Össur og Lucinda ræddu málin: Fullur stuðningur Íra við umsókn Íslands

Evrópumálaráðherra Íra, hin unga Lucinda Creighton, var stödd hér á landi í vikunni sem er að líða. Hún hitti að sjálfsögðu utanríkisráðherra Íslands, Össur Skarphéðinsson. Í tilkynningu á vef Utanríkisráðuneytisins segir:

"Össur Skarphéðinsson utanríkisráðherra fundaði í dag með Lucindu Creighton Evrópumálaráðherra Írlands. Á fundinum ræddu ráðherrarnir aðgerðir Evrópusambandsins til að takast á við skuldavanda ákveðinna Evrópuríkja og stöðu og horfur á evrusvæðinu. Evrópumálaráðherra Írlands lýsti fullum stuðningi við umsókn Íslands um aðild að Evrópusambandinu. Hún sagði að Írar og Íslendingar ættu ótvírætt margra sameiginlegra hagsmuna að gæta innan Evrópusamvinnunnar og hét stuðningi Írlands í samningaferlinu. Írar taka við formennskunni í ESB í byrjun árs 2013."

Hannes Pétursson um "belging" og "drumbshátt" í Kiljunni

Eitt helsta skáld þjóðarinnar, Hannes Pétursson, var gestur í nýjasta þætti Kiljunnar, sem Egill Helgason sér um. Þar var að mestu rædd nýjasta bók Hannesar.

En í lokin kom Hannes inn á stjórnmál og utanríkismál, ræddi meðal annars um það sem hann kallar "drumbshátt" og "belging" og skort á framtíðarsýn í íslenskum stjórnmálum.

Horfa má á viðtalið hér (sem er c.a. í miðri upptökunni)

Elvar Örn um hina bláu Evrópu

Á bloggi Elvars Arnars Arasonar má lesa þetta: 

"Oft er talað um Evrópusambandið eins og það sé eitt allsherjar kratabandalag. Það er fjarri sanni. Sannleikurinn er sá að mið- og hægriflokkar í Evrópu eru býsna Evrópusinnaðir. Bretland gerðist aðili að Evrópusambandinu árið 1973 þegar íhaldsmaðurinn Edward Heath var við völd. Heath var forsætisráðherra frá 1970 til 1974 og leiðtogi Íhaldsflokksins í áratug frá 1965 til 1975.

Í dag eru mið-hægri ríkisstjórnir við völd í tuttugu aðildarríkjum sambandsins og Evrópa hefur aldrei verið jafn „blá“ á litin, eins og sést á myndinni. Á þessu myndskeiði á vef Guardian er hægt að sjá hvernig pólitíska landslagið hefur þróast í álfunni frá því að Bretland gekk í Evrópusambandið fyrir fjórum áratugum síðan."

Meira hér

Harmageddon um verðtrygginguna: Afborgun af íbúðarláni árið 2047 = 670.000 krónur!

X-IÐUmræðan um gjaldmiðilsmál og vertryggingu verpur oft ansi hressileg og sítt sýnist hverjum. Þeir Máni og Frosti á X-inu ræða oftar en ekki Evrópumál og ræddu þeir verðtrygginguna í gær. Þeir eru sko heldur ekkiert að skafa af því! Á Pressunni segir:

"Útvarpsmaðurinn Frosti Logason þarf að borga 140 milljónir króna fyrir 17 milljóna króna lán sem hann tók árið 2006 vegna íbúðakaupa. Hann fékk þau svör frá bankanum sínum að bankinn færi á hausinn fengi hann ekki allar 140 milljónirnar.

Frosti stýrir útvarpsþættinum vinsæla Harmageddon á X-inu 977 ásamt Mána Péturssyni. Í þættinum í gær gerði hann verðtryggð íbúðalán að umræðuefni, en fyrr um morguninn hafði hann gert sér ferð í bankann til að kanna stöðuna á íbúðarláninu sínu.
Lánið, 17 milljónir króna, tók hann árið 2006. Það stendur í tæpum 25 milljónum króna í dag, en hann greiddi sjálfur út 4,5 milljónir króna sem hann segir tapað fé í dag. Frosti sagðist ekki passa inn í 110 prósent leiðina sem þýðir að hann þarf að borga lánið í topp, en hann hefur alla tíð staðið í skilum. Samræðurnar við fulltrúa bankans voru á þessa leið:"

Meira og klippið af X-inu

Evrópumnálaráðherra Írlands: Íslendingar munu hafa mikið að segja varðandi sjávarútvegsmál

Hinn ungi Evrópumálaráðherra Írlands, Lucinda Creighton, er stödd hér á landi og hélt fyrirlestur í HR þann 23.11. Á www.visir.is má sjá ítarlegt viðtal við Creighton, en í fréttum Stöðvar tvö sagði hún meðal annars að vel yrði hlustað Ísland innan ESB, þegar sjávarútvegsmál bæri á góma.

Viðtalið við Creighton 

ESB: Hvalveiðar ekki vandamál við opnun umhverfiskaflans - sérlausn nú þegar í landbúnaði!

ESB setur ekki fram kröfu um að Íslendingar breyti fyrirkomulagi á hvalveiðum, þegar kaflinn um umhverfismál verður opnaður í aðildarviðræðum Íslands og ESB. Þetta kom fram á opnum fundi með Össuri Skarphéðinssyni á Alþingi í dag og RÚV sagði frá í kvöldfréttum.

Einnig var rætt ítarlega við Össur í síðdegisútvarpi Rásar 2 og þar sagði Össur að ESB byði Íslendingum nú þegar sérlausn á sviði landbúnaðarmála, þar eð landið þurfi ekki að vera búið að gera breytingar landbúnaðarkerfi landsins þegar aðildarviðræðum lyki.

Fram hefur komið í fjölmiðlum í dag að stefnt er á að opna alla kafla aðildarviðræðna á næsta ári, en þá verða m.a. Danir í formennsku ESB.

JÁ-ÍSLAND: Umræðan um aðild hafin af alvöru

Á vef samtakanna Já-Ísland má lesa þetta: 

"Umræðan um aðild Íslands að Evrópusambandinu er hafin fyrir alvöru. Við höfum verið aðilar að samningnum um Evrópska efnahagssvæðið frá því 1994 og njótum þegar margra þeirra kosta sem felast í aðild en um leið höfum við kynnst ókostum þess að vera ekki fullgildir þátttakendur í Evrópusamstarfinu. Innan fárra missera gefst okkur kostur á að greiða atkvæði um aðildarsamning. Niðurstaðan mun annars vegar ráðast af því hvað í þeim samningi stendur og hins vegar því hversu vel þjóðin er að sér um Evrópusambandið, eðli þess, markmið og starfshætti.

Eitt af höfuðmarkmiðum ESB hefur frá upphafi verið að tryggja frið í álfunni eftir hinn mannskæða harmleik síðari heimsstyrjaldarinnar. Jafnframt hefur verið lögð mikil áhersla á að skapa öflugt atvinnulíf, standa vörð um jafnrétti og velferð og auka efnahagslegan stöðugleika Evrópuríkja. Á síðustu áratugum hafa neikvæð áhrif hnattvæðingar og aðkallandi verkefni í umhverfismálum ýtt undir enn frekara samstarf enda í mörgum tilvikum um að ræða viðfangsefni sem eru einstökum þjóðum ofviða.

Við Íslendingar erum og verðum Evrópuþjóð. Meðal grunngilda Evrópusambandsins eru friður, frelsi, mannréttindi, jafnrétti og umhverfisvernd. Flest þessara gilda þykir okkur Íslendingum svo sjálfsögð að ekki þurfi að hafa af þeim neinar áhyggjur. Með fullri aðild að ESB lýstum við yfir vilja okkar til að taka þátt í því að vernda þessi gildi, ekki bara hér á landi heldur í Evrópu allri og jafnframt sem fulltrúar álfunnar á alþjóðavettvangi.

Dýrkeypt reynsla okkar Íslendinga undanfarin ár hefur afhjúpað veikleika þess að standa utan Evrópusambandsins og Evrópska myntbandalagsins. Hrun krónunnar varð til þess að stór hluti íslenskra fjölskyldna er í skuldafjötrum. Ungt fólk sem vill koma sér þaki yfir höfuðið horfir fram á að borga margfalda vexti á við jafnaldra sína í nágrannalöndunum. Hrikalegt gjaldþrot íslensku bankanna og margháttaðar afleiðingar þess valda því að þjóðin hefur glatað því trausti sem hún naut á alþjóðavettvangi. Við verðum endurvinna þetta traust. Aðild að ESB er yfirlýsing um að Íslendingar ætli að temja sér þann aga sem þarf til þess að missa ekki tök á hagstjórninni enn á ný, að við viljum vera þjóð meðal þjóða."

Rökin fyrir aðild má svo lesa hér

Jólahittingur Evrópusinna - spurningakeppni, glens og gaman!

Á Eyju-bloggi Bryndísar Hlöðversdóttur segir: "Á morgun verður haldið jólapubquiz á Kaffi Sólon 2 hæð og hefst fjörið kl 20.30 – þar mun hinn frækni Ske-maður og þingmaðurinn Guðmundur Steingrímsson mun spyrja fólk um allt á milli jóla og Evrópu. Og eins og lög gera ráð fyrir verða verðlaunin einn bjórkassi.

Til að sjá til þess að við komumst örugglega í hátíðarskap mun svo hin eina sanna drottning jólalaganna Helga Möller mæta á svæðið og syngja fyrir okkur nokkur lög.

Hér má sjá viðburðinn á Facebook.

Sem sagt, jólapubquiz, Helga Möller, jólabjór, piparkökur og evrópusinnar.

Getur hreinlega ekki klikkað.

Bjór á tilboði!"

SA: Við eigum að taka upp Evru, er betri kostur en krónan

Umræðan um gjaldmiðilsmál heldur áfram og á RÚV segir: "Vilhjálmur Egilsson, framkvæmdastjóri Samtaka atvinnulífsins, segir að krónan sé ekki góður gjaldmiðill. Evran sé betri kostur. Og þá sé eina leiðin að ganga í Evrópusambandið. Hann var gestur Morgunútvarpsins á Rás 2.

Samtök atvinnulífsins hefja á morgun fundarherferð um Ísland undir yfirskriftinni Rjúfum kyrrstöðuna. Leiðir til betri lífskjara."

Hlustið hér

Evran rædd, sem og fleira

Andrés Pétursson, formaður Evrópusamtakanna, tók þátt í umræðu um Evruna í morgunþætti Rásar tvö. Á móti honum var Styrmir Gunnarsson, sem ritstýrði Morgunblaðinu í áratugi.

Andrés lagði mikla áherslu á friðarhugtakið í starfi Evrópusambandsins og Evrunnar. En hann ræddi einnig möguleika á að settar verði strangari reglur í kjölfar þeirra atburða sem nú gerast. Hann mótmælti því sem fram kom í máli andstæðingsins, sem eiginlega var ekki með sínar eigin skoðanir, heldur vitnaði stöðugt í aðila á meginlandi Evrópu. Sem hlýtur að teljast merkilegt.

Andrés lagði á það áherslu að með aðild fengi Ísland sæti við þau "borð" þar sem ákvarðanir eru teknar og benti á að það væru málaflokkar sem Íslendingar gætu látið til sína taka.

Ef af aðild verður, verður Ísland helsta fiskveiðiveldi ESB. Miðað við málflutning Styrmis verður ekkert hlustað á okkur innan ESB. En ef við færum að tala um sjávarútveg? Myndu þá menn innan ESB biðja okkur kurteislega að segja sem minnst? Myndi enginn hlusta á fulltrúa LÍÚ í Brussel? Það hlýtur að teljast afar ólíklegt! 

Hlustið hér

Bætist í sarpinn á Evrópuvefnum! Nú um blöðrur!

Sífellt bætast við svör við áhugaverðum spurningu á Evrópuvefinn, enda er það markmiðið að almenningur (og ef til vill fleiri) geti spurt og Evrópuvefurinn svari.

Margt ber þar á góma, meðal annars allskonar goðsagnir um ESB. Ein er sú hvort ESB banni börnum í Evrópu að blása upp blöðrur og það er s.s. spurt: "Er það rétt að Evrópusambandið banni börnum að leika sér með segulstál, leikfangavaraliti, partýflautur og blöðrur?"

Svarið byrjar svona: "Svarið við þessari spurningu er nei. Evrópusambandið hefur ekki sett neinar reglur sem banna börnum að leika sér með leikföng. Sambandið hefur hins vegar samræmt reglur aðildarríkjanna um öryggiskröfur sem leikföng í verslunum verða að uppfylla. Þessar reglur gilda á öllu Evrópska efnahagssvæðinu, þar með einnig á Íslandi. Reglurnar beinast að framleiðendum, innflytjendum og dreifingaraðilum leikfanga. Þessir aðilar eru ábyrgir fyrir því að vörur uppfylli samræmda evrópska öryggisstaðla og stofni hvorki öryggi né heilsu notenda eða annarra í voða. Settur hefur verið öryggisstaðall um hámarksstyrk segulstáls í leikföngum og blöðrur úr latexi þurfa að bera sérstaka aðvörun. Um leikfangavaraliti og partýflautur gilda hins vegar aðeins almennar reglur tilskipunarinnar." (Leturbreyting, ES-bloggið)

Svarið í heild sinni

Frábær teiknari Fréttablaðsins!

Halldór Baldursson, teiknari Fréttablaðsins á frábæra mynd í blaðinu í dag. Það hreinlega þarf ekkert að segja meira!

http://www.visir.is/halldor-22.11.2011/article/2011111129773

15 af 10 mögulegum!

Ólafur Arnalds um landsfundinn

Á Pressunni skrifar Ólafur Arnalds um "Evrópuhluta" landsfundar Sjálfstæðisflokksins: "Í utanríkismálanefndinni náðist mikilvæg sátt milli fulltrúa andstæðra sjónarmiða í Evrópumálum. Flokkurinn áréttaði andstöðu sína við aðild að ESB enda er meirihluti sjálfstæðismanna andvígur aðild Íslands. Sáttin felst í því að Sjálfstæðisflokkurinn fellur nú frá þeirri kröfu að slíta skuli aðildarviðræðum, sem verið hefur stefna flokksins frá síðasta landsfundi. Flokkurinn vill nú gera hlé á viðræðum og ekki hefja þær að nýju fyrr en vilji þjóðarinnar til þess hefur komið fram í þjóðaratkvæðagreiðslu. Þetta er málamiðlun sem aðildar- og viðræðusinnar innan flokksins geta vel sætt sig við.

Við núverandi aðstæður er ekkert sem kallar sérstaklega á að aðildarviðræðum sé flýtt og eins er ljóst að meirihluti þjóðarinnar vill ljúka viðræðunum og kjósa um þann samning sem út úr þeim kemur. Afstaðan til aðildar að ESB er ekki eitt af grunngildum sjálfstæðisstefnunnar enda greinir flokksmenn á um aðildina. Málamiðlunin sem náðist er gott dæmi um það hvernig sjálfstæðismenn vinna úr ágreiningsmálum sínum og ganga sáttir og samhuga frá fundi.

Ekki er að efa að til eru þeir stjórnmálaflokkar, sem horfa öfundaraugum til flokks, sem getur tekist á um ágreiningsmál á landsfundi sínum af fullri festu og einurð en slíkum heilindum að í fundarlok ganga allir sáttir frá borði. Þetta getur Sjálfstæðisflokkurinn vegna þess að flokksmenn eiga sameiginlegar grunnhugsjónir, sem sjálfstæðisstefnan byggir á. Samherjar láta ekki ágreining um einstök mál verða tilefni óvinafagnaðar – alla vega ekki til lengdar – jafnvel þó að um stór mál á borð við aðild að ESB sé að ræða."

Verðbólga á Íslandi með því mesta sem gerist

Á viðskiptahluta Vísis segir: "Verðbólga er aðeins meiri en á Íslandi í 13 löndum af þeim 43 sem breska vikublaðið The Economist birtir reglulega hagtölur um, en þar er um ræða öll stærstu hagkerfi heimsins.

Verðbólgan á Íslandi er 5,3 prósent á ársgrundvelli um þessar mundir, sem er nokkuð umfram 2,5 prósent markmið Seðlabankans.

Ekkert land sem notar evruna er með meiri verðbólgu en svo, en evrulandið sem glímir við mesta verðbólgu er Belgía með 3,6 prósent. Á evrusvæðinu í heild nemur hún 3 prósentum.

Tvö Evrópuríki sem ekki notast við evruna eru hins vegar með verri verðbólgutölur, en það eru Rússland og Tyrkland, sem hvort um sig er með á bilinu 7 til 8 prósenta verðbólgu."

Hugleiðingar um peninga og gjaldmiðilsmál o.fl.

Á landsfundi Sjálfstæðisflokksins var þetta samþykkt í efnahagsmálum:

"Peninga- og gjaldmiðilsstefnan er ein af grunnstoðum efnahagslífsins. Þjóðin kallar eftir agaðri efnahagsstjórn. Allsherjar þjóðarsátt og samræmd stefna í opinberum fjármálum og peningastefnu þarf að vera um hliðstæð skilyrði og Maastricht-skilyrðin þar sem verðbólga, langtímavextir, afkoma ríkissjóðs og heildarskuldir eiga að vera sambærileg og þekkist í helstu viðskiptalöndum Íslands. Með agaðri efnahagsstjórn er unnt að draga úr vægi verðtryggingar. Íslendingar verða að geta skipt um gjaldmiðil eftir 3–5 ár ef þeim sýnist svo. Sjálfstæðisflokkurinn setji á fót nefnd sem kanni framtíðarskipan gjaldmiðilsmála á Íslandi."

Spurningar vakna:

Ef þjóðin kallar eftir agaðri efnhagsstjórn, er þá ekki verið að kalla á að losna við sveiflur? Krónunni fylgja sveiflur! Virtir hagfræðingar hafa fullyrt það!

Af hverju þarf að vera þjóðarsátt um HLIÐSTÆÐ skilyrði og Maastricht-skilyrðin? Hvernig eiga þau að vera hliðstæð? Harðari - slakari? Og hvernig á að ná þeirri þjóðarsátt? Þjóðaratkvæði?

Er ekki hægt að afnema verðtryggingu með agaðri hagstjórn? Af hverju þarf að DRAGA ÚR væginu? Langflestir Íslendingar vilja losna við verðtryggingu. Með upptöku Evru er það mögulegt!

Og þetta síðasta: Skipta um gjaldmiðil eftir 3-5 ár, ef okkur sýnist svo? Felst ekki í þessu viðurkenning að krónan dugi ekki? Af hverju þarf að bíða í 3-5 ár til að fá frekari staðfestingu þess?

Breytir ný nefnd miklu í málinu?

Staðreyndin er sú að Ísland er með gjaldmiðil á gjörgæslu og afar litlar líkur á að sá gjaldmiðill klári sig í ólgusjó alþjóðlegra efnahagsmála!

Af landsfundinum má annars ráða að niðurstaða hans er mýkri en á síðasta landsfundi. Tvær öfgafyllstu tillögurnar voru felldar.

Sem verður kannski að skoðast í ljósi þeirrar staðreyndar að Sjálfstæðisflokkurinn hefur í gegnum tíðina verið flokkur sem aðhyllist vestræna samvinnu og hefur verið með sterka tengingu inn í atvinnulíf þjóðarinnar. Því er það mikilvægt að flokkurinn taki af skynsemi á t.d. gjaldmiðilsmálum og öðrum stórum hagsmunamálum.

Þau öfl innan flokksins sem virkilega vilja láta reyna á Evrópumálin hér á landi, með því að klára aðildarferlið og bera samning undir þjóðina í atkvæðagreiðlslu geta með góðu móti haldið því starfi áfram innan flokksins. Það er mikilvægt, því dropinn holar steininn.