ESB lánar Íslendingum 52 milljarða

Viðskiptablaðið fylgist vel með Evrópumálum og þar birtist þessi frétt í vikunni:

,,Evrópusambandið (ESB) samþykkti ísl. viku að lána íslandi 300 milljónir evra, 52,3 milljarða króna, á fjögurra prósenta föstum vöxtum, samkvæmt heimildum Viðskiptablaðsins. Láninu er ætlað að auðvelda stjórnvöldum að takast á við þann efnahagsvanda sem þau glíma við um þessar mundir.

Heimildir Viðskiptablaðsins herma að ákveðið hafi verið að veita lánið í sambandi við ákvörðun framkvæmdastjórnar ESB í síðustu viku um að mæla með því að viðræður verði hafnar við Ísland um aðild að sambandinu. ESB hefur boðið nokkrum ríkjum sem sótt hafa um aðild að sambandinu og öðrum nágrannaríkjum sérstaka lánafyrirgreiðslu sem alla jafna er veitt í tengslum við framkvæmd sérstakra efnahagsáætlana (e. macro-financial assistance). Lánin hafa einkum verið veitt til ríkja í Austur-Evrópu, landa við Miðjarðarhaf og ríkja á Balkanskaga. Nú hefur Island bæst í þann hóp," segir í frétt VB.

Meginmarkmið ESB til ársins 2020 eru snjall og sjálfbær hagvöxtur fyrir alla

Þetta kemur fram í stefnumótunarvinnu sem kynnt var fyrir skömmu, sem ber einfaldlega heitið Evrópa 2020. Í forspjalli að umfjölluninni segir José Manuel Barroso, forseti framkvæmdastjórnar ESB að fjármálakrísan hafi verið einskonar ,,vekjaraklukka.”   Hann leggur á það áherslu að Evrópa verði að koma sterkari til leiks að nýju og bendir á að bæði menntun og tækniþekking í Evrópu sé á háu stigi. Meginatriðin í 2020-stefnu ESB eru þessi: Snjall hagvöxtur sem grundvallast á þekkingu og nýsköpun; Sjálfbær hagvöxtur sem hvetur til skilvirkari, umhverfisvænni og samkeppnishæfari hagkerfa; Hagvöxtur fyrir alla með áherslu á hátt atvinnustig og félagslega og svæðisbundna samstöðu. Framkvæmdastjórnin leggur til að sjö framtaksverkefni verði sett á oddinn til að ná þessum markmiðum: 
 

1) Nýsköpun Evrópusambandsins: Að yfirfara stefnuna varðandi rannsóknir og þróunarmál með tilliti til þeirra áskorana sem framundan eru á ýmsum sviðum.

2) Ungt fólk á faraldsfæti: Efla menntun og þekkingu ungs fólks með það að markmiði að auka atvinnumöguleika ungs fólks

3) Stafræn áætlun fyrir Evrópu: M.a. með það markmið að tæknivæða enn meira í verslun og viðskiptum.

4) Skilvirk nýting auðlinda í Evrópu: Minnka notkun á mengandi orkugjöfum og bæta nýtingu á orku. Minnka gróðurhúsaáhrif og stuðla að auknu orku-öryggi.

5) Iðnaðarstefna í alþjóðlegum umhverfi: Miðar m.a. að aukinni nútímavæðingu í iðnaði, styðja við frumkvöðlastarfsemi og samkeppnishæfni. Á bæði við framleiðsluiðnað og þjónustustarfsemi.

6) Áætlun um nýja hæfni og ný störf: Miðar að betrumbótum á vinnumarkaði og aukinni hæfni meðal vinnandi fólks. Auka aðlögunarhæfni á vinnumarkaði og stuðla að aukinni framleiðni.

7) Evrópskur vettvangur gegn fátækt: Miðar að því að berjast gegn öllum félagslegum afleiðingum fátæktar, með það að markmiði að viðhalda mannlegri reisn hvers einstaklings.

Grikkland í kastljósinu-hefur áhrif hér

Óhætt er að segja að Grikkland hafi verið í kastljósinu undanfarnar vikur. Landið glímir við mjög erfitt efnahagsástand, sem að hluta til var skapað af þeirri hægri-stjórn sem féll í síðustu kosningum. Þetta kemur m.a. fram í ítarlegri fréttaskýringu í Fréttablaðinu í dag.

Ljóst er að næstu mánuðir verða Grikkjum erfiðir og mikið sem þarf að gera til þess að laga ástandið, sem forsætisráðherra landsins hefur líkt við stríðsástand.

Það sem gerist í Grikklandi hefur áhrif á t.d. gengi Evrunnar, eins og fram kemur í þessari frétt RÚV. Þar með hefur það sem gerist í Grikklandi áhrif hér uppi á Íslandi. Svona virkar alþjóðakerfið, allir eru háðir öllum og það er ekkert hægt að komast fram hjá því.

Bændur inni...ekki úti

Morgunblaðið skýrði frá því í dag að ....,,Bændasamtökin munu ekki draga fulltrúa sína út úr stjórnskipaðri nefnd sem fjallar áhrif aðildar Íslands að ESB á landbúnaðinn. Á búnaðarþingi, sem lýkur í dag, verður samþykkt ályktun þar sem ítrekuð er fyrri afstaða Bændasamtakanna gegn aðild landsins að ESB."

Evrópusamtökin fagna þessari skynsamlegu afstöðu Bændasamtakanna og vona að þetta sé byrjunin á ferli sem leiðir til þess að samtökin komi meira að ESB-ferlinu í heild sinni og taki eðlilegan þátt í þeim viðræðum sem fara væntanlega af stað í lok mars.

Hlöðver Ingi: Er allt leyfilegt?

Hlöðver Ingi Gunnarsson, meistaranemi við háskólann á Bifröst skrifar áhugaverða grein, ER ALLT LEYFILEGT, um Evrópuumræðuna á www.sterkaraisland.is. Þar segir hann m.a.:

,,Það er orðin döpur staðreynd ef að umræðan er komin á það lágt stig að nú sé aðild að Evrópusambandinu ekki einu sinni til umræðu heldur hvort draga eigi umsóknina til baka. Það er í raun fáránleg staða sem formaður Heimssýnar er í, bæði að vera formaður þeirra samtaka sem og að vera í þingflokki Vinstri grænna. Það hefði kannski verið ráðlegra hjá Heimssýn að velja sér formann sem ekki er um leið þingmaður í ríkistjórn sem styður aðildaviðræður að Evrópusambandinu. Hvernig geta þessi tvö hlutverk hans farið saman? Verður það þá ekki óneitanlega að hlutverki hans að grafa undan störfum ríkistjórnarinnar? Það hlýtur að vera skylda stjórnmálamanna sem styðja ríkistjórnina að stuðla að sem bestum samningum fyrir Ísland. Við erum stödd á þeim tímapunkti núna að leggja allt í sölurnar til þess að ná fram sem bestum samningi fyrir Ísland. Bæði er búið að leggja fjármuni og tíma í aðildarumsókn Íslands, en einnig er það grundvallaratriði í stjórnarsáttmála ríkistjórnarinnar. Því hafa stjórnmálamenn skyldu til þess að gera sitt besta og grafa ekki undan störfum samninganefndarinnar."

Allur pistillinn

Rússnesk kosning formanns Bændasamtakanna

Fram kom í sumum fréttamiðlum í dag að Haraldur Benediktsson var endurkosinn sem formaður Bændasamtaka með 100% greiddra atkvæða. Það hét einu sinni,,rússnesk kosning!" Hann er því ótvíræður leiðtogi íslenskra bænda! Myndin er hinsvegar af rússneskum bónda (við leitina "bóndi" á google komu bara myndir af Bondi-strönd í Ástralíu!)

Ps. Ágæt færsla um landbúnaðarmál á Eyjunni.

Staksteinar verja Bændasamtökin

Eitthvað hefur umfjöllun Evrópusamtakanna farið fyrir brjóstið á Staksteina-höfundi MBL, sem sakar Evrópusamtökin um að ráðast á bændur vegna afstöðu þeirra til ESB-málsins, sem er sem stystu máli sú að bændur neita að ræða málið opinberlega og ætla að firra sig ábyrgð af málinu og segja hana alfarið vera Alþingis og ríkisstjórnar.

Þá telur Staksteinahöfundur að Evrópudamtökin séu á móti því að bændur geri könnun. Það eru Evrópusamtökin ekki, en þau vekja hinsvegar athygli á því að þær kannanir sem Bændasamtökin gera, eru í raun greiddar af íslenskum skattgreiðendum, því Bændasmtökin eru alfarið rekin fyrir opinbert fé, en sem kunnugt er renna rúmlega 10 milljarðar (tíu þúsund milljónir) beint úr vasa skattborgaranna til landbúnaðar á Íslandi. Til samanburðar má nefna að rekstur Sjúkrahúss Akureyrar er með um 4.5 milljarða á fjárlögum 2010.

En eitthvað hefur Staksteina-höfundur lesið þessa könnun skakkt, því hann segir: ,,Fólkið í landinu er á móti aðildarbröltinu." Um hvaða ,,fólk í landinu" er ritari Staksteina að tala um? Samkvæmt könnuninni eru 33% landsmanna fylgjandi aðild. Að skekkja sannleikann er nokkuð sem örugglega á eftir að gerast oft í komandi ESB-umræðunni, en gerir Staksteinahöfundur það viljandi?

Og auðvitað er enginn á mót landbúnaði, en það er líka hægt að spyrja fólk hvort það sé á móti t.d. iðnaði. Auðvitað er enginn á móti iðnaði! Spurningum í könnunum er hægt að stýra!

Evrópusamtökin vilja meina að Staksteinahöfundur hafi bara ekki lesið umfjöllun samtakanna nógu vel, enda sennilega ekki mikill áhugamaður/kona um ESB!

En staðreyndirnar eru á borðinu: Bændasamtökin segja NEI, NEI, NEI, vilja ekki einu sinni ræða málið, en nota á sama tíma fé almennra skattborgara til sín reksturs, þar á meðal útgáfu Bændablaðsins, sem talar fullum hálsi gegn aðild Íslands að ESB og hefur m.a. dreift fylgiriti Nei-samtakanna, Heimssýnar, en það gerðist síðastliðið haust.

Er það ekkert skrýtið?

Ps. Bloggari elskar íslenskar landbúnaðarafurðir, nýsjálenskt lambakjöt er í ruslflokki miðað við það íslenska! Smjör og rjómi úr íslenskum kúm gera allan mat betri!

 

 

Baggalútsmenn blanda sér í ESB-umræðuna!

Baggalútsmenn eru með ötulustu grínistum landsins og þeir láta fátt fram hjá sér fara. Þar á meðal ESB málið. Þeir fjalla um Búnaðarþingið, sem nú stendu yfir og færa að sjálfsögðu í stílinn, en samt sem áður er nálgun Baggalútsmanna ekkert svo ýkja langt í frá svarstsýnustu dómsdagsspám, sem komið hafa frá sjálfum Bændasamtökunum. Svona lítur frétt Baggalútsmanna út og dæmi nú hver fyrir sig:

,,Í harðorðri ályktun Búnaðarþings vara Bændasamtök Íslands þjóðina eindregið við inngöngu í Evrópusambandið.

Telja samtökin víst að embættismenn ESB muni beita öllum brögðum til að sölsa undir sig íslenskan landbúnað með góðu eða illu – brenna akra, míga í brunna og skelfa búsmala með evrópskri danstónlist. Þá þykir einsýnt að reynt verði að spilla sauðfé og bændum með svíðingslegum kynbótum.

Við sama tækifæri ítrekuðu bændur eindregna andstöðu sína við gufuvélina, talsímann og internetið og samþykktu nær einróma að hætta að brennimerkja nýja félagsmenn með slagorðinu „Bóndi er bústólpi“ – en taka frekar upp húðflúrið „Mjólk er góð“."

Þeir sem viljs svo sjá mynd af Brusselbeljunni, er bent á upprunalega hlekk fréttarinnar

Evran: Bjargaði Möltu, segir forsætisráðherrann

Bloggari rakst á þessa frétt á www.malefnin.com og er hún athyglisverð:

,,Forsætisráðherra Möltu segir í viðtali við þýskt dagblað, að landið væri að öllum líkindum gjaldþrota og stæði mun verr en Ísland ef evrunnar nyti ekki við. Samt hafi Malta ekki enn orðið fyrir barðinu á fjármálakreppunni að neinu ráði.

„Ef evrunnar nyti ekki við væri Malta sennilega mun verr stödd en Ísland: við værum gjaldþrota," segir Lawrence Gonzi í viðtali við blaðið Frankfurter Allgemeine Zeitung. „Evran forðaði okkur frá því í tíma, hún bjargaði okkur í raun."

Malta var áður með eigin gjaldmiðil, líruna. Gonzi sagði, að gengi hennar hefði verið nokkuð stöðugt en hagkerfi Möltu hefði hins vegar verið afar viðkvæmt fyrir sveiflum á öðrum gjaldmiðlum. Malta tók upp evru í byrjun síðasta árs og hefur til þessa sloppið að mestu við afleiðingar alþjóðlegu fjármálakreppunnar.

„Til allrar hamingju höfum við sloppið til þessa. Bankarnir okkar hafa alltaf haft nægt lausafé og tengjast ekki alþjóðlegum bönkum, sem nú eiga í miklum erfiðleikum," sagði Gonzi við þýska blaðið.

Malta er eyja á Miðjarðarhafi. Þar búa um 450 þúsund manns. Malta gekk í Evrópusambandið árið 2004."

Enn einn góður frá Guðmundi...

Mælum með þessum pistli Guðmundar Gunnarssonar!