Bændur búast til Brussel - jákvætt skref!

Í Fréttablaðinu í gær birtist áhugaverð frétt um ESB-málið og bændur, en í henni segir: 

"Bændasamtökin segjast reiðubúin til að leggja samninganefnd Íslands lið á rýnifundum Íslands og ESB um landbúnað, sem hefjast á mánudag í Brussel.

Fundirnir eru liður í umsóknarferli um aðild að ESB. Á fundum í fyrra kynnti ESB sín sjónarmið en nú er komið að Íslendingum.

Formaður samninganefndar Íslands, Stefán Haukur Jóhannesson, sagði í Fréttablaðinu í desember að það að samtökin vilji ekki taka þátt í þessum fundum gæti þýtt lakari samningsstöðu þar en ella.

Haraldur Benediktsson, formaður Bændasamtakanna, segir þetta alrangt: "Við vorum búnir að senda formanni samningahóps landbúnaðar, þremur vikum fyrir þessi ummæli Hauks, bréf um að við værum tilbúnir að gera það sem heyrir til okkar skyldna."

Haraldur segir samtökin aldrei hafa verið beðin um að taka þátt í rýnifundunum í næstu viku. Þau hafi ekki viljað taka þátt í rýnifundunum í fyrra því þau hafi ekki haft neinu hlutverki að gegna þar.

"Ef við höfum beinlínis hlutverk förum við á fundinn. Svo framarlega sem þetta er bara til að vinna að þeim þáttum sem við höfum verið að aðstoða með og engin stífla hefur verið í, þá gerum við það," segir hann."

Það hlýtur að teljast vera jákvætt að íslenskir bændur ákveði nú að vera með í ferlinu. Allir vitja jú mikilvægi íslensks landbúnaðar fyrir land og þjóð, ekki síst bændur!

Miklir möguleikar geta falist í aðild fyrir bændur, landbúnaður er ekki "föst stærð" sem er ónæmur fyrir breytingum, þær gerast af mörgum ástæðum, heimatilbúnum og alþjóðlegum, veðurfræðilegum!

Verður t.d. hægt að þróa nýja hluti í landbúnaði með þátttöku í verkefnum innan ESB? Kornrækt? Aukinn "ferðamannalandbúnað"? Aukna trjárækt? Enn grænni og vistvænni landbúnað?

Það eru margar spurningar í kringum íslenskan landbúnað, sem er hluti af alþjóðlegu samspili. 

Bendum hér á greinar um landbúnaðarmál á heimasíðu Evrópusamtakanna. 

Krónan stakk sér síðdegis!

Fram kemur á vísi.is að krónan tók dýfu síðdegis; ,,Gengi krónunnar tók nokkra dýfu síðdegis í dag. Nú klukkutíma fyrir lokun markaðarins hefur gengið veikst um 0,8% og gengisvísitalan er komin í rúmlega 214 stig.

Nokkrir samverkandi þættir gætu hér átt hlut að máli. Nefna má samning Seðlabankans við fjármálafyrirtæki í desember s.l. um umfangsmikil gjaldeyriskaup af þeim og vaxtagreiðslur til erlendra eigenda ríkisskuldabréfa en stór flokkur þeirra bréfa rann út í desember.

Þá má einnig nefna að birgjar eru sennilega í einhverjum mæli að greiða erlendum viðskiptavinum sínum fyrir vörur sem keyptar voru fyrir síðustu jólavertíð.

Á móti kemur svo að ferðamannastraumurinn til Íslands er í lágmarki þessa daganna og gjaldeyrir frá ferðamönnum því með minnsta móti."

Heimildin

Í annarri frétt segir svo að Evran hafi styrkst í dag og þar kemur einnig fram að vel hafi tekist til með sölu ríkisskuldabréfa í bæði Portúgal og Spáni.

 

Rífandi gangur í rýnivinnu

Góður gangur virðist vera í rýnivinnu Íslands og ESB, þar sem löggjöf er borin saman. Þann 14.1 lauk rýnivinnu um mennta, menningarmál, rannsóknir og vísindi. Og í dag var vinnu vegna umhverfismála lokið, eins og sjá má á frétt Eyjunnar um málið. Lítill munur er á löggjöf ESB og Íslands á þessu sviði.

Málið er því alls ekki komið í öngstræti, eins og sumir vilja meina. Það öngstræti er kannski helst til í hugum þeirra sjálfra, hver veit?

Áhugaverð saga á Stöð tvö

Stöð tvö birti áhugaverða frétt í kvöld, segjum ekki meira, sjón er sögu ríkari!

Textaútgáfa

Helgi Skúli Kjartansson: Var Ísland engu líkt?

Bendum á þetta: 

Alþjóðamálastofnun og Rannsóknasetur um smáríki standa fyrir fundaröð í vetur undir yfirskriftinni Evrópa: Samræður við fræðimenn.

Stofnunin hefur fengið til liðs við sig fjölmarga fræðimenn af ýmsum fræðasviðum sem kynna rannsóknir sínar um Ísland og Evrópu á vikulegum fundum í hádeginu á föstudögum.

Föstudaginn 21. janúar hefjum við leik að nýju á nýju ári.

Helgi Skúli Kjartansson, prófessor í sagnfræði við Menntavísindasvið Háskóla Íslands fjallar um Ísland milli 1815 og 1914, og metur hvaða einingar það eru í Evrópu þess tíma sem gagnlegast er að bera Ísland saman við, en erindi Helga Skúla nefnist Var Ísland engu líkt?

Fundurinn fer fram í Lögbergi 101, föstudaginn 21. janúar, frá kl. 12 til 13. Allir velkomnir. 

Tær snilld - Ísland!

Íslendingar lögðu Norðmenn í sögulegum leik á heimsmeistaramótinu í handbolta, 29-22 nú í kvöld. Þar með hefur landsliðið unnið alla sína fimm leiki hingað til og það er einstakt!

Evrópusamtökin óska íslenska liðinu og Íslendingum til hamingju með sigurinn - þetta er tær snilld!

Á laugardag eru Þjóðverjar á dagskrá og verður það eflaust hörku viðureign! 

(Mynd: Vísir.is) 

Össur um málefni norðuslóða í FRBL

Össur Skarphéðinsson, utanríkisráðherra, ritar áhugaverða grein í Fréttablaðið í dag um málefni norðurslóða. Hann segir: "Málefni norðurslóða eru eitt af kjarnamálum í utanríkisstefnu ríkisstjórnarinnar og nú liggur fyrir Alþingi þingsályktunartillaga mín um norðurslóðastefnu Íslands. Þar eru sett fram skýr stefnumið er miða að því að tryggja hagsmuni Íslendinga á sviði auðlindanýtingar, siglinga, umhverfismála og sjálfbærrar þróunar.

Eitt af grundvallaratriðum norðurslóðastefnu Íslands er að tryggja að Ísland hafi bein áhrif á þróun og alþjóðlega ákvarðanatöku í málefnum svæðisins. Ísland á bæði land og hafsvæði innan norðurheimskautsbaugs og engum dylst að Íslendingar reiða sig á viðkvæm náttúrugæði norðurslóða s.s. við fiskveiðar, ferðaþjónustu og orkuvinnslu. Ábyrgur málflutningur í alþjóðasamskiptum auk lagalegra, visfræðilegra og efnhagslegra raka gegnir hér lykilhlutverki. Jafnframt er í stefnunni lagt til að íslensk stjórnvöld beiti sér fyrir víðtækri skilgreiningu á norðurslóðum sem byggi ekki aðeins á landfræðilegri afmörkun heldur tryggi að undir norðurslóðir falli einnig lönd og svæði sem tengjast því nánum böndum gegnum efnahagsleg, samfélagsleg, pólitísk og öryggistengd vensl.

Norðurskautsráðið er mikilvægasti vettvangur alþjóðlegrar samvinnu og stefnumótunar um hagsmunamál norðurskautsríkjanna átta; Bandaríkjanna, Danmerkur f.h. Grænlands, Finnlands, Íslands, Kanada, Noregs, Rússlands og Svíþjóðar. Tillagan kveður skýrt á um að efla beri ráðið til að takast á við yfirstandandi breytingar og vaxandi áhuga alþjóðasamfélagsins á málefnum norðurslóða. Það er sérstakt ánægjuefni að aðildarríki Norðurskautsráðsins skyldu ljúka viðræðum um fyrsta bindandi alþjóðasamninginn um leit og björgun á norðurslóðum í Reykjavík fyrir skemmstu. Hann er mikilvægt fordæmi fyrir frekari samningagerð s.s. um mengunarvarnir og vöktun á norðurhöfum."

Og síðar ritar Össur: "Vísindarannsóknir og fræðsla um málefni norðurheimsskautsvæðsins eru forsenda ábyrgrar þátttöku Íslendinga í umræðu og ákvarðanatöku um framtíðarþróun þess. Því þarf að efla þátttöku íslenskra fræðimanna í alþjóðlegu samstarfi um vísindarannsóknir og fræðslu og leggja rækt við innlent vísindastarf. Fjárfesting í rannsóknum á öllum þáttum norðurslóða getur ekki annað en styrkt stöðu okkar gagnvart öðrum þjóðum svæðisins, og byggt undir málstað okkar."

Öll greinin  

Riddarar hins óbreytta ástands berjast fyrir hina heilögu kú!

Á forsíðu MBL í dag stóð í aðalfrétt: "Engin áform eru um að breyta íslenskum lögum eða reglugerðum til að stofna greiðslustofnun í landbúnaði eða taka upp byggðaáætlun að hætti Evrópusambandsins (ESB), fyrr en aðild að sambandinu hefur verið samþykkt í þjóðaratkvæðagreiðslu og formlega staðfest af Íslandi og ESB.

Þetta kemur fram í svörum sjávarútvegs- og landbúnaðarráðuneytisins við spurningum ESB í kafla 11 um landbúnað og byggðamál. Svörin hafa verið send samninganefnd Íslands gagnvart ESB, samkvæmt heimildum Morgunblaðsins. ESB spyr m.a. hvernig og hvenær Ísland hyggist aðlaga lagaumhverfið sitt hvað varðar stofnun greiðslustofnunar og fleiri breytingar varðandi stjórn- og eftirlitskerfi landbúnaðarins.

Í svari ráðuneytisins segir m.a. að verulegur munur sé á lögum og stjórnkerfi landbúnaðar á Íslandi og í ESB. Ísland þyrfti að grípa til veigamikilla lagabreytinga auk breytinga í stjórnsýslu og stækkunar stofnanakerfis til að laga sig að landbúnaðarkerfi ESB. Ráðuneytið telur enga þörf á því til að framfylgja núverandi landbúnaðarstefnu. Þá segir ráðuneytið að stefna íslensku ríkisstjórnarinnar sé skýr: Engin aðlögun verði að lagaverki ESB fyrr en aðildarsamningur Íslands að sambandinu hafi verið staðfestur. Þá sé það skoðun ríkisstjórnarinnar að vegna stærðar landsins sé óþarft að taka upp stofnanakerfi ESB."

Sá sem svarar er auðvitað enginn annar en Jón Bjarnason, sem berst eins og ljón fyrir óbreyttu ástandi í sínum málaflokki, landbúnaðarmálum.

Í þau mál fara um 110 milljarðar á hverjum áratug úr vasa íslenskra skattborgara. Til bænda og til reksturs Bændasamtaka Íslands. Miðað við núverandi framlög.

Þetta er í raun hin heilaga kú íslensks samfélags og Jón Bjarnason vill að hin heilaga kú verði áfram ÓSNERTANLEG!

Hvort búum við á Indlandi eða Íslandi? 

Lesefni um upptöku Evrunnar í Eistlandi

Eins og fram hefur komið í fréttum tók Eistland upp Evruna í byrjun árs. Athyglisvert verður að fylgjast með því hvernig þetta gengur, en hingað til hefur Evru-upptakan gengið vel.

Á vefsíðu hjá fjármálaráðuneyti Eistlands má lesa mikið af upplýsingum um upptöku Evrunnar. T.d. þá staðreynd að undanfarna mánuði hafa öll verð verið skráð bæði í Evrum og eistneskum krónum og verður svo fram á mitt þetta ár. Ýmsum aðgerðum er beitt til þess að sporna við verðhækkunum og svo framvegis.

Hér er vefsíðan: http://euro.eesti.ee/EU/Prod/Euroveeb/Main_Page/index.jsp 

 

Ásmundur og ógöngurnar

Það er nokkuð átakanlegt að heyra Heimssýnar-þingmanninn úr VG og leiðtoga Nei-sinna, Ásmund Einar Daðason hrópa yfir þingheim að ESB-málið sé komið í ógöngur!

Á sama tíma og það berast fréttir um að ESB-málið sé einmitt og akkúrat eins og það á að vera! Á áætlun og hvaðeina!

Samkvæmt fréttum RÚV verður í næstu viku rýnifundur um landbúnaðarmál. Sjálfsagt mun Ásmundur Einar fylgjast vel með því máli, enda bóndi. 

Alls er lokið rýnifundum um 11 af þeim köflum taka verður fyrir, en þeir eru alls 35 og um þessa kafla má lesa hér.

Þröstur Ólafsson í Fréttablaðið í dag: Er athvarf í vestrænni samvinnu ?

Þröstur Ólafsson, hagfræðingur, ritar áhugaverða grein í Fréttablaðið í dag og spyr: Er athvarf í vestrænni samvinnu ? Hann segir m.a.: ". Við erum vestrænt lýðræðisríki með menningu, tungumál og sið sem á evrópskan uppruna. Vestræn samvinna var lausnarorð margra. Enn heyrast raddir sem telja hagsmunum okkar best borgið við hliðina á Bandaríkjunum, þótt ljóst virðist að áhugi þeirra á norðurslóðum sé nánast enginn. Hvaða hald er í vestrænni samvinnu á tímum hnattvæðingar, er til eitthvert afl sem tekur ákvarðanir í nafni Vesturlanda?"

Í lok greinarinnar segir Þröstur: "Þegar Bandaríkin draga sig úr vestrænni samstöðu, sem við höfum litið á sem utanríkis­pólitísk heimkynni okkar, eigum við Íslendingar engan annan valkost en Evrópu, sem þrátt fyrir erfiðar fæðingarhríðir er athvarf og von lítilla evrópskra þjóða, sem vilja láta rödd sína heyrast í nýrri og flóknari heimsmynd. Að vera ein á báti, eins og félagarnir lengst til vinstri og hægri telja vænlegast, er heimssýn frumbýlingsins á heiðinni - draumórar. Árið 1949 tók Alþingi ákvörðun um að bindast Vesturveldunum. Sú ákvörðun var umdeild en affarasæl. Við fundum öryggi og fengum viðspyrnu. Við beittum aðild okkar að sameiginlegu bandalagi til að láta rödd okkar heyrast, fá stuðning bæði við meint og mikilvæg hagsmunamál. Annars hefðum við lent í kröppum dansi ein með Sovétið ógnandi og lofandi annars vegar en Bandaríkin hinum megin. Við hefðum orðið hættulegt bitbein. Átök stórvelda eru engir barnaleikir. Þeir verða það heldur ekki á 21. öld. Í þeim átökum, hvert sem form þeirra verður, er betra að vera með vinum og jafningjum."

Öll greinin 

Angela Merkel styður Evruna að fullu

Í fréttum RÚv var sagt frá þessu: "Angela Merkel, kanslari Þýskalands, segir að þýska stjórnin muni áfram leggja allt kapp á að tryggja stöðugleika evrunnar. Hún segir í viðtali við tímaritið Stern, sem kemur út á morgun, að ekki komi til greina að taka upp þýska markið aftur. Þjóðverjar ætli að halda sig við evruna. Hún segist fylgjandi frekari samvinnu ríkja á evrusvæðinu til að tryggja stöðugleika gjaldmiðilsins, þar á meðal í skatta-, velferðar- og atvinnumálum og hvað varðar launaþróun."

Frétt RÚV 

Guðmundur Gunnarsson um (m.a.) upphrópanir og órökstuddar fullyrðingar Nei-sinna

Í nýjum pistli á Eyjubloggi sínu segir Guðmundur Gunnarsson, formaður Rafiðnaðarsambandsins:

"Það er afskaplega erfitt að fóta sig á málflutningi andstæðinga ESB, sem einkennist af upphrópunum og órökstuddum fullyrðingum. Þar má t.d. benda á fullyrðingar þeirra um að við ESB-aðild myndu fiskimiðin fyllast at erlendum fiskiskipum og að við missum yfirráð yfir orkulindum landsins.

Það liggur fyrir að lagaumhverfi varðandi orkulindir yrði nánast óbreytt frá því sem nú er. Evrópusambandið á ekki neinar auðlindir. Svíþjóð selur sína umframleiðslu á raforku til annarra Evrópuríkja. Olíulindir Breta og Dana hafa ekki verið framseldar og verða aldrei. Allt eru þetta fullvalda ríki í samstarfi við önnur lönd. Rétt eins og Ísland er í samvinnu við önnur lönd.

Fiskveiðistefna ESB byggir á sögulegum veiðirétti. Öll vitum við, eða ættum allavega að vita; að önnur ESB ríki eiga ekki þann rétt hér. Sameiginleg fiskveiðistefna Evrópusambandsins er eins og fiskveiðistefna Íslands, það er ef um er að ræða sameiginlega stofna, sem margar þjóðir nýta þá á fiskveiðistjórnun þeirra að vera sameiginleg meðal viðkomandi þjóða. Hér má benda á þá stofna sem við veiðum úr og eru sameiginlegir með öðrum þjóðum þ.e. kolmunna, síld og loðnu og karfann hér suður af landinu. Við erum þessa dagana að gera kröfu nákvæmlega um þetta grundvallaratriði hvað varðar veiðirétt í flökkustofnum makríls.

Á það má benda að hið fullvalda ríki Danmörk á litlar auðlindir, en þeir eru duglegir í viðskiptum og stunda gríðarlega útflutning á landbúnaðarvörum. Aðild að ESB er eina tækifæri íslendinga til þess að komast á stóran erlendan markað með fullunnar vörur, án núgildandi takmarkana. Það gefur okkur möguleika sem við höfum ekki um hagræðingu og vöxt í landbúnaði og sjávarútvegi með aðgengi að markaðinum sem opnast við aðild að ESB."

Allur pistillinn 

Engin kúvending hjá Árna Þór!

Á Eyjunni stendur: "Árni Þór Sigurðsson þingflokksformaður Vinstri grænna og formaður utanríkismálanefndar Alþingis sagði á Alþingi í dag að ekkert nýtt hefði komið fram sem breytti þeirri persónulegu skoðun sinni að ljúka bæri viðræðuferlinu við Evrópusambandið og bera þá niðurstöðu undir þjóðina í atkvæðagreiðslu. Hann sagði viðræðurnar vera í samræmi við það nefndarálit sem samþykkt var um miðjan júlí 2009 þegar Alþingi samþykkti að ganga til viðræðna við ESB.

Miklar deilur hafa verið innan Vinstri grænna vegna samningaviðræðna við ESB. Í gær sagði formaður flokksfélagsins í Kópavogi sig úr flokknum vegna samstöðuleysis í stórum málum, og nefndi þá sérstaklega afstöðuna til ESB."

Í kjölfar þeirrar "skjálftavirkni" sem átt hefur sér stað innan VG komu fram hugleiðingar um hvort Árni Þór hefði kúvent í málinu, það sagði m.a. Bjarni Benediktsson, leiðtogi Sjálfstæðisflokksins.

En Árni Þór er fastur á sinni skoðun, enda skynsamleg afstaða. 

Heimildin 

Valgerður um gjaldmiðilsmál í FRBL: Nú er lýst eftir peningastefnu

Valgerður Bjarnadóttir þingkona, skrifar grein um gjaldmiðilsmál í Fréttablaðið í dag og segir þar m.a.:

"Í fréttum af fjórðu afgreiðslu AGS á efnahagsaðstoð til okkar segir að nú verði kveðið á um að við þurfum eða verðum að móta okkur peningastefnu til frambúðar.

Í skrifum um síðustu helgi gagnrýndi pistlahöfundurinn, Þorsteinn Pálsson, stjórnmálaleiðtoga fyrir að þegja um peningastefnu eða – stefnuleysi í áramótagreinum og – ávörpum.

Það má með sanni segja að erfitt er að vita hvað sumir stjórnmálamenn telja að verði okkur, íslensku þjóðinni, affærasælast við stjórn peningamála á næstu árum og áratugum. Það er heldur enginn vandi að taka undir að það er vont þegar fólk þegir um svo mikilvæg málefni.

Krónan hefur ekki reynst okkur vel, það liggur í augum uppi og það sýna rannsóknir. Væntanlega eiga enn fleiri rannsóknir eftir að sýna það, og útlista alls konar villur sem gerðar voru við stjórn peningamála undanfarin ár og jafnvel áratugi.

Stjórnmálamenn sem mæla fyrir aðild okkar að Evrópusambandinu verða ekki sakaðir um stefnuleysi í peningamálum. Aðild að sambandinu myndi færa okkur inn í myntsamstarfið þó við gætum auðvitað ekki umsvifalaust skipt á krónu og evru. Aðild að ESB er hins vegar forsenda fyrir að við getum nokkurn tímann skipt krónunni út fyrir evruna."

Öll grein Valgerðar