Kyrrstöðuöflin þola ekki hugsunina um þjóðaratkvæði um ESB!

Eftir mál gærdagsins, vantraustið sem var fellt, skrifa menn á ýmsum stöðum um stöðuna. Einna þeirra er Jóhann Hauksson á DV. Í pistli segir Jóhann:

"Röksemdir liðhlaupanna á Alþingi í gær halda ekki vatni. ESB-málið verður lagt í dóm þjóðarinnar og því er mótsagnarkennt að lýsa vantrausti með þeim rökum að foringjaræði sé að drepa menn og búið sé að ákveða aðild að ESB að þjóðinni forspurðri."

Menn segja hreint ótrúlega hluti um ESB-málið í fjölmiðlum, en þetta er ekki flókið: Þegar aðildarsamningur liggur fyrir verður kosið (af þjóðinni) um málið.

Ákveðin kyrrstöðuöfl í samfélaginu mega bara ekki til þess hugsa. Svo einfalt er það! 

Nei-foringinn til liðs við höfuðandstæðinginn - Atli heldur að Ísland missi sjálfstæðið og fullveldið

Ríkisstjórn Íslands hafði betur gegn Sjálfstæðisflokknum í kvöld varðandi tillögu um vantraust. Tillagan var felld með 32 atkvæðum gegn 30.

Það sem hlýtur að vekja mesta athygli er JÁ NEI-foringjans, Ásmundar Einars Daðasonar, sem studdi sem sagt ekki sína eigin ríkisstjórn, heldur vantraust höfuðandstæðingsins. Þetta vegna ESB-málsins. Vinstri-maðurinn, Ásmundur Einar skipar sér þar með endanlega í flokk með ysta, öfga-hægrinu í íslenskum stjórnmálum, sem sér rautt þegar minnst er á ESB.

Þetta kom formanni VG, Steingrími J. Sigfússyni, verulega á óvart, enda sagði hann í tíu-fréttum RÚV að Ásmundur hefði stutt ríkisstjórnina í hádeginu í dag, en síðan greitt atkvæði gegn henni í kvöld.

Þá vaknar spurningin; hvað gerðist í millitíðinni?

Atli Gíslason sá pólitískt "villti" og fyrrum VG-liðsmaður, greiddi einnig atkvæði gegn ríkisstjórninni, alfarið á ESB-forsendum. 

Atli trúir því greinilega að Ísland missi sjálfstæði sitt og fullveldi við aðild að ESB.

Kannski áttar Atli sig ekki á þeirri staðreynd að sennilega mun fullveldi og sjálfstæði Íslands aukast við ESB-aðild, með fullri þátttöku í ákvarðanatöku, í stað þess að gleypa reglugerðir ESB hráar í gegnum EES-samninginn! 

Og sjálfsagt veit Atli það og finnur þegar hann fer til Evrópu (ef hann gerir það!) að engin þjóð sem gengið hefur í ESB, hefur hvorki glatað sjálfstæðinu, né fullveldinu!

Nærtækast er að spyrja Eystrasaltsþjóðirnar, sem losnuðu undan kúgun og oki kommúnisma, gengu í ESB og hafa þar með orðið aftur fullvalda, sjálfstæðir og fullgildir aðilar að sambandinu og hinni "evrópsku fjölskyldu."

Að lokinni þessari unnu atkvæðagreiðslu skapast vinnufriður fyrir ríkisstjórnina, sem meðal annars getur haldið áfram að einbeita sér að því að leiða ESB-málið til lykta, með aðildarsamningi og þjóðaratkvæðagreiðslu um málið. Sem bæði Atli og Ásmundur eru greinilega á móti að þjóðin fái tækifæri til! 

Í þessari frétt segir svo að Ásmundur Einar sé gengin úr þingflokki VG! 

Guðbjörn Guðbjörnsson: Frjálslynd öfl sameinist

Guðbjörn Guðbjörnsson, þróunarstjóri hjá Tollstjóraembættinu skrifar áhugaverða færslu um stjórnmál líðandi stundar á blogg sitt, undir fyrirsögninni: Frjálslynd öfl sameinist. 

Pistillinn byrjar svona: "Sjaldan líður mér betur en þegar ég sit í hópi frjálslyndra afla úr Samfylkingu, Framsóknarflokki, Sjálfstæðisflokki og Frjálslynda flokknum og ræði stjórnmál, en þetta gerðist í gærkvöldi eftir stofnfund Evrópuvettvangsins. Mér varð ljóst að margir hægri kratar á borð við mig „lentu“ í Sjálfstæðisflokknum, þar sem hægri öflin hafa alla tíð ráðið og þar sem hægri þjóðernis- og einangrunarstefna tröllríða öllu nú um stundir, af því að það vantaði réttan stjórnmálavettvang fyrir mig og mína líka.

Segja má að Framsóknarflokkurinn hafi reynt að gera tilraun til að endurnýja sig sem slíkur vettvangur undir stjórn Halldórs Ásgrímssonar og Jóns Sigurðssonar og þannig tekið fyrsta skrefið í átt til frjálslyndra flokka (e. liberals) í Evrópu. Síðari formenn hafa ekki aðeins hörfað, heldur stýrt flokknum í aðra átt og róa í raun á sömu mið og Sjálfstæðisflokkurinn. Síðasta landsþing Framsóknarflokksins undir heitinu „Undir vonanna birtu“, sem var opnað með bændaglímu og þar sem þingfulltrúar voru að megninu til 70 ára gamlir fyrrverandi SÍSarar, kaupfélagsmenn og smábændur, rak síðasta naglann í líkkistuna."

Allur pistill Guðbjörns 

Þjóðríkið og fullveldið

Á vef Já-Ísland stendur: "Guðmundur Hálfdánarson, prófessor í sagnfræði við Háskóla Íslands og Eiríkur Bergmann, dósent í stjórnmálafræði við Háskólann á Bifröst fjalla um fullveldið og stöðu þjóðríkisins á fimmtudagsfundi hjá Já Ísland í þessari viku.

Báðir hafa þeir rannsakað þessa þætti og fjallað um í ræðu og riti. Spurningar tengdar fullveldi og þjóðríkinu eru eðlilegar þegar rætt er um aðild Íslands að alþjóðasamstarfi á borð við það sem er innan ESB. Fundurinn er haldinn í húsnæði Já Íslands Skipholti 50a og hefst kl. 17.00."

Til heimabrúks?

Jan Kees de Jager, fjármálaráðherra Hollands lét hafa það eftir sér í dag að Hollendingar íhugðu að beita Ísland efnhagsþvingunum, borgi Ísland ekki Icesave.

De Jager er fulltrúi CDA-flokksins í Hollandi, sem er mið-hægri flokkur. Flokkurinn kom afar illa út úr kosningum í fyrra, frá því að vera stærsti flokkurinn, til að vera sá fjórði stærsti.

Er hægt að yfirlýsingar De Jager í þessu ljósi? Er þetta til heimabrúks? 

Stendur ekki til að borga þetta blessaða Icesave, hvort eð er? 

Nám í Evrópufræðum við H.Í.

Stjórnmálafræðideild HÍ býður nám í Evrópufræðum með okkar fremstu fræðimönnum, sjá viðtal síðatsliðinn laugardag í Fréttablaðinu við Maximilian Conrad.

http://vefblod.visir.is/index.php?s=4960&p=110680 

Ekki þarf að fjölyrða um mikilvægi þekkingar á sviði Evrópufræða, hvort sem Ísland kýs að gerast aðili að Evrópusambandinu eða ekki, landið er aðili að Evrópska efnahagssvæðinu og innleiðir þegar umtalsverðan hluta regluverks Evrópusambandsins. Þá er Evrópa stærsta markaðssvæði Íslands.

Skilningur á öllu regluverki Evrópusambandsins og umgjörð þess er því brýnt hagsmunamál fyrir Ísland.

Við þessum aðstæðum hefur Stjórnmálafræðideild HÍ brugðist með neðangreindu námi:

http://www.hi.is/is/felagsvisindasvid_deildir/stjornmalafraedideild/nam/evropufraedi 

Umsóknir eru rafrænar: http://www.hi.is/felagsvisindasvid_deildir/stjornmalafraedideild/nam/umsoknareydublod

Allar frekari upplýsingar fást hjá: Margréti S. Björnsdóttur aðjúnkt [e-mail], Elvu Ellertsdóttur deildarstjóra, [e-mail], og Bryndísi E. Jóhannsdóttur verkefnisstjóra, [e-mail]

Leiðari FRBL um hið lýðræðislega gjald

Ólafur Þ. Stephensen skrifar í dag góðan leiðara í FRBL um Evrópumálin, sem ber yfirskriftina Lýðræðislegt gjald og þar segir Ólafur í byrjun: "Sautján ára aðild Íslands að Evrópska efnahagssvæðinu virðist furðu oft gleymast í umræðum um Evrópumál. Hún gleymist til dæmis þegar talað er um "aðlögunarviðræður“ en ekki aðildarviðræður við Evrópusambandið og því haldið fram að íslenzkt samfélag þurfi að taka gagngerum breytingum, áður en til aðildar að ESB getur komið. Þeir sem tala svona hafa ekki tekið eftir þeim gífurlegu breytingum sem EES-aðildin hefur leitt af sér, en í samanburðinum er undirbúningur stjórnsýslunnar fyrir hugsanlega ESB-aðild smámunir.

EES gleymist líka þegar reynt er að telja okkur trú um að Evrópusambandið sé "ólýðræðislegt skrifræðisbákn“. Það er hægt að færa rök fyrir því að ESB sé bákn, sem samþykkir mikið af lögum og reglugerðum. Í samanburði við stjórnsýslu flestra aðildarríkjanna er það þó smátt í sniðum. Það má líka halda fram að ákvarðanir í ESB skorti lýðræðislegt lögmæti vegna þess að þær séu teknar býsna langt frá borgurum einstakra aðildarríkja. Þó eru ákvarðanirnar teknar af ráðherrum sem hafa lýðræðislegt umboð og Evrópuþingið, sem kjörið er beint af ESB-borgurum, hefur fengið aukin völd.

Það sem andstæðingar "ólýðræðislega skrifræðisbáknsins“ gleyma hins vegar er að með EES-samningnum skuldbatt Ísland sig til þess að leiða nánast sjálfkrafa í íslenzk lög veigamikinn hluta þeirra laga og reglna sem samþykktar eru í Brussel – og það án þess að lýðræðislega kjörin stjórnvöld á Íslandi hafi nokkur áhrif að ráði á samþykkt þeirra.

Ef hægt er að tala um "lýðræðishalla“ í Evrópusambandinu er sá lýðræðishalli tvöfaldur þegar kemur að þeim yfir 8.000 tilskipunum og reglugerðum sem Ísland hefur þegið af Evrópusambandinu undanfarin sautján ár. Það er reyndar áhugaverð þversögn að sumir þeir sem tala mest um vonda báknið í Brussel voru sjálfir í hópi þeirra sem hvað ákafast börðust fyrir samþykkt EES-samningsins – og þar með hlutdeild okkar í bákninu."

Allur leiðarinn 

Hallur og EVA komin á skrið - ný skynsemisrödd í Evrópumálum

Á blogginu sem Hallur Magnússon heldur úti stendur: "Evrópuráðið sem ber ábyrgð á starfi hins nýja Evrópuvettvangs milli aðalfunda er fullskipað eftir stofnfund Evrópuvettvangsins – EVA – í kvöld. Evrópuráðið er skipað 27 einstaklingum sem kjörnir voru á stofnfundinum.

Evrópuvettvangurinn er þverpólitískur samstarfsvettvangur áhugafólks sem vill opna og lýðræðislega umræðu í tengslum við aðildarviðræður Íslands að Evrópusambandinu. Samtökin taka ekki fyrirfram afstöðu með eða á móti aðild að Evrópusambandinu en leggja áherslu á vandaða málsmeðferð og að Ísland nái sem hagstæðustum aðildarsamningi sem þjóðin taki afstöðu til í þjóðaratkvæðagreiðslu.

Evrópuráð 27 fulltrúa mun á fundi sínum í næstu viku velja sér oddvita, málsvara, skrifara og féhirði. Hlutverk oddvita er að kalla til funda Evrópuráðs og stýra þeim, málsvara að vera í fyrirsvari fyrir Evrópuvettvanginn út á við, skrifara að færa fundargerð til bókar og halda félagaskrá og féhirði að sýsla með fé samtakanna."

Evrópusamtökin fagna stofnun EVA og fagna tilkomu aðila sem hægt er að flokka sem "skynsemisöfl" í Evrópu-umræðunni, en eins og fram hefur komið berst EVA fyrir vandaðri málsmeðferð og þeim rétti landsmanna að fá að kjósa um aðildarsamning, þegar hann liggur fyrir.

 

Nei í Icesave hefur ekki áhrif á ESB-málið - sem er í eðlilegum farvegi!

Íslendingar kusu um helgina að semja EKKI um lausn Icesave-deilunnar um helgina. Að sjálfsögðu vekur það viðbrögð og umfjöllun í fjölmiðlum.

Nei-sinnar í Icesave-málinu og aðrir sem fylgja þeirri línu, hamast hvað þeir geta til þess að tengja ESB-málið við Icesave. Þetta eru þó algerlega aðskilin mál.

Icesave er fyrst og fremst deila Íslands gegn Bretum og Hollendingum. 

ESB-málið snýst um að hið fullvalda og sjálfstæða þjóðríki, Ísland, sótti um aðild að hinu 27 ríkja sambandi,sem heitir ESB og gerði það með meirihluta á Alþingi á bakvið sig.

Forseti vor hefur leikið stórt hlutverk í Icesave-málinu og hefur líka látið í sér heyra (kannski með nokkuð gamalkunnum tóni!) í eftirspili þess máls. Í viðtali á Bloomberg í dag sagði Ólafur Ragnar Grímsson að Icesave-málið hefði ekki nein áhrif á ESB-málið og að það væri hreinlega kjánalegt af Bretum og Hollendingum að halda þeirri afstöðu til streitu, sérstaklega í ljósi þeirrar staðreyndar að löndin fengju greitt úr þrotabúi Landsbankans. Sjá má viðtalið við forsetann hér

Össur Skarphéðinsson og Stefan Füle, stækkunarstjóri ESB segja hið sama, enda málið vel á veg komið og ljóst að samningaviðræður íslands og ESB geta byrjað af fullum krafti eftir nokkrar vikur.

Og eins og fram kom í fréttum um helgina féll tillaga um á flokksþingi Framsóknarflokksins að slíta aðildarviðræðum við ESB, svo því sé líka haldið til haga! Framsóknarmenn eru því áfram um að halda viðræðunum áfram, enda geta mjög jákvæðir hlutir fylgt aðild í sambandi við byggðamál. Um það má lesa hér og hér.

Mikilvægi ESB-málsins er þetta: Staðan í gjaldmiðilsmálum er óviðunandi, ekki er hægt að byggja upp til framtíðar öflugt viðskiptalíf og viðhafa fullt athafnafrelsi með gjaldmiðil í höftum. 

Með fullri aðild að ESB yrði Ísland einn aðili að hinni evrópsku fjölskyldu, þar sem virðing fyrir frelsi einstaklingsins, mannréttindum og aukin áhersla á umhverfismál eru leiðardæmin sem fylgt er.

Nú þegar horfir ESB til okkar og reynslu okkar af verndun fiskistofna. Í skjóli reglunnar um hlutfallslegan stöðugleika myndi Ísland EKKI glata yfirráðum yfir fiskveiðiauðlindinni. Það sama á við um orkuna, ESB mun ekki og getur ekki seilst í hana. 

Full þátttaka tryggir að rödd Íslands, í samvinnu við aðra, myndi heyrast á alþjóðavettvangi.

Full aðild Íslands að ESB tryggir landinu fullan aðgang að helsta viðskiptaveldi heims og það er einmitt sem Ísland þarf um þessar mundir; meiri verslun og viðskipti. Nokkuð sem Jóni Sigurðssyni varð ljóst á sínum tíma! Það er heilshugar hægt að taka undir hans sjónarmið í þessum efnum! 

Af þessum ástæðum er full ástæða til að hvetja alla Evrópusinna um allt land að hefja umræðuna upp á nýtt plan og berjast af fullum krafti fyrir góðum aðildarsamningi og aðild Íslands að ESB.

Það er framtíðin sem um er að tefla, en ekki fortíðin. Hún er liðin og kemur aldrei aftur!

Aðild Íslands að ESB felur í sér tækifæri fyrir komandi kynslóðir! Stefnum þangað! 

 

 

Evrópa: Framsókn snýr við blaðinu - en vill samt aðildarviðræður!

Á flokksþingi Framsóknarflokksins í dag komst flokkurinn að þeirri niðurstöðu að hagsmunum Íslands væri best borgið utan ESB. Þetta er kúvending í málinu miðað við fyrri stefnu og hlýtur að kæta Nei-sinna til hægri og vinstri.

En flokkurinn komst einnig að þeirri niðurstöðu að halda skyldi aðildarviðræðum við ESB áfram og var sú tillaga felld.

Í fréttum RÚV sagði Guðmundur Steingrímsson, þingmaður flokksins að Framsóknarflokkurinn væri nú ekki lengur frjálslyndur miðjuflokkur, eftir að hafa tekið þessa afstöðu og telur afstöðuna einkennast af forsjárhyggju.

Athyglisvert er að formaðurinn lætur ekkert uppi um sínar eigin skoðanir á Evrópumálum, enda talar hann nánast ekkert um Evrópumál. Hann lætur því flokksmennina tala.

Hann situr öruggur á stóli sínum enda berst hugurinn til gömlu Sovétríkjanna þegar tölurnar um kosningu hans til formanns eru skoðaðar, en Sigmundur Davíð fékk um 95% atkvæða.

Þetta er niðurstaðan um Evrópumálin:

"Ályktun um Evrópusambandið

Ísland skal áfram leita eftir samstarfi við þjóðir innan og utan Evrópusambandsins á grundvelli frjálsra og sanngjarnra samninga og samvinnu sem byggir á jöfnuði og ábata allra aðila. Með slíkum samskiptum geta íslensk stjórnvöld tryggt hagsmuni Íslands best á hverjum tíma. Framsóknarflokkurinn telur hag lands og þjóðar best borgið utan Evrópusambandsins. Nú sem fyrr standa auðlindir þjóðarinnar undir velferð hennar og fullt og óskorað forræði á þeim er forsenda farsældar til framtíðar. Framsóknarflokkurinn telur að þjóðin skuli ætíð eiga beina aðkomu með þjóðaratkvæðagreiðslu að ákvörðunum um stórmál eins og aðild að Evrópusambandinu og mun berjast fyrir þeim rétti."

Umgjörð flokkþingsins hefur vakið athygli og þykir sumum að andar þjóðernishyggju og afturhvarfs hafið svifið yfir vötnum.

Í "kommenti" á Eyjunni segir Hallur Magnússon, fyrrum félagi í flokknum: "Stefna Framsóknarflokksins er því - halda áfram aðildarviðræðum, Ísland standi utan ESB og þjóðin taki ekki upplýsta ákvörðun."