur í umræðu um kosti og galla aðildar að ESB skuli bera þetta á borð. Það er öllum ljóst sem vilja kynna sér það að það eru 27 ráðherrar aðildarríkja ESB (allir með lýðræðislegt umboð sinna aðildarríkja) og Evrópuþingið (hver einasti þingmaður kosinn beini kosningu af borgurum ESB) sem fara með þetta vald. Framkvæmdastjórn ESB hefur ekkert annað vald en að setja tæknilegar reglur sem ráðherrar og þing hafa falið þeim að setja; líkt og þegar Alþingi felur ráðherrum að setja reglugerðir.

Um sumt má taka undir með Frosta eins og mikilvægi þess að gera ESB enn opnara og auka sem mest áhrif borgara sambandsins á starfsemi þess svo sem með því að geta með auðveldum hætti náð því fram að sambandið taki mál til umfjöllunar. Það á að vera markmið allra aðildarríkja og þeirra ríkja sem sækja um aðild að sambandinu að efla enn frekar lýðræðislega þætti í starfsháttum þess. Það hefur einmitt verið eitt helsta áherslumál Norðurlandanna innan ESB að auka gagnsæi og lýðræði í Evrópusambandinu.

Að lokum skal ítrekuð sú ábyrgð allra sem taka þátt í umræðum um kosti og galla Evrópusambandsins að þeir haldi sig í betri nálægð við sannleikann en Frosti kýs að gera í sinni grein.

MBL, 7.2.2011.

Ólafur Stephensen í FRBL um matvælaverð og umræðu því tengdu

Ólafur Þ. Stephensen, ritstjóri Fréttablaðsins, gerir matvælaverð að umtalsefni í leiðara í dag, þetta þetta tengist líka ESB-málinu á þann hátt að talið er að matvælaverð getir lækkað umtalsvert við aðild. Ólafur skrifar:

"Erna Hauksdóttir, framkvæmdastjóri Samtaka ferðaþjónustunnar (SAF), vakti í síðustu viku hér í Fréttablaðinu máls á fyrirvörum samtakanna við stefnu stjórnvalda í aðildarviðræðunum við Evrópusambandið, þar sem markmiðið er sagt vera að raska stuðningi við landbúnaðinn sem allra minnst.

Erna benti þannig á að yrði ekki dregið úr hinum gífurlega háu tollum, sem lagðir eru á erlendar búvörur, myndi matarverð ekkert lækka. Engir tollar eru á viðskiptum með vörur á milli ríkja ESB. Í kjölfar aðildar Svíþjóðar og Finnlands að sambandinu fyrir hálfum öðrum áratug lækkaði matarverð umtalsvert. Lækkun matarverðs er hagur greinar á borð við ferðaþjónustuna, sem vill geta boðið ferðamönnum upp á ódýrari mat og er að sjálfsögðu einnig hagur hins almenna neytanda.
Haraldur Benediktsson, formaður Bændasamtakanna, sagði í Fréttablaðinu á laugardag að tollverndin væri þvert á móti hagsmunamál fyrir neytendur. Án hennar hefðu bændur og aðrir aðilar á markaði hækkað verð til neytenda um sextíu prósent, í takt við hækkanir á innfluttum vörum þegar krónan féll 2008.

Við þessa röksemdafærslu er eitt og annað að athuga. Haraldur gefur sér væntanlega að ef ofurtollanna hefði ekki notið við, hefðu erlendar búvörur náð hér umtalsverðri markaðshlutdeild og veitt innlendri búvöru raunverulega samkeppni. Um leið og þær hefðu hækkað í verði, hefði svigrúm innlendra framleiðenda til að hækka verðið hjá sér aukizt. Þetta getur verið rétt, ef menn horfa á mjög þröngan tímaramma, en um leið er þá horft framhjá þeim hag, sem neytendur hefðu haft til lengri tíma af ódýrum innflutningi og þeirri samkeppni, sem hann hefði veitt innlendri búvöru. Og eins mætti segja að niðurfelling tolla nú gæti tekið til baka umtalsverðan hluta þeirrar kjaraskerðingar, sem neytendur urðu fyrir við fall krónunnar."

Allur leiðari Ólafs 

Fundaröð um samningaferlið gagnvart ESB hjá Mími - öllum opið!

Á www.mimir.is segir: 

"Fræðandi fundaröð um samningaferlið vegna aðildarumsóknar Íslands að ESB. Aðalsamningamaður Íslands og fulltrúar úr samningahópum munu skýra frá ferlinu og kynna helstu málaflokka í viðræðum Íslands og ESB. Fundirnir verða haldnir í Ofanleiti 2 á Þriðjudögum frá kl. 20:00 til 21:15. Dagskrá 8. febrúar Almennt um samningaferlið og verkefnin framundan Stefán Haukur Jóhannesson, aðalsamningamaður Íslands í samningaviðræðum við ESB. 15. febrúar Sjávarútvegsmál Ævar Rafn Björnsson, lögfræðingur og starfsmaður samningahóps um sjávarútvegsmál. 22. febrúar Landbúnaður Harald Aspelund, varaformaður samningahóps um landbúna›armál. 1. mars Byggðamál Ragnheiður Elfa þorsteinsdóttir, formaður samningahóps um byggða- og sveitastjórnamál. 8. mars Gjaldmiðilsmál Ólafur Sigurðsson, fulltrúi í samningahópi um gjaldmiðilsmál."

Krækja á fundaröðina

Tilkynningin hjá Mími 

70% frá síðustu öld?

Þegar fjallað er um sögu er hægt að fara með það fyrirbæri á ýmsan hátt; það er hægt að falsa söguna, það er hægt að segja "hálf-sannleika" og bjaga söguna á ýmsan hátt, það er hægt að draga úr og ýkja. 

SAGAN er full af dæmum um þetta og hægt í þessu samhengi að benda á mjög skemmtilega bók sem fjallar um þetta, THE USES AND ABUSES OF HISTORY. 

Í þessu samhengi er áhugavert að lesa síðasta leiðara Morgunblaðsins um ESB og Evruna, sem birtist í gær. Þar segir í byrjun: "Þýska vikuritið Der Spiegel sem er áhugavert rit hefur oftast verið mjög eindregið í stuðningi sínum við evruna, eins og reyndar drýgstur hluti hinnar þýsku pressu. Hún hefur nær öll fylgt stjórnmálalegum rétttrúnaði í því og þess vegna verið mjög á skjön við afstöðu þýsku þjóðarinnar.  En nýjustu kannanir sýna að um 70 prósent Þjóðverja vilja nú markið aftur og evruna á bak og burt.  (Leturbreyting ES-bloggið)

Takið eftir þessu síðasta: Notað er orðið "kannanir" en ekki hefur Morgunblaðið fyrir því að segja hvaðan þessar kannanir eru fengnar.

Þetta má hinsvegar lesa í The Daily Mail frá því í desember í fyrra: 

"The latest poll for the ARD TV broadcaster also showed that 66 percent of Germans fear that the current financial crisis will torpedo their savings.

While 57 percent want the D-mark back, only 32 percent said they found anything positive about the common currency.

The last euro survey earlier in the year - before Greece and Ireland meltdowns - showed 51 percent wanting the mark back.

And seventy five percent believe that it is the financial markets and not the politicians who will decide the eventual fate of the troubled euro.

This is the highest percentage of Germans wanting the D-mark to return since several polls in the 1990's showed close to 70 percent of them wanted to retain the currency of the 'economic miracle."

Hér kemur fram að samkvæmt nýlegri könnun ARD sjónvarpsstöðvarinnar eru 57% sem vilja þýska markið aftur og er þetta það hæsta síðan kannanir á 9.áratugnum (!) sýndu að 70% vildu fá markið aftur (eða halda því, þar sem þetta voru sennilega kannanir áður en Evran var formlega tekin í notkun). Þetta er því langt frá því að vera 70% í nýrri könnun ARD, skeikar bara 13%!

Og þá vaknar spurningin: Eru þau 70% sem Morgunblaðið talar um sem "nýjustu kannanir" virkilega einhvertímann frá síðustu öld? Er söguleg nákvæmni Morgunblaðsins ekki meiri en þetta?

Í annarri frétt um sömu könnun segir svo þetta: "A large majority of Germans, 60 percent, support the euro despite a crisis that will see them guarantee debts of other countries, according to a poll released on Friday by ARD television.

The poll also found that 36 percent of Germans would rather bring back the deutschemark, an icon of Germany's post-war economic success....Among Germans who had pursued their studies, only 17 percent wanted the former money back, while 80 percent said the euro should stay."

Hér kemur fram að um 60% þeirra sem svöruðu STYJÐI Evruna og aðeins 36% vilja þýska markið til baka. Í hópi fólks með framhaldsnám er stuðningurinn við Evruna um 80% samkvæmt könnuninni.

Að lokum: Er Spiegel á skjön við þýsku þjóðina? 

Damanaki vill nýja stefnu gegn brottkasti - Benyon vill hindra viðræður

Í The Guardian er sagt frá því að Maria Damanaki (mynd), yfirmaður fiskveiðimála hjá ESB, hyggist beita sér fyrir því að unnið verði gegn brottkasti á fiski innan ESB, en þetta er vandamál þar. Hún segir að það sé þörf á nýrri stefnu í þessum málum. Fréttin er hér.

Í annarri frétt segir frá því að sjávarútvegsráðherra Bretlands, Richard Benyon, vilji hindra eða stöðva aðildarviðræður Íslands að ESB vegna makrílsins. Benyon segir að Ísland og Færeyjar verði að setjast niður við samningaborðið í stað þess að taka sér kvóta einhliða.

Líklegt er að það verði gert. En þetta sýnir ef til vill ágætlega að sjávarútvegsmálin verða þýðingamikið viðfangsefni í SAMNINGAVIÐRÆÐUM Íslands og ESB, sem hefjast á næstum vikum. 

Allt ESB að kenna!

Úr MBL.

Við spyrjum: Er þetta frétt? Eða bara til þess að segja okkar hvað ESB er vont?

"Lúxusjeppinn Land Cruiser 200 verður ófáanlegur nýr í ár, eflaust einhverjum til armæðu. Um er að kenna reglum Evrópusambandsins um mengunarvarnir en hert var á þeim um áramót. Vél jeppans uppfyllir ekki kröfur þeirrar reglugerðar. Framkvæmdastjóri sölu- og markaðssviðs Toyota á Íslandi hefur þó ekki miklar áhyggjur, enda sala á Land Cruiser 200 ekki mikil miðað við sölu á Land Cruiser 150 en biðlisti er eftir honum.

Mengunarstaðaðallinn sem um ræðir nefnist Euro 5 og vélar bifreiða verða að uppfylla hann til að selja megi þá nýja í Evrópu. Staðallinn tekur við af Euro 4 sem Land Cruiser 200 uppfyllir. Aðrir bílar sem Toyota á Íslandi selur uppfylla Euro 5-staðalinn." (Leturbreyting, ES-bloggið).

Fram kemur í fréttinni að sölustjóri Toyota á Íslandi hafi ekki áhyggjur af þessu og tekur fram að Toyota sé að breyta vélinni til að uppfylla kröfur ESB um mengunarmál. Þá komi þeir til með að selja þennan bíl aftur hér á landi.

Þær eiga nú væntanlega eftir að verða fleiri "fréttirnar" af þessum toga í MBL!

Ps. MBL hefði mátt lesa yfir fréttina áður en blaðið fór í prentun, eða hvað þýðir þetta: "Mengunarstaðaðallinn" ? 

 

Timo Summa: Tími fyrir samstöðu

Timo Summa, sendiherra ESB á Íslandi, hélt áhugavert erindi á fundi í Háskólanum á Akureyri í gær. Þar svaraði hann ýmsum bábiljum varðandi aðildarumsókn Íslands að Evrópusambandinu. Hann fjallaði meðal annars um ,,aðlögunarumræðuna". Einnig sagði hann að nú væri kominn tími fyrir íslensk stjórnvöld að sýna samstöðu í þessum aðildarviðræðum. Annað gæti tafið aðildarumsóknina. Vikudagur birtir góða frásögn af fundinum. Þar segir m.a:

,,Summa var spurður um það á fundinum hvort ekki væri í raun hafið aðlögunarferli að ESB en ekki bara aðildarviðræður, t.d. vegna krafna um breytta stjórnsýslu varðandi hagtölur í landbúnaði. Sagði hann þetta vera þrætubók sem fyrst og fremst hefði gildi í pólitískum átökum hér á Íslandi. Hinn almenni skilningur og sjónarmið ESB væru að aðlögun íslenskra stofnana og verkferla myndi hefjast þegar atkvæðagreiðslu um aðildarsamning væri lokið hér og landsmenn samþykkt þann samning. Þá tæki við visst aðlögunarferli sem gæti verið misjafnlega langt eftir aðstæðum en slíku ferli lyki svo með formlegri aðild. Sumar þjóðir hafi ákveðið að undirbúa slíka aðlögun fyrr en aðrar og því sett upp aðgerðaráætlanir sem færu í gang ef samningur yrði samþykktur og ef slíkur undirbúningur væri fyrir hendi myndi aðlögunartímabilið milli þjóðaratkvæðagreiðslu og aðildar vera styttra. Ef enginn slíkur undirbúningur færi fram yrði þetta aðlögunartímabil einfaldlega eitthvað lengra. Ákvarðanir um slíka áætlanagerð væru hins vegar pólitískar ákvarðanir stjórnvalda í hverju landi fyrir sig og væru ekki mál sem ESB skipti sér að. "

Hægt er að lesa frásögn af fundinum á slóðinni hér að neðan.

http://www.vikudagur.is/?m=news&f=viewItem&id=7585
 

Börnin og ESB - hádegisfundur

Næsti hádegisfundur Evrópuvaktar Samfylkingarinnar verður haldinn næstkomandi þriðjudag 8. febrúar og er umræðuefnið ”Hvaða tækifæri felast í ESB aðild fyrir börn?”

Frummælendur eru þeir Ásgeir Beinteinsson skólastjóri og Eystein Eyjólfsson upplýsingafulltrúi.

Að loknum framsöguerindum verða opnar umræður og eru fundarmenn hvattir til að taka þátt.

Fundurinn verður haldinn á Kaffi Sólon (efri hæð) í Bankastræti frá kl. 12.00 til 13.00 og er öllum opinn. 

Ísland er stór þáttakandi í fjölmörgum Evrópuáætlunum varðandi menntamál og langflestir sem fara í nám erlendis, fara til Evrópu. 

Sjá t.d. hér: http://erasmus.is/ 

Mogginn, "lygin" og ESB-málið -- Eiður Guðnason: "Þetta er til ódrengilegt og til skammar"

Hrokinn og ósmekklegheitin streyma úr Hádegismóum og leiðari blaðsins í dag er ágætis dæmi um það.

Umfjöllunarmálið er ESB-málið.

Í leiðaranum segir: "Öllum er ljóst að Össur Skarphéðinsson segir ósatt þegar hann lætur sig hafa að fullyrða að Íslendingar séu í aðildarviðræðum við ESB en ekki aðlögunarviðræðum."

Hér vænir blaðið utanríkisráðherra Íslands um að bera ósannindi á borð fyrir þjóðina.

En blaðið lætur ekki staðar numið og heggur næst að aðalsamningamanni Íslands, Stefáni Hauki Jóhannessyni og samverkamönnum hans: 

"Enginn gerir neitt með það þó að utanríkisráðherrann fari viljandi með ósannindi og blekkingar. Þetta sé bara Össur og þetta sé hans háttur. Töskuberar hans, jafnvel úr öðrum flokkum, fara aðeins hjá sér en láta yfir sig ganga og skeyta ekki um skömm né heiður. Og því miður er risið á þeim embættismönnum sem í hlut eiga ekki hótinu betra, þótt þeim sé að lögum skylt að gæta meginreglna og gefa réttar og óbrenglaðar upplýsingar til almennings í landinu og eftir atvikum til erlendra viðsemjenda." (Feitletrun: ES-blogg) 

Hér vænir blaðið embættismennina líka um ósannindi. Getur Morgunblaðið komið með einhver alvöru dæmi máli sínu til stuðnings? Er blaðið ekki alveg komið að mörkum þess sem getur kallast fagleg blaðamennska?

Eiður Guðnason fyrrum sendiherra og fjölmiðlamaður gerir þetta að umtalsefni á bloggi sínu og segir:  

"Enn ræðst Morgunblaðið að embættismönnum utanríkisþjónustunnar í nafnlausum leiðara. Enn færir blaðið í málflutningi sig nær hinu gamla málgagni íslenskra kommúnista , Þjóðviljanum , þegar hann var sem verstur. Morgunblaðið beinir í dag spjótum sínum að Stefáni Hauki Jóhannessyni aðalsamningamanni Íslands í aðildarviðræðunum við Evrópusambandið og leiðarahöfundur beitir orðbragði götustráks. Gamli Þjóðviljinn uppnefndi líka þá sem hann taldi andstæðinga sína. Þeir sem þekkja Stefán Hauk vita að hann er vandaður embættismaður og vammlaus. Hann hefur á ferli sínum sinnt mikilvægum trúnaðarstörfum á alþjóðavettvangi, sem aðrar þjóðir hafa falið honum.

Morgunblaðið getur skammað Össur Skarphéðinsson utanríkisráðherra að vild. Hann getur svarað fyrir sig og gerir það. Hann er stjórnmálamaður. Morgunblaðið ræðst hinsvegar á embættismenn vegna þess að sá sem, leiðarann skrifar veit að þeir geta ekki svarað fyrir sig með sama hætti og stjórnmálamenn. Þetta er blaðinu til skammar. Þess vegna er ráðist að þeim. Aftur og aftur. Þetta er ódrengilegt."

ES-bloggið er sammála Eiði, gæðablöð skrifa ekki svona, svo einfalt er það! 

Allur pistill Eiðs 

...að sinna skyldustörfum!

Þremenningar úr röðum Nei-sinna lögðu fram þingsályktunartillögu á Alþingi í dag um að draga umsókn Íslands að ESB til baka. Einn þeirra, Ásmundur Einar Daðason, Nei-foringinn, var að sjálfsögðu að sinna skyldustörfum.

Í "röksemdafærslunni" með tillögunni segir m.a. ,,Aðild að Evrópusambandinu er ekki lausn á efnahagsvanda Íslands." 

En hvaða lausnir hafa þau? Haftakrónu, haftahagkerfi, pólitískt áhrifaleysi um málefni framtíðar, viðtaka á lögum og reglum frá ESB, án virkrar aðkomu og almenna "hliðarlínudvöl," sama gamla sveiflu/verðbólgu og hávaxtakerfið?

Þetta hér er líka snilld: ,,Á næstu missirum og árum mun Evrópusambandið endurskoða starfshætti sína og e.t.v. gera breytingar á grunnsáttmála sínum, Lissabonsáttmálanum. Á meðan ekki er ljóst hvernig haldið verður á málum hjá Evrópusambandinu er óráðlegt að vera í aðildarferli að sambandi sem gæti tekið grundvallarbreytingum á næstu missirum."

En á Íslandi má ekki (og á ekki) að breyta neinu? Hér þvælast hlutir náttúrlega bara fyrir okkur, eins og t.d. Rannsóknarskýrsla Alþingis, er það ekki? 

ESB hefur verið í stöðugum breytingum frá því það var stofnað, stofnríkin voru sex, en nú eru aðildarríkin alls 27 og innihalda öll helstu lýðræðisríki Evrópu!

Samkvæmt könnun sem gerð var um daginn vilja 66% þeirra sem voru spurðir, halda aðildarviðræðum áfram.

Íslendingar vilja fá að kjósa um aðildarsamning, en þetta fólk vill stöðva það. 

Ein "snilld" í viðbót úr "röksemdafærslunni" : ,,Fyrirsjáanlegt er að aðildarsamningur verði felldur í þjóðaratkvæðagreiðslu og sú niðurstaða mun ekki auka velvilja í garð Íslendinga hjá aðildarþjóðum Evrópusambandsins." 

Spurning: Hvað með Norðmenn? Hverskonar röksemdafærsla er þetta? Og er það fyrirsjáanlegt að samningur verði felldur? Enginn veit hvernig niðurstaðan verður fyrr en samningur liggur fyrir. 

 

 

Andrés Pétursson í MBL: Auðlindir ekki í hættu

Andrés Pétursson, formaður Evrópusamtakanna, skrifar grein í Morgunblaðið í dag um ESB-málið og auðlindir undir yfirskriftinni: Auðlindir ekki í hættu. Grein Andrésar birtist hér í heild sinni:

Það er sérkennileg árátta andstæðinga aðildar Íslands að Evrópusambandinu að gefa sér alltaf þær forsendur að ekki sé hægt að semja um neitt varðandi auðlindir þjóða. Það er sérstaklega skrýtið því staðreyndirnar eru þveröfugar. Allar þær þjóðir sem hafa gengið í Evrópusambandið hafa samið um sínar auðlindir með varanlegum samningum. Bretar hafa til dæmis full yfirráð yfir olíulindum sínum, Svíar yfir járngrýtinu sínu og Finnar yfir skógunum.

Angi þessarar auðlindaumræðu kemur fram í grein Sigurbjörns Svavarssonar rekstrarfræðings um sjávarútvegsmál í Morgunblaðinu fyrir skömmu. Þó verð ég að hrósa röksemdafærslu Sigurbjörns í þeirri grein því hún er málefnalega sett fram.Vonandi er þetta upphafið að vandaðri og dýpri umræðu um auðlindamál í tengslum við umsókn Íslands að Evrópusambandinu.

Sigurbjörn bendir á ýmis atriði sem gæta verður vel að í samningaferlinu við Evrópusambandið. Þar má til dæmis nefna mikilvægi þess að hagnaður af sjávarútvegi verði áfram í landinu, komið verði í veg fyrir það að erlendir aðilar sölsi undir sig íslensk sjávarútvegsfyrirtæki og að ekki sé hægt að kippa undirstöðunum undan fiskvinnslu í landi. Ef þetta er ekki tryggt í samningum þá er ljóst að enginn Íslendingur mun greiða atkvæði með því að ganga í sambandið.

Mér finnst þó gæta misskilnings hjá Sigurbirni um regluna um hlutfallslegan stöðugleika. Sú regla hefur verið í gildi yfir 20 ár og engar vísbendingar komið fram um að henni verði kastað fyrir róða. Framkvæmdastjórn ESB hefur stunduð varpað þeirri hugmynd fram að taka upp annað kerfi en því hefur umsvifalaust verið hafnað af nánast öllum þjóðunum. Þar að auki má ekki gleyma því að ef Ísland semur um þessa reglu þá er ekki hægt að breyta því einhliða af Evrópusambandinu. Aðildarsamningar þjóða hafa sama vægi, og í raun meira, en sáttmálar ESB. Ekki er því hægt að þvinga Íslendinga til að breyta einu eða neinu í þeim samningi.

Í lokin langar mig að vísa í skýrslu Sjálfstæðisflokksins um auðlindamál frá árinu 2009. Þar segir skýrt: „Aðild að sambandinu mun ekki hafa veruleg áhrif á málefni er tengjast raforku, vatni, jarðvarma, olíu og gasi. Aðild að ESB hefði engin áhrif á yfirráð Íslands yfir Drekasvæðinu. Aðildin mun heldur ekki hafa í för með sér verulegar breytingar á regluverkinu er gildir um hálendið eða á málefnum norðurheimskautsins... meginreglan um hlutfallslegan stöðugleika í óbreyttri mynd tryggir Íslendingum sama hlutfall heildarkvóta og nú er, m.ö.o. íslenska ríkið fengi kvótann við Íslandsstrendur til úthlutunar til þeirra sem hafa veiðireynslu. Erlendir aðilar innan ESB fengju hann ekki þar sem þeir hafa ekki veitt að neinu ráði á íslensku hafsvæði síðastliðna þrjá áratugi.“
 

Alræðisseggir í ferðabann! KGB lifir góðu lífi í Hvíta-Rússlandi

ESB hefur sett ferðabanna á tæplega 160 einstaklinga sem tengjast síðasta einræðisherra Evrópu, Alexander Lúkasjénkó, sem ræður og ríkir yfir Hvíta-Rússlandi. Þetta kemur m.a. fram á EuObserver.

Ástæðan: Fyrir skömmu voru haldnar forsetakosningar, en eftir þær voru nánast allir sem buðu sig fram á móti Lúkasjenkó, sem hefur stýrt landinu sem einræðisherra í næstum tvo áratugi, handteknir og færðir í fangelsi. Margir hafa flúið land.

Í Hvíta-Rússlandi lifir nafnið KGB enn góðu lífi, en Lúkasjenkó heldur tryggum völdum, með aðstoð öryggislögreglunnar (KGB) og hersins.

Talið er að stutt sé í að Lúkasjenkó verði settur í ferðabann.

Í næstu viku munu ESB og Bandaríkin sennilega samþykkja efnahagsþvinganir á Hvíta-Rússland.  

Hallgrímur Thorsteinsson á Rás 2 var með fína umfjöllun um þetta í vikunni. 

 

Jón Steindór í MBL um ESB-málið

Formaður Sterkara Íslands, Jón Steindór Valdimarsson, skrifar grein í MBL í dag um ESB-málið og hér er öll greinin. Yfirskriftin er: Skammgóður vermir og tittlingaskítur.

"Alla jafna þykir það ljóður á ráði manna að hugsa bara til skamms tíma. Ekki er betra þegar gripið er til ráða sem bæta úr við fyrstu sýn en gera illt verra. Um það er sagt að skammgóður vermir sé að pissa í skó sinn. Þarf sú myndlíking ekki frekari skýringar við.

„Því hefur verið haldið fram að íslendingar beygi sig lítt fyrir skynsamlegum rökum … en leysi vandræði sín með þvi að stunda orðheingilshátt og deila um titlíngaskít sem ekki kemur málinu við; en verði skelfingu lostnir og setji hljóða hvenær sem komið er að kjarna máls.“ segir í Innansveitarkroníku Halldórs Laxness.

Skynsemi og yfirvegun

Ísland sótti um aðild að Evrópusambandinu í júlí 2009. Evrópusambandið samþykkti að taka upp viðræður í júní 2010. Allt gengur samkvæmt áætlun og er búist við að svokallaðri rýnivinnu ljúki í vor og þá hefjist eiginlegar samningaviðræður sem gæti lokið á næstu misserum.

Maður skyldi ætla að ákvörðun Alþingis yrði fylgt eftir af þunga, samningaleiðin gengin til enda og samningurinn falinn þjóðinni til samþykktar eða synjunar. Á þeim tíma og ekki síst þegar samningur lægi fyrir yrði rætt um kjarna máls og hagsmuni Íslands til langs tíma. Þá fyrst gætum við leitt málið til lykta með skynsamlegum og yfirveguðum hætti. Því miður er þessu ekki aldeilis að heilsa. Hér verður tvennt nefnt.

Krónan

Ekki er langt síðan flestir voru þeirrar skoðunar að íslenska krónan dygði okkur ekki. Örmyntin okkar hentaði ekki lengur í ólgusjó alþjóðaefnahagsmála og saga hennar frá upphafi væri meira og minna ein samfelld hörmungarsaga. Þessu vilja margir gleyma núna þegar kollsteypan hefur sett allt úr skorðum og krónan vermir vissulega sumum til skamms tíma. Halda að ylurinn núna sanni ágæti hennar. Hætt er við að snöggkólni í fæturna þegar fram í sækir. Bitur reynsla fortíðar ætti að vera víti til varnaðar.

Að laga eða laga að

Strax og aðildarviðræður hófust fundu andstæðingar aðildar upp alveg nýtt þrætuepli, nýjan tittlingaskít. Allt í einu var skilgreining á eðli viðræðnanna orðið aðalatriðið. Aðlögun!, aðlögun! er nú hrópað á torgum. Ekki er einu orði minnst á það hvort þau lög og reglur sem Evrópusambandið notar eru betri eða verri en þær sem við notum. Ekkert dæmi er nefnt um að sambandið vilji þröngva upp á okkur afleitum reglum.

Kjarni máls er auðvitað sá, og það vita allir sem vilja vita, að fari svo að Ísland gangi í Evrópusambandið þá þarf það að laga sig að reglum þess, alveg eins og við gerum nú innan EES. Frá þessu verða frávik á einhverjum sviðum. Um það snúast samningarnir. Hvort við kjósum að laga okkar kerfi fyrirfram í einhverjum atriðum eða ekki er okkur í sjálfsvald sett en við verðum að gera grein fyrir hvernig við ætlum að gera það komi til aðildar. Kjósum við að bíða þar til ljóst verður hvort við göngum í ESB eða ekki kann það að tefja fyrir því að við njótum ávaxtanna af aðildinni.

Væri ekki nær að við ræddum, t.d. á sviði landbúnaðar, hvort núverandi kerfi þarfnist breytingar og hvort breytingin væri skynsamleg ein og sér, jafnvel þó hún fæli í sér að nýtt kerfi passaði við það sem ESB notar.

Ræðum frekar framtíðina

Óskandi er að gagnslausri umræðu um eðli viðræðnanna og um að draga umsóknina til baka linni og þess í stað snúum við bökum saman um góðan samning og ræðum um framtíðarhagsmuni Íslands.

MBL, 28.1.2001

Öll greinin