Hafa Bændasamtökin breyst?

Búnaðarþing stendur nú um þessar mundir. Það eru Bændasamtök Íslands sem halda það. Bændasamstök Íslands fá sitt árlega rekstrarfé (500 milljónir) frá íslenska ríkinu (=skattborgurum). Má því segja að íslenskir skattgreiðendur séu að halda búnaðarþing?

Hvað um það, þetta var bara hugleiðing. 

Á Búnaðarþingi heldur leiðtogi íslenskra bænda ræðu. Sá er Haraldur Benediktsson. Hann skrifar líka stundum leiðarana í Bændablaðið, sem Bændasamtökin gefa út. 

Í ræðu sinni á þingi búnaðar kom Haraldur inn á ESB-málið, en bændur sjá rautt, eins og naut í flagi, þegar minnst er á ESB! Í ræðu sinni sagði Haraldur:

"Eitt er það mál sem kannski fyrst og fremst heldur íslenskum landbúnaði í höftum og það er umsókn um aðild að ESB. Nú þekkir nánast hvert mannsbarn á Íslandi afstöðu bænda til aðildar. Við höfum með lýðræðislegri umræðu mótað afstöðu okkar. Við höfum með öflugu rannsóknar- og fræðslustarfi gert miklu meira en stjórnvöld hafa gert á eigin spýtur til að mynda þekkingu á málefninu. Þau hafa reyndar kallað hingað Evrópusambandið sjálft til að hlutast til fræðslu.
En hvernig sem stjórnvöld vilja halda á ESB-málunum þá hafa bændur lagt fram sínar áherslur í svokölluðum varnarlínum. Þar tökum við skýra afstöðu og útskýrum kröfur okkar varðandi fjölmörg atriði sem hafa verður í huga í ESB-vegferð ríkisstjórnarinnar. Margt bendir nú til að á vettvangi stjórnvalda sé þegar undirbúið að stíga yfir fjórar varnarlínur okkar af sjö.
Bændur segja því aðeins eitt við þig háttvirtur sjávarútvegs og landbúnaðarráðherra; leiktu þér ekki að eldinum. Þú átt á hættu að aðild verði samþykkt. Gerðu allt sem þú getur til að gæta hagsmuna Íslands. Ekki fyrir bændur heldur fyrir framtíð þjóðarinnar. Ef það er svo að íslenskir samningamenn þora ekki að ganga fram með sterka kröfugerð eigum við sitja heima og viðurkenna að klúbburinn hentar okkur ekki og það er tímabært núna.
Heimurinn hefur breyst."

1) Hafa Bændasamtökin breyst?

2) Hvað hafa Bændasamtökin gert "miklu meira en stjórnvöld" til að mynda þekkingu á málinu? Jú, kannski skrifað í Bændablaðið, en það er nánast allt með neikvæðum formerkjum. Bændasamtökin hafa lagt mikla vinnu í það að finna neikvæða hluti um ESB, til að setja í Bændablaðið, sem stundum er dreift með Morgunblaðinu. Það er eins og að leita að nál í heystakki að finna jákvæð skrif um ESB í Bændablaðinu!

3) Eru bændur með hótanir í garð Steingríms J? "Þú átt á hættu að aðild verði samþykkt." Hvað gerist þá - ef aðild verður samþykkt? Hverskonar stíll er þetta? Eða eru bændur bara hræddir um og við að aðild verði samþykkt?

4) Er það virkilega ekki á tæru að samningamenn Íslands hafi sett sér það markmið að ná hagstæðum samningi fyrir Íslands hönd? Hvaða fréttir lesa menn eiginlega? Það hefur ávallt verið markmið að landa góðum samningi fyrir Íslands hönd! Og er enn!!

5) Bændasamtökin ættu að einbeita sér að því að hjálpa til við að ná slíkum samningi, í stað þess að vera í fýlu úti í horni! 

6) Og hvernig í ósköpunum heldur ESB-málið íslenskum landbúnaði í höftum? Hvernig væri að útskýra þessa fullyrðingu? Hvað með okurvexti, verbólgu, hruninn gjaldmiðil? Eru þetta ekki þættir sem frekar halda íslenskum landbúnaði í höftum? Á hvaða plánetu eru menn?

Kjósa í fyrramálið?

Hvernig væri að kjósa bara um ESB í fyrramálið?

Austfirðir: Nýting hreindýraafurða í gegnum Leonardo-styrk ESB

RÚV birti skemmtilega frétt í kvöld, sem hefst svona: "Hreindýr eru á meðal þess sem Austfirðingar og Samar eiga sameiginlegt. Nú nýlega gafst Austfirðingum kostur á að kynna sér milliliðalaust hvernig samar hafa meðhöndlað og nýtt afurðir hreindýra um aldir.

Námskeiðið er hluti af Evrópuverkefni Þorpsins sem er austfirskt hönnunar- og nýsköpunarverkefni en það er styrkt af starfsmenntaáæltun Leonardo. Tilgangur þess er að leita nýrra leiða til að nýta það hráefni sem fjórðungurinn hefur uppá að bjóða. Þátttakendurnir koma af öllu Austurland, veiðimenn, hönnurðir og handverksfólk."

Hér er aftur á ferðinni "hið vonda ESB" sem gerir ekkert annað en að "rústa þjóðar og menningareinkennum." !!

(Feitletrun ES-bloggið)

Magnús Orri Schram á Eyjunni: Skulda eða Evrukreppa?

Magnús Orri Schram, þingflokksformaður Samfylkingar, skrifar pistil á Eyjuna og fjallar þar um stöðu mála í Evrópu. Hann segir:

"Einkenni núverandi heimskreppu er erfið skuldastaða einstakra ríkja. Ekki er hægt að tengja kreppuna evrunni, heldur frekar að ákveðin ríki í Evrópu standa frammi fyrir erfiðleikum meðal annars vegna óráðsíu í rekstri og skuldasöfnunar, aðgerða til bjargar bankakerfi, og verðhækkana á eignum knúðum áfram af útlánaglöðum bönkum. Þá var þess ekki gætt að halda í samkeppnishæfni í alþjóðavæddum viðskiptaheimi. Þetta þekkja Grikkir, Spánverjar og Ítalir.

Kreppan hefur á hinn bóginn sýnt fram á marga kosti myntsamstarfsins. Í fyrsta lagi hefur sameiginlegt mynt komið í veg fyrir að einstök ríki bregðist við samdrætti með því að setja upp hindranir eða höft í viðskiptum sín á milli. Í öðru lagi kemur evran í veg fyrir að hægt sé að gengisfella myntir einstakra landa til að styrkja framleiðslu innanlands. Þesslags úrræði hafa í för með sér gríðarlega kjaraskerðingu neytenda, verðbólgu og skuldasöfnun og gengur því þvert gegn hagsmunum almennings til lengri tíma. Í þriðja lagi hefur evran gert sameiginlegar aðgerðir mögulegar, þó að slíkt samstilling hafi tekið tíma og ekki verið þrautalaus. Þannig hefur evran í raun mildað áhrif alvarlegrar heimskreppu, samhæft aðgerðir og komið í veg fyrir höft, viðskiptahindranir og gengisfellingar."

Ögmundur vill líka meiri hraða í ESB-málið

Á vef DV er önnur frétt um ESB-málið: "„Lagt er til að viðræðum við ESB verði hraðað. Dagsetning ákveðin fyrir þjóðaratkvæðagreiðslu í síðasta lagi undir lok þessa kjörtímabils. Samninganefndum okkar og ESB verði gerð grein fyrir því að þetta afmarki þann tímaramma sem þær hafi til að fá efnislegar niðurstöður í þeim málaflokkum sem helst varða okkar hag.“ Þetta kemur fram á heimasíðu Ögmundar Jónassonar, innanríkisráðherra og þingmanns VG. Þannig leggur hann til að viðræðulok við Evrópusambandið verði dagsett."

Ögmundur telur að Ísland sé mikilvægt peð í norðuslóðastefnu ESB!

Steingrímur vill hraða ESB-ferlinu

Í annarri RÚV-frétt segir: "Steingrímur J. Sigfússon, formaður vinstri grænna, vill hraða aðildarviðræðum við Evrópusambandið. Hann er óánægður með hvað ferlið hefur dregist og vill hefja eiginlegar samningaviðræður sem fyrst svo skýrir kostir liggi frammi tímanlega fyrir næstu alþingiskosningar. 

Evrópumálin voru rædd á flokksráðsfundi Vinstri grænna um helgina."

Krónan fellur...og fellur!

Á RÚV segir: "Gengi íslensku krónunnar hefur veikst stöðugt frá áramótum og hefur gengisvístalan ekki verið hærri í tæp tvö ár. Lektor í hagfræði segir verðbólguhorfur ekki góðar.

Frá áramótum hefur krónan veikst um 4%. Gengisvísitalan stendur nú í 226,86 stigum og kostar bandaríkjadalur tæpar 124 krónur, evran 166 og pundið tæpar 196 krónur. Krónan varð veikust haustið 2008 skömmu eftir hrun þegar vísitalan rauk upp í 250 stig."

Evrópustofa með fund fyrir norðan

Á vef Evrópustofunnar segir:

"Evrópustofa, upplýsingamiðstöð ESB á Íslandi, efnir til opins fundar um Evrópumál á Akureyri, miðvikudaginn 29. febrúar, kl. 17-18 á Hótel KEA.
Á fundinum verður fjallað um stöðu mála innan Evrópusambandsins og gang aðildarviðræðna sambandsins við Ísland. Jafnframt verður starfsemi og tilgangur Evrópustofu, upplýsingamiðstöðvar ESB á Íslandi kynnt.

Fundaröð um allt land

Fundurinn er liður í því markmiði Evrópustofu að stuðla að aukinni umræðu, þekkingu og skilningi á eðli og starfsemi ESB. ,,Í því skyni ætlum við standa fyrir röð kynningar- og umræðufunda víðsvegar um landið á komandi vikum, enda afar mikilvægt að fólk taki þátt í Evrópuumræðunni óháð búsetu,” segir Birna Þórarinsdóttir, framkvæmdastýra Evrópustofu."

Mikið verðfall krónunnar - von á öllu!

Krónan fellur verulega, þrátt fyrir gjaldeyrishöft! Um þetta var fjallað í hádegisfréttum RÚV og sagt frá því að um verulegar sveiflu sé að ræða. Sérfræðingur sem rætt var við sagði að hún myndi sennilega rétta úr kútnum með vorinu, en það væri í raun von á öllu! Krónan er ólíkindatól!

Vilhjálmur Þorsteinsson: Sveiflur og óstöðugleiki fylgja krónunni

Í nýjum pistli fjallar Vilhjálmur Þorsteinsson, stjórnarformaður CCP um gjaldmiðilsmál og segir meðal annars:

"Á Íslandi varð tvenns konar hrun árið 2008: Annars vegar hrun skuldsettra spilaborga banka og eignarhaldsfyrirtækja, og hins vegar hrun krónunnar.
 
Þessi tvö hrun tengjast vissulega á ýmsa lund, en þó er það svo, að ef hér hefði verið stöðugur fjölþjóðlegur gjaldmiðill – t.d. evra – hefði aðeins fyrrnefnda hrunið orðið. Þótt bankar, FL Group og Exista hefðu engu að síður farið á hausinn, hefðu lán fólks og fyrirtækja staðið óbreytt, ekkert verðbólguskot orðið, enginn „forsendubrestur“. Vissulega hefði syrt nokkuð í álinn í ríkisfjármálum vegna samdráttar fjármagnstekna og skatttekna af fjármálageiranum, og einhver samdráttur orðið í landsframleiðslu, en búsifjar heimila og skaði á raunhagkerfinu hefðu orðið miklu minni með evru en krónu.
 
Sú umræða sem nú geisar um niðurfærslu skulda, breytingar á verðtryggingu o.s.frv. er í raun um augljósa og margstaðfesta galla og afleiðingar krónunnar. Menn tala um að nú þurfi að taka upp agaða hagstjórn (eins og það hafi ekki verið sagt og reynt áður) og þá verði krónan allt í einu að blessun. En kosturinn við sjálfstæðan gjaldmiðil er einmitt sagður vera sá að hann sé unnt að fella til að mæta versnandi viðskiptakjörum, auka útflutning, styðja innlenda framleiðslu og minnka innflutning. Með öðrum orðum, akkúrat það sem gert hefur verið reglulega í 90 ára sögu krónunnar. Sveiflur og óstöðugleiki munu ætíð fylgja þessum litla gjaldmiðli eins og nótt fylgir degi, með tilheyrandi kostnaði fyrir okkur öll."

Krónulaust Ísland eftir 5 ár?

Samtökin Já Ísland standa fyrir fundi um gjaldmiðilsmál næstkomandi fimmtudagskvöld og í tilkynningu segir:

 - Leiðin að upptöku evrunnar
Vilhjálmur Þorsteinsson, frumkvöðull og fjárfestir

- Hvað kostar krónan íslensk heimili
Ólafur Darri Andrason, hagfræðingur ASÍ

Umræður og fyrirspurnir.

Fundastjóri: Margrét Arnardóttir, verkfræðingur

Fundurinn verður haldinn fimmtudaginn næsta, þann 23. febrúar kl 20.00 - 21.30, að Skipholti 50 A, 2. hæð.

Allir velkomnir.

Já Ísland

Helstu tegundir krónu!

Þeir Gylfi Arnbjörnsson, forseti ASÍ og Jón Magnússon, lögfræðingur, ræddu málin á Sprengisandi Bylgjunna, þann 19.febrúar og meðal annars gjaldmiðilsmál og verðtrygginu. Þar kom fram að í raun eru margar tegundir af "krónu" í landinu. Þær helstu eru:

Verðtryggð króna

Haftakróna

Aflandskróna,

og nýjasta tegundin, sem kannski mætti kalla ,,Hæstaréttarkrónu" (eftir dóm í gjaldeyrisláni).

Við þetta mætti kannski bæta einni tegund enn: ,,Útflutningskrónu" ?

Er nema von að fólk sé ringlað yfir ástandinu? Og þetta sýnir líka hversu RUGLAÐ ástandið er!

Ísland þarf einn góðan og traustan gjaldmiðil. Til dæmis gjaldmiðil sem ekki kallar á höft, verðtrygginug og leiðir til verðbólgu og hárra vaxta!

Og er gjaldgengur í alþjóðlegum viðskiptum!

Lítið dæmi af saltfiski - mikilvægt fyrir Ísland

Á www.visir.is birtist í vikunni áhugaverða frétt, sérstaklega fyrir þá sem hrópa hvað hæst að Evrópa sé að hrynja, Evran og hvaðeina. Kristján Már Unnarsson gerði fréttina, sem hefst svona:

"Verð á saltfiski hefur lækkað um allt að tuttugu prósent í einstökum tegundum vegna skuldakreppunnar í ríkjum Suður-Evrópu. Þetta á jafnframt þátt í fjórðungs verðlækkun á stórþorski á fiskmörkuðum hérlendis á undanförnum vikum.

Helstu kaupendur íslensks saltfisks eru Portúgal, Spánn, Grikkland og Ítalía en áætla má að Íslendingar hafi selt saltfisk fyrir um þrjátíu milljarða króna á síðasta ári og er þetta því ein þýðingarmesta útflutningsgrein þjóðarinnar. Bergþór Baldvinsson, framkvæmdastjóri Nesfisks í Garði, segir verðin hafa lækkað talsvert mikið, - þó sé eins og salan sé örlítið aftur að aukast eftir að verðin lækkuðu."

Þetta er bara EITT LÍTIÐ dæmi um hvað myndi gerast ef Evrópa myndi "hrynja" !

Ísland á MIKILLA hagsmuna að gæta í því að Evrópa nái flugi á ný! Það er ótvírætt! Menn ættu aðeins að huga að því!

Hannes Pétursson á flugi í FRBL

Hannes Pétursson, skáld, skrifaði reffilega grein í Fréttablaðið þann 16.febrúar og fjallaði þar meðal annar sum þá æðstu ósk sumra ESB-andstæðinga á landi hér (meðal annars Guðna Ágústssonar, fyrrum framsóknarleiðatoga) að forsetinn, dr. Ólafur Ragnar Grímsson, bjóði sig fram gegn því sem þessir sömu menn kalla "erlent yfirvald." Hannes er frábær penni og segir á einum stað: 

"Bráðum hefur Ólafur Ragnar Grímsson gegnt embætti forseta Íslands í sextán ár samfellt, ásjárlegur maður og tungulipur. En enda þótt sönn tilbreyting hafi verið í því fólgin að fylgjast með millilendingum hans get ég ekki annað en tekið mér í munn hið gamalkveðna: „Leiðir verða langsetumenn“. Öðrum sýnist að sjálfsögðu allt annað, til að mynda Guðna Ágústssyni fyrrverandi ráðherra, nú grasrótarmanni. Ólafur yrði honum aldrei leiður, þótt hann næði abrahamískum aldri á forsetastóli.

Guðni stendur ásamt fleirum fyrir undirskriftasöfnun þar sem fólk skorar á Ólaf að fara hvergi, enda sé forsetinn lýðræðissinni, skrifar Guðni í hvatningargrein nýlega, og ærið verk að vinna fyrir kjarkgóðan mann á viðsjárverðum tímum. Og bætir við að framundan séu „átök um stjórnarskrá, þjóðaratkvæðagreiðslur, um stöðu Alþingis og hlutverk forsetaembættisins. Átök um aðild að Evrópusambandinu, glímunni við yfirþjóðlegt vald“.

Ekki er auðséð í fljótu bragði hvernig Guðni Ágústsson hugsar sér að forseti Íslands taki á öllum þessum málum, nema þá að hann auki valdsvið sitt frá því sem nú er. Vera kann að til þess sé einmitt ætlazt. Og gæti þá orðið fjör í kringum fóninn."

Síðar segir Hannes í lok greinarinnar um Guðna Ágússton: ..."það getur verið gaman að Guðna. Hann er mikill samvinnumaður og sambandsmaður, sambandsmaður samvinnufélaga, samvinnumaður sambandsfélaga og svo framvegis, allt er upp á sam hjá Guðna, sam þetta og sam hitt. Nema í einum punkti: honum er ákaflega í nöp við samvinnu Evrópuþjóða um frelsi, viðskipti og mannréttindi, Evrópusambandið, stærsta efnahagsveldi heims. Þess vegna kom það ýmsum sérkennilega fyrir sjónir að fyrsta verk Guðna Ágústssonar eftir að hann missti snögglega forystuvöld í Framsóknarflokknum var að pakka niður í ferðatöskurnar, hraða sér sem mest hann mátti til Keflavíkur og taka þaðan beint flug eins langt suður í Evrópusambandið og komizt varð, það er að segja til Kanaríeyja, suður í stöðugleika evrunnar, suður í ódýru ostana og ódýra rauðvínið. Þangað leitar klárinn sem hann er kvaldastur." 

Hvað kosta spurningar Vigdísar?

Vigdís Hauksdóttir, þingmaður Framsóknarflokks, er sennilega með spurulustu (forvitnustu?) þingmönnum frá upphafi lýðveldis! Spurningar hennar hafa kostað ríkissjóð = almenning stórar upphæðir. En Vigdís bara bætir við og á RÚV segir:

"Vigdís Hauksdóttir þingmaður Framsóknarflokks hefur lagt fram tíu fyrirspurnir á Alþingi, það er til allra ráðherra í ríkisstjórn, um nefndir, ráð, verkefisstjórnir og starfshópa.
Þingmaðurinn fer fram á skrifleg svör ráðherranna og vill fá upplýsingar um hvaða nefndir, ráð, verkefnisstjóra og starfshópa hafi verið settir á stofn frá kosningum 2009, hvað margir sitji í þeim hópum, hver sé launakostnaður og hve marga starfsmenn hver nefnd hafi. Þá vill Vigdís fá upplýsingar um hvaða einstaklingar hafi verið skipaðir eða tilnefndir til setunnar og hver launakostnaður þeirra sé."

Ef við gefum okkur að hver fyrirspurn kosti á bilinu 500.000 - 1 milljón, er um að ræða kostnað á bilinu 5-10 milljónir! Takk fyrir.

Sami þingmaður hefur kvartað hástöfum yfir kostnaði vegna ESB-umsóknarinnar og að stjórnsýslan leggist alveg á hliðina útaf henni (sem er reyndar ekki rétt).

En okkur er spurn: Hvað er þá þetta? Hver er tilgangurinn með spurningaflóðinu? Og hver er kostnaðurinn?

Eru kannsi líka þarna spurningar um klæðaburð, tónlistarsmekk eða útiveru nefndarmanna í frítíma sínum? 

Án gríns, þetta er eiginlega ekki fyndið lengur!

Er ekki helst skylda/hlutverk þingmanna að setja lög?